သင့်စိုးရိမ်မှုတွေက ဘာတွေလဲ။

close
မတိကျ
နားလည်ရခက်
အခြား

သို့မဟုတ် လင့်ခ်ကူးယူမည်

ရိုးရိုးမွေးခြင်း နဲ့ ခွဲမွေးခြင်း အားသာချက်နှင့် အားနည်းချက်

ရိုးရိုးမွေးခြင်း နဲ့ ခွဲမွေးခြင်း အားသာချက်နှင့် အားနည်းချက်

ကိုယ်ဝန်ဆောင်မိခင်များသည် ပုံမှန်အားဖြင့် နည်းလမ်း ၂ မျိုး( ရိုးရိုးမွေးခြင်း၊ ဗိုက်ခွဲ၍မွေးခြင်း) ဖြင့် ကလေး မီးဖွားလေ့ရှိပါသည်။ နည်းလမ်း ၂ မျိုးစလုံးတွင် အားနည်းချက် အားသာချက်ရှိပါသည်။

ရိုးရိုးမွေးခြင်း

မည်သည့်ဆေးအကူမှမယူဘဲ သဘာဝမွေးလမ်းကြောင်း အတိုင်းမွေးခြင်းကို ဆိုလိုပါသည်။

အားသာချက်

  • မိခင်အနေဖြင့် သဘာ၀ မွေးလမ်းကြောင်းအတိုင်း မွေးနိုင်သည့်အတွက် ကိုယ့်ကိုကိုယ်ယုံကြည်မှု အားတက်မှု ဖြစ်လာခြင်း
  • ကလေးမွေးပြီး ဆေးရုံတွင် ၂၄ နာရီ မှ ၄၈ နာရီအတွင်းသာ နေရခြင်း
  • နေပြန်ကောင်းချိန်မြန်ပြီး မီးတွင်းအနာမြန်မြန်သက်သာခြင်း
  • ကလေးတွင်လည်း အဆုတ်သွေးလွှတ်ကြောများကျဉ်းမြောင်းရာမှ ဖြစ်ပေါ်လာသော ရောဂါ (persistant pulmonary hypertension) နှင့် အခြား အသက်ရှူလမ်းကြောင်းဆိုင်ရာ ရောဂါ (transient tachypnea of the neonate or TTN) ဖြစ်ပွားမှုနှုန်း ကျဆင်းလာခြင်း
  • ကလေးတွင်လည်း ရင်ကျပ်၊ အစာဓါတ်မတည့်ခြင်း၊ လတ်တို့စ် (lactose) မတည့်ခြင်းများ ဖြစ်ပွားမှုနှန်း နည်းပါးလာခြင်း
  • နောက်တစ်ကြိမ် ကလေးမွေးဖွားရာတွင်လည်း မွေးချိန်တိုပြီး မြန်ဆန်ခြင်း
  • မိခင်အနေဖြင့် မိခင်နို့မြန်မြန်နှင့် ထိရောက်စွာ တိုက်ကျွေးနိုင်ခြင်း
  • မိမိကလေးနဲ့ ချက်ချင်းရင်းနှီးမှုရရှိခြင်း
  • မိန်းမကိုယ်မှ သွေး၊သွေးခဲများ ဆင်းခြင်းနှင့် ကိုယ်တွင်းကလီစာများ ထိခိုက်မှု နည်းခြင်း

အားနည်းချက်

  • မိခင်မှ စိုးရိမ်ပူပန်ရခြင်း
  • သွေးဆင်းနိုင်ခြင်း
  • မိန်းမကိုယ်စုတ်ပြဲနိုင်ခြင်း
  • မီးဖွားစဉ်အတွင်း အချင်းဖိမိခြင်း သို့မဟုတ် အခြားအကြောင်းများကြောင့် ကလေး အောက်စီဂျင်ရရှိမှု နည်းသွားနိုင်ခြင်း
  • ကလေးတွင် ပြင်ပထိခိုက်ဒဏ်ရာကြောင့် ဖူးရောင်ခြင်းနှင့် မွေးဖွားစဉ် အရိုးကျိုးခြင်းများဖြစ်နိုင်ပါသည်။
  • ရိုးရိုးမွေးပြီးချိန်တွင် သားအိမ်လန်ခြင်းများ ဖြစ်ပွားနိုင်ပါသည်။ သို့သော် အလွန်တွေ့ရနည်းပါသည်။
  • မွေးလမ်းကြောင်းစုတ်ပြဲဒဏ်ရာကြောင့် ကလေးမွေးပြီး ၃ လအတွင်း အမျိုးသားနဲ့အတူနေစဉ်အတွင်း နာကျင်မှုကိုခံစားရနိုင်ပါသည်။
  • တင်ပဆုံရိုးကျဉ်းသော မိခင်များတွင် ကလေးကြီးခြင်းကြောင့် ကလေးမွေးဖွားစဉ်အတွင်း မြီးညောင့်ရိုး ကျိုးသွားနိုင်ပါသည်။
  • ဆီးမထိန်းနိုင်ခြင်း နှင့် တင်ပါးဆုံတွင်း အင်္ဂါများ ကျွံကျခြင်းရောဂါများမိခင်တွင် တွေ့ရှိရမှုနှုန်းများလာခြင်း

ဗိုက်ခွဲမွေးခြင်း

ဗိုက်ခွဲမွေးခြင်း (C-section (သို့) cesarean section) မွေးခြင်းဆိုသည်မှာ မိခင်၏ ဝမ်းဗိုက်နှင့်သားအိမ် တို့တွင် ခွဲစိတ်ရာပေး၍ ကလေးကိုမွေးထုတ် ခြင်းဖြစ်ပါသည်။

အားသာချက်

  • မိခင်အနေဖြင့် မည်သည့်နေ့တွင် ကလေးမွေးမည်ကို သိသဖြင့် စိုးရိမ်မှုကင်းခြင်း
  • သတ်မှတ်ရက်ထက် ကျော်လွန်၍ ကလေးမွေးဖွားခြင်းမှ ရှောင်ရှားနိုင်ခြင်း
  • သွေးသွန်ခြင်း၊ မွေးဖွားစဉ်အတွင်း ကလေးထိခိုက်ဒဏ်ရာရခြင်း၊ တင်းပါးဆုံ ကြွက်သားများ ဒဏ်ရာရရှိခြင်း၊ ပိုးဝင်ခြင်း၊ ကိုယ်တွင်း ကလီစာများကို မတော်တဆထိခိုက်ခြင်း၊ ကလေးတွင် စုတ်ပြဲဒဏ်ရာရရှိခြင်းနှင့် မေ့ဆေးနှင့်ဆိုင်ရာ နောက်ဆက်တွဲပြဿနာများ ကို ဖြစ်ပွားမှုနှုန်းကျဆင်းသွားခြင်း
  • မိခင်တွင် လိင်မှတဆင့်ကူးဆက်သောရောဂါများ ( ရေယုန်၊ ကြွက်နို့၊ HIV၊ အသည်းရောင်အသားဝါ) ရှိပါက မိခင်မှတဆင့် ကလေးဆီသို့ကူးစက်မှုနှုန်း နည်းခြင်း

အားနည်းချက်

  • ခေါင်းအရမ်းကိုက်ခြင်း၊ ပျို့ခြင်း၊ အန်ခြင်း
  • ဆေးရုံတွင် ကြာရှည်စွာနေရခြင်း၊ နေပြန်ကောင်းရန် အချိန်ကြာခြင်း
  • ခန့်မှန်းမွေးရက် အတွက်မှားခြင်းကြောင့် ကလေးစောစီးစွာ မွေးရနိုင်ခြင်း
  • ခွဲစိတ်ရင်း အူလမ်းကြောင်းနှင့် ဆီးအိမ်ကိုမတော်တဆ ထိခိုက်မိခြင်း
  • သွေးများစွာ ဆုံးရှုံးနိုင်ခြင်း
  • သားအိမ်ကွဲထွက်ခြင်းနှင့် ပုံမှန်အူလမ်းကြောင်းလုပ်ဆောင်ချက်များ ကျဆင်းခြင်း
  • တစ်လအောက် ကလေးသေဆုံးမှု၊ အဆုတ်သွေးလွှတ်ကြော ကျဉ်းမြောင်းရာမှ ဖြစ်ပေါ်လာသော ရောဂါ(persistant pulmonary hypertension) အသက်ရှူလမ်းကြောင်းရောဂါများ (TTN နှင့် respiratory distress syndrome) များဖြစ်ပွားခြင်း
  • နောက်ကိုယ်ဝန်များတွင် အချင်းရှေ့ရောက်ခြင်းနှင့် အချင်းနှင့်သားအိမ်နံရံများစွာ ကပ်တွယ်နေခြင်းများ တွေ့ရနိုင်ပါသည။်
  • ခွဲစိတ်ပြီးတွင် မအီမသာခံစားရခြင်းကြောင့် ကလေးအား မိခင်နို့မတိုက်ကျွေးနိုင်ခြင်း နှင့် မိခင်နှင့်ကလေး ထိတွေ့မှုအားနည်းခြင်း
  • ခွဲစိတ်စဉ် ကလေးအား မတော်တဆ ထိခိုက်မိခြင်း
  • ကျန်းမာရေးစရိတ်ကြီးခြင်း
  • နှလုံးဖောက်နိုင်ခြင်း
  • အနာသွေးစုနာတည်ခြင်း
  • မီးတွင်းအချိန်တွင် သားအိမ်ပိုးဝင်ခြင်း
  • သွေးပြန်ကြောတွင် သွေးခဲများတွေ့ရခြင်း
  • ခွဲစိတ်အနာ ပြန်လည်ပွင့်ထွက်နိုင်ခြင်း
  • ခွဲစိတ်အနာပတ်လည်တွင် နာကျင်ခြင်း

ထိုနည်းလမ်းနှစ်သွယ်တွင် ကောင်းကျိုး၊ဆိုးကျိုး များစွာ ရှိပါသည်။ မိခင်၏ ကျန်းမာရေးအခြေအနေပေါ်တွင် မူတည်၍ ဆရာဝန်များမှ သင့်လျှော်သော နည်းလမ်းကို ရွေးချယ်ပေးပါလိမ့်မည်။

Hello Health Group သည် ဆေးပညာအကြံပြုချက်များ၊ ရောဂါရှာဖွေမှုများနှင့် ကုသမှုများကို မပြုလုပ်ပေးပါ

health-tool-icon

မွေးဖွားမယ့်ရက် တွက်ချက်ခြင်း

ဒီတွက်ချက်တဲ့ ကိရိယာကို အသုံးပြုပြီး ကလေးမွေးဖွားမယ့်ရက်ကို တွက်ချက်နိုင်ပါတယ်။ အတိအကျဖြစ်မယ်လို့တော့ အာမမခံနိုင်ပါဘူး။ အနီးစပ်ဆုံး ခန့်မှန်းတွက်ချက်ပေးမှာ ဖြစ်ပါတယ်။ ကိုယ်ဝန်ဆောင် မိခင်အနေနဲ့ ခန့်မှန်းရရှိလာတဲ့ ရက်ရဲ့ မတိုင်ခင် သီတင်းတစ်ပတ်အတွင်း သို့မဟုတ် သီတင်းတစ်ပတ်အကျော်မှာ မွေးဖွားနိုင်ပါတယ်။

ရာသီစက်ဝန်း ကြာချိန်

28 ရက်

Hello Health Group သည် ဆေးပညာအကြံဉာဏ်များ၊ ရောဂါရှာဖွေမှုများနှင့် ကုသမှုများ မပြုလုပ်ပေးပါ။

ရင်းမြစ်များ

Vaginal Birth vs. Cesarean Section – Pros and Cons.

http://www.womenshealthcaretopics.com/VaginalBirthvsCesareanSection.html.

Access December 13, 2016

စာရေးသူ ဓာတ်ပုံbadge
Dr. K Zin Thwe မှ ရေးသားသည်။ 12/05/2020 တွင် ပြန်လည်ပြင်ဆင်ခဲ့သည်။
Hello Sayarwon Panel မှ အချက်အလက် စစ်ဆေးထားပါသည်။