ဘာလို့ ဦးခေါင်းသေးတဲ့ ပြဿနာဖြစ်တာလဲ။
ဦးခေါင်းသေးတဲ့ ပြဿနာက ဦးနှောက်ဖွံ့ဖြိုးမှု ပုံမမှန်လို့ပါ။ မွေးရာပါလည်း ဖြစ်နိုင်သလို မွေးကင်းစမှာ ဖြစ်တဲ့ အကြောင်းရင်းကြောင့်လည်း ဖြစ်နိုင်ပါတယ်။ မျိုးရိုးလည်း လိုက်နိုင်ပါတယ်။ တခြားအကြောင်းရင်းတွေကတော့
- ဦးခေါင်းရိုး စောဆက်တာ (craniosynostosis) – ဦးနှောက်ကြီးထွားနေတဲ့အချိန်မှာ ကလေးရဲ့ ဦးခေါင်းမှာရှိတဲ့ အရိုးတွေက ဆက်သွားတာပါ။ ဒါကြောင့် ဦးနှောက်ဆက်ကြီးလို့မရတော့တာပေါ့။ ဒါက ဦးနှောက်မှာ တခြားပြဿနာသာ မရှိရင် ခွဲစိတ်ပြုပြင်လိုက်တဲ့အခါ ဦးနှောက်က ပုံမှန်အတိုင်း ဆက်လက်ကြီးထွားနိုင်ပါတယ်။
- ခရိုမိုဇုန်း ပြဿနာ – ဒေါင်းရောဂါလိုမျိုး တခြားခရိုမိုဇုန်းရောဂါတွေကလည်း ဦးခေါင်းသေးတာကို ဖြစ်စေပါတယ်။
- ဦးနှောက်မှာ အောက်ဆီဂျင်မလုံလောက်တာ – ကိုယ်ဝန်ရှိစဉ်မှာဖြစ်ဖြစ်၊ မွေးနေတုန်းမှာ ဖြစ်ဖြစ် တစ်ခုခု အမှားအယွင်း ဖြစ်ခဲ့ရင် ဦးနှောက်ကို အောက်ဆီဂျင်ကောင်းကောင်းရောက်မှာ မဟုတ်ပါဘူး။
- ကိုယ်ဝန်ရှိနေချိန် မိခင်ဆီ ရောဂါပိုးဝင်ခြင်း – ကြောင်ချေးကကူးတဲ့ toxoplasmosisတို့၊ ဂျာမန်ဝက်သက်တို့၊ ရေကျောက်တို့၊ ခြင်ကိုက်ရာက ကူးတဲ့ ဇီကာဗိုင်းရပ်စ်တို့ စတာတွေကို သတိထားပါ။
- ကိုယ်ဝန်ဆောင်စဉ်မှာ ကလေးရဲ့ ဖွံ့ဖြိုးမှုကို ထိခိုက်စေတဲ့ ဆေးတွေ၊ ဓာတုပစ္စည်းတွေ၊ အရက်တွေ သောက်မိတာ။
- အာဟာရချို့တဲ့တာ – ကိုယ်ဝန်ဆောင်စဉ်မှာ အာဟာရ လုံလုံလောက်လောက်မရဘူးဆိုရင်လည်း ကလေးရဲ့ ဖွံ့ဖြိုးမှုကို ထိခိုက်နိုင်ပါတယ်။
- အမေမှာ phenylketouriaလို့ ခေါ်တဲ့ ရောဂါတစ်မျိုးရှိနေတာ စတာတွေပဲ ဖြစ်ပါတယ်။
ကုသလို့ရလား။
ခုနကပြောခဲ့တဲ့ ဦးခေါင်းရိုး စောဆက်တာကြောင့်ဆိုရင်တော့ ခွဲစိတ်ကုသလို့ရပေမယ့် တခြားအကြောင်းကြောင့်ဆိုရင်တော့ တိကျတဲ့ ကုသမှုနည်းလမ်း မရှိပါဘူး။ သေးနေတဲ့ ကလေးဦးနှောက်ကို ကြီးအောင် လုပ်လို့မှမရတာဘဲ။ တခြားနည်းလမ်းတွေကတော့ နောက်ဆက်တွဲတွေကို ကုသတာပါ။ ဖွံ့ဖြိုးမှုနောက်ကျရင် တတ်နိုင်သလောက် ကူညီပေးလို့ရမယ်။ အတက်ရောဂါတွေ၊ အတက်ကြွလွန်တာတွေ ဖြစ်လာရင် ဆေးနဲ့ ထိန်းပေးလို့ရမယ်။ ဒီလောက်ပါပဲ။
ကာကွယ်နည်း
ကာကွယ်နည်းတွေကလည်း ကိုယ်ဝန်ဆောင်ချိန်မှာ ရောဂါပိုး မကူးအောင်နေမယ်။ အာဟာရပြည့်အောင်စားမယ်။ ကိုယ်ဝန်ကို ထိခိုက်နိုင်တာတွေကို ရှောင်ကြဉ်ရပါမယ်။ ဒါပေမယ့် မျိုးရိုးကြောင့်ဖြစ်တာ၊ ခရိုမိုဇုန်းကြောင့် ဖြစ်တာဆိုရင်တော့ သင်လည်း ဘာမှမတတ်နိုင်ပါဘူး။
ဦးခေါင်းသေးတာက ရှားပါးတဲ့ အခြေအနေပါ။ လေ့လာချက်တွေအရ အမေရိကန်နိုင်ငံမှာ ကလေး ၈၀၀ကနေ ၅၀၀၀လောက်မွေးမှ တစ်ယောက်ပါတတ်တာပါ။ ဒါပေမယ့် ဖြစ်လာခဲ့ရင် ကလေးအတွက် ဘဝတစ်လျှောက်ခက်ခဲနိုင်ပါတယ်။ စောစောသိနိုင်တာကတော့ အမေ့ဗိုက်ထဲမှာဆိုရင် Ultrasoundရိုက်ရင်း သိနိုင်မယ်။ မွေးလာရင်တော့ ကလေးရဲ့ ဦးခေါင်းပတ်ချာလည် အတိုင်းအတာကို တိုင်းခြင်းနဲ့ သိနိုင်ပါတယ်။
မှတ်ချက်များ
သင့်အတွေးများကို ဝေမျှပါ။
သင့်ကျန်းမာရေးအတွေးများကို Hello Sayarwonနဲ့ ဝေမျှလိုက်ပါ။
ဆက်သွယ်ရန် သို့မဟုတ် ဝင်မည်။ နှင့် ဝင်ရောက်ဆွေးနွေးပါမည်။