ခုခေတ်မှာ တော်တော်များများက ကိုယ်ခန္ဓါအချိုးကျလှပဖို့ အတွက် အာရုံစိုက် အချိန်ပေးလာကြပါတယ်။ ပိန်တဲ့သူတွေ ကိတ်အောင် ၊ ဝတဲ့သူတွေ ပိန်အောင် GYMတွေမှာ သွားကစားတာ။ အစားတွေလျှော့စားတာတွေ လုပ်လာကြပါတယ်။ ဝိတ်ချတဲ့နေရာမှာ မှန်ကန်တဲ့ အကြံပေးချက်တွေရှိသလို တစ်ချို့မှားနေတဲ့ အယူအဆ တွေလည်းရှိနေတာပါပဲ။ မှန်ကန်တဲ့ လမ်းကြောင်းပေါ်လျှောက်မှသာ ကိုယ်ရောက်ချင်တဲ့ ပန်းတိုင်ကို မြန်မြန် ရောက်မှာလေ။ ခုပြောပြချင်တာက ဝိတ်ချတာနဲ့ ပက်သက်လို့ လူတွေအသိမှားနေတဲ့ အချက်တွေပဲဖြစ်ပါတယ်။

ဝိတ်ကျချင်ရင် လေ့ကျင့်ခန်းပဲ ပြင်းပြင်းထန်ထန်လုပ်ရင်ရပြီ။

ဝိတ်ကျဖို့ဆို လေ့ကျင့်ခန်းတစ်ခုတည်းနဲ့ ချလို့မရပါဘူး။ အစားပါလိုက်မထိန်းရင် ပလိုင်းပေါက်နဲ့ ဖားကောက်နေသလိုပဲ ဘယ်လောက်ပဲ လေ့ကျင့်ခန်းလုပ်လုပ် ကိုယ်လိုချင်တဲ့ အလေးချိန်ကို ဘယ်တော့မှ ရောက်မှာ မဟုတ်ပါဘူး။ မှန်ကန်တဲ့ ဝိတ်ချခြင်းမှာ လေ့ကျင့်ခန်းမှန်မှန်လုပ်တာရော အစားအသောက်ထိန်းစားတာကရော နှစ်ခုလုံး အရေးကြီးပါတယ်။ အစားပဲလျှော့မယ် ။လေ့ကျင့်ခန်းမလုပ်ဘူးဆိုလည်း မဖြစ်ပြန်ဘူးနော်။

အစာငတ်ခံခြင်းကသာ အထိရောက်ဆုံးနည်းလမ်း။

တစ်နေ့လုံးနေမှ ပန်းသီးတစ်လုံးပဲစားတာ ၊ ထမင်းသုံးလုတ်လောက်ပဲစားတာတွေက သင့်ကို ဝိတ်ကျစေမှာ မဟုတ်ဘဲ အစာအိမ်ရောဂါ တောင် ပိုဖြစ်စေပါတယ်။ လူ့ခန္ဓါကိုယ်ရဲ့ သဘောအရ အစာအငတ်ခံတာကို ၅ရက်ထက်ပိုကြာကြာလုပ်လို့မရပါဘူး။ ၅ရက်ထက်ကြာလာရင် အစာကို တောင့်တစိတ် ပိုပြင်းပြလာပြီး ပြန်စားမိတဲ့အခါ အရင်စားနေကျထက် နှစ်ဆ လောက်ပိုစားဖြစ်သွားပါတယ်။ ဘာလို့လဲဆိုတော့ ဗိုက်တွေဆာနေတာကတစ်ကြောင်း၊ သွေးက အစာကို တောင့်တလွန်ုးနေတာက တစ်ကြောင်း၊ ကိုယ့်ကိုကိုယ်သနားနေတာက တစ်ကြောင်း အကြောင်းကြောင်းကြောင့် ပိုစားဖြစ်သွားရော။ အဲအခါကျ ဝိတ်လည်းမကျတဲ့အပြင် အစာအိမ်ရောဂါတောင် အဆစ်ဖြစ်လိုက်သေးတယ်။

ဇီဝကမ္မ ဖြစ်စဉ်ကို မြန်စေတဲ့ အစာတွေပဲ ရွေးစားတာ။

ဇီဝကမ္မဖြစ်စဉ်ဆိုတာ ကိုယ်ခန္ဓါ တစ်ခုအတွက် စားလိုက်တဲ့ အစာတွေကို ချေဖျက်ပေးပြီး ထွက်လာတဲ့ အာဟာရတွေကို လိုအပ်တဲ့ နေရာတွေကို ပို့ပေးရတာပဲဖြစ်ပါတယ်။ တစ်ချို့သော အစားအစာတွေက ဇီဝကမ္မဖြစ်စဉ်တွေကို ပိုမြန်စေပြီး အဆီ တွေမြန်မြန်လောင်ကျွမ်းစေတယ်လို့ပြောကြပါတယ်။ အဲလိုအစားအစာတွေကိုပဲ များများစားရင် ဝိတ်မြန်မြန်ပိုကျတယ်လို့လည်းထင်နေတတ်ကြပါတယ်။ မှားပါတယ်။ သိပ္ပံနည်းကျလေ့လာထားချက်များလည်း မရှိသေးသလို စားလိုက်တဲ့ အစားတွေမြန်မြန်ကုန်သွားတော့ ဗိုက်လည်းမြန်မြန်ပြန်ဆာ အဲတော့ ထပ်စားဖြစ်ပြန်ရော။ ဝိတ်လည်းမကျ ပိုလည်းစားဖြစ်နေမယ်နော်။

အဆီချဆေးတွေပဲသောက်တာ။

အဆီချဆေး။ ဆေးဆိုတော့ ဘယ်လိုပဲဖြစ်ဖြစ် ပို အစွမ်းထက်တယ်။ အစားမလျှော့ လေ့ကျုင့်ခန်းမလုပ်လည်း အဆီချဆေးသောက်တာနဲ့တင် ဝိတ်ကျနိုင်တယ်။ တကယ်ကို မှားနေတာပါ။ ဈေးကွက်မှာ စိတ်ချရတဲ့ အဆီကျဆေးတွေ ရှိနေသလို ကျန်းမားရေးကို ပါထိခိုက်စေနိုင်တဲ့ အဆီချဆေးတွေလည်း အများကြီးရှိနေပါတယ်။ ပိန်ချင်ရင်တော့ ဆေးကိုပဲ အားကိုးနေလို့မရပါဘူး။ ကိုယ်ကိုတိုင်ကလည်း လေ့ကျင့်ခန်းလုပ်၊ အစားလည်းထိန်းပေးမယ်ဆို ပိုမှန်ကန်တဲ့ နည်းလမ်းဖြစ်မှာပါ။ တန်ဆေးလွန်ဘေးဆိုတာကလည်း ရှိသေးတယ်လေ။

အဆီများများရင် အဆီပိုတက်တယ်။

အဆီပါတဲ့ အစားအစာများများ စားလိုက်တာနဲ့ အဆီတက်တော့မှာပဲဆိုတာ တွေးကြည့်တော့ မှန်သလိုလိုပဲ။ ခန္ဓါကိုယ်မှာ အဆီစုတယ်ဆိုတာ တကယ်တော့ စားလိုက်လို့ ပိုနေတဲ့ အရာတွေကို အဆီအဖြစ် သိမ်းထားလိုက်ခြင်းပဲဖြစ်ပါတယ်။ အဆီစားလိုက်တိုင်း အဆီတက်တာ မဟုတ်ပါဘူး။ အစားတွေထဲပါတဲ့ အဆီတွေက နှလုံးသွေးကြောကို အဓိက ဒုက္ခပေးပြီး ကစီဓါတ်ပါတဲ့ အစားအစာ( ထမင်း၊ အာလူး။၊ ဂျုံနဲ့လုပ်ထားတဲ့အစားအစာ) တွေကသာ ဝိတ်တက်စေတာဖြစ်ပါတယ်။

အဖတ်မစားဘူး အရည်ပဲသောက်မယ်။

ထမင်း အသားတွေစားရင် ကယ်လိုရီ တွေပိုတက်လို့ အချိုအရည်တွေပဲသောက်တော့မယ်လို့ သင်ဆုံးဖြတ်ထားရင် ချက်ချင်းပြင်လိုက်ပါ။ သင်ပြောနေတဲ့ အချိုရည်ထဲမှာပါတဲ့ သကြားဓါတ်ရဲ့ ကယ်လိုရီက သင်ထမင်းစားလိုက်လို့ရနိုင်တဲ့ ကယ်လိုရီထက်တောင် ပိုများနေပါဦးမယ်။ အရည်ကြီးပဲ သောက်နေရင် ဗိုက်ကခဏပဲ ပြည့်တာပဲဖြစ်ပြီး ပြန်ပြန်ဆာဆာနေဦးမှာပါ။

ဝိတ်ကျပြီး သွယ်လျလှပချင်ရင် မှန်ကန်တဲ့ လမ်းကြောင်း အတွင်းကပဲသွားပါ။ အစွန်းရောက်တယ်ဆိုတာ ဘယ်မှာမှ မကောင်းပါဘူး။ လေကျင့်ခန်းလေးလည်းမှန်မှန်လုပ် ၊ အစားတွေလည်းထိန်းစားမယ်ဆို ကိုယ်လိုချင်တဲ့ ပန်းတိုင်ကို မြန်မြန်ရောက်မှာပါ။

Hello Health Groupသည် ဆေးပညာဆိုင်ရာ အကြံပေးချက်များ၊ ရောဂါရှာဖွေခြင်းနှင့် ကုသခြင်းများ မပြုလုပ်ပါ။