home

သင့်စိုးရိမ်မှုတွေက ဘာတွေလဲ။

close
မတိကျ
နားလည်ရခက်
အခြား

သို့မဟုတ် လင့်ခ်ကူးယူမည်

ရင်သွေးလေးကို သင်ပေးသင့်တဲ့ တစ်ကိုယ်ရေသန့်ရှင်းမှု အလေ့အထများ

ရင်သွေးလေးကို သင်ပေးသင့်တဲ့ တစ်ကိုယ်ရေသန့်ရှင်းမှု အလေ့အထများ

စမတ်ကျလှပတဲ့ လူငယ်လေး၊ လှပကြော့ရှင်းပြီး နှစ်လိုဖွယ်ကောင်းတဲ့ မိန်းမပျိုလေးအဖြစ် ကိုယ့်ရဲ့ ရင်သွေးလေးကို ကြီးပြင်းလာစေချင်တဲ့မေမေဖေဖေတွေများရှိလား။ ဒါဆိုရင်တော့ စမတ်ကျလှပတဲ့အရွယ်ရောက်သူလေးဖြစ်လာစေဖို့ ကိုယ့်ရဲ့ရင်သွေးလေးကို ငယ်ငယ်ကတည်းက ဘာတွေသင်ကြားပျိုးထောင်ပေးဖို့လိုမလဲဆိုတာကို ဒီဆောင်းပါးလေးထဲမှာ ဖတ်ကြည့်လိုက်ပါ။

ငယ်စဉ်ကတည်းက ပျိုးထောင်ပေးသင့်တဲ့ တစ်ကိုယ်ရေသန့်ရှင်းရေး အလေ့အထများ

ကိုယ့်ရဲ့ ရင်သွေးလေးကို ငယ်စဉ်ကနေစပြီး ဒီအလေ့အကျင့်လေးကို ပျိုးထောင်ပေးပါ။ ဒါမှ ကျန်းမာပြီး စမတ်ကျတဲ့လူငယ်လေး၊ လှပကြော့ရှင်းတဲ့လေဒီလေးအဖြစ် ကြီးပြင်းအရွယ်ရောက်လာမှာပါ။

လက်ဆေးတတ်အောင်သင်ပေးပါ

လက်ကနေတဆင့်ရောဂါပိုးတွေကအများကြီးကူးစက်နိုင်ပါတယ်။ ဒါကြောင့် ကလေးကို ငယ်စဉ်ကတည်းက လက်ဆေးတတ်တဲ့ အလေ့အကျင့်လေးရှိနေအောင် ပျိုးထောင်ပေးထားသင့်ပါတယ်။ ကလေးကို ညစ်ပေတာတွေကိုင်တွယ်ပြီးတိုင်း၊ အစားမစားခင်၊ အစားအသောက်တွေမပြင်ဆင်ခင်၊ အသားစိမ်း၊ငါးစိမ်းတွေကို ကိုယ်တွယ်မိချိန်၊ ခန္ဓာကိုယ်ကထွက်တဲ့အရည်တွေဖြစ်ကြတဲ့သွေး၊ဆီး၊ တံထွေးနဲ့အခြားသောအရာတွေကို ထိတွေ့ပြီးတိုင်း၊ တိရစ္ဆာန်လေးတွေကိုထိတွေ့ပြီးတိုင်း၊ နှာချေပြီးတိုင်း၊ နှပ်ညှစ်ပြီးတိုင်း၊ချောင်းဆိုးပြီးတိုင်း၊ အိမ်သာကဆင်းတိုင်း၊အစားစားပြီးတိုင်းမှာ လက်ဆေးတတ်တဲ့ အလေ့အကျင့်လေးကိုမွေးမြူပေးပါ။ ဒါကရောဂါပိုးမွှားတွေကို ကာကွယ်ရာရောက်လို့ ကလေးကို ကျန်းမာစေဖို့လည်း အကောင်းဆုံး အထောက်အပံ့ပေးနိုင်မှာပါ။

ရေပုံမှန်ချိုးတတ်တဲ့အလေ့အကျင့်မွေးမြူပေးပါ

ရေပုံမှန်ချိုးတတ်တာကလည်း တစ်ကိုယ်ရေသန့်ရှင်းရေးအတွက် အရေးပါတဲ့ အချက်တစ်ခုပါ။ ဒါကြောင့်ဘေဘီလေးကို ပုံမှန်ရေချိုးတတ်တဲ့ အလေ့အကျင့်လေးရအောင် ပျိုးထောင်ပေးပါ။ရေချိုးတာက စိတ်ရောကိုယ်ပါကျန်းမာစေဖို့ အကောင်းဆုံးထောက်ပံ့ပေးနိုင်ပါတယ်။

ခံတွင်းသန့်ရှင်းရေး ဂရုစိုက်တတ်အောင်သင်ပေးပါ
သွားနဲ့ခံတွင်းသန့်ရှင်းမှုက ခံတွင်းအနံ့ဆိုးမဖြစ်အောင် ကာကွယ်ပေးသလို သွားပိုးစားတာနဲ့ သွားဖုံးရောဂါတွေမဖြစ်အောင် ကာကွယ်ပေးနိုင်သလို နှလုံးရောဂါမဖြစ်အောင်ပါ ကာကွယ်ပေးနိုင်ပါတယ်။ ဒါကြောင့်ဘေဘီလေးဘဝကတည်းက မနက်တစ်ကြိမ်၊ ညတစ်ကြိမ်သွားတိုက်တတ်တဲ့ အလေ့အထလေးမွေးမြူပေးပါ။ သွားတစ်ခါတိုက်ရင် ၂ မိနစ်ကြာအောင် တိုက်တတ်တဲ့ အလေ့အကျင့်လေးကိုလည်းမွေးမြူပေးပါ။

ပုံမှန်ခေါင်းလျှော်တဲ့အလေ့အထပျိုးထောင်ပေးပါ

ကလေးတွေကရေချိုးရတာကို ကြိုက်ကြပေမယ့်ခေါင်းလျှော်ရတာကိုတော့ မကြိုက်ကြပါဘူး။ ဒါပေမယ့်ခေါင်းလျှော်တာကလည်း ဂရုစိုက်သင့်တဲ့ တစ်ကိုယ်ရေသန့်ရှင်းရေးဖြစ်တာကြောင့်ဘေဘီလေးဘဝကတည်းက ပုံမှန်တစ်ပတ်ကို တစ်ကြိမ်ခေါင်းလျှော်တဲ့ အလေ့အကျင့်လေးလုပ်ပေးပါ။ အသက်အရွယ်အလိုက်ခေါင်းလျှော်တဲ့ အကြိမ်ရေကိုတိုးပေးဖို့လည်း မမေ့ပါနဲ့။

လက်သည်းခြေသည်းညှပ်တတ်တဲ့အလေ့အထလုပ်ပေးပါ

လက်သည်းခြေသည်းတွေရှည်နေတာက မလိုအပ်ဘဲရောဂါတွေဝင်လာစေဖို့ အားပေးနေသလိုဖြစ်နေနိုင်ပါတယ်။ ဒါကြောင့် ငယ်စဉ်ကတည်းက လက်သည်ရှည်နေရင်ဘာတွေဖြစ်တတ်တယ်ဆိုတာ နားလည်အောင်ပြောပြပြီး လက်သည်းခြေသည်းတွေညှပ်တတ်တဲ့ အလေ့အထလေးကိုမွေးမြူပေးပါ။

အသားအရေ ထိန်းသိမ်းတတ်အောင်သင်ပေးပါ

အသားအရေကလူတစ်ယောက်ရဲ့ သွင်ပြင်ပေါ်မှာတော်တော်လေးသက်ရောက်မှုရှိနေပါတယ်။ ဒါကြောင့်ကလေးကို တစ်နေ့မှာ ၃ ကြိမ်လောက်မျက်နှာသစ်ဖို့လိုတဲ့အကြောင်းပြောပြဖို့လိုသလို မျက်နှာကို လက်နဲ့ကုတ်ဖဲ့တာ၊ ဆိတ်တာမျိုးတွေမလုပ်ဖို့လည်းပြောပြဖို့လိုပါလိမ့်မယ်။ ဒါမှ အနာအဆာကင်းစင်တဲ့ အသားအရေကို ပိုင်ဆိုင်နိုင်မှာပါ။

ချိုင်းသန့်ရှင်းဖို့လိုကြောင်းပြောပေးပါ

ငယ်စဉ်မှာအရေးသိပ်မကြီးပေမယ့် အရွယ်ရောက်လာတာနဲ့အမျှ ချိုင်းချွေးနံ့နံလာနိုင်တာကြောင့် စမတ်ကျတဲ့လူငယ်လေး၊လှပကြော့ရှင်းတဲ့လေဒီလေးဖြစ်ဖို့ အနှောင့်အယှက်ဖြစ်နိုင်တာကြောင့် ချိုင်းကို ပုံမှန်သန့်ရှင်းဖို့လိုကြောင်းနဲ့ လိုအပ်မယ်ဆိုရင်ချွေးနံ့ပျောက်အောင် တစ်ခုခုလိမ်းဖို့ လိုအပ်တဲ့အကြောင်းပြောပြပေးထားပါ။

ခြေထောက်ကိုသန့်ရှင်းတတ်အောင်ပြောပြပေးပါ

ခြေထောက်ကကအနံ့ဆိုးထွက်တာမျိုးမဖြစ်စေဖို့အတွက်ခြေထောက်ကိုသေချာသန့်ရှင်းဖို့လိုသလိုခြေစွပ်၊ ဖိနပ်တွေကိုသေချာလေးသန့်စင်ဖို့လိုအပ်ကြောင်းကိုလည်းသေချာလေးပြောပြပေးဖို့လိုပါမယ်။

ဒါတွေအပြင်ကလေးကို အဝတ်အစားနဲ့အသုံးအဆောင်တွေကို သေချာဂရုတစိုက်အသုံးပြုသင့်တဲ့အကြောင်းနဲ့ သပ်သပ်ရပ်ရပ်ဝတ်စားဆင်ယင်တတ်ဖို့ပါလေ့ကျင့်ပေးထားသင့်ပါတယ်။နောက်ဆုံးတစ်ချက်အနေနဲ့ကတော့ အပျိုဖော်ဝင်လာတဲ့ သမီးလေးတွေကို တစ်ကိုယ်ရေသန့်ရှင်းရေးဂရုစိုက်ဖို့နဲ့ကျောင်းသွားတဲ့အခါမျိုးမှာ လစဉ်သုံးပစ္စည်းကို အပိုဆောင်သွားသင့်တဲ့အကြောင်းလေးသင်ကြားပေးဖို့ပါ။ ဒီလိုလုပ်ဆောင်ပေးခြင်းက သမီးလေးကို လှပကြော့ရှင်းတဲ့လေဒီလေးအဖြစ်ကြီးပြင်းအရွယ်ရောက်လာစေမှာပါ။

Hello Health Group သည် ဆေးပညာအကြံဉာဏ်များ၊ ရောဂါရှာဖွေမှုများနှင့် ကုသမှုများ မပြုလုပ်ပေးပါ။

ရင်းမြစ်များ

Hygiene Habits for Kidshttps://www.healthline.com/health/hygiene-habits-kids Accessed Date 2 August 2019

Healthy Habits You Should Teach Your Child Nowhttps://www.verywellfamily.com/healthy-habits-to-teach-your-child-4071124Accessed Date 2 August 2019

Personal hygiene for childrenhttps://www.healthdirect.gov.au/personal-hygiene-for-childrenAccessed Date 2 August 2019

စာရေးသူ ဓာတ်ပုံbadge
Aye Thi Mon မှ ရေးသားသည်။ 10/12/2021 တွင် ပြန်လည်ပြင်ဆင်ခဲ့သည်။
Dr. Thurein Hlaing Win မှ အချက်အလက် စစ်ဆေးထားပါသည်။