သင့်စိုးရိမ်မှုတွေက ဘာတွေလဲ။

close
မတိကျ
နားလည်ရခက်
အခြား

သို့မဟုတ် လင့်ခ်ကူးယူမည်

COVID_19 ကာလမှာ မဖြစ်မနေ ဆောင်ထားဖို့လိုမယ့် အရာတွေ

ကမ္ဘာ့ကျန်းမာရေးအဖွဲ့ကြီး (WHO) က မတ်လ ၁၁ ရက်နေ့က ကမ္ဘာ့ကပ်ရောဂါအဖြစ် ထုတ်ပြန်ကြေညာခဲ့တဲ့ COVID_19 ဖြစ်ပွားနေချိန်မှာ ကိုယ်တိုင်ရော မိသားစုဝင်တွေပါ ရောဂါဘေးကနေ ကင်းဝေးနိုင်ဖို့ အရာရာကို ဂရုစိုက်နေရမယ် ထင်ပါတယ်။ ကာကွယ်ဆေးရော ကုသဆေးပါ မရှိသေးတဲ့ ကိုဗစ်ရောဂါကို ကာကွယ်ဖို့ အကောင်းဆုံး နည်းလမ်းက ကြိုတင်ကာကွယ်တာဆိုတော့ အရာရာကို သတိထားတာက မမှားပါဘူး။

ဒီလိုအရာရာကို ဂရုစိုက်နေရချိန်မှာ ကိုယ်တိုင်ကိုရော မိသားစုကိုပါ ရောဂါ အန္တရာယ်ကနေ ကာကွယ်ဖို့အတွက် ဘာတွေကို ဆောင်ထားသင့်တယ် ထင်လဲ။ ဘာတွေကိုများ ဂရုစိုက်ဖို့ လိုမယ်ထင်လဲ။

COVID_19 အန္တရာယ် မိမိကစ ကာကွယ်ပါ

လူတစ်ယောက်ကနေတစ်ယောက်ကို လျင်လျင်မြန်မြန် ကူးစက်နေတဲ့ ကူးစက်မြန် ကိုရိုနာဗိုင်းရပ်စ်ကို ကာကွယ်ဖို့ဆိုရင် အရေးအ​ကြီးဆုံးက ကိုယ်ခံအား ကောင်းအောင် လုပ်ဆောင်ဖို့ပါ။ ကိုယ်ခံအားကောင်းမှ ရောဂါပိုးကို ကာကွယ်နိုင်မှာဖြစ်သလို မတော်တဆ ကူးစက်ခဲ့ရင်လည်း တိုက်ထုတ်နိုင်မှာပါ။ ဒီတော့ ကိုဗစ် ဗိုင်းရပ်စ် ကူးစက်မခံရစေဖို့ ဒီအချက်လေးတွေကို လိုက်နာစေချင်ပါတယ်။

ကိုဗစ်ကာလမှာ လိုက်နာရမယ့် အချက်တွေက ဘာတွေလဲ…………

အာဟာရပြည့်ဝအောင်စားပါ – နေ့တိုင်း အရောင်အသွေးစုံလင်စွာနဲ့ အာဟာရမျှတတဲ့ အစားအသောက်ကို တစ်နေ့ ၃ ကြိမ် စားပေးပါ။

ရေများများသောက်ပါ – ခန္ဓာကိုယ်ကျန်းမာနေစေဖို့ လိုအပ်တဲ့ ရေဓာတ်ပြည့်ဝဖို့အတွက် ရေများများသောက်ဖို့ လိုပါမယ်။

ကိုယ်လက်လှုပ်ရှားမှု လုပ်ပါ – တစ်နေ့တာမှာ အရွယ်ရောက်ပြီးသူတစ်ယောက်အနေနဲ့ ကိုယ်ခံအား ကောင်းစေဖို့ အနည်းဆုံး ၁ နာရီလောက် ကိုယ်လက်လှုပ်ရှားမှု လုပ်ပေးပါ။ အခုချိန်က Gym သွားဖို့အဆင်မပြေတာကြောင့် နေအိမ်မှာတင် ကိရိယာလွတ် လေ့ကျင့်ခန်းတွေ လုပ်ပေးပါ။

အိပ်ရေး ဝဝအိပ်ပါ – ညတိုင်းမှာ အနည်းဆုံး အိပ်စက်ချိန် ၈ နာရီ ရှိနေစေဖို့ ဂရုပြုပါ။ ဒီလိုပြောရတာက ပြည့်ဝတဲ့ အိပ်စက်ချိန်က ကိုယ်ခံအားကောင်းစေဖို့ အကောင်းဆုံး ထောက်ပံ့ပေးနိုင်လို့ပါ။

တစ်ကိုယ်ရေ သန့်ရှင်းရေးဂရုစိုက်ပါ – နေ့တိုင်း ရေချိုးတာ၊ လက်ဆေးတာကစလို့ လိုအပ်တဲ့ တစ်ကိုယ်ရေသန့်ရှင်းရေးတွေကို သေချာလေး ဂရုစိုက်ပါ။ တစ်ကိုယ်ရေ သန့်ရှင်းရေးက ကျန်းမာရေးအပေါ် အများကြီး သက်ရောက်နိုင်တာကြောင့်ပါ။

လူစူလူဝေးကို ရှောင်ပါ – လူစုလူဝေးက ရောဂါကူးစက်နိုင်ခြေကို မြင့်တက်စေနိုင်ပါတယ်။ ဒါကြောင့် အခုလို ကာလမှာ ဖြစ်နိုင်ရင် နေအိမ်မှာပဲနေပါ။ လူစုလူဝေးဖြစ်တဲ့ နေရာတွေကို မသွားပါနဲ့။

ဒီအချက်တွေအပြင် ကိုဗစ်ဗိုင်းရပ်စ်ကို ကာကွယ်ဖို့ မဖြစ်မနေ ဆောင်ထားဖို့ လိုမယ့်အရာတွေ ရှိပါသေးတယ်။ ဒါတွေက ဘာတွေများဖြစ်မလဲဆိုတာအတူတူကြည့်လိုက်ရအောင်လား။

ကိုဗစ် ကာလမှာ မဖြစ်မနေဆောင် ထားဖို့လိုမှာက ဘာတွေဖြစ်မလဲ…………

အခုလိုမျိုး ကိုဗစ်ကာလမှာ ကိုယ်တိုင်ကိုရော မိသားစုဝင်တွေကိုပါ ရောဂါပိုး မကူးစက်စေဖို့ဆိုရင် ဒီပစ္စည်းလေးတွေကို ဆောင်ထားဖို့လိုပါမယ်။

ဆပ်ပြာ – အခုချိန်မှာ ကိုဗစ်ကို ကာကွယ်နိုင်မယ့် အထိရောက်ဆုံး နဲ့ အလွယ်ကူဆုံးနည်းလမ်းက လက်ဆေးတာပါ။ ဒါကြောင့် အပြင်ကပြန်လာတိုင်း၊ ညစ်ပေတဲ့ အရာတွေကို ထိတွေ့မိတိုင်း လက်မှာ ပေကျံနေတဲ့ ရောဂါပိုးတွေကို အကောင်းဆုံး တိုက်ဖျက်နိုင်ဖို့အတွက် ရေနဲ့ဆပ်ပြာကို သုံးပြီး လက်ကို စက္ကန့် ၂၀ ကြာဆေးကြောနိုင်စေဖို့ ဆပ်ပြာက မဖြစ်မနေလိုအပ်မှာပါ။

နှာခေါင်းစည်း– ကိုဗစ် ရောဂါပိုး မဝင်ရောက်စေဖို့ဆိုရင် အသက်ရှူလမ်းကြောင်းကို သေချာလေး ကာကွယ်ဖို့ လိုပါမယ်။ ဒီလို ကာကွယ်ဖို့ဆိုရင်တော့ အပြင်ထွက်တဲ့အခါတိုင်း နှာခေါင်းစည်းက မဖြစ်မနေ တပ်ဆင်ဖို့လိုမှာပါ။

မျက်နှာဖုံး (Face Shield) – မျက်လုံးထဲမှာ ကိုဗစ်ရောဂါပိုးက ရှင်သန်နေနိုင်တယ်ဆိုတဲ့ တွေ့ရှိချက်အရ ရောဂါပိုး မကူးစက်စေဖို့ဆိုရင် မျက်လုံး၊ နှာခေါင်း နဲ့ ပါးစပ်တွေကို မထိတွေ့စေဖို့ လိုမယ်။ ဒါ့အပြင် ရောဂါပိုး ကူးစက်ခံရနိုင်တဲ့နေရာတွေကို သွားရမယ်ဆိုရင် မျက်လုံးထဲကို မတော်တဆ ရောဂါပိုး ဝင်ရောက်တာမျိုုး မဖြစ်စေဖို့ မျက်နှာဖုံး (Face Shield) ကို တပ်ဆင်ဖို့လိုမှာပါ။

ရေမလို လက်သန့်ဆေးရည် – ရောဂါပိုး ကူးစက်ခံရတာကို ကာကွယ်ဖို့ဆိုရင် တစ်ခုခုကို ကိုင်တွယ် ထိတွေ့ပြီးတိုင်း အယ်လ်ကိုဟော ၆၀ ရာခိုင်နှုန်းနဲအထက်ပါတဲ့ ရေမလိုလက်သန့်ဆေးရည်ကို သုံးပြီး ဆေးကြောရပါမယ်။ ဒါမှ ရောဂါပိုး ကူးစက်ခံရနိုင်ခြေကို လျှော့ချနိုင်မှာပါ။

ပိုးသတ်ဆေးရည် – နေအိမ်နဲ့ အပြင်ကနေပြန်လာတဲ့အခါ ယူဆောင်လာတဲ့ အသုံးအဆောင်တွေကို ပိုးသတ်သန့်စင်ဖို့အတွက် Dettol လိုမျိုး ပိုးသတ်ဆေးရည်ကို ဆောင်ထားတာက အဆင်ပြေပါတယ်။ ပိုးသတ်ဆေးရည်မရှိလည်း စိတ်မပူပါနဲ့။ ဆပ်ပြာရည်နဲ့ ဆေးလည်း ရလဒ်က အတူတူပါပဲ။

သောက်ရေဗူး – အပြင်သွားတဲ့အခါတိုင်းမှာ ကိုယ်ပိုင်ရေဗူးလေး ယူဆောင်သွားပေးပါ။ အသက်ရှူလမ်းကြောင်း ကျန်းမာစေဖို့က ရေဓာတ်ပြည့်ဝနေဖို့ လိုပါမယ်။ ဒါကြောင့် ရေဓာတ်ပြည့်ဝနေစေဖို့ ရေဆာတိုင်း သောက်နိုင်ဖို့အတွက် ရေဗူးလေးကလည်း မရှိမဖြစ် လိုအပ်မှာပါ။

အခုပြောပြခဲ့တဲ့ အချက်တွေကို သေချာလေး ဂရုစိုက်လို့ ကိုဗစ်ကာလမှာ ကိုယ်တိုင်ရော မိသားစုကျန်းမာရေးကိုပါ ဂရုစိုက်လိုက်ပါ………..

Hello Health Group သည် ဆေးပညာ အကြံပြုချက်များ၊ ရောဂါရှာဖွေအတည်ပြုချက်များနှင့် ကုသမှုများ မပြုလုပ်ပေးပါ။

Verifying...

Hello Health Group သည် ဆေးပညာအကြံဉာဏ်များ၊ ရောဂါရှာဖွေမှုများနှင့် ကုသမှုများ မပြုလုပ်ပေးပါ။

ရင်းမြစ်များ

COVID-19 (Coronavirus) Prevention Tips https://www.medicinenet.com/covid-19_prevention_tips/article.htm Accessed Date 29 April 2020

Coronavirus (COVID-19) Prevention: 12 Tips and Strategies https://www.healthline.com/health/coronavirus-prevention Accessed Date 29 April 2020

How to Protect Yourself & Others https://www.cdc.gov/coronavirus/2019-ncov/prevent-getting-sick/prevention.html Accessed Date 29 April 2020

စာရေးသူ ဓာတ်ပုံbadge
Aye Thi Mon မှ ရေးသားသည်။ 03/01/2022 တွင် ပြန်လည်ပြင်ဆင်ခဲ့သည်။
Hello Sayarwon Panel မှ အချက်အလက် စစ်ဆေးထားပါသည်။