စူပါမေမေ တစ်ယောက်ဖြစ်စေဖို့

ထူးချွန်ထက်မြက်တဲ့ ကလေးတစ်ယောက်ရဲ့ နောက်ကွယ်မှာ စူပါမေမေ ရှိပါတယ်။ ဒီတော့ ကိုယ့်အသက်တမျှ ချစ်ခင်ရတဲ့ သားသားမီးမီးတို့ကို ထူးချွန်ထက်မြက်တဲ့ ကလေးတစ်ယောက်ဖြစ်အောင် ပျိုးထောင်ပေးနိုင်မယ့် စူပါမေမေဖြစ်စေဖို့ဆိုရင်

(၁) အခြားသူတွေနဲ့ နှိုင်းယှဉ်မှုကို ရပ်ပါ – လူတိုင်းရဲ့ လုပ်နိုင်စွမ်း၊ ကြုံတွေ့ရတဲ့ အခြေအနေတွေက မတူပါဘူး။ ဒီတော့ အခြားသူတွေနဲ့ နှိုင်းယှဉ်တာမျိုး မလုပ်ပါနဲ့။ ကိုယ်လုပ်နိုင်တဲ့ အတိုင်းအတာကို အကောင်းဆုံးလုပ်ပါ။ စိတ်ပင်ပန်း မခံပါနဲ့ စိတ်ကို သက်သောင့်သက်သာထားလို့ ကိုယ်ဖြတ်သန်းရမယ့် မိခင်ဘဝကို အကောင်းဆုံး ကျော်ဖြတ်ဖို့ပဲ အာရုံစိုက်ပါ။

(၂) ပြန်လည် သုံးသပ်ပါ – ကိုယ်ပိုင် မှတ်စုစာအုပ် တစ်အုပ်ထားလို့ တစ်ပတ်တာ အလုပ်တွေကို ဘာတွေကတော့ အိမ်အလုပ်၊ ဘာတွေက ရုံးအလုပ်၊ ဘာတွေက လူမှုရေးကိစ္စတွေဆိုတာကို သေချာလေး ခွဲခြားမှတ်ပါ။ ဒီထဲကမှ ဘာတွေကို ဆက်လုပ်သင့်တယ်။ ဘာတွေကို ဆက်မလုပ်သင့်ဘူးလဲ ဆိုတာကို သေချာခွဲခြားမှတ်ပါ။ ဒီလိုလုပ်တာက ကိုယ်တိုင်အတွက်ရော မိသားစုအတွက်ပါ အချိန်ပိုလေးတွေ ထွက်လာနိုင်ပါတယ်။

(၃) လွှတ်ချတတ်ပါစေ – မေမေဆိုတာက တာဝန်တွေများတယ် ဆိုပေမယ့် အားလုံးကို လုပ်ဆောင်နိုင်ဖို့မလွယ်ဘူး။ မေမေဆိုတာကလည်း လူသားတွေထဲက လူသားတစ်ယောက် ဖြစ်တာကြောင့် လုပ်ဆောင်နိုင်တဲ့ အင်အားက အကန့်အသတ်ရှိတယ်ဆိုတာကို လက်ခံ တတ်ဖို့လိုပါမယ်။ မဖြစ်နိုင်တဲ့ အခြေအနေတွေကို လက်ခံပြီး လွှတ်ချသင့်တာကို လွှတ်ချရပါမယ်။ မေမေဆိုတဲ့ ခရီးရှည်ကြီးကို လျှောက်ဖို့အတွက် မနိုင်ဝန်ကို မထမ်းဖို့ ပြောပါရစေ။

(၄) အမှားလုပ်မိနိုင်တယ် ဆိုတာကို လက်ခံတတ်ပါစေ – မိဘက သားသမီးတွေရဲ့ စံပြဖြစ်ရမှာဆိုပေမယ့် အမှားလုံးဝမရှိအောင် ဂရုစိုက်ရမယ် မဆိုပါဘူး။ မေမေကလည်း ပြဿနာတွေကို၊ စိန်ခေါ်မှုတွေကို ရင်ဆိုင်ဖြေရှင်းရတဲ့အခါ မှားတဲ့အခါမျိုးလည်း ရှိနိုင်ပါတယ်။ တွေ့ကြုံရတဲ့ အခြေအနေတွေများလာတဲ့အခါ အတွေ့အကြုံတွေများလာပြီး ပြဿနာတွေကို အကောင်းဆုံး ဖြေရှင်းလာနိုင်မှာပါ။

(၅) အနားယူပါ – မေမေတွေရဲ့ တာဝန်က ပိတ်ရက်မရှိဘူးဆိုပေမယ့် တစ်သက်တာလုံးမှာ အကောင်းဆုံး ထမ်းဆောင်ရမယ့် မေမေ့တာဝန်ကို ကျေပွန်ဖို့ လိုအပ်တဲ့ ပြည့်ဝတဲ့ အနားယူမှုကို ဖန်တီးပါ။ တစ်ပတ်မှာ တစ်ရက်လောက်တော့ ကောင်းကောင်း အနားယူပေးပါ။

(၆) စဉ်းစားတွေးခေါ်မှု ပုံစံပြောင်းပါ – တစ်ခါတလေမှာ ကိုယ့်ရဲ့ ရန်သူက ကိုယ်တိုင်ဖြစ်နေနိုင်ပါတယ်။ ဒီလိုဖြစ်ရတာလည်း ကိုယ့်အတွေးကြောင့်ပါ။ သားသားမီးမီးတို့ရဲ့ ဂုဏ်ယူရတဲ့ မေမေဖြစ်ချင်တာကြောင့် သင်ယူမှုတွေ ဆက်လုပ်မယ်၊ လုပ်ငန်းခွင်မှာ တိုးတက်မှုရအောင် ကြိုးစားတဲ့အခါ အချိန်အပိုင်းအခြားတစ်ခုလောက် သားသားမီးမီးတို့ကို မိဘ (ဘိုးဘိုးဘွားဘွားတို့) နဲ့ ထားသွားရတာ၊ ကလေးထိန်းနဲ့ ထားသွားရတာမျိုးရှိနိုင်ပါတယ်။ ဒါတွေကို အပြစ်ရှိတယ်လို့ မယူဆစေချင်ပါဘူး။

(၇) လိုအပ်ရင် အကူအညီယူဖို့ ဝန်မလေးပါနဲ့ – မေမေဆိုတာကလည်း အပေါ်မှာ ပြောခဲ့သလို သာမန်လူသားတစ်ဦးပါ။ မွေးဖွားလာကတည်း မေမေတစ်ယောက်ရဲ့ တာဝန်တွေကို မလုပ်တတ်ခဲ့ပါဘူး။ ပြုစုယုယခံ သားသမီးတစ်ယောက်အနေနဲ့ မွေးဖွားလာတာပါ။ ဒါကြောင့် အချို့သော မေမေတာဝန်တွေကို မလုပ်ဆောင်နိုင်တာမျိုး၊ မသိနားမလည်တာမျိုး ရှိနိုင်ပါတယ်။ ဒီလို အခြေအနေမျိုးမှာ ကိုယ့်ထက် အတွေ့အကြုံရှိသူတွေဆီကနေ အကူအညီတောင်းရမှာကို ဝန်မလေးပါနဲ့လို့ ပြောပါရစေ။ မတတ်နိုင်တဲ့အရာတွေကို အကူအညီယူဖို့ မတွန့်ဆုတ်နေပါနဲ့။

(၈) ကလေးကို အချိန်ပေးပါ – ကလေးကို အချိန်ပေးပြီး စကားပြောပေးတာ၊ လိုအပ်တာလေးတွေကို ဂရုစိုက်ပြင်ဆင်ပေးတာ၊ ခံစားချက်တွေကို မျှဝေပေးတာကလည်း စူပါမေမေတိုင်း လုပ်ဆောင်သင့်တဲ့ အလေ့အထကောင်း တစ်ခုပါ။ ဒါမှ မေမေနဲ့ သားသားမီးမီးတို့ကြား ချစ်ခင်မှုတွေ တိုးပွားပြီး ကျန်းမာပျော်ရွှင်တဲ့ မိသားစု ဘဝလေးကို ပျိုးထောင်နိုင်မှာပါ။

ကိုယ့်ဘဝတိုးတက်ဖို့လည်း ကြိုးစားရင်း သားသားမီးမီး ကျန်းမာပျော်ရွှင်စွာ ကြီးပြင်းလာစေဖို့ ပျိုးထောင်တဲ့ တာဝန်ကိုလည်း မလစ်ဟင်းစေတဲ့ စူပါမေမေတွေဖြစ်ကြပါစေ။