ကျန်းမာစေမယ့် အလေ့အကျင့်များ

သက်ရှိတွေ အထူးသဖြင့် လူတွေမှာ ကျန်းမာကြတယ်ဆိုတာက ကျန်းမာရေးနဲ့ ညီညွတ်တဲ့ နေထိုင်စားသောက်မှု အလေ့အထတွေ ရှိလို့ပါ။ ကျန်းမာရေးဆိုတာက သဘာဝအတိုင်း ရထားတဲ့ လက်ဆောင်ဆိုပေမယ့် သေချာစောင့်ရှောက်ဖို့က ကိုယ်တိုင်မှာ တာဝန်အရှိဆုံးပါ။ ဒီတစ်ခေါက်တော့ လူတိုင်း ကျန်းမာဖို့အတွက် သိထားဖို့ လိုမယ့် ကျန်းမာစေမယ့် အလေ့အကျင့်များ အကြောင်း ပြောပြပေးသွားချင်ပါတယ်။

ကျန်းမာစေမယ့် အလေ့အကျင့်များဆိုတာ ဘာလဲ ……..

ကျန်းမာစေမယ့် အလေ့အကျင့် ဆိုတာက ရုပ်ပိုင်းဆိုင်ရာ၊ စိတ်ပိုင်းဆိုင်ရာနဲ့ စိတ်ခံစားမှုပိုင်းဆိုင်ရာ ကောင်းကျိုးတွေကို ခံစားရရှိစေနိုင်တဲ့ လှုပ်ရှားလုပ်ဆောင်မှုတွေပါ။ စလုပ်ခါစမှာတော့ ပြောင်းလဲမှု သေးသေးလေးတွေက ထိရောက်မြင်သာတဲ့ ကောင်းကျိုးတွေကို ခံစားရမှာ မဟုတ်ပါဘူး။ ဒါပေမယ့် အချိန်ကြာလာတဲ့အခါ သေးငယ်တဲ့ အလေ့အကျင့် ပြောင်းလဲမှုတွေက ကျန်းမာတဲ့ ဘဝနေထိုင်မှုကို ပုံဖော်ပေးနိုင်မှာပါ။

ဒီနေရာမှာ သတိထားရမယ့် အရေးကြီးတဲ့ အချက်တစ်ခုက တစ်ဆင့်ချင်း သွားရတယ်ဆိုတာကိုပါ။ ကျန်းမာစေမယ့် အလေ့အကျင့်များစွာကို ရေရှည် လုပ်ဆောင်ပေးတာက ကျန်းမာပျော်ရွှင်တဲ့ ဘဝနေထိုင်မှုပုံစံကို ပိုင်ဆိုင်နိုင်စေမှာ ဖြစ်ပါတယ်။ ယနေ့ခေတ်မှာ လူတော်တော်များများက ကျန်းမာတဲ့ အလေ့အထတွေထက် ကျန်းမာရေးနဲ့ ညီညွတ်မှု မရှိတဲ့ အလေ့အထတွေကိုပဲ လုပ်ဆောင်နေကြတာ များပါတယ်။

နောက်တစ်ချက်က ကျန်းမာရေးနဲ့ မညီညွတ်တဲ့ အလေ့အထတွေကိုပဲ ကျန်းမာရေးနဲ့ ညီညွတ်တဲ့ အလေ့အထတွေလိုမျိုး လုပ်ဆောင်နေကြတာပါ။ ဥပမာ ပြောပြရရင် ညတိုင်း ရေခဲမုန့် ၂ ခွက်စားတာက ကျန်းမာရေးနဲ့ မညီညွတ်ဘူး။ ဒါကြောင့် ၂ ခွက် မစားတော့ဘူး။ ၁ ခွက်ပဲ စားတော့တယ်။ လျှော့စားလိုက်တယ်လို့ပေါ့။

တကယ်ကတော့ ရေခဲမုန့်က ကျန်းမာရေးနဲ့ မညီညွတ်ပါဘူး။ ညဘက်စားတာက သွေးတွင်းသကြားဓာတ်ကို မြင့်တက်စေပြီး ကျန်းမာရေးကို ထိခိုက်စေနိုင်ပါတယ်။ ဒါကို ၁ ခွက်လျှော့စားလိုက်ရင်ပဲ ကျန်းမာရေးနဲ့ ညီညွတ်တဲ့ အလေ့အထလိုမျိုး မှတ်ယူလုပ်ဆောင်နေကြတာပါ။

ကျန်းမာစေတဲ့ အလေ့အကျင့်တွေက လုပ်စမှာ ခက်ခဲပေမယ့် ရေရှည်မှာ ကျန်းမာရေးကို အတော်လေး ကောင်းမွန်လာစေမှာပါ။

လူတိုင်း သိထားဖို့လိုမယ့် ကျန်းမာစေမယ့် အလေ့အကျင့်များ

နေ့စဉ်ဘဝမှာ ကျန်းမာပျော်ရွှင်စေဖို့ဆိုရင် လူတိုင်း အခုပြောပြမယ့် ကျန်းမာစေမယ့် အလေ့အကျင့်လေးတွေကို မွေးမြူဖို့ လိုပါမယ်။

• မနက်စာ စားပါ

မနက်စာ ပုံမှန် စားသုံးတာက ကျန်းမာရေးကို အတော်လေး အထောက်အကူပြုပေးပါတယ်။ ကျန်းမာစေခြင်းရဲ့ အခြေခံအကျဆုံး အကြောင်းတရား တစ်ရပ်ပါ။ မနက်ခင်းမှာ မနက်စာ ပြည့်ပြည့်ဝဝ စားသုံးတာက ဇီဝကမ္မဖြစ်စဉ်ကို မှန်ကန်ကောင်းမွန်စေပြီး အလွန်အကျွံ မစားမိစေဖို့လည်း ဟန့်တားရာရောက်ပါတယ်။

မနက်စာ ပုံမှန်စားသုံးသူတွေက အလုပ်တွေကိုလည်း အကောင်းဆုံး လုပ်ဆောင်နိုင်သလို စဉ်းစားတွေးခေါ်နိုင်စွမ်းလည်း ပိုကောင်းကြပါတယ်။ ဒါကြောင့် ကျန်းမာချင်တယ်ဆိုရင် တစ်နေ့တာအတွက် အရေးအကြီးဆုံး မနက်စာကို မဖြစ်မနေ စားပေးပါ။

• အနားယူပါ

ကျန်းမာတဲ့သူတိုင်းက အလုပ်ချိန် နားချိန် ခွဲထားတတ်ကြပါတယ်။ အနားယူတယ်ဆိုတဲ့နေရာမှာ ဖုန်းသုံးတာတွေ၊ စိတ်ကို ဖိစီးစေမယ့် ရုပ်ရှင်မျိုးတွေ ကြည့်တာတွေကို ဘာမှ မလုပ်ဘဲ ပြည့်ပြည့်ဝဝ အနားယူတာကို ပြောတာပါ။

ပြည့်ဝစွာ အိပ်စက် အနားယူတာက ကျန်းမာစေမယ့် အလေ့အထတွေထဲက တစ်ခုပါ။

• မနက်ခင်းတိုင်း နာရီဝက် လမ်းလျှောက်ပါ

မနက်ခင်းတိုင်းမှာ လေကောင်းလေသန့် ရရှိနိုင်မယ့် နေရာမှာ နာရီဝက် လမ်းလျှောက်တာက အဆုတ်တွေကို အားကောင်းစေနိုင်သလို ကိုယ်တွင်းက အဆိပ်အတောက်တွေကိုလည်း ဖယ်ရှားပေးနိုင်ပြီး စိတ်ရောကိုယ်ပါ ကျန်းမာလာစေမှာပါ။

• ၁ နာရီ ထိုင်ပြီးတိုင်း ၂ မိနစ် လမ်းလျှောက်ပါ

အခုခေတ်မှာ အလုပ်အများစုက ထိုင်လုပ်ရတာပါ။ အထိုင်များတဲ့ နေထိုင်မှု ဘဝပုံစံကြောင့် ကျန်းမာရေးကို မထိခိုက်စဖို့ဆိုရင် ၁ နာရီထိုင်ပြီးတိုင်းမှာ ၂ မိနစ်လောက် လမ်းလျှောက်ပါ။

• အိမ်အလုပ်တွေ လုပ်ပါ

အိမ်အလုပ်တွေ လုပ်တာကလည်း ကျန်းမာအောင် လေ့ကျင့်ခန်း လုပ်သလိုပါပဲ။ ဒါကြောင့် နေ့စဉ်ဘဝမှာ ကျန်းမာစေဖို့ဆိုရင် အိမ်အလုပ်တွေကို နိုင်သလောက်လုပ်ပြီး ကျန်းမာအောင် နေထိုင်လိုက်ကြပါစို့။

• ကိုယ်နေဟန်ထား မှန်တဲ့ အလုပ်စားပွဲကို ရွေးပါ

တစ်နေကုန်ထိုင်ပြီး အလုပ်လုပ်ရတဲ့ စားပွဲကို ကိုယ်နေဟန်ထား မှန်စေဖို့အတွက် သေချာလေး ဂရုစိုက်ဖို့ လိုပါမယ်။ ဒါမှ ကြွက်သားတွေ နာကျင်တာ၊ အရိုးအဆစ်တွေ ထိခိုက်တာမျိုး မဖြစ်မှာပါ။

• လေ့ကျင့်ခန်း ပုံမှန် လုပ်ပါ

နေ့စဉ် လေ့ကျင့်ခန်းကို ပုံမှန်လုပ်ပေးတာက ကိုယ်ခန္ဓာ အချိုးအစား ပြေပြစ်စေသလို စိတ်ရောကိုယ်ပါ ကျန်းမာစေဖို့လည်း အကောင်းဆုံး ထောက်ကူပေးနိုင်ပါတယ်။ တစ်နေ့ကို အနည်းဆုံး ၁၅ မိနစ်လောက် ပေါ့ပေါ့ပါးပါး လေ့ကျင့်ခန်းလေးတွေ လုပ်ပေးပါ။

ဒါတွေအပြင် ကျန်းမာပျော်ရွှင်တဲ့ ဘဝနေထိုင်မှုကို ပိုင်ဆိုင်နိုင်စေဖို့ဆိုရင် အခုပြောပြမယ့် အလေ့အထလေးတွေကိုလည်း မွေးမြူဖို့ လိုပါမယ်။

• ဓာတ်လှေကားအစား လှေကားကို သုံးပါ
• နီးနီးနားနား နေရာတွေကို လမ်းလျှောက်သွားပါ
• တတ်နိုင်သမျှ လမ်းလျှောက်ပါ
• တစ်နေ့ကို ခြေလှမ်း ၁ သောင်း လျှောက်ပါ
• အက ဝါသနာပါရင် ကပါ
• တောင်တက်ပါ
• ယောဂ လေ့ကျင့်ပါ
• အလုပ်စားပွဲမှာ လုပ်လို့ရတဲ့ လေ့ကျင့်ခန်းလေးတွေ လုပ်ပါ
• ကျန်းမာရေးနဲ့ ညီညွတ်အောင်စားသုံးပါ
• ရေများများ သောက်ပါ
• အစားကို အချိန်မှန် စားပါ
• ကာကွယ်ဆေး ထိုးပါ
• ပုံမှန် ကျန်းမာရေး စစ်ဆေးမှု လုပ်ပါ
• အိပ်ရာမဝင်ခင်မှာ အစားအများကြီး မစားပါနဲ့
• ရေများများ သောက်ပါ
• ဆေးလိပ်ဖြတ်ပါ
• အချိုရည်တွေအစား ကျန်းမာရေးနဲ့ ညီညွတ်တဲ့ အသီးဖျော်ရည်တွေ သောက်ပါ
• အသင့်စား အမြန်စား အစားအစာတွေ မစားပါနဲ့
• အာဟာရ မျှတအောင် စားပါ။

ကျန်းမာပျော်ရွှင်စွာနဲ့ အသက်ရှည်ရှည် နေချင်တယ်ဆိုရင် အခုပြောပြခဲ့တဲ့ ကျန်းမာရေးနဲ့ ညီညွတ်တဲ့ အလေ့အထလေးတွေကို ကိုယ်ပိုင် အလေ့အထလေးတွေ ဖြစ်အောင် ပျိုးထောင်လိုက်ပါ။