အမျိုးသမီးတစ်ယောက်ရဲ့ အရေးအကြီးဆုံး အချိန်ဖြစ်တဲ့ကိုယ်ဝန်ဆောင်ကာလဆိုတာ အသေးစိတ်လေးက အစ သေချာသတိထား ဂရုစိုက်ဖို့လိုတဲ့ကာလတစ်ခုပါ။ ကံတရားအရဖြစ်လာမယ့် ဆိုးတဲ့အရာတွေကို အကုန်လုံးကို တားဆီးလို့ မရဘူးဆိုပေမယ့် ခုပြောပြမယ့် အချက်လေးတွေကို သိထားရင်တော့ ကျန်းမာတဲ့ ကိုယ်ဝန်တစ်ခုကို ပိုင်ဆိုင်ရမှာ အသေအချာပါ။ ဒါဆို ဗိုက်ထဲက ရင်သွေးလေး ဖွံ့ဖြိုးဖို့ တာဆူနေတဲ့ ကိုယ်ဝန် ပထမ ၃လမှာ ဘယ်လို အချက်တွေကို လိုက်နာရမလဲ ။ ဘယ်လို အချက်တွေကို ရှောင်ကြဉ်ရမလဲ ။ ။

ကိုယ်ဝန် ပထမ ၃ လမှာ ကိုယ်ဝန်ဆောင်တိုင်းလိုက်နာသင့်သည့် အချက်များ ။ ။

• အစားအသောက်က အရေးကြီးဆုံးပါ။ – ဘယ်လောက်ပဲ ပျို့အန်ချင်ပြီး အစားစားချင်စိတ်ပျောက်နေပါစေ ၂ ယောက်စာပေါင်းစားရမယ့် ကိုယ်ဝန်ဆောင်ကာလမှာ နည်းနည်းလေးမှ အာဟာရချိုတဲ့ခံလို့မရပါဘူး။ စားတဲ့အခါမှာလည်း သဘာဝအတိုင်းရတဲ့ အစားအသောက်တွေကို ဦးစားပေးစားသ့င်ပါတယ်။
• ကိုယ်ဝန်ဆောင်ဖြည့်စွက်အားဆေးတွေ သောက်ပေးပါ။ – ကိုယ်ဝန်ဆောင်နဲ့ ဗိုက်ထဲက ရင်သွေးလေးအတွက် အရေးအကြီးဆုံး ဗီတာမင် နဲ့ သတ္တုဓါတ်တွေဖြစ်တဲ့ folic acid၊ သံဓါတ်၊ ဇင့်နဲ့ ကယ်လ်ဆီယမ် အပြင် DHA တို့တစ်နေ့တာလိုအပ်တဲ့ ပမာဏ အတိုင်းရဖို့ အရေးကြီးပါတယ်။
• အရောင်အသွေးစုံတာတွေစားပါ။ – အစားအသောက်တွေကို ပြင်ဆင်တဲ့အခါ အရောင်သွေးစုံအောင် ( ဥပမာ အစိမ်းရောင်အသီးအရွက်တွေ အဝါရောင် အသီးအနှံတွေနဲ့ ရောင်ခြယ်ပစ္စည်းတွေပါတဲ့ ဘယ်ရီသီးတွေ စားပေးပါ။) သူတို့မှာပါဝင်တဲ့ ဓါတ်တိုးဆန့်ကျင်ပစ္စည်းတွေက အချင်းကနေ ကလေးဆီကို ရောက်သွားပြီး ရင်သွေးလေးအတွက် အစွမ်းကုန် ကာကွယ်ပေးမှာပါ။ ဒါ့အပြင် ပါဝင်တဲ့အမျှင်ဓါတ်က ဝမ်းချုပ်ခြင်းကိုလည်း သက်သာစေပါတယ်။
• ရေများများသောက်ပါ ။ – ရေဓါတ်ြပည့်ဝနေခြင်ဟာ ေန့မစေ့လ မစေ့ ကလေးမွေးဖွားနိုင်မှုကို လျှော့ချပေးပြီး ဝမ်းချုပ်ခြင်းကို သက်သာစေပါတယ်။ ဒါ့ကြောင့် ရေများများသောက်ပေးပါ။
• အိပ်ရေးဝဝအိပ်ပါ – ကိုယ်ဝန်ဆောင်ကာလမှာ ရုပ်ပိုင်းဆိုင်ရာရော၊ ဇီဝကမ္မ ဖြစ်စဉ်တွေရော ပြောင်းလဲနေတာကြောင့် နုန်းချိမောပန်းနေတတ်ပါတယ်။ ဒီလို ပင်ပန်းမှုတွေကို ပြေပျောက်စေဖို့အတွက် အိပ်စက်ခြင်းကသာ အကောင်းဆုံးပါ။ တစ်ညကို ၈ နာရီလောက် အိပ်သ့င်ပြီး နေ့ခင်းပိုင်းတွေမှာလည်း တစ်ရေးအိပ်ပေးလို့ရပါတယ်။
• လေ့ကျင့်ခန်းလုပ်ပါ။ – ကိုယ်ဝန်ထိခိုက်မှာစိုးလို့ဆိုပြီး ထိုင်ပဲထိုင်နေတာက ပုံစံမကျပါဘူး။ ပြင်းထန်တဲ့လေ့ကျင့်ခန်းမျိုး မဟုတ်ရင်တောင် လမ်းလျှောက်လေ့ကျင့်ခန်းကတော့ လုပ်ကိုလုပ်ပေးသင့်ပါတယ်။ ဒါမှ ေသွးလည်ပတ်မှု ကောင်းပြီး ခြေထောက်တွေ ဖောရောင်တာကိုလည်း သက်သာစေမှာပါ။
• တုပ်ကွေးကာကွယ်ဆေးကြိုထိုးထားပါ။ – ကိုယ်ဝန်ဆောင်အမျိုးသမီးတွေ တုပ်ကွေးကာကွယ်ဆေး ထိုးလို့ရသလို မဖြစ်မနေထိုးပေးဖို့လည်း လိုအပ်ပါတယ်။ အမေနေမကောင်းရင် ဗိုက်ထဲက ကလေးအတွက် မကောင်းဘူးလေ။ ဒါ့အပြင် နောက်ထပ် ထိုးပေးဖို့လိုတဲ့ ကာကွယ်ဆေးတစ်ခုကတော့ မေးခိုင်ကာကွယ်ဆေးပဲ ဖြစ်ပါတယ်။

ကိုယ်ဝန်ဆောင် ပထမ ၃ လအတွင်း ရှောင်သင့်တဲ့ အချက်တွေကတော့

• ဆေးလိပ်လုံးဝ မသောက်ပါနဲ့။ – ဆေးလိပ်က ကိုယ်ဝန်ပျက်ကျစေနိုင်ဖို့ အခွင့်အလမ်းများစေသလို မွေးလာမယ့် ကလေးမှာလည်း ချို့ယွင်းချက်တွေ အများကြီးရှိစေတတ်ပါတယ်။ ( နှုတ်ခမ်းကွဲအာခေါင်ကွဲ၊ ကလေးပေါင်ချိန်မပြည့်တာ၊ ေန့မစေ့လမစေ့ဘဲမွေးတာ၊ အသေလေးမွေးတာ ) စတာတွေပေါ့။ ကိုယ်ဝန်ဆောင်နေတဲ့အချိန်မှာတော့ ဆေးလိပ်ဖြတ်ခဲ့ပြီး ကလေးမွေးပြီး ဆေးလိပ်ပြန်သောက်တာမျိုးလည်း မလုပ်ပါနဲ့။ ကိုယ့်အနားမှာ တစ်ချိန်လုံးရှိနေတဲ့ကလေးက တစ်ဆင့်ခံ ဆေးလိပ်သောက်သူဖြစ်သွားတတ်သလို အခြား ဆိုးကျိုးတွေလည်း ခံစားရတတ်လို့ပါ။
• အရက်ကိုလည်း ရှောင်ပါ ။ – ကိုယ်ဝန်ကာလမှာ အရက်တစ်စက်ကလေးတောင် သောက်လို့မရပါဘူး။ အချင်းကိုဖြတ်သွားပြီး ကလေးဆီ ရောက်သွားတဲ့အရက်က ကလေးဖွံ့ဖြိုးမှု အဆင့်တိုင်းကို ပြဿနာ ဖြစ်စေတတ်ပြီး မွေးရာပါ ချို့ယွင်းချက် အများကြီးနဲ့ မွေးဖွားလာတတ်ပါတယ်။
• မကျက်တကျက် အသားတွေ မစားပါနဲ့။ – အကင်ဆို အကုန်ကျက်တာမျိုး မဟုတ်ဘဲ တုန်တုန်လေးဖြစ်နေမှ စားလို့ကောင်းတာတွေကို ကိုယ်ဝန်ဆောင်အချိန်မှာ ဘေးဖယ်ထားလိုက်ပါ။ မကျက်တကျက် အသားတွေဟာ listeriosis နဲ့ toxoplasmosis လို့ခေါ်တဲ့ ကိုယ်ဝန်ဆောင်တွေ အတွက် အကြောက်ရဆုံး ရောဂါတွေကို ဖြစ်စေပြီး ကိုယ်ဝန်ပျက်ကျဖို့ အခွင့်အလမ်းများစေပါတယ်။
• ချွေးထုတ်ခန်း မသွားပါနဲ့။ – ကိုယ်ဝန်ကြီးနဲ့ နေရတာ ငြီးစီစီကြီးဆိုပြီး ချွေးထုတ်ခန်းသွားပြီး အပန်းမဖြေလိုက်ပါနဲ့။ ချွေးထုတ်ခန်းဆိုတာ အပူချိန်မြင့်တယ်မလား။ ကိုယ်ဝန်ပထမ ၃ လမှာ မိခင်ရဲ့ ကိုယ်အပူချိန် မြင့်ခြင်းဟာ ဗိုက်ထဲက ရင်သွေးလေးကိုထိခိုက်စေပြီး ကိုယ်ဝန်ပျက်ကျစေတတ်ပါတယ်။
• ကော်ဖီ အများကြီး မသောက်ပါနဲ့။ – ကော်ဖီမှာပါတဲ့ ကဖင်းဓါတ်ဟာ အချင်းကိုဖြတ်ပြီး ကလေးဆီရောက်ကာ ကလေးရဲ့ နှလုံးခုန်နှုန်းအပေါ် သက်ရောက်မှုရှိပါတယ်။ ကိုယ်ဝန်သည်တွေ ကော်ဖီသောက်လို့ရတယ်ဆိုပေမယ့် တစ်နေ့ ၂ ခွက်ထက်တော့ ပိုမသောက်သင့်ပါဘူး။
• ကိုယ်ဝန်ကြီးနဲ့ အိမ်က အိမ်မွေးတိရိစ္ဆာန်တွေရဲ့ အညစ်အကြေးတွေကို သန့်ရှင်းရေး မလုပ်သင့်ပါဘူး။

ကဲ အရေးကြီးတဲ့ ကိုယ်ဝန် ပထမ ၃ လမှာ ဒီလိုအချက်လေးတွေ သိထားပြီးလိုက်နာရင် မိခင်ရော ဗိုက်ထဲက ကလေးလေးပါ ကျန်းမာမှာ အသေအချာပဲနော် ။ ။

Hello Health Group သည် ဆေးပညာဆိုင်ရာ အကြံပေးချက်များ၊ ရောဂါရှာဖွေခြင်းနှင့် ကုသခြင်းများ မပြုလုပ်ပါ။