ကလေးအာဟာရနဲ့ ပက်သက်လို့မေမေတို့ အမေးများတဲ့ မေးခွန်းတွေ။ ။

ကလေးကို အစားအသောက်ပြင်ဆင်ပေးတဲ့နေရာမှာ မေမေတိုင်း တစ်ဘက်ကမ်းခတ်တော်နေကြတာ မဟုတ်ပါဘူး။ သူတို့ မသဲကွဲတဲ့အချက်တွေ မရှင်းတဲ့အချက်တွေ အများကြီးရှိပါသေးတယ်။ ဒီဆောင်းပါေးလးထဲမှာ မေမေတို့ အမေးများတဲ့ မေးခွန်းတွေအတွက် အဖြေလေးတွေ ဖြေပေးထားပါတယ်။

Q .ကလေးကို ဘယ်အရွယ်မှာ ရေစတိုက်လို့ရသလဲ။ ။

ကလေးအသက် ၆ လအထိ မိခင်နို့ တစ်မျိုးတည်းတိုက်ရမှာဖြစ်တဲ့ အတွက် ရေတိုက်လို့မရပါဘူး။ ကလေးအသက် ၆လကျော် ဖြည့်စွက်စာစားတဲ့ အချိန်ရောက်မှသာ ရေတိုက်လို့ရမှာပါ။

Q .ကလေး ဝမ်းမှန်အောင် ဘာတွေကျွေးရမလဲ။ ။

ဖြည့်စွက်စာ စားချိန်ဆို ကလေးတွေအသီးအရွက်ထက် အသားပိုစားကြပါတယ်။ ဒါကြောင့် အမျှင်ဓါတ်ေတွမရတော့ဘဲ ကလေးတွေဝမ်းချုပ်ကြတာဖြစ်ပါတယ်။ ကလေးဝမ်းမှန်စေဖို့အတွက်ဆို အသီးအရွက်များများကျွေးပါ။ အသီးဖျော်ရည်လုပ်တိုက်ပါ။ ကိုယ်လက်လှုပ်ရှားမှုလုပ်ခိုင်းပါ။ ဝမ်းသွားချင်ရင် ချုပ်မထားသင့်ကြောင်း ပြောပြပါ။ ကလေးက မိခင်နို့်သောက်နေတဲ့သူဆိုရင်တော့ မေမေတို့ အသီးအရွက်များများ စားပေးပါ။

Q .ကလေးထွားဖို့ အားဆေးတိုက်ဖို့လိုလား ။ ။

ကလေးရဲ့ နေ့စဉ်စားတဲ့ အစားအသောက်တွေဟာ အာဟာရြပည့်ဝမျှတနေမယ်၊ ကလေးကလည်း အစားကြေးများ မနေဘူးဆိုရင် ကလေးထွားဖို့ အားဆေးတိုက်စရာ မလိုပါဘူး။

Q .ကလေးကို အမေနို့တိုက်လိုက် နို့မှုန့်တိုက်လိုက် လုပ်လို့ရလား။ ။

ကလေး အသက် ၆ လအတွင်းမှာ မိခင်နို့တစ်မျိုးတည်း တိုက်တာကသာ အကောင်းဆုံးပါ။ ဖြည့်စွက်စာစကျွေးတဲ့ အချိန်ရောက်မှသာ ဖြည့်စွက်စာလည်းကျွေး၊ မိခင်နို့လည်းတိုက်၊ နို့မှုန့်လည်းတိုက်ပါ။ ဒါမှ ကလေးအူက ခံနိုင်ရည်ရှိမှာဖြစ်ပါတယ်။

Q .ကလေးကို ဘယ်အရွယ်မှာ နွားနို့စတိုက်လို့ ရမလဲ။ ။

ကလေးက အသက် ၁ နှစ်အရွယ်ဆိုရင် တစ်နေ့ကို နွားနို့ ၈အောင် စကနေ ၁၂အောင်စ တိုက်ပေးရုံနဲ့ လုံလောက်ပါတယ်။ နွားနို့ တစ်နေ့ကို တစ်ခွက် ကနေ ၁ ခွက်ခွဲလောက်ဆိုရင် ကလေးအတွက် လိုအပ်တဲ့ ကယ်လ်ဆီယမ်နဲ့ဗီတာမင် Dကိုရရှိစေမှာပါ။ ကလေးက အသက် ၂ နှစ်ဆိုရင်တော့ တစ်နေ့ကို နွားနို့ ၁၆အောင်စ နှစ်ခွက်တိုက်ပေးရင်လုံလောက်ပါတယ်။ ကလေးက နှစ်နှစ်ကျော်ပြီဆိုရင်တော့ နွားနို့ကို တစ်နေ့ကို ၄ ခွက်လောက်အထိတိုက်ပေးလို့ရပါတယ်။ ဒါ့အပြင်နို့ထွက်ပစ္စည်းတွေကျွးပေးလို့လည်းရပါတယ်။

Q .ကလေးတွေကို ငါးကြီးဆီ ဘယ်အရွယ်မှာ စတိုက်ရမလဲ။ ။

ကလေးအသက်ဘယ်လောက်ဆို ငါးကြီးဆီ တိုက်မှရမယ်ဆိုတဲ့ ကန့်သတ်ချက်တော့ မရှိပါဘူး။ ကလေး အသက် ၆ လအထိကမိခင်နို့တစ်မျိုးတည်း တိုက်ရမယ်ဆိုတာကတော့ အားလုံးအသိပါ။ ဒီတော့ဖြည့်စွက်စာကျွေးတဲ့ အရွယ်မှာ ကိုယ့်ကလေးက ငါးတွေ မစားတဲ့သူ၊ EPA နဲ့ DHA တို့ပါတဲ့ အာဟာရနို့မှုန့်တွေ မသောက်ဘူးဆိုရင်တော့ ကလေးကို ငါးကြီးဆီတိုက်ဖို့လိုပါတယ်။ အတိုချုပ်ပြောရရင် ငါးကြီးဆီ တိုက်သင့်တဲ့ အရွယ်ဆိုတာ အတိအကျ သတ်မှတ်ထားတာမရှိပါဘူး။ ကိုယ့်ကလေးက ငါးမစားဘူးဆိုရင် ဆရာဝန်နဲ့ တိုင်ပင်ပြီး ငါးကြီးဆီ တိုက်သင့်ရင်တိုက်ရပါမယ်။

Q . ငါးကြီးဆီ ဘယ်လောက်ပမာဏ ကလေးတွေကို တိုက်ရမှာလဲ။ ။

ကလေးတစ်ယောက်သောက်သင့်တဲ့ ငါးကြီးဆီ ပမာဏကို ငါးကြီးဆီတွေမှာပါတဲ့ EPA နဲ့ DHA ပမာဏနဲ့ ဆုံးဖြတ်ပါတယ်။

• အသက်၄ နှစ်မှ ၈နှစ်ကလေး ။ ။ EPA နဲ့ DHA နှစ်ခုပေါင်းပမာဏ၁၀၀၀ မီလီဂရမ်- ၁၅၀၀ မီလီဂရမ်လိုပါတယ်။
• အသက်၈ နှစ်အထက်ကလေး ။ ။ EPA နဲ့ DHA နှစ်ခုပေါင်းပမာဏ၂၀၀၀ မီလီဂရမ်- ၂၅၀၀ မီလီဂရမ်လိုပါတယ်။

သဘောကတော့ ကိုယ်ငါးကြီးဆီဝယ်ပြီဆိုရင် ငါးကြီးဆီဘူးနောက်မှာပါတဲ့ EPA နဲ့ DHA ပမာဏနှစ်ခုကို တစ်ချက်ပေါင်းပြီး ကိုယ့်ကလေး အသက်နဲ့ ပြန်ချိန်ဆပါ ။ ငါးကြီးဆီတော်တော်များများကတော့ လိုအပ်တဲ့ ပမာဏတွေ ချိန်ပြီး ထုတ်ထားတာဖြစ်ပါတယ်။ လူကြီးဆို ဘယ်နှစ်လုံး ကလေးဆို ဘယ်နှစ်လုံးဆို သောက်ရမလဲဆိုတာက ကိုယ်ဝယ်သောက်တဲ့ ငါးကြီးဆီ တံဆိပ်ပေါ်မူတည်ပါတယ်။ ။

Q .ကလေးကိုကျွေးဖို့ မသင့်တော်တဲ့အစားအစာတွေက ဘာတွေလဲ။ ။

ပီကေ၊ ပျားရည်၊ ရယ်ဒီမိတ်အသားတွေ၊ အကင်တွေ၊ ဂတ်စ်ပါတဲ့ အချိုရည်တွေနဲ့ ကလေးနဲ့ ဓါတ်မတည့်တဲ့ အစားအသောက်တွေဟာ ကလေးကို မကျွေးသင့်တဲ့ အစားအသောက်တွေပါ။

Q .ကလေးအာဟာရမပြည့်ဝဘူးဆိုတာကို ဘယ်လိုသိနိုင်သလဲ။ ။

ကလေးက ဖျားနာလွယ်မယ်၊ ခဏခဏဝမ်းပျက်ဝမ်းလျှောဖြစ်မယ်၊ သူများတွေထက်ညှက်နေမယ်၊ အာရုံလည်း မစူးစိုက်နိုင်ဘူး၊ ဆိုရင် အာဟာရမပြည့်ဝတာဖြစ်နိုင်ပါတယ်။

Q .ကလေးဉာဏ်ကောင်းအောင် ဘာတွေကျွေးရမလဲ။ ။

ကိုယ့်ကလေးကို ဉာဏ်ကောင်းစေချင်ရင် ဦးနှောက်ဖွံ့ဖြိုးဖို့အတွက် လိုအပ်တဲ့ အာဟာရတွေ ဖြစ်တဲ့

သံဓါတ် ။ ။ အသား၊ အသည်းအမြစ်၊ ငါး၊ တို့ဟူး၊ အစေ့အဆန်တွေ၊ အစိမ်းရောင်ဟင်းသီးဟင်းရွက်

ဗီတာမင် B ။ ။ အသား၊ ငါး၊ ကြက်သား၊ အခွံမာသီး၊ နို့ထွက်ပစ္စည်း၊ ဥနဲ့ ပဲအမျိုးမျိုး

ဖောလစ်အက်ဆစ် (Folic Acid) ။ ။ မိခင်နို့၊ အစိမ်းရောင်ဟင်းသီးဟင်းရွက်၊ အသည်း၊ ပဲ၊ ဂျုံ၊ ကောက်ပဲသီးနှံ

အိုင်အိုဒင်းဓါတ် ။ ။ မိခင်နို့၊ ပင်လယ်စာ၊အိုင်အိုဒင်းဆား

DHA, Omega – 3, Omega – 6 ။ ။ DHA, Omega 3, Omega 6 တို့ပါတဲ့ အဆီများတဲ့ တူနာငါး၊ ဆယ်လ်မွန်ငါး၊ အာဟာရနို့မှုန့်တွေ၊ ငါးကြီးဆီတွေကျွေးရပါမယ်

Q .ကလေးကို ဘယ်လိုနို့မှုန့်တွေဝယ်တိုက်ရမလဲ။ ။

• နွားနို့ကို အခြေခံပြီးထုတ်ထားတဲ့ နို့မှုန့်
• ဆိတ်နို့ကိုအခြေခံပြီးထုတ်ထားတဲ့နို့မှုန့်
• hydrolysed protein ကိုအခြေခံပြီးထုတ်ထားတဲ့ နို့မှုန့်
• ပဲနို့ကို အခြေခံပြီးထုတ်ထားတဲ့နို့မှုန့် တို့တိုက်လို့ရပါတယ်။ ကိုယ်ဝယ်တိုက်တဲ့ နို့မှုန့်တွေမှာ ကလေးအတွက် မရှိမဖြစ်လိုအပ်တဲ့ သံဓါတ်၊ omega3 ၊ omega 6 နဲ့ DHA တို့ မဖြစ်မနေပါဖို့တော့ လိုအပ်တယ်နော်။

ကဲ ဒီလောက်ဆို ကလေးကို ကျွေးမွေးပြုစုတာနဲ့ ပက်သက်လို့ မေမေတို့ရှင်းသလောက်ဖြစ်သွားပြီလို့ထင်ပါတယ်။ ကလေးအာဟာရနဲ့ ပက်သက်လို့ သိပ်မသိကြသေးတဲ့ မေမေတို့တစ်နေရာတည်းမှာဖတ်နိုင်စေဖို့ အတွက် ရည်ရွယ်ပါတယ်။

Hello Health Groupသည် ဆေးပညာဆိုင်ရာ အကြံပေးချက်များ၊ ရောဂါရှာဖွေခြင်းနှင့် ကုသခြင်းများ မပြုလုပ်ပါ။