- အဝလွန်တဲ့ သူတွေ
- အရက်သောက်တဲ့သူတွေ
- သက်ကြီးရွယ်အိုတွေ
- ကလေးငယ်တွေပဲ ဖြစ်ပါတယ်။
အကြောင်းကတော့ ခန္ဓာကိုယ်အပူချိန်ကို ထိန်းသိမ်းရာမှာ ပိုခက်လို့ပါ။
အပူ ချိန်လွန်ကဲတဲ့ သူတွေကို ဘယ်လို ပြုစုကြမလဲ။
ကိုယ်ပဲဖြစ်ဖြစ် သူများပဲဖြစ်ဖြစ် အပူဒဏ်တွေ ခံနေရပြီဆိုရင် အောက်ကအတိုင်း လုပ်ပါ။
- အရေးပေါ်အခြေအနေဖြစ်လို့ ဆေးရုံကားခေါ်တာဖြစ်ဖြစ် ဆေးရုံသွားတာဖြစ်ဖြစ် လုပ်ပါ။
- သတိမကောင်းတဲ့သူ၊ အန်နေတဲ့သူကို ဘာမှမတိုက်ပါနဲ့။
- အရက်တွေ ကော်ဖီတွေလည်း မတိုက်ပါနဲ့။
အရင်ဆုံး အရေးပေါ်ပြုစုနိုင်တဲ့ နည်းလမ်းတွေကတော့
အပူကြောင့် ကြွက်တက်ရင်
- အရင်ဆုံး အေးတဲ့ နေရာကို ရွေ့ပေးပါ။
- ကြွက်တက်တဲ့ နေရာကို အသာအယာနှိပ်ပေးပါ။
- ဖြည်းဖြည်းချင်း အကြောလျှော့ပေးပါ။
- ၁၅မိနစ်တစ်ခါ ရေအေးအေးဖြစ်ဖြစ် ဓာတ်ဆားဖြစ်ဖြစ် တိုက်ပေးပါ။
အပူကြောင့် အားအင်ကုန်ခမ်းရင်
- အရင်ဆုံး အေးတဲ့ နေရာကို ရွေ့ပါ။
- ပွပွချောင်ချောင် အဝတ်အစားကို ဝတ်ပါ။
- တစ်ကိုယ်လုံးကို ရေပတ်ဝတ်တိုက်ပါ။
- ပန်ကာလေခံပါ။ အဲကွန်းခံပါ။
- ၁၅မိနစ်တစ်ခါ ရေအေးအေးဖြစ်ဖြစ် ဓာတ်ဆားဖြစ်ဖြစ် တိုက်ပေးပါ။
- မြန်မြန်မသောက်ပါနဲ့။
အပူလျှပ်ခဲ့ရင်
ဒါကတော့ အသက်အန္တရာယ် ထိခိုက်နိုင်တဲ့အတွက် ဆေးရုံကို မြန်မြန်သွားရမှာပါ။ ဒီအချိန်အတွင်းလေးမှာတော့
- အရင်ဆုံး အေးတဲ့ နေရာကို ရွေ့ပါ။
- ပွပွချောင်ချောင် အဝတ်အစားကို ဝတ်ပါ။
- ချွေးစိုနေတဲ့ အဝတ်အစားတွေကို လဲပါ။
- ပန်ကာလေခံပါ။ အဲကွန်းခံပါ။
- မျက်နှာသုတ်ပဝါအရွယ် အဝတ်၆ခုကို ရေစိုအောင် စွတ်ပါ။ ပြီးရင် လည်ပင်းနှစ်ဖက်မှာ တစ်ခုစီ၊ ချိုင်းအောက်မှာ တစ်ခုစီ၊ ပေါင်ခြံမှာ တစ်ခုစီ စုစုပေါင်း ၆ခု ကပ်ပေးပါ။ ဒီနေရာတွေမှာ သွေးကြောမကြီးတွေရှိလို့ အပူကို မြန်မြန်သက်သာစေပါတယ်။
- သတိကောင်းရင် ၁၅မိနစ်တစ်ခါ ရေအေးအေးဖြစ်ဖြစ် ဓာတ်ဆားဖြစ်ဖြစ် တိုက်ပေးပါ။ မြန်မြန်မသောက်ပါနဲ့။
နောက်ဆက်တွဲ ဘာဖြစ်နိုင်လဲ။
တော်တော်များများကတော့ အပူလျှပ်ပြီး ရက်အနည်းငယ် အတွင်းမှာ သက်သာလာပါတယ်။ ဒါပေမယ့် အခန့်မသင့်ရင် အပူလျှပ်တဲ့အချိန်မှာ ဦးနှောက်က ရောင်ရမ်းလာပါတယ်။ ဒါက ဦးနှောက်ကို ပျက်စီးစေပါတယ်။ ကိုယ်တွင်းအင်္ဂါတွေ ပျက်စီးတာမျိုးလည်း ဖြစ်နိုင်ပါတယ်။
အပူ ပြဿနာများ ကနေ ဘယ်လိုကာကွယ်ကြမလဲ။
- ပွပွချောင်ချောင် အဝတ်အစားတွေ ဝတ်ပါ။ အရောင်ဖျော့တာလေးတွေ ရွေးဝတ်ပါ။ အဝတ်တွေကို အထူကြီး ဝတ်တာက ခန္ဓာကိုယ်ကို အပူတွေ စုစေပါတယ်။
- နေလောင်မခံပါနဲ့။ နေလောင်တာခံရရင် ခန္ဓာကိုယ်က ကိုယ့်ကိုယ်ကို အေးအောင်မလုပ်နိုင်ပါဘူး။ ဒါကြောင့် အပြင်သွားရင် ထီး ဒါမှမဟုတ် ဦးထုပ်ဆောင်းပါ။ နေရောင်ကာ ကရင်မ် လိမ်းပါ။ နေကာမျက်မှန်တပ်ပါ။
- ရေများများသောက်ပါ။ ရေဓာတ်ပြည့်ဝနေမှ ခန္ဓာကိုယ်က ချွေးထွက်ပြီး အပူချိန်ကို ထိန်းနိုင်မှာပါ။
- ကားပေါ်မှာ အလုံပိတ်ပြီး မနေပါနဲ့။ သူများကိုလည်း မထားပါနဲ့။ အလုံပိတ်ကားထဲမှာဆိုရင် ၁၀မိနစ်အတွင်းမှာ အပူချိန်က ၂၀ဒီဂရီ ဖာရင်ဟိုက်ထိ တက်သွားနိုင်ပါတယ်။
အပူချိန်ကြောင့် ကလေးတွေ သေဆုံးရတဲ့ အထဲမှာ ကားထဲမှာ အလုံပိတ်ထားခဲ့လို့ အပူလျှပ်ပြီး သေရတာက ထိပ်ဆုံးမှာပါ။ ကားကို အရိပ်ထဲမှာ ရပ်ထားရင်တောင် စိတ်မချရပါဘူး။ ဒါကြောင့် နွေရာသီမှာ ကလေးတွေ၊ အိမ်မွေးတိရစ္ဆာန်လေးတွေကို ကားထဲမှာ ပိတ်မထားခဲ့ပါနဲ့။
- တတ်နိုင်ရင် အရက်မသောက်ပါနဲ့။ မရှောင်နိုင်ရင် လျှော့သောက်ပါ။
- ကိုယ်က နေပူထဲမှာ အလုပ်လုပ်ရတဲ့သူဆိုရင် နေပြင်းတဲ့ အချိန်မှာ ရေများများသောက်ပါ။ အရိပ်ထဲမှာ နေပါ။ လေ့ကျင့်ခန်းလုပ်ဖို့ စဥ်းစားထားရင်လည်း အပူသက်သာတဲ့ မနက်စောစော ဒါမှမဟုတ် ညနေစောင်းမှ လုပ်ပါ။
- အပူထဲမှာ နေသားမကျတဲ့သူဆိုရင် အပူဒဏ်ကို ပိုပြီးခံရနိုင်ပါတယ်။ ဒါကြောင့် နေရာအသစ်ကို ပြောင်းလုပ်တဲ့သူဆိုရင် ရာသီဥတုဒဏ်ကို မခံနိုင်သေးချိန်မှာ ပင်ပင်ပန်းပန်းအလုပ်တွေကို မလုပ်နိုင်သေးပါဘူး။
- ဖြစ်နိုင်ခြေရှိတဲ့သူဆိုရင် ပိုပြီးသတိထားပါ။ ဆေးတွေ သောက်နေတယ်။ အပူဒဏ်ကို မခံနိုင်တဲ့ ကျန်းမာရေးပြဿနာတစ်ခုခု ရှိနေတယ်ဆိုရင် (ဥပမာ အရင်ကလည်း အပူလျှပ်ဖူးတယ်ဆိုရင်) သတိထားပါ။ နွေရာသီမှ အားကစားပြိုင်ပွဲတွေမှာ ပါမယ်ဆိုရင်လည်း အပူဒဏ်မခံရအောင် သတိထားဖို့ လိုပါတယ်။
မှတ်ချက်များ
သင့်အတွေးများကို ဝေမျှပါ။
သင့်ကျန်းမာရေးအတွေးများကို Hello Sayarwonနဲ့ ဝေမျှလိုက်ပါ။
ဆက်သွယ်ရန် သို့မဟုတ် ဝင်မည်။ နှင့် ဝင်ရောက်ဆွေးနွေးပါမည်။