ဂေါ်ဖီ စားလို့ရမယ့် ကျန်းမာရေးအကျိုးကျေးဇူး

ဂေါ်ဖီ လို့ ပြောလိုက်ရင် အသုပ်တွေထဲ ထည့်စားတာ၊ ကြော်စားတာ၊ ခေါက်ဆွဲကြော်၊ ကြာဇံကြော်၊ ထမင်းကြော်တွေထဲ ထည့်စားတာကို ပြေးမြင်မယ်ထင်ပါတယ်။ မြန်မာလူမျိုးတွေရဲ့ အစားအစာ တော်တော်များများမှာ ပါတတ်တဲ့ ဂေါ်ဖီလေးက တဂျွတ်ဂျွတ်နဲ့ ဝါးလို့ကောင်းသလို ကျန်းမာရေး အတွက်လည်း အထောက်အကူပြုပေးပါတယ်။

ဂေါ်ဖီ မှာပါတဲ့ အာဟာရဓာတ်

သရေစာ အစားအစာကစလို့ နေ့စဉ် စားသုံးနေတဲ့ အစားအစာ တော်တော်များများမှာ ပါဝင်တတ်တဲ့ ဂေါ်ဖီထုပ်မှာ

• ကယ်လ်လိုရီ
• ကာဗိုဟိုက်ဒရိတ်
• အမျှင်ဓာတ်
• သကြားဓာတ်
• ပရိုတင်း
• ဗီတာမင် C
• ဗီတာမင် K
• ဗီတာမင် A
• ဗီတာမင် B6
• ကယ်လ်ဆီယမ်
• မဂ္ဂနိစ်
• ပိုတက်ဆီယမ်
• မဂ္ဂနီဆီယမ်
• ဖောလိတ် တို့ ပါဝင်နေပါတယ်။

ဂေါ်ဖီ ကပေးတဲ့ ကျန်းမာရေး

အသုပ်ထဲ ထည့်စားစား၊ အကြော်တွေထဲ ထည့်ထည့်၊ ဟင်းခါးပဲ ချက်သောက်သောက် စားလို့ကောင်းတဲ့ ဂေါ်ဖီက

ကင်ဆာ ကာကွယ်ပေးတယ်

ဂေါ်ဖီ မှာ sulforaphane ဒြပ်ပေါင်း ပါဝင်နေတာကြောင့် ကင်ဆာရောဂါကို တိုက်ဖျက်ပေးနိုင်ပါတယ်။ ကင်ဆာ မဖြစ်အောင် ကာကွယ်ဖို့အတွက်လည်း ဂေါ်ဖီထုပ်ကို စားပေးလို့ ရပါတယ်။

ဂေါ်ဖီက ကင်ဆာဆဲလ်တွေ မပွားအောင် အထိရောက်ဆုံး ကာကွယ်ပေးနိုင်ပါတယ်။ အထူးသဖြင့် အရေပြားကင်ဆာ၊ အစာရေမျိုကင်ဆာ၊ ဆီးကျိတ်ကင်ဆာ၊ ပန်ကရိယကင်ဆာတို့ကို ကာကွယ်ပေးပါတယ်။ ရင်သားကင်ဆာ ဖြစ်သူတွေအနေနဲ့ ကင်ဆာဆဲလ်တွေ ပြန့်ပွားတာကို ဟန့်တားနိုင်ဖို့လည်း အထောက်အကူပြုပေးပါတယ်။

နှလုံး ကျန်းမာစေတယ်

ဂေါ်ဖီ မှာပါတဲ့ anthocyanins က ကင်ဆာ မဖြစ်အောင် ကာကွယ်ပေးသလို နာကျင်ရောင်ရမ်းမှုကို သက်သာစေနိုင်တာကြောင့် နှလုံးသွေးကြောတွေကို ကျန်းမာစေပြီး နှလုံးကို သွေးစီးဆင်းမှု ကောင်းစေပါတယ်။

ဂေါ်ဖီထုပ်မှာ ဖလေဗာနွိုက် ပါဝင်နေတာကြောင့် ကျန်းမာရေးကို အထောက်အကူပြုပေးပါတယ်။ နှလုံးရောဂါကြောင့် သေဆုံးနိုင်ခြေကို လျှော့ချပေးသလို နှလုံးသွေးကြောဆိုင်ရာ ရောဂါတွေ မဖြစ်အောင် ကာကွယ်ပေးပါတယ်။ polyphenol ပါဝင်မှုက နှလုံးသွေးကြောဆိုင်ရာရောဂါတွေ မဖြစ်အောင် ကာကွယ်ပေးသလို နှလုံးသွေးကြောကျဉ်းရောဂါကို ကင်းစေနိုင်ပါတယ်။

နှလုံးသွေးကြောထဲမှာ အဆီတွေ စုပုံတာမျိုး မဖြစ်စေဖို့ ကာကွယ်ပေးသလို သွေးပေါင်ချိန်ကို ထိန်းညှိပေးပါတယ်။

ကိုယ်ခံအား ကောင်းစေတယ်

ဂေါ်ဖီထုပ်မှာ ဗီတာမင် C၊ ဗီတာမင် A တို့ ကြွယ်ဝစွာ ပါဝင်နေတာကြောင့် ကိုယ်ခံအားကို အကောင်းဆုံး အားဖြည့်ပေးနိုင်ပါတယ်။ ဒါတွေအပြင် ဂေါ်ဖီမှာ ခန္ဓာကိုယ် ကျန်းမာစေဖို့ အားဖြည့်ပေးတဲ့ အာဟာရဓာတ်များစွာ ပါဝင်နေပါတယ်။

အစာခြေစနစ် ကျန်းမာစေတယ်

ဂေါ်ဖီမှာ အစာခြေစနစ်ကို အားဖြည့်ပေးမယ့် ရေဓာတ် နဲ့ အမျှင်ဓာတ် ကြွယ်ဝစွာ ပါဝင်နေပါတယ်။ အူတွေကို လှုပ်ရှားမှု ကောင်းစေပြီး အူနံရံတွေကို အာဟာရဓာတ် ပြည့်ပြည့်ဝဝ စုပ်ယူနိုင်စေသလို ဝမ်းလည်း မှန်စေပါတယ်။ ကိုယ်တွင်းက အဆိပ်အတောက် ဖြစ်စေတဲ့အရာတွေကို ပြင်ပကို ဝမ်းအနေနဲ့ စွန့်ထုတ်ပေးပါတယ်။

အဝလွန်တာကို ကာကွယ်ပေးတယ်

အမျှင်ဓာတ် ပါဝင်နေမှုက အဆာခံနိုင်စေဖို့ အားဖြည့်ပေးပြီး အစား ခဏခဏ မစားမိအောင် ကာကွယ်ပေးတာကြောင့် အဝမလွန်အောင် ကာကွယ်ပေးပါတယ်။ ဝိတ်ချနေသူတွေ အတွက်လည်း အထူး သင့်တော်ပါတယ်။

သွေးတိုး ကျစေတယ်

ဂေါ်ဖီထုပ်က ပိုတက်ဆီယမ် ကြွယ်ဝစွာ ပါဝင်နေတာကြောင့် သွေးပေါင်ချိန်ကို အကောင်းမွန်ဆုံး ထိန်းညှိပေးပြီး သွေးမတိုးစေဖို့ ကာကွယ်ပေးသလို သွေးကြောတွေထဲမှာ သွေးစီးဆင်းမှု ကောင်းစေဖို့လည်း အကောင်းဆုံး အားဖြည့်ပေးပါတယ်။