(၂) အရက်သေစာနဲ့ မူးယစ်ဆေးဝါးကို ရှောင်ကြဉ်ပါ။
မကောင်းတဲ့အရာကြီးကို ဘာလို့လုပ်နေမှာလဲ ….. ဒီလိုပြောလေ့ရှိပါတယ်။ ဒါပေမယ့် လုပ်တဲ့သူတွေကလည်း ကောင်းလို့လုပ်တာနေမှာပါ။ ဘယ်လိုပဲဖြစ်ဖြစ် အရက်နဲ့ မူးယစ်ဆေးဝါးတွေဟာ သင့်ကျန်းမာရေးအတွက် ကောင်းကျိုးမပြုတာတော့ သေချာပါတယ်။
အရက်ကြောင်တဲ့ အချိန်မျိုး၊ ဆေးကြောင်နေတဲ့အချိန်မျိုးမှာ လူဟာ ဘာမဆိုလုပ်တတ်ပါတယ်။ သူများကို သတ်ဖို့ဝန်မလေးသလို ကိုယ့်ကိုယ်ကို သတ်သေဖို့လည်း မတွန့်ဆုတ်ပါဘူး။ Hallucination လို့ခေါ်တဲ့ ကယောင်ကတမ်း မြင်ယောင်၊ ကြားယောင်နေတဲ့ အာရုံတွေကြောင့် ကိုယ့်ကိုယ်ကို သတ်သေတာမျိုး ဖြစ်နိုင်တဲ့အတွက် အရက်သေစာနဲ့ မူးယစ်ဆေးဝါးတွေဟာလည်း ဘဝကူးကြောင်း အထောက်အပံ့တွေပါ။ လုံးဝရှောင်ကြဉ်သင့်ပါတယ်။
(၃) ရင်ဖွင့်ပါ။
လူဟာ ပေါင်းသင်းဆက်ဆံရေးသတ္တဝါပါ။ ခရီးဆောင်အိတ်ထဲ အဝတ်တွေ သွတ်ထည့်သလို သင့်ခံစားချက်တွေကို အတွင်းထဲမှာပဲ စုပြုံပိတ်လှောင်ထားလို့ မရပါဘူး။ အချိန်တစ်ခုရောက်ရင် ပေါက်ကွဲထွက်ကုန်ပါလိမ့်မယ်။ ဒီလို ပေါက်ကွဲထွက်တဲ့အချိန်ရောက်ရင် အခြားသူတွေကိုရော၊ မိမိကိုယ်ကိုပါ အန္တရာယ်ရှိပါတယ်။ ဒါကြောင့် သင့်ခံစားချက်တွေကို ဖွင့်ထုတ်လိုက်ပါ။ ရင်ဖွင့်ပါ။ မိတ်ဆွေအပေါင်းအသင်း၊ မိဘဆွေမျိုး၊ ချစ်သူရည်းစားလင်မယား၊ ညီအစ်ကိုမောင်နှမ ဘယ်လိုလူမျိုးကိုပဲဖြစ်ဖြစ် (သင်ယုံကြည်ရသူ၊ချစ်ခင်ရသူဆိုရင်) ရင်ဖွင့်ပါ။
ဗိုက်ထဲအရမ်းပြည့်လာတဲ့အခါ အန်ထုတ်လိုက်ရင် သက်သာသွားသလိုမျိုး သင့်ခံစားချက်တွေကို ရင်ဖွင့်ထုတ်လိုက်တဲ့အခါ အများကြီးနေလို့ကောင်းသွာတာကို တွေ့ရပါလိမ့်မယ်။ အဆိုတော် ချက်စတာဆိုရင်လည်း သူစိတ်ဓာတ်ကျနေကြောင်းကို ရေဒီယိုအင်တာဗျူးတွေမှာ ရိပ်ဖမ်းသံဖမ်းပြောခဲ့ဖူးသလို သူ့သီချင်းတွေမှာလည်း အရိပ်အရောင်တွေ တွေ့မြင်နိုင်ပါတယ်။ ချမ်းသာကြွယ်ဝအောင်မြင်ကျော်ကြားရှာတဲ့ ကျွန်တော်တို့ရဲ့ သူရဲကောင်းကြီး ချက်စတာဟာ ရင်ဖွင့်စရာ မိတ်ဆွေတော့ ဆင်းရဲရှာပုံရတာကို ဝမ်းနည်းစရာ တွေ့ရပါတယ်။
(၄) အကောင်းမြင်ပါ။
ဘယ်အရာကိုမဆို အကောင်းဖက်က မြင်ပါ။ ပြဿနာတိုင်းမှာ အဖြေရှိတယ်ဆိုတာကို နှလုံးသွင်းပါ။ တတ်နိုင်သမျှ စိတ်ကောင်းထားပါ။ သင့်ထက်နိမ့်ပါးသူတွေကို ကရုဏာထားပါ။ တန်းတူတွေကို မုဒိတာပွားပါ။ ချစ်သူခင်သူတွေကို မေတ္တာပေးပါ။ မုန်းသူ၊ကြည့်မရသူတွေကိုလည်း မေတ္တာပေးကြည့်ပါ။ ဘယ်လိုမှ မရနိုင်ရင်တောင် ဥပေက္ခာပြုလိုက်ပါ။ ဒါဆိုရင် သင်အများကြီး နေပျော်သွားပါလိမ့်မယ်။
(၅) ငါဟာ အသုံးဝင်တဲ့သူတစ်ယောက်ဖြစ်တယ်လို့ ရဲရဲကြီး ယုံကြည်ပါ။
မိမိကိုယ်ကို အသုံးမဝင်၊ အရေးမပါ၊ ဘယ်သူကမှ အလိုမရှိတော့တဲ့ လူတစ်ယောက်အဖြစ် ရှုမြင်သုံးသပ်လိုက်မိခြင်းဟာလည်း သတ်သေရခြင်းရဲ့ ထိပ်တန်းအကြောင်းရင်းတစ်ခုပါ။ ဒါကြောင့် သင်ဟာ အရေးပါနေဆဲ၊ အရာရောက်နေဆဲ၊ သင့်ကို လိုအပ်သူတွေ ရှိနေဆဲဆိုတဲ့ ခံယူချက်ကို ရဲရဲကြီး နှလုံးသွင်းပါ။
ချစ်သူ/အိမ်ထောင်ဖက်မရှိဘူးလား၊ သူငယ်ချင်း ရှိပါလိမ့်မယ်။ သူငယ်ချင်းတောင် မရှိဘူးလား၊ သင့်မိဘတွေရှိပါလိမ့်မယ်။ မိဘတွေ မရှိတော့ဘူးလား၊ သင်အိမ်ပြန်လာမှာ စောင့်နေတဲ့ ချစ်စဖွယ်ခွေးကလေး၊ ကြောင်ကလေးတစ်ကောင်ရှိနေပါဦးမယ်။ ခွေးတွေ၊ ကြောင်တွေ မမွေးထားဘူးလား၊ ဟုတ်ပြီ ပရဟိတလုပ်ပါ။ အားနည်းနေသူတွေ၊ဒုက္ခရောက်သူတွေကို ကူညီပါ။
သင်ကြုံတွေ့နေရတဲ့ ဒုက္ခသုက္ခတွေထက် ပိုဆိုးတဲ့အနေအထားတွေကို ရင်ဆိုင်နေရသူတွေ ရှိနေသေးကြောင်း သင်သိလာမှာဖြစ်တဲ့အပြင် လူသားပိုဆန်လာပါမယ်။ လူပိုပီသလာပါမယ်။ သင့်ကို လိုအပ်သူတွေရှိနေဆဲ၊ တစ်စုံတစ်ယောက်အတွက် သင်လုပ်ပေးနိုင်တာတွေ ရှိနေဆဲဆိုတဲ့ ခံစားမှုမျိုးကို ပြန်ရလာပြီး သတ်သေချင်တဲ့ အတွေးတွေ ပျောက်ကွယ်သွားပါလိမ့်မယ်။
ဘောလီးဝုဒ်ရဲ့ ဂန္တဝင် classic တစ်ခုလို့တောင် ပြောနိုင်တဲ့ “Three Idiots” ရုပ်ရှင်ကားကို အတော်များများ ကြည့်ဖူးပါလိမ့်မယ် (မကြည့်ဖူးရင်လည်း ကြည့်ကြည့်ပါ။ ရင်ထဲတစ်ခုခု ကျန်ခဲ့ပါမယ်)။ မိမိဝါသနာပါရာကို မလုပ်ရဘဲ မိဘအလိုကျ အင်ဂျင်နီယာအလုပ်ဇောက်ချလုပ်ရတော့မှာမို့ စိတ်ညစ်ပြီး သတ်သေသွားမှာစိုးတဲ့အကြောင်း မိခင်က သူ့သားကို ပြောတဲ့အခါ ဇာတ်ဆောင် ‘ဖာဟန်’ ပြန်ပြောတဲ့ စကားလေးနဲ့ ဒီဆောင်းပါးလေးကို အဆုံးသတ်ချင်ပါတယ်။
သူက ဘာပြောသလဲဆိုတော့ ဒီလိုသတ်သေမှာစိုးလို့ သူ့သူငယ်ချင်းက သူ့ပိုက်ဆံအိတ်ထဲကို မိဘနှစ်ပါးရဲ့ ဓာတ်ပုံထည့်ပေးထားပါတယ်တဲ့။ သူသတ်သေတဲ့ သတင်းကြားရတဲ့အခါ မိဘတွေရဲ့ ပြုံးနေတဲ့မျက်နှာ ဘယ်လိုဖြစ်သွားမလဲဆိုတာလေးကို တွေးမြင်ကြည့်ဖို့ပါတဲ့။
ဒါကြောင့် ကိုယ်ဟာ စိတ်အားငယ်တတ်၊စိတ်ဓာတ်ကျတတ်တယ်၊သတ်သေချင်တဲ့အတွေးတွေ မကြာခဏဖြစ်ပေါ်တတ်တယ်ဆိုရင် ပိုက်ဆံအိတ်ထဲမှာပဲဖြစ်ဖြစ်၊ကားထဲမှာပဲဖြစ်ဖြစ်၊ဖုန်း wall paper အနေနဲ့ပဲဖြစ်ဖြစ် ကိုယ်ချစ်ရ၊ခင်ရ၊မြတ်နိုးရဆုံးသူ (တွေ)ရဲ့ ဓာတ်ပုံလေးကို အမြဲသိမ်းထားပါ။
သတ်သေချင်တဲ့ အတွေးတွေပေါ်လာတိုင်း ဒီပုံလေးကို ထုတ်ကြည့်ပါ။ သင်သာသတ်သေသွားရင် သူတို့ဘယ်လိုခံစားရမလဲဆိုတာကို တွေးကြည့်၊မြင်ယောင်ကြည့်ရင်း အားတင်းပါ။ ဘဝကို အရှုံးမပေးပါနဲ့လို့ ပြောလိုက်ပါရစေ။
မှတ်ချက်များ
သင့်အတွေးများကို ဝေမျှပါ။
သင့်ကျန်းမာရေးအတွေးများကို Hello Sayarwonနဲ့ ဝေမျှလိုက်ပါ။
ဆက်သွယ်ရန် သို့မဟုတ် ဝင်မည်။ နှင့် ဝင်ရောက်ဆွေးနွေးပါမည်။