ကိုယ့်ကလေး နားကိုက်ရင် ဘာတွေလုပ်ပေးမလဲ။ ။

နားကိုက်တယ်ဆိုတာ တကယ်ကို ခံစားရခက်တဲ့ ဝေဒနာတစ်ခုပါ။ လူကြီးတွေမှာသာ နားကိုက်တာ ဖြစ်ခဲပေမယ့် အသက် ၅ နှစ်အောက် ကလေးတွေမှာတော့ နားကိုက်တာ အဖြစ်များတဲ့ အရာတစ်ခုပါ။ ကလေးတွေဆိုတာလည်း ဘယ်လိုခံစားနေရလဲဆိုတာ သေချာ မပြောပြနိုင်တဲ့အတွက် မိဘဖြစ်သူတိုင်း ကလေးနားကိုက်နေပြီဆို ခြေမကိုင်မိလက်မကိုင်မိဖြစ်တတ်ကြပါတယ်။

နားဘာကြောင့် ကိုက်ရတာလဲ။ ။

• နားထဲပိုးဝင်တာ
• နားဖားချေးပိတ်တာ
• နားထဲရေဝင်တာမျိုးနဲ့
• နားအတွင်းပိုင်း ထိခိုက်မိတာမျိုးတွေ
• သွားကိုက်၊ လည်ချောင်းနာတဲ့ အနာတွေက နားဆီပျံ့လာတာကြောင့် နားကိုက်ရတာဖြစ်ပါတယ်။

နားရဲ့ ဘယ်အစိတ်အပိုင်းကို အများဆုံးထိတာလဲ။ ။

နားကိုက်တာ အများဆုံးက နားအလယ်ပိုင်းမှာ အဖြစ်များပါတယ်။ နားရောင်ပြီး နားကိုက်တာကို ဆေးပညာအရဆို ortitis media လို့ခေါ်ပါတယ်။ နားစည်အလယ်လောက်မှာရှိတဲ့နားပြွန်ထဲမှာ နားဖားချေးပိတ်နေတာ၊ ရေဝင်သွားတာမျိုးတွေဖြစ်ရင် အပြင်က အသံတွေက နားစည်ဆီကို ရှင်းရှင်းလင်းလင်းမရောက်နိုင်တာကြောင့် ကိုယ့်ရဲ့ အကြားအာရုံကိုပါထိခိုက်စေပါတယ်။

ကိုယ့်ကလေး နားကိုက်နေပြီဆိုတာ ဘယ်လိုသိနိုင်မလဲ။ ။

ဒီအချက်တွေနဲ့ ကိုယ့်ကလေး နားကိုက်တာလားဆိုတာကို သိနိုင်ပါတယ်။ ။

• နားထဲမှာ နားဖားချေးတွေရှိနေမယ်
• ကလေးကလည်း တအားငိုနေမယ်
• နားထဲက ပြည်တွေယိုနေမယ်။
• ဘယ်လို သိပ်သိပ် မအိပ်တော့ဘူး
• ကိုယ်ခေါ်နေလည်း အသံကြားရာကို ကလေး လှည့်မကြည့်တော့ဘူးဆိုရင် သင့်ကလေး နားနဲ့ ပက်သက်ပြီး တစ်ခုခုဖြစ်နေပါပြီ။ ။

နားကိုက်တာ ၊ နားထဲပိုးဝင်တာကြောင့် နောက်ဆက်တွဲအနေနဲ့ ဘာတွေဆက်ဖြစ်နိုင်သလဲ ။ ။

• ယာယီ အကြားအာရုံချို့ယွင်းတာ
• ခေါင်းချာချာလည်အောင်မူးနေတာ
• နားအူတာ မျိုးတွေ ဆက် ဖြစ်နိုင်ပါတယ်။

ကိုယ့်ကလေး နားကိုက်နေပြီလို့ ယူဆရရင် မိဘတွေဘာလုပ်ပေးရမလဲ ။ ။

ကလေးနားဆိုတာ အရမ်းနုတာကြောင့် မိဘတွေအနေနဲ့ နားဖားချေး အိမ်မှာ ကလော်ပေးတာ၊ ကလေးနားထဲ နားဖားချေးပျော်ဆေးတွေ ထည့်တာမျိုးတွေ လုံးဝ မလုပ်သင့်ပါဘူး။ စေတနာကနေ ဝေဒနာ ပြောင်းသွားနိုင်လို့ပါ။

အကောင်းဆုံးနဲ့ အထိရောက်ဆုံးကတော့ ဆရာဝန်ဆီသွားပြပါ။ ကလေးဆရာဝန်ဆီကို ဖြစ်ဖြစ် ၊ နား၊နှာခေါင်း၊လည်ချောင်းဆရာဝန်ဆီကို ဖြစ်ဖြစ် ခေါ်သွားပါ။ ဆရာဝန်တွေဆီမှာ ကိရိယာပစ္စည်းတွေ အစုံအလင်ရှိတဲ့အပြင် သင့်ကလေးဖြစ်နေတဲ့ ပြဿနာကို အကောင်းဆုံး ပြေလည်အောင် ဖြေရှင်းပေးနိုင်မှာပါ။

Hello Health Groupသည် ဆေးပညာဆိုင်ရာ အကြံပေးချက်များ၊ ရောဂါရှာဖွေခြင်းနှင့် ကုသခြင်းများ မပြုလုပ်ပါ။