ဓာတ်ဆားရည် သောက်ပေးသင့်တဲ့ အကြောင်းအရင်း

နေ့စဉ်လှုပ်ရှားမှုတိုင်းကို အကောင်းဆုံး လုပ်ဆောင်နိုင်စေဖို့ ခန္ဓာကိုယ်ကျန်းမာနေစေဖို့ အာဟာရဓာတ်လိုအပ်သလို  ဓာတ်ဆားဓာတ်ကလည်း ချန်ထားလို့မဖြစ်တဲ့အရာ တစ်ခုပေါ့။ နေ့စဉ်လှုပ်ရှားမှုတွေ လုပ်ရင်ဖြစ်ဖြစ်၊ လေ့ကျင့်ခန်းတွေ လုပ်ရင်ဖြစ်ဖြစ် ထွက်သွားတဲ့ ချွေးတွေကြောင့် ကိုယ်တွင်းမှာ ဓာတ်ဆားဓာတ်တွေက အစဉ်မပြတ် ဆုံးရှုံးနေပါတယ်။ ဒီဓာတ်တွေကို အစားအသောက်တွေက ဖြည့်တင်းနိုင်တယ် ဆိုပေမယ့် ဝမ်းပျက်တာမျိုး၊ ဖျားနာတာမျိုး ဖြစ်တဲ့အခါ လုံလောက်တဲ့ ဓာတ်ဆားဓာတ်ကို အစားအသောက်တွေကနေတဆင့် ပြန်လည် မဖြည့်တင်းနိုင်တဲ့အခါ ဓာတ်ဆားရည်ကို တပ်ကူခေါ်ဖို့လိုလာမှာပါ။

ဘယ်လိုအခြေအနေမျိုးမှာ ဓာတ်ဆားရည်သောက်ဖို့လိုမလဲ………

နေ့စဉ်တိုင်း စားသုံးနေတဲ့ အစားအစာတွေထဲမှာ ဓာတ်ဆားဓာတ်က ပါဝင်နေတာကြောင့် ပုံမှန်အချိန်တွေမှာ ဓာတ်ဆားရည် သောက်ဖို့မလိုပေမယ့် ဒီလိုအခြေအနေမျိုးတွေမှာတော့ ဓာတ်ဆားရည် သောက်ဖို့ လိုပါမယ်။

• ဖျားနေတဲ့အခါမျိုး
• ချွေးထွက်များတဲ့အခါမျိုး
• အော့အန် နေတဲ့အခါမျိုး
• ဝမ်းသွားနေတဲ့အခါမျိုး
• အချိန်ကြာကြာ လေ့ကျင့်ခန်းလုပ်ပြီးတဲ့အခါမျိုး
• အချိန်အကြာကြီးနေပူထဲမှာနေမိတဲ့အခါမျိုး
• လှုပ်လှုပ်ရှားရှားလုပ်တာကြောင့်ချွေးအရမ်းထွက်တဲ့အခါမျိုး
• ရေဓာတ်ခမ်းခြောက်တဲ့အခါမျိုး
• ကြွက်တက်တဲ့အခါမျိုးတွေမှာ ခန္ဓာကိုယ်က လျော့နည်းသွားတဲ့ ဓာတ်ဆားဓာတ်တွေကို ပြန်လည်ဖြည့်တင်းဖို့အတွက် ဓာတ်ဆားရည်ကိုသောက်ပေးဖို့လိုပါမယ်။

ဓာတ်ဆားက ခန္ဓာကိုယ်အတွက် ဘာလုပ်ပေးလဲ…………

ဓာတ်ဆားဓာတ်ဆိုတာက ကိုယ်တွင်းက အရည်ပမာဏကို ထိန်းညှိပေးတဲ့ သွေးတွင်းသတ္တုဓာတ်တစ်မျိုးပါ။ သွေးပေါင်ချိန်ကို ထိန်းညှိပေးသလို ကြွက်သားတွေကျုံ့ဆန့်မှုကို အကောင်းဆုံး ထိန်းညှိပေးပြီး ခန္ဓာကိုယ်ရဲ့ စနစ်တွေကို အကောင်းဆုံး လည်ပတ်စေနိုင်ပါတယ်။ ခန္ဓာကိုယ် ကျန်းမာနေစေဖို့နဲ့ ကောင်းမွန်စွာလှုပ်ရှားနိုင်စေဖို့အတွက် ဓာတ်ဆားဓာတ်က မရှိမဖြစ် လိုအပ်တာပါ။

• ကိုယ်တွင်းအရည်ဓာတ်ကို ထိန်းညှိပေးတယ်
• သွေးပေါင်ချိန်ကို ထိန်းညှိပေးတယ်
• ကြွက်သားတွေ ကျုံ့ဆန့်မှုကို ကောင်းစေတယ်
• နှလုံး ကျန်းမာစေတယ်
• သွေးတွင်း အက်ဆစ်ပမာဏကို ထိန်းညှိပေးတယ်။

ဓာတ်ဆားရည်မှာပါတဲ့ အခြေခံပါဝင်ပစ္စည်းတွေကဘာတွေလဲ……..

ဓာတ်ဆားရည်အများစုမှာ အခုလို ဓာတ်တွေ ပါဝင်နေပါတယ်။

ဆိုဒီယမ် – သွေးပေါင်ချိန်ကို ထိန်းညှိပေးတယ်။ ကြွက်သားတွေကို ကျန်းမာစေပြီး အာရုံကြောစနစ် ကျန်းမာစေဖို့ အကောင်းဆုံး ထောက်ပံ့ပေးပါတယ်။ ခန္ဓာကိုယ်အတွက် နေ့စဉ် စားသုံးပေးသင့်တဲ့ ဓာတ်တစ်မျိုးပါ။

ပိုတက်ဆီယမ် – သွေးတွင်း အက်ဆစ်ပမာဏနဲ့ သွေးပေါင်ချိန်ကို ထိန်းညှိပေးပါတယ်။ ဆိုဒီယမ် များသွားတာကြောင့် သွေးတိုးတာမျိုး မဖြစ်အောင် ကာကွယ်ပေးပါတယ်။

မဂ္ဂနီဆီယမ် – သွေးပေါင်ချိန်ကို ထိန်းညှိပေးပြီး ခန္ဓာကိုယ်ရဲ့လှုပ်ရှားမှုတွေ ကောင်းမွန်အောင် ထောက်ပံ့ပေးသလို စိတ်ပိုင်းဆိုင်ရာ ကျန်းမာစေနိုင်ပါတယ်။ နာကျင်ရောင်ရမ်းမှုကို သက်သာစေပြီး ခေါင်းတစ်ခြမ်းကိုက်တာကို သက်သာစေနိုင်ပါတယ်။

ဓာတ်ဆားရည် သောက်ပေးတာကြောင့် ရရှိမယ့် ကျန်းမာရေး အကျိုးကျေးဇူးတွေ

ဓာတ်ဆားရည် သောက်ပေးဖို့ အချိန်တိုင်း မလိုအပ်ပေမယ့် အပေါ်မှာ ပြောခဲ့တဲ့ အခြေအနေမျိုးဆိုရင်တော့ ဓာတ်ဆားရည်သောက်ပေးတာက အကောင်းဆုံးဖြစ်မှာပါ။ ဓာတ်ဆားရည်သောက်ပေးတာကြောင့်

• ကိုယ်တွင်းရေဓာတ် ပြည့်ဝစေနိုင်တယ်
• ခန္ဓာကိုယ်အပူချိန်ကို လျော့ကျစေနိုင်တယ်
• လေ့ကျင့်ခန်း လုပ်ဆောင်နိုင်မှုကို ပိုမိုကောင်းမွန်စေနိုင်တယ်
• အပူလျှပ်တာကို ကာကွယ်ပေးတယ်
• အော့အန်တာ၊ ဝမ်းသွားတာကြောင့် ကုန်ဆုံးသွားတဲ့ ရေနဲ့ ဆားဓာတ်ကို အမြန်ဆုံး ပြန်ဖြည့်ပေးနိုင်တယ်
• ကဖင်း၊ အယ်လ်ကိုဟောပါတဲ့ သောက်စရာတွေ  သောက်တာကြောင့်ရေဓာတ်ဆုံးရှုံးတာကို အမြန်ဆုံး ပြန်လည် ဖြည့်တင်းပေးနိုင်တယ်။

တစ်နေ့ ရေဘယ်လောက်ပမာဏသောက်ရမလဲ…….

ပုံမှန်အားဖြင့်ကတော့ အမျိုးသမီးတစ်ယောက်က တစ်နေ့ကို ရိုးရိုးရေ ၉ ခွက်စာလောက် သောက်ဖို့ လိုပါမယ်။ အမျိုးသား တစ်ယောက်ကတော့ တစ်နေ့တာမှာရေဓာတ် ၁၂ ခွက်စာလောက် ရရှိဖို့ လိုပါမယ်။

တကယ်လို့ ရာသီဥတုက အရမ်းပူမယ်ဆိုရင်တော့ ပုံမှန်လိုအပ်ချက်ထက် ၃ ခွက်စာစီလောက် ပိုလိုအပ်မှာပါ။ လေ့ကျင့်ခန်း လုပ်မယ်ဆိုရင် မလုပ်ခင်မှာ ၂ ခွက်စာလောက် သောက်သုံးပေးပြီး လေ့ကျင့်ခန်းလုပ်ပြီး မိနစ် ၂၀ အကြာမှာ တစ်ခွက်လောက် သောက်သုံးပေးဖို့ လိုပါမယ်။ တစ်နေ့တာမှာ ဓာတ်ဆားကို မိမိချွေးထွက်တဲ့ပမာဏပေါ် မူတည်ပြီး သင့်တော်သလို သောက်ပေးနိုင်ပါတယ်။