ညဉ့်မနက်ခင် စောစော အိပ်စက် ရင် သင် အရမ်းကျန်းမာလာမယ်ဆိုတာ သိပါလေစ

ညဉ့်မနက်ခင် စောစော အိပ်စက် ရင် သင် အရမ်းကျန်းမာလာမယ်ဆိုတာ သိပါလေစ …. အိပ်စက် ခြင်းဟာ လူ့ကျန်းမာရေးနဲ့ အမြဲဆက်စပ်နေတတ်ပါတယ်။ လူတစ်ယောက်ကျန်းမာရွှင်လန်းစွာ ရှင်သန်နေထိုင်ချင်တယ်ဆိုရင် အိပ်စက်ချိန်ကို သတိထားဖို့ လိုအပ်မှာပါ။

ပုံမှန်အားဖြင့် လူတစ်ယောက်ဟာ ည ၉ နာရီနဲ့ ၁၀ နာရီဝန်းကျင်တွေမှာ အိပ်စက်ဖို့ ကျွမ်းကျင်သူတွေက တိုက်တွန်းကြပါတယ်။ ဒီအချိန်မှာစတင်အိပ်စက်ပြီး ပျမ်းမျှ ၆-၈ နာရီလောက် အိပ်စက်ပေးဖို့လည်း အကြံပေးတတ်ကြပါတယ်။

အကြောင်းကတော့ အိပ်ရာဝင်နောက်ကျခြင်းနဲ့ အိပ်ရေးပျက်ခြင်းတို့ဟာ ဆက်စပ်နေတာကြောင့်ပါ။ အိပ်ရေးမဝဘူးဆိုရင် သင့်ကျန်းမာရေးဟာလည်းထိခိုက်လာနိုင်ပါတယ်။ ပြောင်းပြန်အနေနဲ့ အိပ်ရာစောစောဝင်ပြီး အိပ်ရေးဝဝအိပ်မယ်ဆိုရင် သင့်ကျန်းမာရေးကို အကျိုးရှိစေမှာပါတဲ့။

ညဉ့်မနက်ခင် စောစော အိပ်စက် ရင် သင် အရမ်းကျန်းမာလာမယ်ဆိုတာ သိပါလေစ

တကယ်လို့သင်သာ သန်းခေါင်မတိုင်ခင် ဒါမှမဟုတ် ည ၉ နာရီနဲ့ ၁၀ နာရီအကြားမှာ ပုံမှန် အိပ်စက်မယ်ဆိုရင် အောက်ပါ အကျိုးကျေးဇူးတွေ ရလာမှာပါ။

၁။ ကိုယ်အလေးချိန်ထိန်းပေးနိုင်တယ် – ညဉ့်နက်မှ အိပ်လေလေ ကိုယ်အလေးချိန်တိုးလေလေပါ။ ဒါကြောင့် စောစောစီးစီးအိပ်ရာဝင်တာက သင့်ကို ကိုယ်အလေးချိန် မတက်အောင် ထိန်းပေးနိုင်ပါတယ်။

၂။ အိပ်မက်ဆိုးတွေ ကင်းဝေးစေမယ် – ညည အိပ်မက်ဆိုးတွေ မက်တက်သူတွေဟာ ညဉ့်နက်သန်းခေါင်မှ အိပ်စက်တတ်သူတွေလို့ လေ့လာချက်တွေကဆိုပါတယ်။ ညဉ့်နက်မှ အိပ်ယာဝင်ခြင်းဟာ stress hormone တွေကို တိုးပွားစေတာမို့ ခုလိုအိပ်မက်ဆိုးတွေ၊ ဘီလူးစီးတာတွေဖြစ်လာစေတာဖြစ်ပါတယ်။

၃။ ပိုပြီး ပျော်ရွှင်စေမယ် – အိပ်ရာဝင်တာစောပြီး အိပ်ချိန်လုံလောက်တဲ့သူတွေဟာ အိပ်ရာထရင်လည်း ကြည်လင်လန်းဆန်းနေတတ်ပါတယ်။ စိတ်လန်းဆန်းတက်ကြွနေတဲ့ လူတစ်ယောက်က စိတ်ချမ်းသာပျော်ရွှင်နေမှာ ဖြစ်ပါတယ်။

၄။ သောကင်းမယ် – အိပ်ရာဝင်ချိန်နောက်ကျလေလေ ပူပင်သောကများလေလေပါပဲ။ ဒါမှမဟုတ် ပူပင်သောကများပြီး ဟိုတွေးဒီတွေး တွေးမိနေလို့ အိပ်မပျော်တာလည်း ဖြစ်နိုင်ပါတယ်။ ဒီနှစ်ခုက ဆက်စပ်နေတာကိုး။ အကောင်းဆုံးကတော့ စောစောအိပ်ရာဝင်နိုင်ရင် သောကတွေကို အများကြီးလျှော့ချပေးနိုင်တယ်ဆိုတာပါပဲ။

၅။ အာရုံစူးစိုက်မှု အားကောင်းမယ် – အိပ်ရာကနေ လန်းဆန်းတက်ကြွစွာ ထလာနိုင်တာကြောင့် တစ်နေ့တာလုံးမှာ အာရုံစူးစိုက်မှုကောင်းကောင်းနဲ့ လုပ်နိုင်ဆုံးဖြတ်နိုင်မှာဖြစ်ပါတယ်။ အကြံပေးချက်တွေအရဆိုရင်တော့ ည ၁၁ နာရီခွဲမတိုင်ခင် အိပ်စက်တာက နောက်ရက်မှာ အာရုံစူးစိုက်မှုကို အားကောင်းစေပြီး မှန်ကန်တဲ့ဆုံးဖြတ်ချက်တွေကို ချမှတ်နိုင်စေဖို့ အထောက်အကူဖြစ်စေပါတယ်တဲ့။

၆။ ကျန်းမာရေးကောင်းစေမယ် – အိပ်ရာဝင်တာ နောက်ကျတဲ့အခါ ခန္ဓာကိုယ်က ပိုပြီးပင်ပန်းနွမ်းနယ်လာတတ်ပါတယ်။ ဒါကြောင့် ခန္ဓာကိုယ်ရဲ့ ကိုယ်ခံအားစနစ်ဟာ ဘက်တီးရီးယားတွေကို တွန်းလှန်ရာမှာ အားနည်းသွားပြီး ကျန်းမာရေးကို ထိခိုက်စေမှာပါ။ ဒါကြောင့် စောစောစီးစီးအိပ်စက်တဲ့အခါ ရောဂါပိုးမွှားဒဏ်ကို ခံနိုင်စွမ်းမြင့်မားမှာဖြစ်တာမို့ ပိုကျန်းကျန်းမာစေမှာ ဖြစ်ပါတယ်။

၇။ အသားအရေလှမယ် – စောစောအိပ်တဲ့အခါ ခန္ဓာကိုယ်က စောစောစီးစီးနဲ့ အချိန်လုံလုံလောက်လောက်လည်း အနားယူခွင့်ရတာမို့ အရေပြားဆဲလ်တွေ ပြန်လည်ပြုပြင်တဲ့လုပ်ငန်းစဉ်ကို ကောင်းကောင်းအချိန်ယူပြုလုပ်နိုင်ပါတယ်။ ဒါကြောင့် အသားအရေကြည်လင်ပြီး အမည်းစက်တွေ ထွက်ပေါ်တာမျိုးလည်း နည်းလာမှာပါ။

၇။ အမျိုးအစား ၂ ဆီးချိုကို တားဆီးပေးတယ် – အိပ်ရာဝင်တာနောက်ကျတဲ့လူတွေဟာ စောစောအိပ်ရာဝင်သူတွေထက် ဆီးချိုဖြစ်နိုင်ခြေ အလွန်မြင့်မားပါတယ်။ အိပ်ချိန်စက်ဝန်းဟာ ဆီးချိုရောဂါကာကွယ်နိုင်စွမ်းနဲ့ တိုက်ရိုက်ဆက်စပ်နေတာကြောင့်ပါ။

၉။ မျိုးပွားနိုင်စွမ်း မြင့်မယ် – အိပ်ချိန်နောက်ကျတဲ့အမျိုးသမီးတွေဟာ ကိုယ်ဝန်ရနိုင်ခြေ၊ ကလေးရနိုင်ခြေ လျော့နည်းသွားတတ်ပါတယ်။ အမျိုးသားတွေမှာတော့ ဒီအချက်က သိပ်ပြီးမသက်ရောက်ပါဘူး။

၁၀။ မှတ်ဉာဏ်ကောင်းမွန်လာမယ် – အကြောင်းအရာတွေကို ရုတ်တရက် မေ့နေတာမျိုး၊ စဉ်းစားရခက်နေတာမျိုး ကြုံဖူးကြမှာပါ။ ဒီအချက်က အိပ်ရေးမဝတာ၊ အိပ်ရာဝင်ချိန်နောက်ကျတာတွေနဲ့ တိုက်ရိုက်ဆက်စပ်နေပါတယ်။ အိပ်ရေးဝရင် အာရုံစူးစိုက်မှုကောင်းရုံတင်မကပါဘူး၊ သင့်မှတ်ဉာဏ်ပါ ကောင်းမွန်နေမှာပါ။

[embed-health-tool-bmi]