သင့်စိုးရိမ်မှုတွေက ဘာတွေလဲ။

close
မတိကျ
နားလည်ရခက်
အခြား

သို့မဟုတ် လင့်ခ်ကူးယူမည်

Prediabetes (အကြိုဆီးချို )

အဓိပ္ပါယ်ဖွင့်ဆိုချက်

Prediabetes (အကြိုဆီးချို ) ကဘာလဲ။

အကြိုဆီးချိုဆိုသည်မှ သွေးထဲ၌ သကြားဓါတ်များ ပုံမှန်ထက်မြင့်တက်နေသော်လည်း အမျိုးအစား ၂ ဆီးချိုဟု သတ်မှတ်နိုင်ရလောက်အောင် မမြင့်သေးသည့် အခြေအနေကိုဆိုလိုပါသည်။ သင့်၌ အကြိုဆီးချိုရှိလာပါက အစာစားပြီးနောက် အင်ဆူလင် လုံလောက်စွာမထုတ်နိုင်ခြင်း သို့မဟုတ် ခန္ဓါကိုယ်မှ အင်ဆူလင်ကို ကောင်းကောင်းမတုံ့ပြန်ခြင်းကြောင့် ဖြစ်နိုင်ပါသည်။

ကုသမှုမလုပ်ပါက အကြိုဆီးချိုမှ ၁၀ နှစ်အတွင်း အမျိုးအစား ၂ ဆီးချို ဖြစ်လာနိုင်ပါသည်။ အကြိုဆီးချိုသည် နှလုံးနှင့် သွေးကြောစနစ်အား အမျိုးအစား ၂ ဆီးချို မဖြစ်ခင်ကပင် ကြိုပျက်စီးထားစေနိုင်ပါသည်။

Prediabetes (အကြိုဆီးချို ) က ဘယ်လောက်အဖြစ်များသလဲ

ဒီရောဂါသည် အလွန်အဖြစ်များ၏။ ရောဂါဖြစ်ပွားနိုင်သော အချက်အလက်များကို လျှော့ချခြင်းအားဖြင့် စီမံနိုင်ပါသည်။ အချက်အလက်များ ထပ်မံသိရှိဖို့အတွက် ဆရာဝန်နှင့် တိုင်ပင်ဆွေးနွေးသင့်ပါသည်။

လက္ခဏာများ

Prediabetes (အကြိုဆီးချို ) ရဲ့လက္ခဏာတွေကဘာတွေလဲ

ဖြစ်ရပ်အများစုတွင် အကြိုဆီးချိုသည် လက္ခဏာမပြတတ်ပါ။ လက္ခဏာများ ပြလာပြီးဆိုလျှင်တော့ အောက်ပါတို့ကို မျှော်လင့်ထားရပါမည်။

  • ရေငတ်ခြင်း
  • မကြာခဏဆီးသွားခြင်း
  • မောပန်းလွယ်ခြင်း
  • အမြင်ေဝဝါးခြင်း

အကြိုဆီးချိုရှိသောလူများတွင် တူညီစွာဖြစ်တတ်သော လက္ခဏာတစ်ခုမှာ အသားရေအရောင်ပြောင်းခြင်း ဖြစ်ပါသည်။ အသားရောင်သည် ပိုနက်လာနိုင်ပြီး အထူးသဖြင့် ခြေချောင်းလက်ချောင်းများတွင် ဖြစ်လာပါသည်။ (Acanthosis nigricans)

အထက်တွင်ဖော်ပြထားသည့်အထဲမှာမပါဝင်သေးသော အခြားလက္ခဏာများလည်း ရှိနိုင်ပါသေးသည်။ အကယ်၍ကိုယ့်ဆီ၌ ရောဂါလက္ခဏာတစ်ခုခုများ ရှိနေမလားဆိုပြီး စိုးရိမ်နေမယ်ဆိုပါက ဆရာဝန်နှင့်ဆွေးနွေးတိုင်ပင်သင့်ပါသည်။

ဘယ်အချိန်မှာ ဆရာဝန်နဲ့ သွားရောက်တွေ့ဆုံသင့်သလဲ

သင့်၌ အောက်ဖော်ပြပါအချက်အလက်များထဲမှ တစ်ခုခုရှိခဲ့လျှင် သင့်ဆရာဝန်နှင့် ဆက်သွယ်သင့်သည်။

  • အဝလွန်နေလျှင် – ခန္ဓါကိုယ် အလေးချိန်ညွှန်းကိန်း ၂၅ အထက်ဆိုလျှင်
  • တက်ကြွမှုမရှိလျှင်
  • အသက် ၄၅ နှင့် အထက်
  • အမျိုးအစား ၂ ဆီးချို မိသားစုရာဇဝင်ရှိလျှင်
  • အာဖရိကန် အမေရိကန်ကပြား၊ စပိန် ပေါ်တူဂီ၊ အမေရိကန်အင်ဒီးယန်၊ အာရှ-အမေရိကန် သို့မဟုတ် ပစိဖိတ်အိုက်စလန်ဒါ လူမျိုးဆိုလျှင်
  • ကိုယ်ဝန်ဆောင်စဉ် ဆီးချိုဖြစ်လာလျှင် သို့မဟုတ် ကလေး ၉ ပေါင် (၄.၂ ကီလို) အထက် မွေးဖူးလျှင်
  • သင့်၌ အိတ်များစွာပါသောသားဥအိမ်ရောဂါ ဖြစ်ဖူးလျှင် – ထိုရောဂါကို ပုံမှန်ရာသီမလာခြင်း၊ အမွှေးထူခြင်း၊ အဝလွန်ခြင်းဖြင့် သိနိုင်ပါသည်။
  • သွေးတိုးရောဂါရှိလျှင်
  • ပြင်းအားများသော လစ်ပိုပရိုတင်း (HDL) ကိုလက်စထရောသည် 35 mg/dL (0.9 mmol/L)ရှိလျှင် သို့မဟုတ် ထရွိင်ဂလစ်စရိုက်လယ်ဗယ် 250 mg/dL (2.83 mmol/L) အထက်ဆိုလျှင်

အကြောင်းရင်းများ

Prediabetes (အကြိုဆီးချို ) ကိုဘာတွေကဖြစ်စေသလဲ

အကြိုဆီးချိုဖြစ်ရသည့်အကြောင်းရင်းအား သိပ္ပံပညာရှင်များ မသိရသေးပါ။ သို့သော်လည်း တစ်ချို့ကတော့ မျိုးရိုးဗီဇသည် ရောဂါဖြစ်နိုင်ချေ မြင့်မားသည့်အချက်တစ်ခုဖြစ်ကြောင်း ဆိုကြသည်။ အင်ဆူလင်ထုတ်လုပ်မှုအား ထိန်းချုပ်သည့် ဗီဇပျက်စီးရာမှ အင်ဆူလင်ကောင်းကောင်း မထုတ်နိုင်သောကြောင့်ဖြစ်ရခြင်းပင်။ ထို့ကြောင့် အင်ဆူလင်လယ်ဗယ်ကျနေသည့်နှင့် သွေးတွင်းသကြားဓါတ် တက်လာစေပါသည်။ အဆီများခြင်းကလည်း အကြိုဆီးချိုဖြစ်နိုင်စေပါသည်။

ဖြစ်နိုင်ခြေများ

ငါ့ဆီမှာ Prediabetes (အကြိုဆီးချို ) ဖြစ်နိုင်ခြေကိုဘာ်တွေက မြင့်တက်စေသလဲ

အကြိုဆီးချို ဖြစ်ပွားနိုင်ချေကိုမြင့်စေသော အကြောင်းရင်းများစွာရှိပါသည်။ ဥပမာအားဖြင့်

  • ကိုယ်အလေးချိန် – ကိုယ်အလေးချိန်တိုးခြင်းသည် အကြိုဆီးချိုဖြစ်သည် အန္တရာယ်ရှိသည့်အချက် ဖြစ်ပါသည်။ ကိုယ်ခန္ဓါကိုယ် အညွှန်းကိန်း ၃၅ ထက်မြင့်သော လူများပါဝင်ပါသည်။
  • ခါးဆိုဒ် – ခါးဆိုဒ်ကြီးြုခင်းသည် အင်ဆူလင် ခုခံနိုင်စွမ်းကို ပြသနေပါသည်။
  • လှုပ်ရှားမှုနည်းခြင်း – လှုပ်ရှားမှုနည်းလေလေ အကြိုဆီးချိုဖြစ်နိုင်ချေ များလေလေဖြစ်ပါသည်။
  • အသက်အရွယ် – ဆီးချိုသည် အသက်အရွယ်မရွေး ဖြစ်နိုင်သည်ဆိုသော်လည်း အကြိုဆီးချိုဖြစ်နိုင်ချေမှ အသက်ကြီးလာလျှင် အထူးသဖြင့် ၄၅ အထက်တွင် ပိုမြင့်လာပါသည်။
  • မိသားစုရာဇဝင် – မိဘ မောင်နှမတစ်ဦးဦးတွင် အမျိုးအစား ၂ ဆီးချို ဖြစ်ဖူးလျှင် အကြိုဆီးချို ဖြစ်နိုင်ချေ မြင့်တက်နေပါမည်။
  • လူမျိုး – ဘာရယ်ကြောင့်မသိရသော်လည်း အာဖရိကန် အမေရိကန်ကပြား၊ စပိန် ပေါ်တူဂီ၊ အမေရိကန်အင်ဒီးယန်၊ အာရှ-အမေရိကန် သို့မဟုတ် ပစိဖိတ်အိုက်စလန်ဒါ လူမျိုးဆိုလျှင် အကြိုဆီးချိုဖြစ်နိုင်ချေ မြင့်ပါသည်။
  • ကိုယ်ဝန်ဆောင်ဆီးချို – ကိုယ်ဝန်ဆောင်စဉ် ဆီးချိုဖြစ်ဖူးပါက နောက်ပိုင်းတွင် ဆီးချိုဆက်ဖြစ်နိုင်ချေ မြင့်မား၏။ ၄.၁ ကီလိအထက် ကလေးမွေးဖူးလျှင်လည်း ဆီးချိုဖြစ်နိုင်ချေ များပါသည်။
  • အိတ်များစွာပါသော သားဥအိမ်ရောဂါ – ထိုရောဂါရှိသောအမျိုးသမီးများတွင် ရာသီပုံမှန်မလာခြင်း၊ အမွှေးထူခြင်း၊ အဝလွန်ခြင်းဖြစ်နိုင်ပြီး ဆီးချိုဖြစ်နိုင်ချေ များ၏။
  • အိပ်စက်ခြင်း – အိပ်ပျော်စဉ် အသက်ရှုရပ်ခြင်းသည် အိပ်စက်မှုအရည်အသွေးကို လျော့ကျစေပါသည်။ နေ့အလုပ် ညအလုပ် ပြောင်းလုပ်ရသောလူများတွင် အိပ်စက်မှုဆိုင်ရာ ပြဿနာများဖြစ်နိုင်ပြီး အကြိုဆီးချို သို့မဟုတ် အမျိုးအစား ၂ ဆီးချို ဖြစ်လာနိုင်ပါသည်။

ရောဂါအဖြေရှာခြင်းနှင့် ကုသမှု

ယခုဖော်ပြထားသော အချက်အလက်များကို ဆေးပညာအကြံပေးမှုနေရာတွင် အစားထိုးရန်မသင့်တော်ပါ။ ပိုမိုသောအချက်အလက်များရရှိရန်အတွက် ဆရာဝန်နှင့် အမြဲတမ်းတိုင်ပင်ပါ.

Prediabetes (အကြိုဆီးချို ) ကို ဘယ်လိုအတည်ပြုပါသလဲ

အကြိုဆီးချိုအား အတည်ပြုရာတွင် အသုံးပြုနိုင်သည့် စစ်ဆေးမှုများ ရှိပါသည်။

  • A1C စစ်ဆေးမှု (HbA1C ဟေမိုဂလိုဘင် သို့မဟုတ် ဂလိုင်ဂိုဂျင်ထိန်း ဟေမိုဂလိုဘင် စစ်ဆေးခြင်းဟုလည်း ခေါ်သည်) ဤစစ်ဆေးမှုသည် သင့်သွေးအတွင်းမှ ၂-၃ လအကြာ သကြားပမာဏရာခိုင်နှုန်းကို တိုင်းတာခြင်းဖြစ်သည်။ ပုံမှန် A1C မှာ ၅.၇ % ရှိသင့်ပါသည်။ A1C လယ်ဗယ် ၅.၇ နှင့် ၆.၄ %ကို အကြိုဆီးချိုဟု ယူဆပါသည်။ နှစ်ကြိမ်ခွဲတိုင်းပြီးနောက် ၆.၅% နှင့် အထက်ရပါက သင့်၌ ဆီးချိုရှိနေကြောင်း သိနိုင်ပါသည်။
  • အစာရှောင်ပြီးသွေးတွင်းသကြားဓါတ် စစ်ဆေးခြင်း – တစ်ညတာ အစာရှောင်ခိုင်းပြီး သင့်သွေးနမူနာကို ဆရာဝန်မှယူမည်ဖြစ်သည်။ သွေးတွင်းသကြားလယ်ဗယ် ၁၀၀ – ၁၂၅ mg/dL (5.6 – 6.9 mmol/L) ဆိုလျှင် အကြိုဆီးချိုဟု သတ်မှတ်နိုင်၏။
  • Oral glucose tolerance စစ်ခြင်း – ဤစစ်ဆေးမှုသည် တစ်ညတာ အစာရှောင်ပြီးနောက် သွေးတွင်းသကြားဓါတ်ကို တိုင်းတာခြင်းဖြစ်သည်။ စစ်ဆေးပြီးနောက်တွင် သကြားရည်တစ်ခွက် သောက်ပြီး ခန္ဓါကိုယ်တွင် ပျံ့နှံ့မည့်အချိန်တစ်ခု ထပ်စောင့်ရပါမည်။ ထို့နောက်တွင်မှ နောက်တစ်ခေါင် သွေးထပ်စစ်ပါလိမ့်မည်။ သွေးတွင်းသကြားဓါတ်လယ်ဗယ် ၁၄၀ – ၁၉၉ mg/dL (7.8 – 11.0 mmol/L) ဆိုလျှင် အကြိုဆီးချိုဟု ယူဆနိုင်ပါသည်။

အထက်ပါစစ်ဆေးမှုအားလုံးတွင် ကိန်းဂဏန်းများ မြင့်လေလေ နောက်ပိုင်းတွင် အမျိုးအစား ၂ ဆီးချို ဖြစ်နိုင်ချေ များလေလေဖြစ်ပါသည်။

Prediabetes (အကြိုဆီးချို ) ကို ဘယ်လိုကုသပါသလဲ

သင့်၌ အကြိုဆီးချိုရှိနေလျှင် ပထမဆုံးကုသမှုသည် လူနေမှုပုံစံပြောင်းလဲခြင်းပင်ဖြစ်သည်။ အစားအသောက်ပြောင်းခြင်းနှင့် လေ့ကျင့်ခန်းပုံမှန်လုပ်ခြင်းတို့ ပါဝင်ပါသည်။ အကြိုဆီးချိုအား စီမံတိုက်ထုတ်နိုင်မည့် အဓိက ပုံစံနှစ်မျိုးပြောင်းလဲခြင်းမှာ လေ့ကျင့်ခန်းပုံမှန်လုပ်ခြင်းနှင့် ဝိတ်ချခြင်းဖြစ်ပါသည်။ အဝလွန်သူဖြစ်ပါက အကြိုဆီးချိုမှ ဆီးချိုအဆင့်ထိ ပြောင်းနိုင်ချေ ပိုများပါသည်။

စစ်ဆေးမှုရလဒ်များက ဆီးချိုခေါ်နိုင်သည့်အထိ မဟုတ်သော်လည်း မြင့်နေသည်ဆိုပါက အင်ဆူလင်လယ်ဗယ်ကိုထိန်းရန် ဆေးလိုအပ်နိုင်ပါသည်။ အသုံးများသော အကြိုဆီးချိုဆေးများ မက်ဖော်မင် (Glucophage) ဖြစ်၏။

လူနေမှုပုံစံပြောင်းလဲခြင်းနှင့် အိမ်သုံးကုထုံးများ။

လူနေမှုပုံစံပြောင်းလဲခြင်းနဲ့ အိမ်သုံးကုထုံးတွေအသုံးပြုခြင်းက အကြိုဆီးချို ကို ကုသရာမှာ ဘယ်လိုအထောက်အကူပြုနိုင်မလဲ။

အောက်ဖော်ပြပါ လူနေမှုပုံစံများနှင့်အိမ်သုံးကုထုံးများက သင့်အနေဖြင့် အကြိုဆီးချို ကိုကုသတဲ့နေရာနှင့် လိုက်လျောညီထွေဖြစ်အောင်နေသောနေရာများတွင် အကူအညီပေးနိုင်ပါသည်။

ဆေးလိပ်ဖြတ်ပါ။

ကိုယ်အလေးချိန်အား အန္တရာယ်ကင်းသည့်နည်းဖြင့် ချပါ။ အလေးချိန် ၅%လောက် ချနိုင်လျှင်ကို ပြောင်းလဲမှုအများကြီး ဖြစ်နေပါပြီ။

သွေးတွင်းသကြားဓါတ်အား အပင်ထွက်ပစ္စည်းများဖြင့် ထိန်းခြင်းကို အသုံးများကြ၏။ အသုံးများသော အပင်ပစ္စည်းများမှ သစ်ဂျပိုး၊ ခရိုမီယမ်၊ ကိုအင်ဇိုင်း Q10၊ ဂျင်ဆင်း၊ ဂလူကိုမန်နာ၊ ဂူအာသစ်စေး၊ ဂျင်နီမာ၊ မဂ္ဂနီစီယမ်၊ ကျားလျှာပင်နှပ်၊ ပဲပိစပ်နှင့် စတီးဗီးယားပင် စသည်တို့ဖြစ်ပါသည်။ ထိုထဲမှ တစ်ချို့သည် စစ်ဆေးမှုများပြုလုပ်ထားသည်ဆိုသော်လည်း အာနိသင်ရှိကြောင်း သက်သေပြချက်များ တိတိကျကျမရှိပါ။

အကယ်၍သင့်မှာ မေးခွန်းတွေရှိမယ်ဆိုလျှင် သင့်အတွက်သင့်တော်သော အဖြေရှာဖွေနိုင်ဖို့ ဆရာဝန်နှင့်ဆွေးနွေးတိုင်ပင်သင့်ပါသည်။

Hello Health Group သည် ဆေးပညာအကြံပြုချက်များ၊ ရောဂါရှာဖွေမှုများနှင့် ကုသမှုများကို မပြုလုပ်ပေးပါ

health-tool-icon

ခန္ဓာကိုယ် ထုထည်ညွှန်းကိန်း တွက်ချက်ခြင်း (BMI) ။

ခန္ဓာကိုယ် ထုထည်ညွှန်းကိန်း တွက်ချက်ခြင်း (BMI) ကို အသုံးပြုပြီး ကျန်းမာတဲ့ ကိုယ်အလေးချိန် ရှိရဲ့လားဆိုတာကို တွက်ချက်ပါ။ ဒီကျန်းမာရေး ကိရိယာကို အသုံးပြုပြီး ကလေးရဲ့ (BMI) ကိုလည်း တွက်ချက်လို့ ရပါတယ်။

အမျိုးသား

အမျိုးသမီး

Hello Health Group သည် ဆေးပညာအကြံဉာဏ်များ၊ ရောဂါရှာဖွေမှုများနှင့် ကုသမှုများ မပြုလုပ်ပေးပါ။

ရင်းမြစ်များ
စာရေးသူ ဓာတ်ပုံbadge
Dr. Hlaing Min Ko Ko မှ ရေးသားသည်။ 05/11/2021 တွင် ပြန်လည်ပြင်ဆင်ခဲ့သည်။
Dr. Kaung Thar မှ အချက်အလက် စစ်ဆေးထားပါသည်။