ပဲပင်ပေါက် ကပေးတဲ့ ကျန်းမာရေးအကျိုးကျေးဇူး

ပဲပင်ပေါက် ဆိုတာ

ပဲပင်ပေါက်ဆိုတာက ပဲစေ့လေးတွေကနေ စပြီး အပင်ပေါက်လာတဲ့အေ့ခြအနေပါ။ ထိပ်ဖျားမှာ အဝါရောင် အရွက်နှစ်ခုရှိနေပြီး အဖြူရောင်ရိုးတံလေးနဲ့ အမြစ်ခပ်ပါးပါးလေးပါတဲ့ အပင်ငယ်လေးတွေပါ။ ပဲပြားနဲ့ ပဲပင်ပေါက်ကို ရောကြော်စားကြတာများသလို အသုပ်တွေ၊ မုန့်ဟင်းခါးထဲမှာလည်း ထည့်စားကြပါတယ်။ ပဲတီချဉ်သုပ်ကလည်းမြန်မာလူမျိုးတွေကို ခံတွင်းမြိန်စေတဲ့ ဟင်းလျာတစ်မျိုးပါ။

ပဲပင်ပေါက် စားရင်းရရှိမယ့် ကျန်းမာရေးအကျိုးကျေးဇူးတွေက

ပဲပင်ပေါက်က အာဟာရဓါတ်ကြွယ်ဝသလို ခန္ဓါကိုယ်အတွက်လိုအပ်တဲ့ ဗီတာမင် နဲ့ သတ္တုဓါတ် တွေကြွယ်ဝစွာပါဝင်နေတာကြောင့် ခန္ဓါကိုယ်ကိုကျန်းမာစေနိုင်ပါတယ်။

ကိုယ်ခံအားကောင်းစေတယ်

ပဲပင်ပေါက်မှာ ဗီတာမင် C ပါဝင်တာကြောင့် ကိုယ်ခံအားကိုကောင်းစေနိုင်ပြီးရောဂါပိုးတွေကူးစက်မှုကနေ အထိရောက်ဆုံးကာကွယ်ပေးနိုင်ပါတယ်။ ဓါတ်တိုးဆန့်ကျင်အာနိသင်ပါဝင်နေတာကြောင့် ခန္ဓါကိုယ်ကို ကျန်းမာစေပြီး ဇီဝကမ္မလုပ်ငန်းစဉ်တွေကို အကောင်းဆုံးလည်ပတ်စေနိုင်မှာပါ။ ဗီတာမင် A ပါဝင်နေတာကြောင့်လည်း ခန္ဓါကိုယ်ကို အကောင်းဆုံးထောက်ပံ့ပေးနိုင်မှာပါ။

ဇီဝကမ္မဖြစ်စဉ်တွေကိုကောင်းမွန်စေနိုင်ပါတယ်

ပဲပင်ပေါက်မှာ ဇီဝကမ္မဖြစ်စဉ်တွေကို အကောင်းဆုံးလည်ပတ်စေနိုင်ဖို့ထောက်ပံ့ပေးနိုင်တဲ့ အင်ဇိုင်းတစ်မျိုးပါဝင်နေပါတယ်။ ဒီအင်ဇိုင်းကို အခြားစားစရာတွေကနေရရှိဖို့ ခက်ခဲပါတယ်။ ဒါ့အပြင် ပဲပင်ပေါက်မှာ ဆဲလ်တွေဖြစ်ပေါ်မှု၊ ကိုယ်တွင်းအင်္ဂါတွေကျန်းမာအောင်ထောက်ပံ့ပေးမှု နဲ့ ကြွက်သားတွေကျန်းမာသန်စွမ်းအောင်လုပ်ဆောင်ပေးတဲ့ ပရိုတင်းကြွယ်ဝစွာပါဝင်နေပါတယ်။ အရိုးနဲ့ကြွက်သားတွေသန်မာပြီး ကိုယ်တွင်းအင်္ဂါတွေကျန်းမာစေဖို့ စားသုံးပေးသင့်ပါတယ်။

ခန္ဓါကိုယ်မှာ သံဓါတ်နည်းလာတဲ့အခါသွေးအားနည်းရောဂါကို ခံစားရနိုင်ပါတယ်။ ဒါကြောင့် သံဓါတ်ကြွယ်ဝတဲ့ အစားအစာတွေကို စားဖို့လိုပါမယ်။ ဒီတော့ သံဓါတ်ချို့တဲ့မှုကြောင့်သွေးအားနည်းတာ၊ အစာခြေစနစ်ပြဿနာတွေခံစားရတာ၊ခြေကုန်လက်ပမ်းကျတာ၊ အမောမခံနိုင်တာတွေမဖြစ်စေဖို့အတွက် ပဲပင်ပေါက်လေးကို စားသုံးပေးသင့်ပါတယ်။ ပဲပင်ပေါက်မှာပါတဲ့ သံဓါတ် နဲ့ကော့ပါးဓါတ်တွေက ခန္ဓါကိုယ်ထဲမှာသွေးနီဥဆဲလ်တွေဖြစ်ပေါ်စေပြီး ကိုယ်တွင်းသွေးလည်ပတ်မှုကိုကောင်းစေနိုင်ပါတယ်။

ကဲ… ခန္ဓါကိုယ်လေး ကျန်းမာစေဖို့ ပဲပင်ပေါက်ကို တစ်ပတ်ကို ၃ ကြိမ်လောက်တော့ စားသုံးပေးဖို့ ပြောပါရစေ။

ဘာတွေ သတိထားရမလဲ!

ပဲပင်ပေါက်က လူတိုင်းနဲ့ တည့်တယ်ဆိုပေမယ့် အသက် ၅ နှစ်အောက် ကလေးတွေ၊ အသက် ၇၀ အထက် လူကြီးတွေ၊ ကိုယ်ဝန်ဆောင်မေမေတွေ နဲ့ ကိုယ်ခံအားနည်းသူတွေ အများကြီး စားတာမျိုး မလုပ်သင့်ပါဘူး။ နောက်တစ်ချက်က လတ်ဆတ်ပြီး သေချာ ချက်ထားတာကိုပဲ စားပေးပါ။ အစိမ်းစားတာမျိုး မလုပ်ပါနဲ့။