အသည်းရောင် အသားဝါ Bပိုး ပျောက်အောင် ကုလို့ရသလား။

အသည်းရောင် အသားဝါ ပိုးတွေထဲမှာ B ပိုးနဲ့ C ပိုးက အဆိုးဆုံးပါ။ သူတို့နှစ်ခုကလည်း မျှမျှတတပါပဲ။ Bပိုးက ကာကွယ်ဆေးရှိပေမယ့် အပြီးပျောက်အောင် ကုလို့ မရပါဘူး။ Cပိုးက ကုသလို့ ရပေမယ့် ကာကွယ်လို့ မရပါဘူး။ ဒါကြောင့် ရောဂါကူးခဲ့ရင်တောင် C ပိုးကူးခံရသူတွေက ကုလို့ရတာပဲလေဆိုပြီး သိပ်စိတ်ဓာတ်မကျကြပါဘူး။ Bပိုး ပျောက်အောင် ကုမရဘူးဆိုပြီးတော့တာ Bပိုးရှိတဲ့သူတွေက စိတ်ဓာတ်ကျတတ်တာပါ။

အသည်းရောင် အသားဝါ Bပိုး ပျောက်အောင် ကုလို့ရသလား။

အသည်းရောင် အသားဝါ Bပိုး အထူးသဖြင့် နာတာရှည် အသည်းရောင် အသားဝါ Bပိုးကို အမြစ်ပြတ်ပျောက်အောင်တော့ ကုလို့ မရသေးပါဘူး။ ဒါပေမယ့် ဆေးပညာတွေ တိုးတက်လာတာကြောင့် အရင်ကထက် ပိုပြီး လူနာတွေအတွက် အခွင့်အလမ်းတွေ ပိုများလာပါတယ်။

Bပိုးကို  ကုသရတဲ့ အကြောင်းကတော့ နောက်ပိုင်းမှာ ပိုးကြောင့် အသည်းခြောက်တာ၊ အသည်းကင်ဆာဖြစ်တာကို လျှော့ချချင်လို့ပါ။ ဆိုလိုတာကတော့ Bပိုး ရှိနေသည့်တိုင် နောက်ဆက်တွဲပြဿနာကင်းကင်းနဲ့ သက်တမ်းစေ့ နေစေချင်တာကြောင့်ပါ။

လက်ရှိမှာ အသည်းရောင် အသားဝါ Bပိုးကို ဘယ်လိုကုသနေသလဲ။

Bပိုး ကူးစက်ခံရတာမှာ နှစ်ပိုင်းရှိပါတယ်။ လတ်တလော ကူးစက်ခံရတာလား။ အကူးခံရတာ ကြာပြီး နာတာရှည်အဆင့် ရောက်နေပြီလား ဆိုတာရယ်ပါ။

လတ်တလော ကူးစက်ခံရတာကို ဘယ်လိုကုသလဲ။

Bပိုး ကူးပြီးပြီးချင်း သိတယ်ဆိုတဲ့သူက ခပ်ရှားရှားပါ။ အများစုက လက္ခဏာ မပြကြသလို ပြခဲ့ရင်တောင် တုပ်ကွေးဆန်ဆန် လက္ခဏာလောက်ပဲ ပြကြပြီး ရက်ပိုင်းလောက်နေရင် သက်သာသွားကြပါတယ်။ တိုက်တိုက်ဆိုင်ဆိုင် အဲ့ဒီအချိန်မှာ ဆေးစစ်လို့ သိသွားခဲ့ရင်ရော။

ဆေးစစ်လိုက်လို့ Bပိုးတွေ့ရင် အရင်က ကူးတာလား။ လောလောလတ်လတ် ကူးထားတာလားဆိုတာ စစ်ဆေးပါတယ်။ လောလောလတ်လတ် ကူးထားတာဆိုရင် အသည်းအထူးကုနဲ့ ပြသပြီး အသည်းထိခိုက်မှု ရှိမရှိ စစ်ဆေးရပါမယ်။ ပိုးရှိတာကလွဲပြီး တခြားပြဿနာ မရှိဘူးဆိုရင်

• ပြည့်ပြည့်ဝဝ အနားယူပါ။
• ကိုက်တာခဲတာအတွက် အကိုက်အခဲပျောက်ဆေး သောက်ပါ။
• ဖျားတာရှိရင် လေဝင်လေထွက်ကောင်းတဲ့နေရာမှာ နေပါ။ အဖျားကျဆေးသောက်ပါ။ ပွပွချောင်ချောင် အဝတ်အစားတွေ ဝတ်ပါ။
• အသားယားတာရှိရင်တော့ ရေနွေးနဲ့ ရေချိုးတာရှောင်ပါ။ ရိုးရိုးရေနဲ့သာ ချိုးပါ။
• ပျို့တာ အန်တာ ရှိရင် အအန်ပျောက်ဆေး သောက်ပါ။

လောလောလတ်လတ် Bပိုးကူးထားတဲ့သူတွေကို အများအားဖြင့် လက္ခဏာသက်သာအောင်ပဲ ကုသလေ့ရှိပါတယ်။ အများစုကလည်း လပိုင်းလောက်နေရင် သက်သာသွားကြပါတယ်။

Bပိုးကူးခံရတာကို ဘာကြောင့် ဆေးတွေ မတိုက်လဲ။ Bပိုးက အသည်းကင်ဆာဖြစ်တတ်တယ်ဆို ဘာလို့ မကုပေးလဲဆိုပြီး တွေးနေမှာပါ။ Bပိုးကူးခံရသူအများစုက လပိုင်းလောက်နေရင် ပိုးတွေပျောက်သွားတတ်ပါတယ်။ Bပိုးကူးခံရတိုင်း လူတိုင်းက နာတာရှည် အသည်းရောင်အသားဝါ အဆင့်ကို ရောက်ကြတာ မဟုတ်ပါဘူး။ ဒါကြောင့် လပိုင်းလောက် စောင့်ကြည့်ပြီး သွေးပြန်စစ်ပါလိမ့်မယ်။ သွေးစစ်လို့ Bပိုးဆက်ရှိနေသေးတယ်ဆိုမှသာ ဆေးဆက်ကုဖို့ လိုပါလိမ့်မယ်။

နာတာရှည် အသည်းရောင် အသားဝါ Bပိုး ပျောက်အောင် ဘယ်လိုကုသလဲ။

လတ်တလော ပိုးကူးခံရပြီး ၆လကြာလို့ သွေးပြန်စစ်ကြည့်တာ ပိုးဆက်ရှိနေသေးရင်ဖြစ်ဖြစ်၊ ဆေးစစ်ရင်း ပိုးတွေ့လို့ နာတာရှည် ကူးခံထားရတာပဲဖြစ်ဖြစ် Bပိုးနဲ့ နောက်ဆက်တွဲ ပြဿနာတွေကို ရှောင်ဖို့ ဆေးကုဖို့ လိုပါတယ်။

အထူးသဖြင့်

C ပိုးနဲ့ မတူတာက အသည်းရောင် အသားဝါ Bပိုး ပျောက်အောင် ကုလို့မရသေးပါဘူး။ ဆေးတွေက ပိုးတွေကို ထိန်းပေးပြီး အသည်းမပျက်စီးအောင် ကာကွယ်ပေးပါတယ်။ Bပိုးကို ကုတဲ့အခါ တချို့တွေက တစ်သက်လုံး ဆေးသောက်ရတာတွေ ရှိပါတယ်။ ဆီးချိုတို့၊ သွေးတိုးတို့ ကုသလိုပေါ့။

ကုလို့ရတဲ့ နည်းတွေကတော့

• သောက်ဆေးတွေ

Entecavir, Tenofovir, Lamivudine, Adefovirနဲ့ Telbivudine စတဲ့ ဆေးတွေ အသုံးများပါတယ်။ ဒီဆေးတွေက ဗိုင်းရပ်စ်ကို တိုက်ခိုက်တဲ့အတွက် အသည်းပျက်စီးတာ နည်းသွားပါတယ်။ ဆေးတွေ အများကြီးရှိတဲ့အတွက် ဘယ်ဆေးက မိမိနဲ့ သင့်တော်သလဲ။ ဘယ်လိုဘေးထွက်ဆိုးကျိုးတွေ  ခံစားရနိုင်လဲ။ စျေးနှုန်း စတာတွေကို ဆရာဝန်နဲ့ တိုင်ပင်ပါ။

• ထိုးဆေး

 Interferon alfa-2b (Intron A) ဆိုတာကို သုံးလေ့ရှိကြပါတယ်။ အထူးသဖြင့် ငယ်ငယ်ရွယ်ရွယ်နဲ့ ပိုးကူးခံရပြီး အချိန်ကြာကြာ ကုသမှု မခံယူချင်တဲ့သူတွေ၊ နှစ်အနည်းငယ်အတွင်းမှာ ကိုယ်ဝန်ဆောင်ဖို့ စီစဉ်ထားကြတဲ့ အမျိုးသမီးလူနာတွေမှာ သုံးလေ့ရှိပါတယ်။ Interferonကို ကိုယ်ဝန်ဆောင်ချိန်မှာတော့ သုံးလို့ မရပါဘူး။  ဘေးထွက်ဆိုးကျိုးအနေနဲ့ ပျို့တာ၊ အန်တာ၊ အသက်ရှူရခက်တာ၊ စိတ်ကျတာတွေ ဖြစ်တတ်ပါတယ်။

• အသည်းအစားထိုးတာ

အသည်းရောင် အသားဝါ Bပိုး ရှိရုံတင် မဟုတ်ဘဲ ပိုးကြောင့် အသည်းပါ ပျက်စီးနေပြီဆိုရင်တော့ အသည်းအစားထိုးဖို့ ပြင်ဆင်ရတော့မှာပါ။ အသည်းအစားထိုးပြီးပေမယ့် Bပိုးအတွက် ဆေးတွေ ဆက်သောက်ဖို့ လိုကောင်းလိုနိုင်ပါတယ်။ မဟုတ်ရင် သွေးထဲက ပိုးတွေက အစားထိုးထားတဲ့အသည်းကို ထပ်ပြီး တိုက်ခိုက်ပါလိမ့်မယ်။