သင့်စိုးရိမ်မှုတွေက ဘာတွေလဲ။

close
မတိကျ
နားလည်ရခက်
အခြား

သို့မဟုတ် လင့်ခ်ကူးယူမည်

null

ဗိုက်ချပ်အဆီကျဖို့ ကြိုးစားတဲ့အခါ မှန်းသလောက် အရာမထင်တာ ဘာကြောင့်လဲ

    ဗိုက်ချပ်အဆီကျဖို့ ကြိုးစားတဲ့အခါ မှန်းသလောက် အရာမထင်တာ ဘာကြောင့်လဲ

    ဗိုက်အဆီကျြပီး အချိုးကျချပ်ရပ်တဲ့ကိုယ်ဟန်နေထားရနိုင်ဖို့ လူတိုင်းစိတ်ကူးယဉ်ကြမှာပါပဲ။ တကယ်တော့ ဗိုက်ခေါက်လေးတွေကို ဘယ်သူမှမချစ်နိုင်ကြပါဘူး။ ဗိုက်ချပ်အဆီကျဖို့ ကြိုးစားကြတဲ့အခါ အစားလျှော့မယ်၊ အားကစားလုပ်မယ်၊ detoxတွေသောက်မယ်၊ စသည်ဖြင့် နည်းလမ်းကိုစုံနေတာပဲ။ ဒီလိုကြိုးစားတဲ့နေရာမှာ လွဲမှားနေတာရှိရင် ပင်ပန်းပေမယ့်အရာမထင်ဖြစ်နေရနိုင်ပါတယ်။ အစားလျှော့မယ်၊လေ့ကျင့်ခန်းလုပ်မယ်ဆိုပြီးတာပဲလို့ တွေးမယ့်အစား ဘာတွေမှားတတ်လဲ သိထားရင် ပိုထိရောက်ဖို့အထောက်အကူဖြစ်နိုင်ပါလိမ့်မယ်။

    ဗိုက်အဆီချရင်း လုပ်မိတတ်တဲ့အမှား (၆) ခု

    (၁) အိပ်ရေးဝအောင် မအိပ်တာ

    ဖုန်းလေးပွတ်လိုက်၊ ဂိမ်းလေးဆော့လိုက်နဲ့ ညဉ့်နက်သွားတာ၊ အလုပ်တွေများပြီး မအိပ်နိုင်တာ၊ အိပ်ခါနီးကော်ဖီသောက်လိုက်မိတာ စတဲ့အကြောင်းရင်းတွေကြောင့် အိပ်ရေးမဝဖြစ်ရတတ်ပါတယ်။နောက်တစ်နေ့မှာ လူကနုံးနေပြီး အားမရှိဖြစ်နေတာကိုသိသာပေမယ့် ညဘက်အိပ်ရေးပျက်ခြင်းရဲ့အကျိုးဆက်ထဲမှာ ကိုယ်အလေးချိန်အပေါ်သက်ရောက်မှုလည်းပါရှိပါတယ်။ အိပ်ရေးပျက်တဲ့အခါ အစာစားချင်စိတ်ကို သက်ရောက်နိုင်တဲ့ ghrelin နဲ့ leptinဟော်မုန်းတွေကိုထိန်းညှိနိုင်စွမ်းမရှိတော့ပါဘူး။ ဗိုက်ဆာစေနိုင်တဲ့ghrelin ပမာဏကမြင့်လာပြီး ဗိုက်ပြည့်ခြင်းကိုခံစားရစေတဲ့leptin ပမာဏက ကျဆင်းသွားပါတော့တယ်။ ဒီလိုစားချင်စိတ်ပိုများနေတဲ့အချိန် အဆီချရတာ ပိုပင်ပန်းစေနိုင်လို့ အိပ်ရေးဝအောင်အိပ်ပါ။

    (၂) အချိုစားတာ များနေတာ

    အားကစားတွေလုပ်ရင်းရေဓါတ်ဖြည့်အချိုရည်တွေသောက်မိတာများရင် ဝိတ်ချရပိုခက်စေပါလိမ့်မယ်။ အသီးအနှံတွေကကောင်းတယ်၊ စားသင့်တယ်ဆိုပေမယ့် သဘာဝအချိုဓါတ်ကိုကပါဝင်မှုများတဲ့အသီးတွေကို အများကြီးစားမိတယ်ဆို ကိုယ်အလေးချိန်မကျတဲ့အပြင် ပိုတောင်တက်စေနိုင်ပါတယ်။ ဒိန်ချဉ်ဆိုလည်း သကြား သို့မဟုတ် ထန်းလျက်ရည်အများကြီးထည့်စားမိရင် အဆီချတာက မှန်းသလောက်မထိရောက်နိုင်ပါဘူး။

    (၃) ပရိုတင်း လုံလောက်အောင်မစားတာ

    အဆီချတဲ့အခါမှာ ပရိုတင်းဓါတ်က အရမ်းကိုအရေးပါပါတယ်။ ပရိုတင်းက ကြွက်သားတစ်ရှူးတွေတည်ဆောက်မှုကို ထိန်းသိမ်းပေးပြီး ကယ်လိုရီလောင်ကျွမ်းမှုပမာဏကိုတိုးစေဖို့ ကူညီပေးပါတယ်။ အချိန်ကြာကြာဗိုက်ပြည့်တင်းတိမ်နေစေဖို့ အကောင်းဆုံးခွန်အားအရင်းအမြစ်လည်းဖြစ်တာကြောင့်တော်ရုံမဆာတော့ပါဘူး။ ကြက်ရင်ပုံသား၊ တူနာငါး၊ ကြက်ဥ၊နို့ နဲ့ ကုလားပဲ တို့က အကောင်းဆုံးပရိုတင်း အရင်းအမြစ်တွေဖြစ်ပါတယ်။ ပရိုတင်းလုံလောက်အောင်မစားဘဲ အဆီချရင်တော့ ပိန်ပေမယ့် မကျစ်လျစ်ဘဲ အသားအရေလျော့တွဲတာတွေဖြစ်နိုင်ပါတယ်။

    (၄) စိတ်ဖိစီးမှုနဲ့ စိတ်လှုပ်ရှားမှုတွေများနေတာ

    စိတ်ဖိစီးမှုတွေထမ်းပိုးထားတာက ခန္ဓါကိုယ်မှာ ဗရမ်းဗတာတွေဖြစ်စေနိုင်တယ်နော်။ စိတ်ဖိစီးမှုကြောင့်ထွက်လာတဲ့ကော်တီဆောဟော်မုန်းတွေက အချိုများတာတွေပဲ မက်မောတောင့်တစိတ်ဖြစ်လာစေနိုင်ပါတယ်။ ကော်တီဆောဟော်မုန်းတွေမြင့်မားမှုအချိန်ကြာလာရင် ဗိုက်အဆီကလည်း ပိုထူပါလိမ့်မယ်။

    (၅) အသေအကြေ အစားလျှော့တာ

    စားတဲ့အစားအသောက်ပမာဏကို ချက်ချင်းလျှော့ပစ်လိုက်တာက စစချင်းမှာပေါင်အနည်းငယ်ကျစေနိုင်ပေမယ့် အဆီချအစီအစဉ်ရပ်လိုက်တဲ့အခါပြန်မတက်အောင် ထိန်းထားနိုင်ဖို့ ခက်စေပါလိမ့်မယ်။ ကယ်လိုရီပမာဏကို ပုံမှန်စားသင့်တဲ့ပမာဏထက်လျှော့စားတယ်ဆိုရင်ကောင်းကျိုးထက် ဆိုးကျိုးပိုများပါလိမ့်မယ်။ ခန္ဓါကိုယ်မှာ ကယ်လိုရီပမာဏကျဆင်းသွားတဲ့အခါ အင်အားပြတ်လပ်မှုအဆင့်ကိုရောက်သွားနိုင်ပါတယ်။ ဇီဝဖြစ်စဉ်တွေကိုနှေးကွေးစေပြီး ကိုယ်အလေးချိန်လျော့ဖို့ပိုခက်စေနိုင်ပါတယ်။

    (၆) မရပ်မနားလေ့ကျင့်ခန်းလုပ်လွန်းတာ

    လူ့ခန္ဓါကိုယ်ဟာ လှုပ်ရှားမှုအားကစားနဲ့ အနားယူခြင်းကိုညီညွတ်မျှတအောင် ထိန်းဖို့လိုပါတယ်။လေ့ကျင့်ခန်းတွေမနားတမ်းလုပ်တာများလွန်းတဲ့အခါကော်တီဆောဟော်မုန်းတွေပိုထွက်စေနိုင်ပြီး အဆီတောင်တက်လာနိုင်ပါတယ်။ လှုပ်ရှားသင့်သလောက်လှုပ်ရှား၊ ထိုက်သင့်သလောက်စား၊ နားသင့်သလောက်နားမှသာရေရှည်ခံတဲ့ကိုယ်အလေးချိန်ကိုရရှိနိုင်ပါတယ်။

    health-tool-icon

    ခန္ဓာကိုယ် ထုထည်ညွှန်းကိန်း တွက်ချက်ခြင်း (BMI) ။

    ခန္ဓာကိုယ် ထုထည်ညွှန်းကိန်း တွက်ချက်ခြင်း (BMI) ကို အသုံးပြုပြီး ကျန်းမာတဲ့ ကိုယ်အလေးချိန် ရှိရဲ့လားဆိုတာကို တွက်ချက်ပါ။ ဒီကျန်းမာရေး ကိရိယာကို အသုံးပြုပြီး ကလေးရဲ့ (BMI) ကိုလည်း တွက်ချက်လို့ ရပါတယ်။

    အမျိုးသား

    အမျိုးသမီး

    Hello Health Group သည် ဆေးပညာအကြံဉာဏ်များ၊ ရောဂါရှာဖွေမှုများနှင့် ကုသမှုများ မပြုလုပ်ပေးပါ။

    ရင်းမြစ်များ

    11 mistakes you make when trying to lose belly fat https://www.netdoctor.co.uk/healthy-living/fitness/a24888416/losing-belly-stomach-fat-mistakes/ Accessed Dec 12,2018.

    Lack of sleep increases unhealthy abdominal fat, study findshttps://www.sciencedaily.com/releases/2022/03/220328165327.htm Accessed Dec 12,2018.

    Consuming Too Much Sugar May Lead To Excess Fat Storage Around Heart And Belly – Study Reveals https://food.ndtv.com/news/consuming-too-much-sugar-may-lead-to-excess-fat-storage-around-heart-and-belly-study-reveals-2254356 Accessed Dec 12,2018.

    High protein diets decrease total and abdominal fat and improve CVD risk profile in overweight and obese men and women with elevated triacylglycerol https://pubmed.ncbi.nlm.nih.gov/19179060/ Accessed Dec 12,2018.

    Stress-induced cortisol response and fat distribution in women https://pubmed.ncbi.nlm.nih.gov/16353426/ Accessed Dec 12,2018.

     

     

    စာရေးသူ ဓာတ်ပုံbadge
    Yun Sandi Nan Mon မှ ရေးသားသည်။ 30/05/2022 တွင် ပြန်လည်ပြင်ဆင်ခဲ့သည်။
    Dr. Thurein Hlaing Win မှ အချက်အလက် စစ်ဆေးထားပါသည်။