ဗိုက်အောင့်တာ သက်သာပျောက်ကင်းစေတဲ့ သဘာဝနည်းလမ်းများ

လူတိုင်းဗိုက်အောင့်ဖူးကြပြီး ဗိုက်အောင့်စေတဲ့အကြောင်းရင်းတွေလည်း အများကြီးရှိပါတယ်။ ဒါပေမယ့် ဗိုက်အောင့်ခြင်းအများစုဟာ အန္တရာယ်ထူးထူးခြားခြားမရှိဘဲ ဘယ်လိုမျိုးထိထိရောက်ရောက်ကုသရမလဲဆိုတာသိရင် အလျင်အမြန်ပျောက်ကင်းသွားမှာပဲ ဖြစ်ပြီး ဒီလိုထိရောက်စွာကုသပေးနိုင်တဲ့ နည်းလမ်းလေးတွေဟာလည်း သင့်မီးဖိုချောင်ထဲမှာတင်ရှိနေပါတယ်။ အောက်မှာမျှဝေပေးချင်တာကတော့ ဗိုက်အောင့်ခြင်းကိုသက်သာအောင် အိမ်မှာပဲ အလွယ်တကူကုသပေးနိုင်တဲ့ သဘာဝဆေးနည်းလေးတွေပဲ ဖြစ်ပါတယ်။

ဂျင်း

ဟိုးအဘိုးအဘွားတွေလက်ထက်ကတည်းကစပြီး ဂျင်းဟာစွယ်စုံရအိမ်သုံးဆေးဝါး ဖြစ်ခဲ့တာကိုသိကြပါလိမ့်မယ်။ နာကျင်တာကအစပြုလို့ပျို့အန်မအီမသာဖြစ်တာတွေအထိ ဂျင်းကိုအသုံးပြုနိုင်ပါတယ်။ ဂျင်းဟာဗိုက်အောင့်ခြင်းအတွက် အင်မတန်အကျိုးရှိတဲ့သဘာဝဆေးနည်းတလက်ဖြစ်ကြောင်းကို မကြာသေးမီက ပြုလုပ်ခဲ့တဲ့သုတေသနလေ့လာချက်တွေအရ သိရှိခဲ့ရပါတယ်။ ဂျင်းဟာရောင်ရမ်းတာတွေကို သက်သာစေတဲ့သတ္တိရှိတဲ့အပြင် တခြားကျန်းမာရေးအကျိုးကျေးဇူးတွေအများအပြားကိုလည်း ပေးစွမ်းနိုင်တာမို့အစာကြေစေသလိုဗိုက်အောင့်တာကိုလည်း သက်သာစေပါတယ်။ တချို့တွေကဂျင်းနဲ့ပြုလုပ်ထားတဲ့သကြားလုံးလေးတွေ၊ ဖြည့်စွက်စာလေးတွေကို စားလေ့ရှိကြသလို တချို့ကျပြန်တော့လည်း ဂျင်းပြုတ်ရည်သောက်တာ ဒါမှမဟုတ် လက်ဖက်ရည်နဲ့ရောနှပ်ပြီး သောက်တာမျိုးကို ပိုကြိုက်နှစ်သက်ကြပါတယ်။ လူတကိုယ်အကြိုက်တမျိုးဆိုသလိုပေါ့။

ပူဒီနာ (ပူစီနံ)

ပူဒီနာမှာ menthol ဓါတ်ပါဝင်ပြီး အဆိုပါ menthol ဟာခံတွင်းအနံ့ကောင်းစေရုံသာမက သဘာဝအကိုက်အခဲပျောက်ဆေးတမျိုးလည်း ဖြစ်တာကြောင့် ပူဒီနာကိုပျို့အန်ခြင်းနဲ့ဗိုက်အောင့်ခြင်းတို့အတွက် တွင်ကျယ်စွာအသုံးပြုလေ့ရှိကြပါတယ်။ ဂျင်းနည်းတူ ပူဒီနာကိုလည်းပုံစံအမျိုးမျိုးနဲ့အသုံးပြုနိုင်ပါတယ်။ ပူဒီနာအရွက်ခပ်ထားတဲ့ရေနွေးကြမ်းပူပူလေးလုပ်သောက်လို့ရသလို သင်ကြိုက်နှစ်သက်ရာဟင်းလျာတွေထဲမှာလည်း ထည့်သွင်းချက်ပြုတ်နိုင်ပါသေးတယ်။ ဒါမှမဟုတ် ပူဒီနာအရွက်ကလေးကို အသာအယာဝါးစားနေရင်ကို အံ့ဩလောက်တဲ့ အာနိသင်တွေကိုရရှိနိုင်မှာ ဖြစ်ပါတယ်။ ပူဒီနာဟာအစာကြေစေသလို အစာစားချင်စိတ်ကိုလည်း ဖြစ်စေပါတယ်။ ဒါတင်မကသေးပါဘူး။ ဓမ္မတာလာစဉ်နာကျင်ကိုက်ခဲမှုတွေအတွက်လည်း ပူဒီနာဟာဆေးစွမ်းတလက် ဖြစ်ပါတယ်။

သံပုရာရည်နွေးနွေးလေး

အိုး သံပုရာရည်ဆိုပါလား။ ပူအိုက်လွန်းလှတဲ့နေ့မှာ အမောပြေသောက်စရာ ဖြစ်သလို ဗိုက်အောင့်နေစဉ်မှာလည်း ကယ်တင်ရှင် ဖြစ်ပါတယ်။ သံပုရာရည်ဟာဖျော်ဖို့ ဒါမှမဟုတ် သောက်ဖို့အလွယ်ကူဆုံးသောအရည်တမျိုးဆိုရင်လည်း မမှားပါဘူး။ ရေနွေးထည့်ထားတဲ့မက်ခွက်ထဲကို သံပုရာသီးတခြမ်းညှစ်ထည့်ပါ (သကြားနည်းနည်းလည်းထည့်ပါ)။ ဒါဆိုရင် ဗိုက်အောင့်ခြင်းကို သက်သာပျောက်ကင်းစေမယ့် အကောင်းဆုံးသောဖျော်ရည်တခွက်ကိုရရှိပါပြီ။ သတိထားရမယ့်အချက်က သံပုရာသီး ဒါမှမဟုတ် သကြားအလွန်အကျွံမထည့်မိဖို့ပဲ ဖြစ်ပါတယ်(တခြားအကျိုးသက်ရောက်မှုတွေ ဖြစ်လာစေနိုင်လို့ပါ)။

ဆားရေနွေးနွေးလေး

သင့်အိမ်မှာ ဂျင်း၊ ပူဒီနာ ဒါမှမဟုတ် သံပုရာသီးတခုမှ မရှိဖူးဆိုပါစို့။ မပူပါနဲ့။ ရေနွေးလေးတခွက်ရှိရုံနဲ့ အလုပ်ဖြစ်ပါတယ်။ ရနွေးနွေးလေးတခွက်နဲ့ ဆားလေးတဇွန်းစာလောက်ရှိရင် အိုကေပါပြီ။ အာနိသင် အကောင်းဆုံးရရှိနိုင်ဖို့အတွက် ဆားရည်နွေးနွေးလေးကို မြန်နိုင်သမျှ မြန်မြန်သောက်ချပါ။ ဒါပေမယ့် သင့်မှာသွေးတိုးရောဂါလိုမျိုး တခြားရောဂါတခုခုရှိနေမယ်ဆိုရင်တော့ ဒီနည်းကိုလုံးဝအသုံးမပြုသင့်ပါဘူး။

ပန်းသီး ဒါမှမဟုတ် ငှက်ပျောသီးနဲ့ ပြုလုပ်ထားတဲ့ဗနီဂါ

ဗနီဂါထဲမှာပါဝင်တဲ့အက်ဆစ်ဟာ သင့်အူလမ်းကြောင်းကို ရှင်းလင်းပေးနိုင်တဲ့အတွက် မကောင်းတဲ့ဘက်တီးရီးယားတွေကို ခန္ဓါကိုယ်ထဲကဖယ်ရှားပေးပြီး အကျိုးပြုဘက်တီးရီးယားတွေကို ဆက်လက်ရှင်သန်နေစေပါတယ်။ အချို့ကကြိုတင်ကာကွယ်တဲ့အနေနဲ့ဗနီဂါလက်ဖက်ရည်ဇွန်းနဲ့တဇွန်းကိုနေ့စဉ်သောက်လေ့ရှိကြပါတယ်။ တကယ်လို့ ဗနီဂါအရသာကို သင့်အနေနဲ့သိပ်မကြိုက်ဖူးဆိုရင်ဗနီဂါထဲကိုရေနဲ့ ပျားရည်အနည်းငယ်ရောစပ်ပြီးမှ ဖြည်းဖြည်းချင်းသောက်နိုင်ပါတယ်။

BRAT (ငှက်ပျောသီး၊ ဆန်၊ ပန်းသီအနှစ်နဲ့ပေါင်မုန့်မီးကင်) နဲ့ CRAP (ချယ်ရီသီး၊စပျစ်ခြောက်၊မန်မွန်သီးနဲ့ဆီးသီးခြောက်)

အထက်ဖော်ပြပါ အစားအစာတွဲဖက်မှုဟာ ဗိုက်အောင့်နေသူတွေအတွက် အသင့်တော်ဆုံးအတွဲအဖက် ဖြစ်ပါတယ်။ BRAT မှာပါဝင်တဲ့ အစားအစာတွေအားလုံးဟာ အမျှင်ဓါတ်အနည်းငယ်သာ ပါဝင်ပြီး သင့်အစာအိမ်ကိုထိခိုက်စေမယ့် ဆား ဒါမှမဟုတ် ငရုတ်သီးအစပ်တွေ လုံးဝမပါဝင်ပါဘူး။ ဒီအရသာသိပ်မပြင်းလှတဲ့ အတွဲအဖက်တွေဟာ သင်နေထိုင်မကောင်းဖြစ်နေတဲ့အချိန်မှာ ကျိန်းသေပေါက်စားပေးရမယ့် အစားအစာတွေဖြစ်ပါတယ်။ ဒါပေမယ့် တခြားအစားအစာတွေကိုလည်း စားဖို့လိုအပ်ပါသေးတယ်။ ပုံမှန်ထမင်းစားမယ့် အချိန်မှာ BRAT ကိုစားနိုင်ပြီး ထမင်းတနပ်နဲ့တနပ်ကြားအချိန်တွေမှာ ကျန်းမာရေးနဲ့ညီညွတ်တဲ့ သွားရည်စာအဖြစ် CRAP ကိုစားနိုင်ပါတယ်။ အမျှင်ဓါတ်အနည်းငယ်သာ ပါဝင်တဲ့အစားအစာတွေ ဖြစ်တဲ့အတွက် ဗိုက်အောင့်တာ၊ ပျို့အန်မအီမသာဖြစ်တာနဲ့ဝမ်းလျှောတာတွေကို သက်သာစေပါတယ်။ လေထတာ၊ ဝမ်းချုပ်တာ၊ မအီမသာဖြစ်တာ၊ ပျို့အန်တာ ဒါမှမဟုတ် အစာမကြေတာတွေဖြစ်နေရင် အဆိုပါအစားအစာတွေကို စားပေးခြင်းအားဖြင့်သက်သာရာရစေပါလိမ့်မယ်။ ဒီအစားအစာတွေနဲ့ဓါတ်မတည့်တာမျိုး ဒါမှမဟုတ် သူတို့ကြောင့် ပိုဆိုးသွားစေနိုင်တဲ့ရောဂါမျိုးတွေသင့်မှာ ရှိနေရင်တော့ မစားခင်မှာသင့်ဆရာဝန် ဒါမှမဟုတ်

အာဟာရပညာရှင်နဲ့ကြိုတင်တိုင်ပင်မေးမြန်းရမှာဖြစ်ပြီး သူတို့ကအကောင်းဆုံးသော အကြံဉာဏ်တွေကိုပေးပါလိမ့်မယ်။

Hello Health Group သည်ဆေးပညာအကြံပြုချက်များ၊ရောဂါရှာဖွေအတည်ပြုချက်များနှင့် ကုသမှုများမပြုလုပ်ပေးပါ။