သင့်စိုးရိမ်မှုတွေက ဘာတွေလဲ။

close
မတိကျ
နားလည်ရခက်
အခြား

သို့မဟုတ် လင့်ခ်ကူးယူမည်

နွေရာသီမှာ ဆီးချိုရောဂါရှိသူ တွေ ကျန်းမာစေဖို့

နွေရာသီမှာ ဆီးချိုရောဂါရှိသူ တွေ ကျန်းမာစေဖို့

ရာသီဥတုဆိုတာ လူသားတွေအံတုလို့မရတဲ့ သဘာဝဖြစ်စဉ်တစ်ခုပါ။ နွေပူလာတာကတော့ သိသိသာသာနော်။ သာမန်လူတွေအတွက်တောင် နေရထိုင်ရတာခက်တဲ့ အပူချိန်မှာ ရောဂါအခံရှိသူတွေဆိုရင် ပိုဆိုးတော့မှာပေါ့။ ဒီတစ်ခေါက်တော့ နွေပူလာလို့ ဆီးချိုရောဂါရှိတဲ့ မိဘတွေနဲ့ ကိုယ်ချစ်ရသူကို စိတ်ပူနေသူတွေအတွက် နွေရာသီမှာ ဆီးချိုရောဂါရှိသူ ကို ဘယ်လိုဂရုစိုက်ပေးရမလဲဆိုတဲ့အကြောင်းလေး ပြောပြပေးချင်ပါတယ်နော်။

နွေဥတုနဲ့ ခန္ဓာကိုယ်တုံ့ပြန်မှု

ရာသီဥတုပူပြင်းမှုက လူတိုင်းသည်းမခံနိုင်တဲ့ ကိစ္စတွေထဲကတစ်ခုပါ။ ခန္ဓာကိုယ်က ချွေးထွက်များပြီး ရေဓာတ်ဆုံးရှုံးမှုများတဲ့ ရာသီတစ်ခုပေါ့။ နေလောင်တာကြောင့် အသားကလည်း မည်းသေးတယ်နော်။ ရေဓာတ်ဆုံးရှုံးမှုကြောင့် လေးလံထိုင်းမှိုင်းတာတွေ၊ မအီမသာဖြစ်တာတွေ ခံစားလာရနိုင်ပါတယ်။ ဒီလိုခံစားရမှုက သာမန်လူမှာ အတွေ့ရများပါတယ်။ ဒါဆို ဆီးချိုရောဂါရှိသူ တွေရော ဘယ်လိုများခံစားရနိုင်လဲ။

နွေရာသီနဲ့ ဆီးချို

ခန္ဓာကိုယ်က အပူဒဏ်နဲ့ ထိတွေ့မိတဲ့အခါ ချွေးထွက်များလာမယ်။ ဒီလိုချွေးထွက်များလာတာက ရေဓာတ်ဆုံးရှုံးမှုကို ဖြစ်စေတယ်။ ရေဓာတ်ဆုံးရှုံးမှုရဲ့နောက်ဆက်တွဲအနေနဲ့ သွေးတွင်းသကြားဓာတ်မြင့်တက်လာမယ်။ ပြောချင်တာကတော့ နွေရာသီမှာ သွေးချိုတက်လွယ်တယ်။ ဆီးချိုရောဂါရှိသူ တွေ ပိုသတိထားသင့်တယ်ပေါ့နော်။

အပူချိန်က ခန္ဓာကိုယ်ရဲ့ အင်ဆူလင်စုပ်ယူမှုအပေါ်မှာ သက်ရောက်မှုဖြစ်စေပါတယ်။ ရာသီဥတုပူတဲ့အခါ အရေပြားဆီကို သွေးစီးဆင်းမှု ပိုရောက်စေနိုင်ပါတယ်။ ဒီလိုဖြစ်စေဖို့က ရေဓာတ်လုံလောက်စွာ ရရှိနေဖို့လိုပါတယ်။ တကယ်လို့ ရေဓာတ်မလုံလောက်ဘူးဆိုရင်တော့ သွေးစီးဆင်းရောက်ရှိမှုက နည်းသွားပြီး ထိခိုက်မှုတွေ ဖြစ်လာနိုင်ပါတယ်။ ခန္ဓာကိုယ်ရဲ့ အင်ဆူလင်စုပ်ယူမှုအပေါ်မှာ ထိခိုက်မှုဖြစ်လာစေပြီး သွေးချိုတက်စေနိုင်ပါတယ်နော်။ ဒါဆို ဘယ်လိုလုပ်ရမလဲ။

နွေရာသီမှာ ဆီးချိုရောဂါရှိသူ ကို ဒီလိုဂရုစိုက်ပါ

နွေရာသီရဲ့ အပူဒဏ်ကြောင့် ချွေးထွက်များပြီး ရေဓာတ်ဆုံးရှုံမှုက သာမန်အချိန်တွေထက် ပိုများနိုင်ပါတယ်။ ဒါကြောင့် ခန္ဓာကိုယ်မှာ သွေးစီးဆင်းမှုကောင်းစေပြီး အင်ဆူလင်စုပ်ယူမှုကောင်းစေဖို့အတွက် ရေဓာတ်ပြည့်ဝအောင် သောက်သုံးဖို့ လိုအပ်ပါမယ်။ရေများများသောက်ဖြစ်အောင် ဂရုစိုက်ပါ။

  • မကြာခဏ သွေးချိုတိုင်းပါ

နွေရာသီမှာ အပူချိန်လွန်ကဲတာနဲ့ အပူလျှပ်တာတို့ကြောင့် မောပန်းလွယ်တာ၊ မအီမသာဖြစ်တာ၊ အော့အန်တာ၊ ခေါင်းထဲမှာ ရီဝေဝေဖြစ်တာနဲ့ ချွေးထွက်လွန်တာမျိုးတွေဖြစ်နိုင်ပြီး သွေးချိုတက်တဲ့အခါ ဒါမှမဟုတ် သွေးချိုကျတဲ့အခါမှာ ခံစားရတတ်တဲ့ လက္ခဏာတွေနဲ့ ရောထွေးနိုင်တာကြောင့် မကြာခဏဆိုသလိုသွေးချိုတိုင်းပေးပါ။

သွေးချိုကျပြီး ကျန်းမာနေစေဖို့ ဆီးချိုရောဂါရှိသူ တွေ မဖြစ်မနေလုပ်တတ်ကြတာ တစ်ခုရှိပါတယ်။ ဒါကတော့ လေ့ကျင့်ခန်းလုပ်တာပါ။ နွေရာသီမှာလေ့ကျင့်ခန်းမလုပ်ရဘူးလို့ မဆိုလိုပါဘူး။ ပင်ပင်ပန်းပန်းမလုပ်ဖို့ဘဲ လိုတာပါ။

နေအရမ်းပူနေချိန်မှာ လေ့ကျင့်ခန်းမလုပ်ပါနဲ့။ လေ့ကျင့်ခန်းလုပ်မယ်ဆိုရင် မနက်ခင်း ၁၀ နာရီမတိုင်ခင်နဲ့ ညနေ ၄ နာရီနောက်ပိုင်းမှ လုပ်ပေးပါ။ချွေးအရမ်းထွက်လာမယ်။ နှလုံးခုန်နှုန်းမြန်လာမယ်ဆိုရင် လေ့ကျင့်ခန်း ဆက်မလုပ်သင့်တော့ပါဘူး။ နားပေးပါ။ ပြီးရင်သွေးချိုတိုင်းပေးပါ။

နေလောင်တာက အရေပြားကို ပျက်စီးစေနိုင်သလို ဆီးချိုရှိသူတွေမှာ သွေးချိုထိန်းညှိမှုကို ထိခိုက်စေနိုင်ပါတယ်။ နေလောင်တာကြောင့် အရေပြားမှာ ရောင်ရမ်းတာဖြစ်စေပြီး သွေးတွင်းသကြားဓာတ်ကို မြင့်တက်စေနိုင်ပါတယ်။ ဒါကြောင့် နေလောင်ဒဏ်မခံပါနဲ့။ အပြင်ထွက်တိုင်း နေလောင်ကာခရင်မ်လူးပေးပါ။

စားသောက်ဖို့ ပြင်ဆင်ပေးတဲ့အခါမှာလည်း အဆီများတာ၊ အချိုများတာတွေကို ရှောင်ရပါမယ်။ ဟင်းသီးဟင်းရွက်နဲ့ အသားမျှတအောင်ပြင်ဆင်ပေးပါ။ ထမင်းကို လျှော့ကျွေးပေးပါ။

နွေအပူချိန်နဲ့ နေလောင်မှုတွေကို ကာကွယ်ဖို့ နေလောင်ကာခရင် လူးပေးတာအပြင် နောက်ထပ်ဂရုစိုက်ရမှာတစ်ခုက အဝတ်အစားတွေကို ချည်သားပွပွချောင်ချောင်လေးတွေ ဝတ်ဆင်ပေးဖို့ပါ။ အဝတ်အစားတွေကို လေဝင်လေထွက်ကောင်းတာမျိုးဖြစ်ဖို့လည်း အထူးဂရုပြုပေးပါနော်။

ဆီးချိုသမားတွေက အခြားသူတွေထက် ခြေထောက်ကို ပိုဂရုစိုက်ပေးဖို့လိုပါမယ်။ ဆီးချိုရောဂါက အချိန်ကြာလာနဲ့အမျှ ခြေထောက်က အာရုံကြောလေးတွေထိခိုက်လာပြီး အာရုံခံစားနိုင်စွမ်းနည်းလာပါတယ်။ ဒါကြောင့် နေ့စဉ်ခြေထောက်မှာ ထိခိုက်မိထားတာရှိသလားဆိုတာကို စစ်ဆေးပါ။ ခြေထောက်မှာ ရေဓာတ်ခမ်းခြောက်ပြီး အသားခြောက်တာကြောင့် ပြဿနာတစ်စုံတရာရှိ၊မရှိ စစ်ဆေးပေးပါ။

တကယ်လို့ ခြေထောက်မှာ မှိုပိုးဝင်ထားတာမျိုးရှိနေမယ်ဆိုရင် အမြန်ဆုံးကုသမှုခံယူဖို့ လိုပါမယ်။ ဖိနပ်ကိုလည်း ကျပ်တာမျိုးတွေ မစီးပါနဲ့။ လေဝင်လေထွက်ကောင်းပြီး သက်သောင့်သက်သာရှိမှာမျိုးကို စီစဉ်ပေးပါ။ ဖိနပ်မပါဘဲ လမ်းလျှောက်တာမျိုး မဖြစ်စေဖို့ ဂရုစိုက်ပါ။

ကဲ…….. ပူပြင်းတဲ့နွေရာသီမှာ ဆီးချိုရှိနေတဲ့ မိမိချစ်ခင်ရတဲ့သူတွေကို ဒီနည်းလမ်းလေးတွေနဲ့ စောင့်ရှောက်ပေးလိုက်ပါနော်။

health-tool-icon

ခန္ဓာကိုယ် ထုထည်ညွှန်းကိန်း တွက်ချက်ခြင်း (BMI) ။

ခန္ဓာကိုယ် ထုထည်ညွှန်းကိန်း တွက်ချက်ခြင်း (BMI) ကို အသုံးပြုပြီး ကျန်းမာတဲ့ ကိုယ်အလေးချိန် ရှိရဲ့လားဆိုတာကို တွက်ချက်ပါ။ ဒီကျန်းမာရေး ကိရိယာကို အသုံးပြုပြီး ကလေးရဲ့ (BMI) ကိုလည်း တွက်ချက်လို့ ရပါတယ်။

အမျိုးသား

အမျိုးသမီး

Verifying...

Hello Health Group သည် ဆေးပညာအကြံဉာဏ်များ၊ ရောဂါရှာဖွေမှုများနှင့် ကုသမှုများ မပြုလုပ်ပေးပါ။

ရင်းမြစ်များ

Ask the Expert: Summer Heat and Diabetes Controlhttps://www.webmd.com/diabetes/features/diabetes-summer-heat Accessed Date 18 March 2019

Type 2 Diabetes and Summer: Tips to Beat the Heathttps://www.everydayhealth.com/hs/type-2-diabetes-guide-healthy-habits/diabetes-summer-beat-heat/ Accessed Date 18 march 2019

Summertime: Hazardous for People With Diabetes?https://www.diabetesselfmanagement.com/blog/summertime-hazardous-for-people-with-diabetes/ Accessed Date 18 March 2019

စာရေးသူ ဓာတ်ပုံbadge
Aye Thi Mon မှ ရေးသားသည်။ 3 ပတ် အကြာက တွင် ပြန်လည်ပြင်ဆင်ခဲ့သည်။
Dr. Htet Htet Zaw Win မှ အချက်အလက် စစ်ဆေးထားပါသည်။