home

သင့်စိုးရိမ်မှုတွေက ဘာတွေလဲ။

close
မတိကျ
နားလည်ရခက်
အခြား

သို့မဟုတ် လင့်ခ်ကူးယူမည်

ဆီးချိုမရှိဘဲ သွေးတွင်းသကြားဓါတ်ကျဆင်းခြင်းဝေဒနာ

ဆီးချိုမရှိဘဲ သွေးတွင်းသကြားဓါတ်ကျဆင်းခြင်းဝေဒနာ
မူးတယ်၊ တုန်တယ်၊ချွေးတွေထွက်တယ်၊မောပန်းနေတယ် ဆိုရင်သွေးတွင်းသကြားဓါတ်များကျနေသလားလို့ ယူဆကြပါတယ်။သွေးတွင်းသကြားဓါတ်ကျတယ်ဆိုရင် ဆီးချိုများရှိနေပြီလားလို့ စိုးရိမ်ရတတ်ပါတယ်။ ဒါပေမယ့် ဆီးချိုလည်းမရှိဘဲ ဒီလက္ခဏာတွေ ခံစားရတာ ဘယ်လိုလုပ်မလဲ။ သွေးတွင်းသကြားဓါတ်အရမ်းကျဆင်းနေတဲ့အခြေအနေကို hypoglycemia လို့ခေါ်ပါတယ်။သွေးတွင်းသကြားဓါတ်ဟာ ခန္ဓါကိုယ်အတွက်အားအင်ပေးတဲ့နေရာမှာ အရေးပါတာကြောင့် အတက်အကျကို ပုံမှန်ထိန်းညှိထားနိုင်ဖို့လိုပါတယ်။ သွေးတွင်းသကြားဓါတ်ကျနေရင် လူကနေလို့မကောင်းတာတော့ သိသာပါတယ်။

သကြားဓါတ်ကျတာက ဆီးချိုရှိတဲ့သူတွေမှာဖြစ်လေ့ရှိပေမယ့် ဆီးချိုမရှိသူတွေမှာလည်းဖြစ်တတ်ပါတယ်။ ဆီးချိုမရှိသူတွေမှာဖြစ်တတ်တဲ့hypoglycemia ကနှစ်မျိုးရှိပါတယ်။

  • Reactivehypoglycemia – အစာစားပြီး နာရီပိုင်းအတွင်းဖြစ်လာတတ်တယ်။
  • Fastinghypoglycemia – ဆေးဝါး သို့မဟုတ် ရောဂါတစ်ခုခုနဲ့ ပတ်သက်နေတတ်တယ်။

ဆီးချိုကြောင့်မဟုတ်ဘဲ ဘာကြောင့်ဒီလိုဖြစ်စေတာလဲ

သွေးတွင်းသကြားဓါတ်ကျတာက နှစ်မျိုးကွဲပြားသလိုပဲ အကြောင်းရင်းကလည်းမတူကြပါဘူး။

Reactive hypoglycemia ကသွေးတွင်းမှာ အင်ဆူလင်ပမာဏများနေရာကနေဖြစ်လာတတ်ပါတယ်။ဖြစ်နိုင်ခြေရှိတဲ့ အကြောင်းရင်းတွေက –

  • ဆီးချိုဖြစ်ဖို့အလားအလာရှိနေတဲ့ အနေအထား
  • အစာအိမ်ခွဲစိတ်ထားခြင်း
  • ဖြစ်ခဲတဲ့ အင်ဇိုင်းချို့တဲ့မှုတွေပါဝင်ပါတယ်။

Fasting hypoglycemia ကတော့ –

  • Aspirin နဲ့sulfaဆေးတွေလိုဆေးဝါးတွေ
  • အယ်ကိုဟောသောက်သုံးမှုများခြင်း
  • အသည်း၊ နှလုံး၊ကျောက်ကပ်နဲ့ ပန်ကရိယရောဂါတွေ
  • ဟော်မုန်းတချို့ ကျဆင်းခြင်း
  • အကျိတ်ဖြစ်ပေါ်မှု တို့ကြောင့်ဖြစ်နိုင်ပါတယ်။

ဘယ်လို လက္ခဏာတွေလဲ

လက္ခဏာတွေကတော့ ကိုယ့်ရဲ့သွေးတွင်းသကြားဓါတ်က ဘယ်လောက်ကျဆင်းသလဲဆိုတာကို မူတည်ပြီး ကွဲပြားတတ်ပါတယ်။ ဖြစ်လေ့ရှိတာကတော့ –

  • ဆာလောင်တတ်တာ
  • ကတုန်ကယင်ဖြစ်တာ
  • ချွေးတွေထွက်တာ
  • ဖြူဖတ်ဖြူရော်ဖြစ်တာ
  • နှလုံးခုန်မြန် သို့မဟုတ် မမှန်တာ
  • အိပ်ငိုက်တာ
  • ခေါင်းမူးတာ
  • စိတ်တိုလွယ်တာ
  • စိုးရိမ်စိတ်များတာတွေဖြစ်တတ်ပါတယ်။

အခြေအနေပိုဆိုးလာရင်တော့

  • အာရုံထွေပြားခြင်း
  • အမြင်အာရုံဝေဝါးခြင်း
  • မူးလဲခြင်း၊ သတိလစ်ခြင်း၊တက်ခြင်း တို့ဖြစ်လာနိုင်ပါတယ်။

ဘယ်လိုကုသလဲ

ဒီလိုဖြစ်လာရင် ချက်ချင်းပဲ ကာဗိုဟိုက်ဒရိတ်တစ်ခုခုစားလိုက်၊သောက်လိုက်ပြီးမှသွေးတွင်းသကြားဓါတ်ပြန်တက်အောင်လုပ်ရပါမယ်။ အချိုရည်၊ သကြားလုံး တို့လည်းဆောင်ထားသင့်တယ်။ ပုံမှန်အားဖြင့်တော့ ဒီလောက်နဲ့သက်သာသွားတတ်ကြပါတယ်။နောက် ၁၅ မိနစ်လောက်နေရင်သွေးတွင်းသကြားဓါတ်ကိုပြန်စစ်ကြည့်ပြီး ကျနေတုန်းပဲဆိုရင် ဆက်ကြိုးစားပြီး ၁၅ မိနစ်အကြာ ထပ်စစ်ပါ။ မသက်သာရင် ဒါမှမဟုတ် သကြားဓါတ်ပြန်တက်မလာခဲ့ရင်ဆေးခန်းအမြန်ပြပါ။

သကြားဓါတ်ကျဆင်းမှုဆိုးရွားတဲ့ လက္ခဏာတွေဖြစ်တဲ့ မူးလဲတာ၊ တက်တာ၊ အာရုံထွေပြားတာတွေဖြစ်လာရင် ချက်ချင်း ဆေးကုသမှုခံယူသင့်ပါတယ်။ လိုအပ်လာရင် ဆရာဝန်ကဆေးထိုးသင့်ထိုးပေးပါလိမ့်မယ်။ရေရှည်အတွက်ဆိုရင်တော့ပြောင်းလဲမှုတစ်ခုခုလုပ်သင့်ပါတယ်။ ဥပမာဆေးကြောင့်ဖြစ်တယ်ဆိုဆေးပြောင်းသောက်ရပါမယ်၊ အကျိတ်ကြောင့်ဆို ခွဲစိတ်ကုသရမယ်၊ စတာတွေပေါ့။

အစားအသောက်၊အနေအထိုင်ပြောင်းလဲဖို့လိုအပ်ကြောင်း ဆရာဝန်ကအကြံပေးပါလိမ့်မယ်။ အခြေခံအားဖြင့်တော့ စားသောက်ပုံအပြောင်းအလဲနဲ့ပတ်သက်လို့ ဒီအချက်လေးတွေ သိထားသင့်ပါတယ်။

  • နည်းနည်းနဲ့ အကြိမ်ရေများများခွဲစားပါ။
  • ပရိုတင်းများတဲ့၊ အဆီများတဲ့၊ အမျှင်ဓါတ်များတဲ့ အစားအစာတွေအပါအဝင် အမျိုးအစားအစုံပါအောင်စားပါ။
  • အချိုများတာတွေ သိပ်များများမစားပါနဲ့။

ကာကွယ်လို့ရလား

သွေးတွင်းသကြားဓါတ်ကို ပုံမှန်ထိန်းထားနိုင်ဖို့ကတော့ ဒီအပြောင်းအလဲလေးတွေ လုပ်သင့်ပါတယ်။

  • အစာစားချိန်ကို ပုံမှန်သတ်မှတ်ထားပါ။ အချိန်မှန်စားပါ။
  • ထမင်းအငတ်မခံပါနဲ့။နေ့လယ်စာလွတ်တာ၊ မနက်စာလွတ်တာတွေ မကောင်းပါဘူး။
  • ပုံမှန်ကိုယ်လက်လှုပ်ရှားမှုလေးရှိနေရင်လည်း hypoglycemiaဖြစ်နိုင်ခြေနည်းစေပါတယ်။
  • ကဖင်းပါတဲ့ အစားအသောက်တွေကိုလျှော့ပါ။
  • အယ်လ်ကိုဟောရှောင်ပါ။

Hello Health Groupသည်ဆေးပညာအကြံပြုချက်များ၊ရောဂါရှာဖွေအတည်ပြုချက်များနှင့် ကုသမှုများမပြုလုပ်ပေးပါ။

Hello Health Group သည် ဆေးပညာအကြံဉာဏ်များ၊ ရောဂါရှာဖွေမှုများနှင့် ကုသမှုများ မပြုလုပ်ပေးပါ။

ရင်းမြစ်များ
စာရေးသူ ဓာတ်ပုံbadge
Yun Sandi Nan Mon မှ ရေးသားသည်။ 11/05/2020 တွင် ပြန်လည်ပြင်ဆင်ခဲ့သည်။
Dr. Thurein Hlaing Win မှ အချက်အလက် စစ်ဆေးထားပါသည်။