Omicronကူးစက်မှုရဲ့ အတွေ့ရများတဲ့ လက္ခဏာတွေက ဘာတွေဖြစ်မလဲ။

လတ်တလော လူတိုင်းရဲ့ ပါးစပ်ဖျားမှာရော စိတ်ကူးတွေထဲမှာပါ နေရာယူထားပြီး သိချင်နေမယ့် ကျန်းမာရေး ပြဿနာက Omicron အကြောင်း ဖြစ်မယ်ထင်ပါတယ်။ ကာကွယ်ဆေးတွေ ထိုးထားတာတောင် Omicronက ဖြစ်တာပဲ။ ဖြစ်ဖူးတဲ့သူတွေမှာ ဖြစ်နိုင်ခြေ ပိုများတယ်ဆိုတဲ့ စကားလုံးတွေကြားမှာ ခေါင်းလေးပဲ ကိုက်ကိုက်၊ ဇက်ကြောလေးပဲ တက်တက်၊ နှာလေးပဲ စေးစေး Omicron များဖြစ်နေပြီလားဆိုပြီး စိုးရိမ်နေကြမယ် ထင်ပါတယ်။ ဒီလိုဆိုရင်တော့ ဒီဆောင်းပါးလေးကို ဖတ်ကြည့်လိုက်နော်။

ဒီဆောင်းပါးလေးထဲမှာ Omicronကူးစက်မှုရဲ့ အတွေ့ရများတဲ့ လက္ခဏာတွေက ဘာတွေလဲဆိုတာကို ပြောပြပေးသွားပါမယ်။ ကဲ …… ဘယ်လို လက္ခဏာတွေ ဖြစ်မလဲ အတူတူ ဆက်ကြည့်လိုက်ရအောင်နော်။

Omicronကူးစက်မှုရဲ့ ကာလအတိုင်းအတာ

Omicronက ကမ္ဘာ့နိုင်ငံတွေမှာ ပြန့်နှံ့ဖြစ်ပွားနေတာက တစ်လကျော်တောင် ကြာခဲ့ပါပြီ။ ဒီကာလအတွင်း လူဦးရေများစွာကို ကူးစက်ခဲ့ပြီး ရောဂါဖြစ်ဖူးသူတွေမှာ ကူးစက်မှု ပိုများသလို ကလေးငယ်တွေမှာလည်း တော်တော်လေး ကူးစက်မှုနှုန်း မြင့်နေပါတယ်။

ကာကွယ်ဆေးတွေရော ထပ်ဆောင်းကာကွယ်ဆေးတွေပါ ထိုးပြီးသူတွေမှာပါ ကူးစက်တာတွေ ရှိနေပါတယ်။ ဒီကာလအတွင်းမှာ လေ့လာတွေ့ရှိခဲ့တဲ့ Omicronကူးစက်မှုရဲ့ လက္ခဏာတွေက ဘာတွေလဲဆိုတာကို သတိထားနိုင်ဖို့ ပြောပြပေးသွားပါမယ်။

Omicronကူးစက်မှုရဲ့ အတွေ့ရများတဲ့ လက္ခဏာတွေက ဘာတွေဖြစ်မလဲ။

စစ်တမ်းတွေအရ Omicron ကူးစက်ခံရတဲ့အခါ အတွေ့ရများတဲ့ လက္ခဏာတွေကို ဖော်ပြပေးလိုက်ပါတယ်။

• အနံ့ပျောက်တာ — ၁၉%
• ရင်ဘတ်အောင့်တာ — ၁၉%
• ကြွက်သားတွေ နာကျင်တာ — ၂၃%
• (ဦးနှောက်ထိုင်းမှိုင်းသွားတာ) Brain fog — ၂၄%
• မူးဝေတာ —၂၈%
• အဖျားတက်တာ— ၂၉%
• ချမ်းတုန်တာ — ၃၀%
• အသံဝင်တာ — ၃၆%
• ချောင်းဆိုးတာရှည်တာ — ၄၄%
• နှာချေတာ — ၆၀%
• လည်ချောင်းနာတာ— ၆၀%
• ခြေကုန်လက်ပမ်းကျတာ — ၆၄%
• ခေါင်းကိုက်တာ — ၆၈%
• နှာစေးတာ — ၇၃% တွေ ခံစားရနိုင်ပါတယ်။

ဘယ်လို သက်သာအောင် လုပ်မလဲ။

Omicronကူးစက်မှုကြောင့်ဖြစ်တဲ့ ခေါင်းကိုက်တာ၊ လည်ချောင်းနာတာ၊ အဖျားရှိတာ၊ ကိုယ်ပူတာတွေလိုမျိုး လက္ခဏာတွေကို သက်သာစေဖို့ဆိုရင် ရေများများသောက်တာ၊ ခေါင်းကိုက်သက်သာစေတဲ့ ဆေးတွေ၊ အဖျားကျဆေးတွေ သောက်လို့ရပါတယ်။ ဒီလို သောက်သုံးပေးတာက အတိုင်းအတာ တစ်ခုအထိတော့ သက်သာစေနိုင်ပါတယ်။

Omicron ရဲ့ လက္ခဏာတွေကို လုံးဝရပ်တန့်ပစ်ဖို့တော့ မလွယ်ပါဘူး။ အကောင်းဆုံးသော နည်းလမ်းက မဖြစ်ခင်က ကြိုတင် ကာကွယ်တာပါ။

ဘယ်လို ကာကွယ်မလဲ။

Omicron ကူးစက်မှုကနေ ကာကွယ်ဖို့ဆိုရင်

ကာကွယ်ဆေး ထိုးပါ။

ကိုဗစ် ကာကွယ်ဆေးတွေလည်း အမျိုးအစား ရွေးစရာ အများကြီး ရှိလာခဲ့ပြီ ဖြစ်သလို လူတော်တော်များများဟာလည်း ကာကွယ်ဆေး ၂ ကြိမ်တောင် ထိုးပြီးကြပါပြီ။ ကာကွယ်ဆေးက ကိုဗစ် လုံးဝ မကူးစက်အောင် မကာကွယ်ပေးနိုင်ဘူးဆိုပေမယ့် ထိုက်သင့်သလောက်တော့ ကာကွယ်ပေးနိုင်ပါတယ်။ ဒါကြောင့် ကာကွယ်ဆေး ၂ ကြိမ် ပြည့်မီအောင် ထိုးထားပါ။

လက်တွေကို အပြင်က ပြန်လာတိုင်း၊ တစ်ခုခုကို ကိုင်တွယ်ထိတွေ့ပြီးတိုင်း လက်တွေကို ရေနဲ့ ဆပ်ပြာနဲ့ သေချာလေး သန့်စင်ဆေးကြောပေးပါ။