ဆံပင်တွေ ကျွတ်လွန်းလို့ ကိုယ့်ကိုယ်ကိုယ်ယုံကြည်မှုနည်းနေပြီလား

ဆံပင်တွေ တနေ့တခြားပါးလာတာ သတိထားမိကြမှာပေါ့။ စဉ်းစားရတာ၊ ဦးနှောက်ခြောက်ရတာများလို့ ဆံပင်တွေကျွတ်ရတယ်လို့ပြောကြတယ်။ လူတစ်ယောက်မှာ တစ်နေ့ကို ဆံပင် အပင် ၅၀ ကနေ ၁၀၀ ကြားကျွတ်တာက ပုံမှန်ပါပဲ။ ဒါပေမယ့် ကိုယ့်ဆံပင်ကျွတ်တာ အဲဒီထက်ပိုတယ်လို့ထင်တယ်၊ မှန်ထဲကြည့်လိုက်ရင်လည်း အရင်နဲ့မတူတော့တာ သိလာတယ်၊ခေါင်းဖြီးလိုက်တိုင်း စိတ်ညစ်ရတာ တကယ်ပါပဲ။

လူတစ်ယောက်ရဲ့အသွင်အပြင်မှာ ဆံပင်ပုံစံက သိပ်ကိုအဓိကကျပါတယ်။ ဆံပင်ညှပ်ဆိုင်တွေ၊ စင်တာတွေ နဲ့ ဆံသားအလှပညာရှင်တွေ ဘာလို့ ဝင်ငွေတွေကောင်းနေတယ်ထင်ပါသလဲ။ယောကျာ်းလေးဖြစ်ဖြစ် မိန်းကလေးဖြစ်ဖြစ် ကိုယ်နဲ့လိုက်ဖက်တဲ့ ဆံပင်ပုံစံမရှိရင်၊ ဆံပင်ပျက်စီးနေရင်၊ ဆံပင်နည်းလွန်းရင် (ထိပ်ပြောင်လုလု) ဘယ်လောက်ချောနေပါစေ ကြည့်မကောင်းပါဘူး။ ဆံသားအလှအတွက် ညှပ်တယ်၊ ပုံသွင်းတယ်၊ အရောင်ဆိုးတယ် ဆိုတာ မလုပ်ဖူးတဲ့သူမရှိသလောက်ပါပဲ။ လူကြီးတွေတောင် ဆံပင်အနက်ဆိုးကြတာပဲ။လုပ်ငန်းခွင်မှာအောင်မြင်မှုအတွက်ဆိုလည်း ကိုယ့်ကိုယ်ကိုယ်ယုံကြည်မှုကရှိနေမှဖြစ်မှာ၊ အသွင်အပြင် ကြည့်ကောင်းနေဖို့ကလည်း အရေးပါတယ်လေ။

ဆံပင်တွေ ကျွတ်လွန်းလို့ ကိုယ့်ကိုယ်ကိုယ်ယုံကြည်မှုနည်းနေပြီလား

ဆံပင်ကျွတ်တယ်ဆိုတာ သဘာဝပဲဆိုပေမယ့် ဆံပင်ပါးလာတာက သိသာလာပြီဆို အကြောင်းရင်းတစ်ခုခုရှိနေနိုင်ပါတယ်။ ခန္ဓါကိုယ်မှာ ဓါတ်တခုခုအားနည်းလို့လား၊ စိတ်ဖိစီးနေလို့လား၊ သောက်နေရတဲ့ ဆေးကြောင့်လား၊ရောဂါတစ်ခုခုရဲ့လက္ခဏာများဖြစ်နေမလား စသည်ဖြင့် သို့လောသို့လောတွေနဲ့ စိတ်ပူရပါတယ်။

ဆံပင်ကျွတ်စေတဲ့အကြောင်းရင်းတွေက တစ်ယောက်နဲ့တစ်ယောက်မတူနိုင်ပေမယ့် အဖြစ်များတာက –

• အလုပ်ပင်ပန်းတဲ့ဒဏ် (စိတ်ဖိစီးမှုနဲ့ အိပ်ရေးပျက်တာ အပါအဝင်)
• ကလေးမွေးဖွားခြင်း/ ကိုယ်ဝန်ဆောင်ခြင်း (ဟော်မုန်းမညီမျှမှုကြောင့်)
• ခွဲစိတ်ကုသမှု
• သန္ဓေတားဆေးသောက်သုံးခြင်း
• ဦးရေပြားမှာရောဂါပိုးဝင်ခြင်း
• အာဟာရညီညွတ်အောင်မစားတာ ( အထူးသဖြင့် ပရိုတင်းစားသုံးမှုနည်းတာ)
• ဆံပင်ပြုပြင်မှုများလွန်းတာ၊အရောင်ဆိုးလွန်းတာ
• ဆေးလိပ်သောက်တာ
• မျိုးဗီဇကြောင့် ဆံပင်ကျွတ်တာ
• Alopecia areata လို ထိပ်ပြောင်ခြင်းဖြစ်စေတဲ့ရောဂါ
• ဓါတုကုထုံးတွေ (ဆေးတွေကြောင့် ဆံပင်ကွက်ပြီးကျွတ်တာ၊ ထိပ်ပြောင်တာတွေဖြစ်စေနိုင်တယ်)
• သွေးအားနည်းခြင်း၊ သံဓါတ်အားနည်းခြင်း၊ သိုင်းရွိုက်ရောဂါ
• ဗီတာမင် B ချို့တဲ့တာ၊
• သွေးကျဲဆေး၊ စိတ်ကျရောဂါသောက်ဆေးတွေ
• အသက်ကြီးလာခြင်း တို့ကြောင့်ဖြစ်တတ်ပါတယ်။

ဒါဆို ဘယ်လိုလုပ်ရမလဲ

(၁) အစားအသောက်ကို ဂရုစိုက်ပါ

ပရိုတင်းဓါတ်ဟာ ဆံပင်အတွက်အပါအဝင် ခန္ဓါကိုယ်ရဲ့တစ်ရှူးတွေတည်ဆောက်ရာမှာ အရေးပါပါတယ်။ ကိုယ်စားတဲ့အစာအာဟာရတွေထဲမှာ ပရိုတင်းဓါတ်အလုံအလောက်ပါဝင်ရဲ့လား သတိထားကြည့်ပါ။ ပဲ၊နွားနို့၊ ကြက်ဥအကာနဲ့omega-3 fatty acids ပါဝင်မှုများတဲ့ငါးတွေစားပါ။ အပူအစပ်တွေ အရမ်းစားတာလည်း ဆံပင်ကျွတ်စေနိုင်တယ်နော်။

(၂) ဗီတာမင်လည်းပြည့်ပါစေ

ဆံပင်ကျန်းမာရေးအတွက်က ဗီတာမင် A ကအရေးပါပါတယ်။ အစိမ်းရောင်များတဲ့အသီးအရွက်တွေ၊ မုန်လာဥနီနဲ့ ကြက်ဥ စားပါ။

ဗီတာမင်B12 ကသွေးနီဥဆဲလ်တွေဖြစ်ပေါ်မှုကို အားပေးတယ်၊ ဗီတာမင် E ကသွေးလည်ပတ်မှုကောင်းတယ်။ ဒါတွေအကုန်လုံးက ဆံပင်ကျန်းမာရေးကို အထောက်အကူပြုပါတယ်။ ဒါ့အပြင် ကယ်လ်စီယမ်၊ကော့ပါး၊ သံဓါတ်၊ မဂ္ဂနီဆီယမ်နဲ့ဇင့်ဓါတ်တွေကလည်း အရေးပါတဲ့သတ္တုဓါတ်တွေဖြစ်ပါတယ်။

(၃) အကျင့်ဆိုးတွေပြင်ပါ

ဆေးလိပ်သောက်တာ၊ အရက်သောက်တာ၊ ကဖင်းပါတာတွေသောက်တာက ကိုယ်ခံအားစနစ်ကို ထိခိုက်စေပြီး ဆံပင်ကျွတ်ခြင်းကို အားပေးတာကြောင့် တတ်နိုင်သလောက်လျှော့ပါ။နောက်အကျင့်ဆိုးတစ်ခုကရေကို လုံလောက်အောင်မသောက်တာပါပဲ။ တစ်ရှူးတွေကျန်းမာရေးအတွက် ရေဓါတ်ပြည့်ဝနေဖို့လိုပါတယ်။ ဂက်စ်ပါတဲ့အချိုရည်တွေသောက်တာတော့ရှောင်ပါ။

(၄) စိတ်အေးချမ်းအောင်နေပါ

စိတ်ဖိစီးမှုနဲ့ဒေါသစိတ်က ဆံပင်ကျွတ်စေတဲ့အကြောင်းရင်းတွေထဲရှေ့ကပါဝင်နေပါတယ်။ စိတ်ကိုအေးချမ်းအောင်ထားနိုင်ဖို့ဒေါသတွေလျှော့ပါ၊ဖြေလျှော့ဖို့နည်းလမ်းရှာပါ။ တရားထိုင်တာ၊ယောဂကစားတာတွေက အကူအညီဖြစ်ပါလိမ့်မယ်။

(၅) ဆံသားကို ပြုစုပါ

ဦးရေပြားကို ဆေးအဆီနဲ့ နှိပ်နယ်ပေးခြင်းက ဆံပင်အမြစ်တွေကို နှိုးဆွပေးနိုင်ပြီး ဆံပင်ပိုများစေနိုင်ပါတယ်။ သံလွင်ဆီ၊ လာဗင်ဒါဆီ၊ ရို့စ်မေရီ စတဲ့အဆီတွေ လိမ်းပြီး ဆံသားကို ဂရုစိုက်ပေးပါ။။ သဘာဝပါဝင်ပစ္စည်းတွေဆိုတော့ဘေးဥပါဒ်ကင်းမကင်းကိုလည်း စိတ်ပူစရာမလိုပါဘူး။

(၆) ဆံပင်တွေကို ကြင်နာပါ

နောက်ဆုံး အချက်ကတော့ ဆံပင်ကိုဖြီးတဲ့အခါ၊လျှော်တဲ့အခါ၊ရေသုတ်တဲ့အခါ ညှာတာဖို့၊ ကြင်နာဖို့ပဲဖြစ်ပါတယ်။ ဆံပင်ကပါးနေလို့ ပြန်မွေးမြူနေရတဲ့ကြားထဲ ရှိတဲ့ဆံပင်လေးတွေကို ထပ်မထိခိုက်စေဖို့ပါ။ ခေါင်းလျှော်ပြီးရင် ဆံပင်ခြောက်ခံစက်ကို အပူပြင်းပြင်းနဲ့ မသုံးပါနဲ့၊ ဖြောင့်စက်တွေ အရမ်းမဆွဲပါနဲ့။ ဆံပင်အရောင် ခဏခဏ မပြောင်းပါနဲ့။ ဆံသားနူးညံ့ပြီး အစိုဓာတ် ထိန်းနိုင်ဖို့ ဆံပင်ခြောက်ခါနီးလေးမှာ hair spray တစ်မျိုးမျိုးသုံးပေးပါ။ခေါင်းဖြီးတဲ့အခါ အရမ်းကြမ်းကြမ်းဆွဲမဖြီးပါနဲ့။

ဒီလောက် အချက်အလက်တွေ သိထားပြီးပြီဆိုတော့ ထိပ်ပြောင်မှာကို သိပ်ကြောက်မနေနဲ့တော့နော်။ ဆံသားအလှအတွက် အချိန်မီ ပြန်ကုစားလိုက်ကြပါတော့လို့။