ပင်ပန်းနွမ်းနယ်ခြင်း
အလွန်အမင်း ပင်ပန်းနွမ်းနယ်ခြင်းဟာ စိတ်ဓာတ်ကျဆင်းချိန်မှာ တွေ့များတဲ့ လက္ခဏာဖြစ်ပါတယ်။ သုတေသနများအရ စိတ်ဓာတ်ကျဆင်းသူများရဲ့ ၉၀%ဟာ ကိုယ်ရောစိတ်ပါ ပင်ပန်းနွမ်းနယ်နေတတ်ပါတယ်။ ပင်ပန်းနွမ်းနယ်တတ်တာ လူတိုင်းရဲ့ သဘာဝဖြစ်ပါတယ်။ ဒါပေမယ့် အင်အားပြန်လည်ပြည့်ဝခြင်းမရှိဘဲ တောက်လျှောက် နွမ်းနယ်နေမယ်ဆိုရင်တော့ စိတ်ဓာတ်ကျဆင်းခြင်းရဲ့ လက္ခဏာတခု ဖြစ်နေနိုင်ပါတယ်။
လုပ်ယူရသော ပျော်ရွှင်ခြင်း
ပုန်းလျှိုးကွယ်လျှိုးနဲ့ စိတ်ဓာတ်ကျနေခြင်းကို ပြုံးနေလျက်နဲ့ စိတ်ကျခြင်းလို့လည်း ညွှန်းဆိုကြပါတယ်။ စိတ်ထဲမှာ ခံစားမှုမကောင်းပေမယ့် ဟန်လုပ်ပြုံးနေရခြင်း ဖြစ်ပါတယ်။ အထူးသဖြင့် လူအများအလယ်မှာ ဟန်လုပ်ပြီး ပျော်ရွှင်နေတတ်ကြပါတယ်။ ဒါပေမယ့် ဟန်လုပ်ယူထားရတဲ့ ပျော်ရွှင်ခြင်းဟာ တာရှည်မခံပါဘူး။ မျက်နှာဖုံးကွာကျလွယ်ပြီး ဝမ်းနည်းခြင်း၊ မျှော်လင့်ချက်မဲ့ခြင်းတွေကို တွေ့မြင်နိုင်မှာ ဖြစ်ပါတယ်။
အကောင်းမြင်စိတ်နည်းခြင်း
စိတ်ဓာတ်ကျဆင်းသူတွေကို သတိပြုတဲ့အခါ သူတို့ဟာ အရာရာကို အကောင်းမြင်စိတ်နည်းတာ တွေ့မှာ ဖြစ်ပါတယ်။ မိမိရဲ့ အနာဂတ်နဲ့ ပတ်သက်ပြီး အဆိုးမြင်စိတ်တွေနဲ့ တွေးတောနေတတ်ပါတယ်။ မိမိဝန်းကျင်မှာ တစုံတဦးဟာ အရာရာကို အဆိုးမြင်နေတတ်ရင် သတိထားဖို့ လိုအပ်ပါတယ်။ ဒါပေမယ့် အများထက်ပိုပြီး လက်တွေ့ဆန်လွန်း၊ အကောင်းမြင်လွန်းနေရင်လည်း စိတ်ဓာတ်ကျဆင်းခြင်းကြောင့် ဖြစ်နိုင်ပါတယ်။ တခြား လက္ခဏာတွေ ရှိမရှိ စောင့်ကြည့်ရမှာ ဖြစ်ပါတယ်။
အာရုံစူးစိုက်မှု မပြုနိုင်ခြင်း
စကားပြောနေရင်းနဲ့ ပြောနေတဲ့အကြောင်းအရာကို မစူးစိုက်နိုင်ဘဲ မကြာခဏ အာရုံလွင့်ပျံ့သွားသူတွေကို တွေ့ဖူးကြပါလိမ့်မယ်။ မှတ်ဉာဏ်မကောင်းခြင်း၊ အာရုံစူးစိုက်မှု မပြုနိုင်ခြင်း စတာတွေဟာ စိတ်ဓာတ်ကျဆင်းခြင်းရဲ့ လက္ခဏာတွေ ဖြစ်နိုင်ပါတယ်။ ဒီပြဿနာဟာ လူမှုဆက်ဆံရေး ပုံရိပ်ကိုပါ ထိခိုက်နိုင်တဲ့ ကိစ္စဖြစ်ပါတယ်။
ဒေါသထွက်လွယ်ခြင်း၊ ဆတ်ဆတ်ထိမံခြင်း
လူတချို့ဟာ စိတ်ဓာတ်ကျချိန်မှာ ဝမ်းနည်းခြင်းအစား အရာရာကို စိတ်အလိုမကျ သည်းမခံနိုင်ခြင်း၊ ဆတ်ဆတ်ထိ မခံခြင်း စတာတွေ ဖြစ်လာတတ်ပါတယ်။ ဒေါသဖြစ်လွယ်သူတွေကို စိတ်ဓာတ်ကျဆင်းနေသူတွေလို့ ထင်မိမှာ မဟုတ်ပါဘူး။
လိင်စိတ်ဆန္ဒနည်းပါးခြင်း
နောက်ပိုင်းမှာ ဆိုးဆိုးရွားရွား စိတ်ဓာတ်ကျဆင်းမှုကို ရောဂါအတည်ပြုရာမှာ လိင်စိတ်ဆန္ဒ နည်းပါးခြင်းကိုပါ ထည့်သွင်းစဉ်းစားလာကြပါတယ်။ လူတယောက်ရဲ့ လိင်စိတ်ဆန္ဒကို နည်းပါးစေတဲ့ အကြောင်းအရာတွေ များစွာ ရှိပါတယ်။ လိင်မှုကိစ္စကို မသာယာတော့ခြင်း၊ ပင်ပန်းနွမ်းနယ်ပြီး အားအင်ကုန်ခမ်းခြင်း၊ မိမိကိုယ်ကို ယုံကြည်မှုလျော့ရဲခြင်း စတာတွေ ဖြစ်ပါတယ်။
သင်ချစ်ရသူတွေမှာ ဒီလက္ခဏာတွေ့တဲ့အခါ ဘာလုပ်မလဲ
မိမိချစ်ခင်ရသူတွေမှာ ဖော်ပြခဲ့ပြီးဖြစ်တဲ့ စိတ်ကျခြင်းရဲ့ လက္ခဏာတွေ တွေ့လာပြီဆိုရင် တတ်နိုင်သမျှ နားလည်ပေးပါ။ အဖော်လုပ်ပေးပါ။ ပျော်ရွှင်ဖွယ်ရာ အချိန်တွေ ဖန်တီးပေးပါ။ ကိုယ်လက်လေ့ကျင့်ခန်း အတူပြုလုပ်ပါ။ အထီးကျန်ဆန်ဆန် မနေစေဘဲ လူမှု အသိုင်းအဝိုင်းထဲ ဆွဲခေါ်ပါ။ အကောင်းမြင်စိတ်နဲ့ တွေးတောတတ်စေဖို့ ဝိုင်းဝန်းကူညီပါ။
Hello Health Group သည်ဆေးပညာအကြံပြုချက်များ၊ ရောဂါရှာဖွေအတည်ပြုချက်များနှင့် ကုသမှုများ မပြုလုပ်ပေးပါ။
မှတ်ချက်များ
သင့်အတွေးများကို ဝေမျှပါ။
သင့်ကျန်းမာရေးအတွေးများကို Hello Sayarwonနဲ့ ဝေမျှလိုက်ပါ။
ဆက်သွယ်ရန် သို့မဟုတ် ဝင်မည်။ နှင့် ဝင်ရောက်ဆွေးနွေးပါမည်။