ယောက်ျားလေးတွေ ဆီးခုံမွေး ပုံမှန်ရိတ်ပေးဖို့ လိုအပ်လား …… လိင်တံ ပတ်လည်မှာ ရှိတဲ့ ဆီးခုံမွေးတွေကို ရိတ်ဖို့ လိုအပ်လားဆိုတာ ယောက်ျားလေးတွေ မကြာခဏ မေးတတ်ကြတဲ့ မေးခွန်းတွေထဲက တစ်ခုပါပဲ။ ကျန်းမာရေးအရ ကြီးမားတဲ့ ပြောင်းလဲမှုမျိုး၊ ကောင်းကျိုးများစွာ မရှိပေမယ့် တစ်ကိုယ်ရေသန့်ရှင်းမှုကို အလေးထားတယ်ဆိုရင်တော့ ရိတ်လို့ ရပါတယ်။
အရေပြား အလွန်နူးညံ့ပြီး ထိခိုက်လွယ်တဲ့ လိင်အင်္ဂါနားကို ဘလိတ်ဓားကိုင်ပြီး အမွေးရိတ်ဖို့ဆိုတာ တော်ရုံအမျိုးသားတွေအတွက်တော့ တွေးမိရုံနဲ့တင် အသည်းယားစရာ ကိစ္စ ဖြစ်မှာပါ။ နေ့စဉ် ရေပုံမှန်ချိုးပေးမယ်။ လိင်တံထိပ်အရေပြား မဖြတ်ထားတဲ့သူတွေဆိုရင် အရေပြားအတွင်းကို ဆပ်ပြာ၊ ရေနဲ့ အမြဲ ဆေးကြောသန့်ရှင်းပေးမယ်ဆိုရင်တော့ အမွေးရိတ်ဖို့ မလိုအပ်ဘူးလို့သာ ပြောချင်ပါတယ်။
ဒါဆိုရင် ဆီးခုံမွေးရိတ်လို့ ဘာကောင်းကျိုး ရနိုင်လဲ။ ဘာလို့ တချို့ယောက်ျားလေးတွေက အရဲစွန့်ပြီး လိင်အင်္ဂါတစ်ဝိုက်က အမွေးအမျှင်တွေကို ရိတ်နေကြတာလဲဆိုတာနဲ့ ပတ်သက်ပြီး ပြောပြပေးချင်ပါတယ်။
ယောက်ျားလေးတွေ ဆီးခုံမွေး ပုံမှန်ရိတ်ပေးဖို့ လိုအပ်လား
ယောက်ျားလေးတွေ ဆီးခုံမွေး ပုံမှန်ရိတ်ပေးဖို့ လိုအပ်လား …… ဆိုတာကို လေ့လာကြည့်လိုက်ရအောင်နော်။
ဆီးခုံမွေး ရိတ်ခြင်းဆိုသည်မှာ
လူပျိုဖြစ်တဲ့အချိန် လိင်အင်္ဂါအပေါ်ဘက်မှာ အမွေးအမျှင်တွေ စတင်ပေါက်လာပြီး အသက်ကြီးလာတာနဲ့အမျှ အမွေးအမျှင် အုံထူလာပါတယ်။ တချို့အမျိုးသားတွေမှာဆိုရင် လိင်တံပတ်လည်၊ ဝှေးစေ့၊ ပေါင်ခြံတစ်ဝိုက်မှာပါ အမွေးအမျှင်တွေ ထူထဲစွာ ပေါက်တာမျိုးလည်း ရှိပါတယ်။
များသောအားဖြင့် ဆီးခုံမွေးရိတ်တဲ့အခါမှာ လိင်တံရဲ့ အပေါ်စပ်နားမှာ ရှိတဲ့ အမွေးအမျှင်တွေကိုသာ အဓိကရိတ်ကြတာဖြစ်ပါတယ်။ ဝှေးစေ့ဟာ အလွန်ထိခိုက်လွယ်တဲ့အပြင် ဓါးနဲ့ ရိတ်ရတာဖြစ်တာကြောင့် ကျွမ်းကျင်မှု မရှိတဲ့အခါ ပွန်းပဲ့ဒဏ်ရာ ဖြစ်နိုင်ပါတယ်။
ဆီးခုံမွေး ရိတ်ခြင်းဖြင့် ရနိုင်တဲ့ ကောင်းကျိုးတွေ
ဆီးခုံမွေး ရိတ်ခြင်း ကနေရရှိမယ့် ကောင်းကျိုးတွေကတော့
၁။ တစ်ကိုယ်ရေ သန့်ရှင်းမှု
အမွေးအမျှင်တွေ ပါးသွားတဲ့အခါ သန့်ရှင်းရေး လုပ်ဖို့၊ ချေးချွတ်သန့်စင်ဖို့ ပိုလွယ်ကူပါတယ်။ ပုံမှန်အားဖြင့် ဘောင်းဘီ၊ အတွင်းခံဘောင်းဘီနဲ့ အမြဲထိကပ်နေပြီး ချွေးအလွန်ထွက်တာကြောင့် ဘက်တီးရီးယားပိုးတွေ အမြဲ ကပ်ငြိနေနိုင်ပါတယ်။ ဆီးခုံမွေးနည်းသွားတဲ့အခါ ချွေးထွက်နည်းသွားနိုင်တဲ့အပြင် ကိုယ့်ရဲ့ တစ်ကိုယ်ရေသန့်ရှင်းမှုအတွက်လည်း အကျိုးဖြစ်စေပါတယ်။
၂။ လိင်တံ ကျန်းမာရေး
အမွေးအမျှင်တွေ မရှိတော့တဲ့အတွက် ဘက်တီးရီးယားပိုးမွှားတွေအပြင် တခြားသော အင်းဆက်ပိုးမွှားတွေပါ မကပ်တွယ်နိုင်တော့တဲ့အတွက် ပိုပြီး သန့်ရှင်းသွားတယ်။ ဒါ့အပြင် မှိုကြောင့် ဖြစ်တဲ့ အရေပြားရောဂါတွေ ဥပမာ – ပွေး၊ ဝဲ၊ ညှင်း၊ ဖြစ်နိုင်ခြေကို လျှော့ချပေးနိုင်တယ်။ ဆီးကျိတ်ကင်ဆာရှိ၊ မရှိ ကိုယ့်ရဲ့ ဝှေးစေ့ကို အသေးစိတ် စစ်ဆေးကြည့်လို့ ရတယ်။
၃။ ထိတွေ့ခံစားမှု
အမွေးအမျှင် နည်းသွားတဲ့အခါ တစ်ကိုယ်ရေ အာသာဖြေတာ ဖြစ်စေ၊ ကိုယ့်ရဲ့ ချစ်သူနဲ့ လိင်ဆက်ဆံတဲ့အခါဖြစ်စေ ပိုပြီး ထိတွေ့ခံစားမှု ကောင်းလာပါတယ်။ အမွေးအမျှင်တွေ မရှိတော့တဲ့အတွက် ကိုယ့်ရဲ့ လိင်ဆက်ဆံဖော်ကိုလည်း ယားယံမှုတွေ မဖြစ်စေနိုင်တော့ပါဘူး။
၄။ အရွယ်အစား
ပုံမှန် အမွေးအမျှင်တွေနဲ့ ဖုံးနေတဲ့ နေရာဟာ ပြောင်ရှင်းသွားတဲ့အခါ ကိုယ့်ရဲ့ လိင်တံဟာ ပိုပြီး သန့်ရှင်းသွားတယ်။ ခါတိုင်းထက် ပိုပြီး ကြီးနေသလို စိတ်ထဲမှာ ခံစားရစေပါတယ်။
ဆီးခုံမွေး ရိတ်ဖို့အတွက် ဘာတွေ ပြင်ဆင်သင့်လဲ
၁။ ရိတ်ရလွယ်ကူစေဖို့ အရင်ဆုံး ရှည်နေတဲ့ အမွေးတွေကို ကပ်ကြေးဖြင့် တိုအောင် ညှပ်လိုက်ပါ။
၂။ ပြီးရင် ရေနွေးနွေးနဲ့ လိင်တံတစ်ဝိုက်ကို လောင်းချလိုက်ပါ။
၃။ ခြောက်အောင် သုတ်ပြီးသွားရင် အမွေးအမျှင်ရိတ်တဲ့ ခရင်မ်၊ ဂျယ်လ် များများ သုတ်လိမ်းထားပါ။
၄။ အသစ်စက်စက် ဘလိတ်ဓားကို အသုံးပြုပြီး အမွေးအမျှင်တွေကို ဖြည်းညှင်းစွာ ရိတ်ပါ။
၅။ အရေပြားကို ဆွဲဆန့်ထားပြီး ဓားကို အောက်ဘက်သို့ ဦးတည်ပြီး ရိတ်ပါ။
၆။ အမွေးအမျှင်ရိတ်ပြီးသွားရင် ရေနဲ့ ပြောင်စင်အောင် ဆေးကြောပြီး ခြောက်အောင် သုတ်ပါ။
၇။ ယားယံမှုကင်စေဖို့ အစိုဓာတ်ထိန်းခရင်မ် တစ်မျိုးမျိုး လိမ်းပေးရင် ပိုကောင်းပါတယ်။
[embed-health-tool-bmi]
