မိမိရင်သားကို ကိုယ်တိုင်ဘယ်လို စမ်းသပ်နိုင်မလဲ

တကယ်လို့ သင်ဟာ ရင်သားကို ဆရာဝန်နဲ့ စမ်းသပ်ဖို့ ရှက်နေတယ် (သို့) အလုပ်ရှုပ်လွန်းတယ်ဆိုရင် အိမ်မှာ ကိုယ်တိုင် စမ်းသပ်နိုင်ပါတယ်။ ကိုယ်တိုင်စမ်းသပ်ခြင်းဟာ အကျိတ်တွေကို ရှာဖွေဖို့ ကိုယ်တိုင် စစ်ဆေးတဲ့နည်းတစ်မျိုးပဲ ဖြစ်ပါတယ်။ ပုံမှန် ရင်သားစစ်ဆေးခြင်းဟာ ရင်သားကင်ဆာကို စောစီးစွာ တွေ့ရှိဖို့အတွက် အရေးပါတဲ့ နည်းလမ်းတစ်ခုဖြစ်ပါတယ်။ ဒီတော့ မိမိရင်သားကို ကိုယ်တိုင်ဘယ်လို စမ်းသပ်နိုင်မလဲ ဆိုတာ ကြည့်လိုက်ရအောင်နော်။

အခြား အဆင့်မြင့်တဲ့ စစ်ဆေးမှုတွေဖြစ်တဲ့ ပုံမှန် mammogram ရိုက်ခြင်းနဲ့ ယှဉ်ရင်တော့ ကိုယ်တိုင်စမ်းသပ်ခြင်းဟာ အကျိုးရရှိမှု ပိုနည်းပါတယ်။ ဒါပေမယ့် သင့်ရင်သားတွေထဲမှာ ပုံမမှန်မှုကို ကြိုတင် သိရှိနိုင်ခြင်းဟာ ဘယ်တော့မှ အကျိုးမယုတ်ပါဘူး။ ကိုယ်တိုင်စမ်းသပ်ခြင်းကို လုပ်ဖို့ အကောင်းဆုံးအချိန်ကတော့ ရာသီမလာခင်နဲ့ လာပြီး တစ်ပတ်မှာပဲ ဖြစ်ပါတယ်။ သွေးဆုံးပြီးသွားပြီဆိုရင်တော့ တစ်လမှာ တစ်ရက်သတ်မှတ်ပြီး စစ်ဆေးနိုင်ပါတယ်။

ဟော်မုန်ပြောင်းလဲမှုတွေဟာ ရင်သားရဲ့ အရွယ်အစားကိုပြောင်းလဲစေနိုင်တာမို့ ရင်သားတွေ ပုံမှန်အတိုင်း ရှိချိန်မှာ စမ်းသပ်တာ အကောင်းဆုံးပဲ ဖြစ်ပါတယ်။ တစ်လကို တစ်ခါ ပုံမှန်စမ်းသပ်တဲ့ အလေ့အကျင့် လုပ်သင့်ပါတယ်။ ဒါဟာ သင့်ရင်သားပြောင်းလဲမှုတွေကို အချိန်မီ သိရှိနိုင်မှာဖြစ်ပါတယ်။

မိမိရင်သားကို ကိုယ်တိုင်ဘယ်လို စမ်းသပ်နိုင်မလဲ

မိမိရင်သားကို ကိုယ်တိုင်ဘယ်လို စမ်းသပ်နိုင်မလဲ ဆိုတော့ ကိုယ်တိုင်စမ်းသပ်ခြင်းအတွက် အဆင့်ငါးဆင့် ရှိပါတယ်။

အဆင့် ၁

ခါးအပေါ်ပိုင်းကို အင်္ကျီဗလာနဲ့ မတ်တပ်ရပ်ပြီး ပုခုံးကိုတည့်တည့်ထားကာ ခါးထောက်ပြီး ရင်သားတွေကို ကြည့်ပါ။ အောက်ပါ အချက်တွေကို လေ့လာပါ။

• အရွယ်အစား၊ ပုံသဏ္ဍာန်၊ အရောင်
• ရင်သား နေရာ
• နို့သီးခေါင်း အထဲဝင်ခြင်း (သို့) အပြင်ထွက်ခြင်း
• အရေပြား ယားယံခြင်း၊ နာကျင်ခြင်း၊ ခွက်ဝင်ခြင်း
• တွန့်ရှုံ့ခြင်း

အဆင့် ၂

ချိုင်းမြှောက်ပြီး ပြောင်းလဲမှုတွေ ရှိမရှိကြည့်ပါ။

အဆင့် ၃

မှန်ရှေ့မှာ ရပ်နေတုံး နို့သီးခေါင်းက အရည်ထွက်ခြင်း ရှိ၊ မရှိ လေ့လာပါ (ဒီအရည်ဟာ အရေကြည်၊ နို့ရည်၊ အဝါရောင်ရည်၊ သွေး တွေ ဖြစ်နိုင်ပါတယ်)

အဆင့် ၄

ခုတင်ပေါ်မှာ လဲလျောင်းပြီး ရင်သားကို စစ်ဆေးကြည့်ပါ။ လက်ချောင်းအနည်းငယ်ကို အသုံးပြုပါ။ လက်ချောင်းတွေကို စုပြီး ပြားအောင် ထားပါ။ ရင်သားပတ်လည်ကို စက်ဝိုင်းပုံစံသဏ္ဍာန်နဲ့ လက်မ လေးပုံတစ်ပုံလောက်စီတစ်ခါ စမ်းသပ်ပါ။ သင့်အရေပြားဟာ စိုနေရင် (သို့) ချောနေရင် ရင်သားတွေကို စမ်းရတာ ပိုလွယ်ပါတယ်။ ဒါကြောင့် ရေချိုးနေရင်း ဒါမှမဟုတ် လိုးရှင်းလိမ်ရင်း စမ်းနိုင်ပါတယ်။

အပေါ်ကနေ အောက်အထိ သေချာစွာစမ်းပါ။ ရင်ညွန့်ရိုးကနေပြီး ဗိုက်အထိ၊ ချိုင်းကြားကနေ ရင်ညွန့်အထိ စမ်းသပ်ပါ။ ဘာလို့လဲ ဆိုတော့ ရင်သားတစ်ရှူးတွေက ထိုနေရာတွေ အထိ ရှိတတ်သောကြောင့် ဖြစ်ပါတယ်။

သင်ရင်သားတစ်ခုလုံးကို စမ်းသပ်တဲ့ပုံစံ တစ်ပုံစံတည်းနဲ့ စမ်းပါ။ နို့သီးခေါင်းကနေစပြီး ရင်သားရဲ့ အပြင်ဘက် အစွန်းကို ရောက်တဲ့အထိ ပိုမိုကြီးလာတဲ့ စက်ဝိုင်းပုံစံနဲ့ စမ်းပါ။ လက်ချောင်းတွေကို မြက်ရိတ်သလိုမျိုး အပေါ်အောက် ကစားပြီးလည်း စမ်းသပ်နိုင်ပါတယ်။ ဒီလို အပေါ်အောက် စမ်းတာက အမျိုးသမီးတွေအတွက် အကျိုးအရှိဆုံးဖြစ်နိုင်ပါတယ်။

ရင်သားတွေရဲ့ အရှေ့ကနေ အနောက်အထိရှိတဲ့ တစ်ရှူးတွေ အကုန်ကို စမ်းသပ်ဖို့သတိရပါ။ အောက်မှာရှိတဲ့ အရေပြားနဲ့ တစ်ရှူးတွေအတွက်ကတော့ အနည်းငယ်ဖိပြီး စမ်းသပ်ပါ။ ရင်သားအလယ်ပိုင်းကို အလယ်အလတ်ဖိစမ်းသင့်ပြီး နက်တဲ့ တစ်ရှူးတွေကို စမ်းသပ်ဖို့ကတော့ အတော်ဖိစမ်းသင့်ပါတယ်။ တစ်ရှူးနက်နက်တွေကို ရောက်ပြီဆိုရင် အောက်က နံရိုးတွေကိုပါ စမ်းမိနိုင်ပါတယ်။

အဆင့် ၅

နို့သီးခေါင်းက ထွက်နေတဲ့ အရည် ရှိ၊ မရှိ နို့သီးခေါင်းကို ညှစ်ကြည့်ပါ။

ပြောင်းလဲမှု အကုန်လုံးဟာ ကင်ဆာ မဟုတ်ပါဘူး။ ဒါပေမယ့် ရင်သားမှာ ပုံမှန်မဟုတ်တာတွေ တွေ့မယ်ဆိုရင်တော့ ဆရာဝန်နဲ့ သွားရောက် တိုင်ပင်ဆွေးနွေးသင့်ပါတယ်။