အစာအိမ်နဲ့ အူသိမ်နံရံတွေမှာ ပေါက်တတ်တဲ့ အနာကို အက်စစ်နာ လို့ခေါ်ပါတယ်။ ဝမ်းဗိုက်တွင်းနာကျင်ခြင်း၊ လေပွခြင်း၊ ရင်ပူခြင်းတို့ဖြစ်စေနိုင်ပါတယ်။ ပြင်းထန်တဲ့အခါ သွေးယိုခြင်းပင်ဖြစ်စေနိုင်တယ်။

ဘာကြောင့်အနာဖြစ်ရသလဲ

အစာအိမ်တွင်းအက်စစ်များခြင်းကြောင့်ဖြစ်တယ်လို့ယူဆကြတယ်။ အချိန်တစ်ခုကြာအောင် အစပ်စားလို့ အစာအိမ်တွင်းအက်စစ်ပမာဏတက်ရတယ်လို့ ထင်ကြပါတယ်။

ဒါပေမယ့်လတ်တလောလေ့လာမှုတွေကတော့ တခြားအချက်တွေကိုသက်သေပြခဲ့ပါတယ်။

အစာအိမ်ထဲမှာ အစာအိမ်နံရံကိုအက်စစ်ဒဏ်ကနေကာကွယ်ပေးတဲ့ အကျိအချွဲအလွှာတစ်ခုရှိပါတယ်။ ထိုအကျိအချွဲအလွှာနည်းသွားတဲ့အခါမှာ အစာအိမ် သို့ အူနံရံဟာ အက်စစ်တွေဖျက်စီးခြင်းခံရဖို့များသွားတယ်။ ဒါကြောင့် အစာမရှိဘဲ ကော်ဖီသောက်ပါက အနာဖြစ်နိုင်ချေများပါတယ်။ ကော်ဖီက အစာအိမ်တွင်းမှာရှိတဲ့ အက်စစ်ပမာဏကိုများစေတယ်။ အစာမရှိဘဲ အစာအိမ်တွင်းအက်စစ်ထွက်လာပြီး အစာအိမ်၊ အူကိုထိခိုက်ဖျက်စီးနိုင်ပါတယ်။

နောက်ထပ်အချက်တွေလည်းရှိနိုင်ပါသေးတယ်-

H.pylori ဘတ်တီးရီးယား

ခန္ဓါကိုယ်ရဲ့အစာခြေစနစ်တွင်းနေထိုင်တဲ့ ဘတ်တီးရီးယားတစ်မျိုးဖြစ်တယ်။ အစာအိမ်နံရံမှာ အကွာအကွယ်ရှိစဉ်မှာ အနာမဖြစ်စေနိုင်၊ လက္ခဏာတွေမပြစေနိုင်ပေမယ့် ကာပေးထားတဲ့ အလွှာပျောက်သွားတဲ့အခါမှာ နံရံတွေကိုထိခိုက်ဖျက်စီးပြီး အနာတွေဖြစ်လာစေနိုင်ပါတယ်။ ဒီအချက်ဟာ အဖြစ်အများဆုံးအကြောင်းအရင်းဖြစ်တယ်။ တခါတလေ မကုသဘဲထားလိုက်ရာမှ ကင်ဆာအထိဖြစ်နိုင်ပါတယ်။

အကိုက်အခဲပျောက်ဆေး

အကိုက်အခဲပျောက်ဆေးများအချိန်ကြာသောက်ပါကလည်း အစာအိမ်အတွင်းရှိ အကျိအချဲွအလွှာကို ထိခိုက်ပျက်စီးစေနိုင်တယ်။ လူတိုင်းမှာ COX-1 နဲ့ COX-2 ဆိုတဲ့ အင်ဇိုင်းနှစ်မျိုးရှိပြီး ထိုအင်ဇိုင်းတွေက တစ်သျူးထိခိုက်မှုတွေဖြစ်စဉ် ခန္ဓါကိုယ်ကိုကာကွယ်ကုသနိုင်ဖို့ နာကျင်ခြင်းနဲ့ ရောင်ရမ်းခြင်းတွေဖြစ်စေတယ်။ အကိုက်အခဲပျောက်ဆေးတွေက ထိုအင်ဇိုင်းတွေကိုတားတာကြောင့် ခန္ဓါကိုယ်မှနာကျင်မှုတွေသက်သာရခြင်းဖြစ်ပါတယ်။

ဒါပေမယ့် COX-1 ဟာ အစာခြေစနစ်ကို အက်စစ်ဒဏ်မှကာကွယ်ပေးတဲ့ ကယ်မီကယ်တစ်မျိုးလည်းထုတ်ပေးသေးတယ်။ ဒါကြောင့် အကိုက်အခဲပျောက်ဆေးတွေရဲ့ အကြီးဆုံးဘေးထွက်ဆိုးကျိုးက အစာအိမ်၊ အူအနာဖြစ်ခြင်းဖြစ်တယ်။

အက်စစ်အထွက်များခြင်း

အစာအိမ်တွင်း အက်စစ်အထုတ်များခြင်း။ မျိုးရိုးဗီဇ၊ စိတ်ဖိစီးမှု၊ ဆေးလိပ်သောက်ခြင်း၊ အရက်စသော အစားအစာတချို့ကြောင့်ဖြစ်နိုင်တယ။် Zollinger-Ellison ရောဂါလို့ခေါ်တဲ့ ရှားပါးရောဂါတစ်မျိုးကလည်း အက်စစ်ထုတ်ခြင်း တက်စေပါတယ်။

ဓါတ်ကင်ခြင်း

တခြားကုသမှုအတွက် ဓါတ်ကင်ကုသခြင်းဟာလည်း အနာတွေဖြစ်စေနိုင်ပါတယ်။ ရေဒီယိုသတ္တိကြွဓါတ်ရောင်ခြည်တွေရဲ့ ဘေးထွက်ဆိုးကျိုးကြောင့်ဖြစ်တယ်။

ရောဂါရှာဖွေခြင်း၊ ကုသခြင်း

ရောဂါရှာဖွေဖို့အတွက် ခံစားရတဲ့လက္ခဏာတွေအပါအဝင် သောက်နေတဲ့ဆေးတွေအကြောင်းပါမေးမြန်းပါလိမ့်မယ်။

တခြားသောစစ်ဆေးမှုတွေလည်း လုပ်ရနိုင်ပါတယ်-

• pylori အတွက် Breath test, သွေးစစ်ခြင်း၊ ဝမ်းစစ်ခြင်း
• ဘေရီယမ်ဓါတ်မှန်
• မှန်ပြောင်းကြည့်ခြင်း
• အသားစစစ်ခြင်း

ကုသမှု

ကုသမှုမှာ ဆေးထိုးဆေးသောက်ခြင်းနဲ့ ခွဲစိတ်ခြင်းရှိနိုင်ပါတယ်။ သာမန်အနာအတွက်တော့ အက်စစ်ပမာဏနည်းစေတဲ့ ဆေး သို့ အစာခြေစနစ်နံရံကိုကာကွယ်ပေးသောဆေးများမှီဝဲခြင်းဖြင့်လုံလောက်ပါတယ်။

• H2 blockers.
• Proton pump inhibitors.
• ဆေးဆိုင်များတွင်ဝယ်ယူရရှိနိုင်သော antacid
• Cytoprotective ဆေးများ

Hello Health Group မှ အခြားသောဆေးဘက်ဆိုင်ရာအကြံဉာဏ်များ၊ ရောဂါရှာဖွေမှုများ၊ ကုသမှုများမပေးပါ။