အရိုးကျန်းမာကြံ့ခိုင်ရေးအတွက် မေမေတို့ သိထားကြဖို့

“ကလေးက ထွားလာလိုက်တာနော်၊ သွက်လက်နေတာပဲ”ဆိုတဲ့စကားနဲ့ “ကလေးက ကြည့်ရတာ အားနည်းနေသလိုပဲ၊ ချော်လဲမယ်နော်” ဆိုတဲ့စကား မေမေတို့ ဘယ်ဟာပိုကြားချင်မလဲ။နေမကောင်းတော့ မဖြစ်ပေမယ့် ကြီးထွားဖွံ့ဖြိုးနေဆဲအရွယ်မှာ ကြံ့ခိုင်မှုရှိဖို့လည်း လိုပါတယ်နော်။ အားရှိအောင်လို့ဆိုပြီး စားသမျှအကုန်ကျွေးတာမျိုးကလည်း အာဟာရတန်ဖိုးသေချာမချင့်ချိန်ခဲ့ရင် ကလေးမှာအဝလွန်တာပဲ အဖတ်တင်ပါလိမ့်မယ်။ ဒါဆို ကလေးကို လူလည်း ကျန်းမာ၊ အရိုးအဆစ်တွေလည်း ကြံ့ခိုင်သန်စွမ်းဖို့ ဘာတွေသိထားဖို့လိုအပ်လဲ အကြံပေးမယ်နော်။ အရိုးကျန်းမာကြံ့ခိုင်ရေးအတွက် မေမေတို့ သိထားကြဖို့ လိုမှာလေးတွေကို အတူတူ ကြည့်လိုက်ရအောင်နော်။

အရိုးကျန်းမာကြံ့ခိုင်ရေးအတွက် မေမေတို့ သိထားကြဖို့

အရိုးကျန်းမာကြံ့ခိုင်ရေးအတွက် မေမေတို့ သိထားကြဖို့ လိုမှာလေးတွေကတော့

အရိုးအဆစ်တွေအတွက် ဘာတွေက ထောက်ကူအားဖြည့်ပေးသလဲ

အရိုး ကျန်းမာကြံ့ခိုင်ရေးအတွက် ဒေါက်တိုင်တစ်ခုလို အဓိကထောက်ကူပေးဖို့ ပါဝင်အားဖြည့်ပေးနေတဲ့ အာဟာရဓါတ်တွေအများကြီးရှိပါတယ်။ ကယ်လ်စီယမ်က ရှေ့ဆုံးက ဦးဆောင်နေပြီး ဗီတာမင် D၊ မဂ္ဂနီဆီယမ်၊ ဗီတာမင် K တို့ကလည်း အရေးကြီးတဲ့နေရာက ပါဝင်ကြပါတယ်။နောက်ဆုံးတာဝန်ကတော့ ကိုယ်လက်လှုပ်ရှားမှုရှိဖို့ပဲဖြစ်ပါတယ်။ ဒါ့ကြောင့် အာဟာရပြည့်အောင်စားပြီး ပြေးလွှားကစားနေတဲ့ကလေးတွေ ကျန်းမာတာတွေ့ဖူးကြမှာပါ။ ကဲ တစ်ခုချင်းဆက်ပြောရရင်

• ကယ်လ်စီယမ်

ကလေးစားမယ့် အာဟာရတွေထဲ ကယ်လ်စီယမ် အလုံအလောက်ပါဝင်အောင် ဂရုစိုက်ပါ။ နွားနို့၊ ဒိန်ချဉ်တို့လို နို့ထွက်ပစ္စည်းတွေမှာ သဘာဝအလျောက် ကယ်လ်စီယမ်ကြွယ်ဝစွာပါရှိပါတယ်။ ကယ်လ်စီယမ်ဟာ ကိုယ်ဝန်ဆောင်စဉ်တည်းက လိုအပ်တဲ့ အာဟာရဓာတ်ဖြစ်ပြီး ကယ်လ်စီယမ် လုံလောက်မှ သန္ဓေသားမှာ အရိုးတည်ဆောက်မှု ကြံ့ခိုင်စေမှာဖြစ်ပါတယ်။

ကယ်လ်စီယမ်ချို့တဲ့နေခဲ့ရင် ကလေးမှာ အရိုး နဲ့ ကြွက်သားအားနည်းပြီး ခြေခွင်တာ၊ အရိုးကျိုးအက်လွယ်တာတွေ ဖြစ်လာစေနိုင်ပါတယ်။ နို့ထွက်ပစ္စည်းမဟုတ်ပေမယ့် ကယ်လ်စီယမ်ဖြည့်စွက်ထားတဲ့ အစားအသောက်တွေလည်း တိုက်ကျွေးလို့ရပါတယ်။ ပန်းဂေါ်ဖီစိမ်း၊ မုန်ညင်းစိမ်း၊ ကိုက်လန်၊ စတဲ့ အစိမ်းရောင် ဟင်းသီးဟင်းရွက်တွေကိုလည်း မကြာခဏ ကျွေးပေးပါ။

• ဗီတာမင် D

ဗီတာမင် D ကို နေရောင်ခြည်က နေရရှိနိုင်တယ်ဆိုပေမယ့် အသားအရောင်၊ ရာသီဥတု၊ နေရာဒေသကိုလိုက်ပြီး ရရှိမှုကွာခြားနိုင်ပါတယ်။ ဒါ့အပြင်နေရောင်ခြည်ခံတာများရင် အရေပြားကင်ဆာဖြစ်နိုင်တဲ့ အန္တရာယ်ရှိနိုင်ပါတယ်။ ဒါ့ကြောင့် ရှားပေမယ့် အစာအာဟာရကနေ ရနိုင်သလောက် ရအောင် စားသုံးသင့်ပါတယ်။ နေရောင်ခံမယ်ဆို မနက်စောစော နေထွက်စအချိန်မှာပဲ ခံသင့်ပါတယ်။

မွေးစအရွယ်မှာ မိခင်နို့ကနေ ဗီတာမင် D ကို ရရှိနိုင်ပေမယ့် တဖြည်းဖြည်းအရွယ်ကြီးလာတဲ့အခါ ဗီတာမင် D လိုအပ်ချက်က များလာတော့ မလုံလောက်တော့ပါဘူး။ အစားအစာကနေရရှိနိုင်ဖို့ကလည်း မများတာကြောင့် လိုအပ်မယ်ဆိုရင် ဗီတာမင် D ဖြည့်စွက်ထားတဲ့ အစာအာဟာရတွေရဲ့အကူအညီကို ယူရပါလိမ့်မယ်။

ဗီတာမင် D ပမာဏအနည်းငယ်ပါဝင်တဲ့ အစားအစာတွေက ကြက်ဥအနှစ်၊ ဆယ်လ်မွန်နဲ့ တူနာတို့လို အဆီများတဲ့ငါးတွေ ဖြစ်ပါတယ်။ နောက်ထပ်ရရှိနိုင်တာက ဗီတာမင် D ပေါင်းထည့် ဖြည့်စွက်ထားတဲ့ အာဟာရနို့မှုန့်၊ အသီးဖျော်ရည်၊ နို့နဲ့ ဒိန်ချဉ်တွေဖြစ်ပါတယ်။ အားဆေးတိုက်မယ်ဆိုရင်တော့ ဆရာဝန်နဲ့ တိုင်ပင်ပြီးမှ တိုက်သင့်ပါတယ်။

• မဂ္ဂနီဆီယမ်

ဗာဒံစေ့၊ ဟင်းနုနွယ်၊ ထောပတ်သီး၊ ငှက်ပျောသီး၊ ဘိုစားပဲ တို့လို အသီးအရွက်၊ ပဲအမျိုးမျိုးနဲ့ အစေ့အဆန်တွေမှာပါဝင်လေ့ရှိသလို အဆီများတဲ့ငါးနဲ့ ပင်လယ်စာတွေမှာလည်း ပါဝင်တတ်ပါတယ်။

• ဗီတာမင် K

ဗီတာမင် K ကို အကောင်းဆုံးရရှိနိုင်တဲ့ အစားအစာကတော့ အစိမ်းရောင်ရှိတဲ့ အသီးအရွက်တွေ ( ကိုက်လန်၊ ဂေါ်ဖီ၊ ဟင်းနုနွယ်၊ ပန်းဂေါ်ဖီစိမ်း)၊ ပဲအမျိုးမျိုးနဲ့ အစိမ်းရောင်ပဲသီးတွေပဲ ဖြစ်ပါတယ်။

အစားအစာကို ဂရုစိုက်ပေးပြီးပြီဆိုရင် ကလေးကို –

• လှုပ်လှုပ်ရှားရှား ပေးကစားပါ

အရိုး နဲ့ ကြွက်သားဆိုတာ လေ့ကျင့်ပေး၊ လှုပ်ရှားပေး၊ အသုံးပြုပေးလေ ပိုသန်စွမ်းကြံ့ခိုင်လေဖြစ်ပါတယ်။ ကလေးကို ချော်လဲမှာစိုး၊ တခုခုထိခိုက်မှာစိုးပြီး လက်မလွှတ်တမ်းဆွဲထားတာမျိုး၊ အမြဲလိုလို ချီထားတာမျိုးမလုပ်ပါနဲ့။ အန္တရာယ်မရှိအောင်သာ ဘေးကစောင့်ရှောက်ပြီး သူ့ဘာသာလွတ်လွတ်လပ်လပ်ပေးကစားပါ။

သီချင်းနဲ့ ကတာ၊ ဘောလုံးကန်တာ၊ ပြေးတမ်းကစားတာတွေက အရိုး နဲ့ ကြွက်သား ကြံ့ခိုင်ဖို့ အကောင်းဆုံးအားကစားတွေပါပဲ။ အိမ်မှာအငြိမ်နေတဲ့ ကလေးတွေဆိုရင် အနည်းဆုံး တစ်နေ့တစ်နာရီလောက်တော့ လှုပ်လှုပ်ရှားရှားအားကစားပေးလုပ်ပါ။ ကျောင်းတက်နေတဲ့ ကလေးတွေဆိုရင် စာပဲထိုင်မလုပ်စေဘဲ လှုပ်လှုပ်ရှားရှားနေဖို့ သီးသန့်အချိန်ပေးရပါမယ်။