သက်ကြီးရွယ်အို ကျန်းမာရေးအကြောင်း သိကောင်းစရာ

သက်ကြီးရွယ်အို ကျန်းမာရေးအကြောင်း သိကောင်းစရာ အကြောင်းလေးတွေကို လေ့လာလိုက်ရအောင်နော်။ ဘယ်သူမဆို အသက်အရွယ် ကြီးလာတာနဲ့အမျှ ခန္ဓာကိုယ်ရဲ့ ခုခံအားစနစ် တဖြည်ဖြည်း အားနည်းလာပြီး ခန္ဓါကိုယ်ဟာလည်း ယိုယွင်းဆုတ်ယုတ်လာမှာ ဓမ္မတာပါပဲ။

ဇရာရဲ့ သဘောတရားအရ သက်ကြီးပိုင်း ရောက်လာလေ နာမကျန်းဖြစ်လွယ်လေ၊ ရောဂါရလွယ်လေ ဖြစ်လာကြရပါတယ်။ ဒါကြောင့်လည်း မိမိတို့ရဲ့ လက်ရှိကျန်းမာရေးအခြေအနေ၊ ရှေ့လျှောက်ဖြစ်လာနိုင်တဲ့ အခြေအနေတွေကို ကောင်းစွာသတိပြုမိပြီး ကျန်းမာရေးအသိပညာ အပြည့်အဝရှိအောင် လေ့လာအားထုတ်ခြင်းအားဖြင့် ဘဝရဲ့ တတိယအရွယ်ကို ကျန်းမာပျော်ရွှင်စွာ နေထိုင်ဖြတ်သန်းနိုင်မှာ ဖြစ်ပါတယ်။

သက်ကြီးရွယ်အို ကျန်းမာရေးအကြောင်း သိကောင်းစရာ

သက်ကြီးရွယ်အို ကျန်းမာရေးအကြောင်း သိကောင်းစရာ တွေကတော့ –

၁။ နှလုံးနှင့်သွေးကြော အဖွဲ့အစည်း

အသက်အရွယ်ကြီးသူတွေမှာ နှလုံးခုန်နှေးခြင်း၊ သွေးကြောများမာလာပြီး နှလုံးကြီးခြင်း ဖြစ်နိုင်ခြေ ပိုများပါတယ်။ နောက်ဆက်တွဲရလဒ်အဖြစ် ခန္ဓာကိုယ်အနှံ့ သွေးလှည့်ပတ်စီးဆင်းရာမှာ အခက်အခဲဖြစ်လာပြီး သွေးဖိအားများခြင်း (သွေးတိုးခြင်း) အပါအဝင် နှလုံးနဲ့သွေးကြောဆိုင်ရာ ပြဿနာတွေ ဖြစ်လာနိုင်ပါတယ်။

၂။ အရိုးအဆစ်နှင့် ကြွက်သား အဖွဲ့အစည်း

လူ့သက်တမ်း နှစ် ၅၀၊ ၆၀ အထိ အလုပ်လုပ်လာခဲ့ရတဲ့ အရိုးတွေဟာ သက်ကြီးပိုင်း ရောက်လာတာနဲ့အမျှ အရွယ်အစားနဲ့ သိပ်သည်းဆ တဖြည်းဖြည်း လျော့နည်းလာပြီး ပြင်းထန်တဲ့ ကိုယ်ကာယလှုပ်ရှားမှုဒဏ်ကို ငယ်ရွယ်စဉ်အချိန်တုန်းကလောက် မခံနိုင်တော့ပါဘူး။

တချို့အဘိုးအဘွားတွေဆိုရင် အသက်ကြီးမှ အရပ်ပြန်ပုသွားတာကို တအံ့တသြ မြင်တွေ့ကြရပါတယ်။ ကြွက်သားတွေဟာလည်း အရင်လောက် လှုပ်ရှားရမလွယ်ကူတော့ဘဲ တောင့်တင်းသန်မာမှု အားနည်းလာတဲ့အတွက် ခန္ဓာကိုယ်ဟန်ချက် ထိန်းရာမှာ၊ နေ့စဉ်လုပ်ငန်းဆောင်တာတွေ ဆောင်ရွက်ရာမှာ အခက်အခဲ ဖြစ်လာရပါတယ်။

၃။ အစာခြေ အဖွဲ့အစည်း

သက်ကြီးပိုင်း တွေမှာ အလွန်အဖြစ်များတဲ့ ပြဿနာတစ်ခုကတော့ ဝမ်းချုပ်ခြင်းဖြစ်ပါတယ်။ နေ့စဉ်အစားအသောက်ထဲမှာ အမျှင်ဓာတ်နည်းပါးခြင်း၊ ရေလုံလောက်စွာ မသောက်ခြင်း၊ ကိုယ်လက်လှုပ်ရှားမှု မလုပ်ခြင်း၊ သွေးချိုဆီးချိုရောဂါရှိခြင်း၊ Irritable bowel syndrome ခေါ် အူမကြီးရောဂါတစ်မျိုးရှိခြင်း စတဲ့ အကြောင်းရင်းမျိုးစုံကြောင့် ဝမ်းချုပ်ရတာ ဖြစ်ပါတယ်။ ဆီးရွှင်ဆေး၊ သံဓာတ်အားဆေးများ အပါအဝင် အချို့သော ဆေးဝါးတွေကြောင့်လည်း ဝမ်းချုပ်တတ်ပါတယ်။

၄။ ဆီးအိမ်နှင့် ဆီးလမ်းကြောင်း

များသောအားဖြင့် သက်ကြီးရွယ်အိုတွေဟာ ကျန်းမာရေးအခြေအနေအမျိုးမျိုး၊ အကြောင်းရင်းအမျိုးမျိုးကြောင့် ဆီးအိမ်ကို ထိန်းချုပ်ရခက်တဲ့ (ဆီးမထိန်းနိုင်တဲ့) ပြဿနာကို ရင်ဆိုင်ရတတ်ပါတယ်။ ဥပမာ သွေးချိုဆီးချိုရောဂါ၊ အမျိုးသမီးများတွင် သွေးဆုံးကိုင်ခြင်း၊ အမျိုးသားများတွင် ဆီးကျိတ်ကြီးခြင်း။

၅။ မှတ်ဉာဏ်အဖွဲ့အစည်း

ပုံမှန်အားဖြင့် လူတွေဟာ အသက်ကြီးလာလေ မှတ်ဉာဏ်အားနည်းလာလေဖြစ်ပြီး အကြောင်းအရာအသစ်တွေကို သင်ယူမှတ်သားဖို့ ခက်ခဲလာလေ ဖြစ်ပါတယ်။ အသက်ကြီးသူတွေမှာ မှတ်ဉာဏ်အပြောင်းအလဲ ဖြစ်လာခဲ့မယ်ဆိုရင် ဒါဟာ အယ်လ်ဇိုင်းမားခေါ် ဦးနှောက်ရောဂါတစ်မျိုးရဲ့ လက္ခဏာဖြစ်နိုင်တဲ့အတွက် သတိထားသင့်ပါတယ်။ အယ်လ်ဇိုင်းမားရောဂါဟာ အများသိထားသလို မှတ်ဉာဏ်ဆုံးရှုံးရုံသာမကဘဲ ပုံမှန်အတိုင်း တွေးခေါ်ပြုမူနိုင်စွမ်းကိုပါ ဆုံးရှုံးစေနိုင်တဲ့ ရောဂါဖြစ်ပါတယ်။

အိုမင်းခြင်းဖြစ်စဉ်ကို နှေးကွေးအောင် ဘယ်လိုပြုမူနေထိုင်သင့်သလဲ

၁။ ကျန်းမာရေးနှင့် ညီညွတ်စွာ စားသုံးပါ

ကျန်းမာရေးနဲ့ ညီညွတ်ပြီး အာဟာရမျှတသည့် အစားအစာများကို စားသုံးပါ။

• ပေါင်မုန့်၊ ဆန်၊ အာလူးနှင့် အခြား ကစီဓာတ်အဓိကပါဝင်သော အစားအစာများကို သင့်တင်စွာ စားသုံးပါ။ ဖြစ်နိုင်ရင် သဘာဝအတိုင်းရရှိသည့် အစေ့အဆံများကို စားသုံးပါ။ သင့်ဆရာဝန်နဲ့ တိုင်ပင်ပြီး သင့်အတွက် အသင့်တော်ဆုံးဖြစ်မယ့် အစားအစာများကို ရွေးချယ်စားသုံးပါ။
• ဟင်းသီးဟင်းရွက် များများစားပါ။ ဟင်းသီးဟင်းရွက်များမှာ ခန္ဓာကိုယ်အတွက် လိုအပ်တဲ့ အမျှင်ဓာတ်၊ ဗီတာမင်နဲ့ သတ္တုဓာတ်တွေ ပါဝင်ပါတယ်။
• သစ်သီးဝလံအမျိုးမျိုး စားသုံးခြင်းဟာ သွေးတိုးရောဂါ၊ နှလုံးရောဂါ၊ လေဖြတ်ခြင်း၊ အဝလွန်ခြင်းနဲ့ အချို့သောကင်ဆာရောဂါများ ဖြစ်ပွားနိုင်ခြေကို လျော့ကျစေပါတယ်။
• နို့၊ ကြက်ဥ စသည့် ခြံထွက်အစားအစာများ စားသုံးပါ။
• Omega 3 အဆီဓာတ်ပါဝင်တဲ့ ငါးများ စားသုံးပါ။ ၎င်းတို့ဟာ နှလုံးကျန်းမာရေးကို အထောက်အကူပြုတဲ့အပြင် နှလုံးရောဂါကြောင့် အသက်ဆုံးရှုံးနိုင်ခြေကို ၃၅ ရာခိုင်နှုန်း လျော့ချပေးနိုင်ပါတယ်။
• ဆား၊ အဆီနဲ့ ဆီ လျော့စားပါ။

၂။ ကိုယ်လက်လှုပ်ရှားမှု ပြုလုပ်ပါ။

ကိုယ်လက်လှုပ်ရှားမှု ပြုလုပ်ခြင်းဟာ သင့်ကို ကာယသုခ၊ စိတ္တသုခ နှစ်မျိုးလုံး ပြည့်စုံစေပါတယ်။ ကိုယ်ကာယ ကျန်းမာရေးကို ကောင်းမွန်စေရုံသာမက လေ့ကျင့်ခန်းအတူတူလုပ်ရင်း အပေါင်းအသင်းရရှိစေခြင်း၊ စိတ်ဖိစီးမှုကို လျော့ကျစေခြင်း၊ စိတ်တည်ငြိမ်စေခြင်း စတဲ့ အကျိုးရလဒ်တွေကတဆင့် စိတ်ပိုင်းဆိုင်ရာ ပျော်ရွှင်မှုကို ဆောင်ကြဉ်းပေးပါတယ်။

အမှန်တကယ်တော့ အသက်အရွယ်ကြီးလာခြင်းဟာ ကိုယ်စိတ်နှစ်ပါးလုံး သက်သောင့်သက်သာရှိအောင် အပန်းဖြေဖို့၊ ဘဝကို ငြိမ်းချမ်းစွာ ဖြတ်သန်းဖို့ အခွင့်အရေး ပိုမိုရလာခြင်းပဲ ဖြစ်ပါတယ်။ ဒီလိုအချိန်မှာ အမျိုးမျိုးသော ကျန်းမာရေးအခြေအနေတွေကြောင့် အနှောင့်အယှက်မဖြစ်ရလေအောင် အထက်မှာဖော်ပြခဲ့တဲ့ အကြောင်းအရာတွေကို သတိပြုမှတ်သားပြီး ကျန်းမာရေးနှင့်ညီညွတ်စွာ ပြုမူနေထိုင် စားသောက်ခြင်းအားဖြင့် ဘဝရဲ့ ချမ်းမြေ့ပျော်ရွှင်မှု အသီးအပွင့်တွေကို ခံစားနိုင်မှာ ဖြစ်ပါတယ်။