အသားအရေအတွက်ကော်လာဂျင်ကြွယ်ဝတဲ့ အစားအစာ (၁၀) မျိုး

အသားလေးလှလိုက်တာ ကော်လာဂျင်သောက်လို့လေ။ ဟင်..ဒါဆို အသားလှဖို့က ကော်လာဂျင်မဖြစ်မနေသောက်ဖို့လိုမှာလား။ ဒီလိုလဲမဟုတ်သေးပါဘူး။ အသားလှဖို့အတွက် ကော်လာဂျင်ရနိုင်တဲ့ အစားအစာတွေရှိပါတယ်။ ဒါဆို ဘာတွေစားရမလဲ……..

အသားအရေလှပအောင် ကော်လာဂျင်ကြွယ်ဝစေဖို့ ဘာတွေစားမလဲ………

အသားအရေလှပအောင် ကော်လာဂျင်ကြွယ်ဝစေဖို့အတွက်ဒါတွေစားပေးလို့ရပါတယ်။

ငါး (အရေခွံပါစားရမယ်)

ငါးစားတဲ့အခါ တော်တော်များများကအရေခွံကို ဖယ်စားလေ့ရှိကြပါတယ်။ ကော်လာဂျင်ကြွယ်ဝဖို့ဆိုရင်တော့ ငါးစားတဲ့အခါအရေခွံကိုပါစားဖို့ပြောပါရစေ။ အကြောင်းကတော့ ငါးအရေခွံမှာပါတဲ့ အမိုင်နိုအက်ဆစ်က ကော်လာဂျင်ထုတ်ဖို့အတွက် အကောင်းဆုံးလှုံ့ဆော်ပေးပါတယ်။ ငါးအရေခွံမှာ အရေပြားကျန်းမာရေးအတွက်အရေးအပါဆုံး ကော်လာဂျင်အမျိုးအစားဖြစ်တဲ့ Type I collagen ပါဝင်နေပါတယ်။ တစ်နေ့ကို အရွယ်တော် ငါး နှစ်တုံးစားပေးမယ်ဆိုရင် အရေပြားအတွက် လိုအပ်တဲ့ ကော်လာဂျင်ကို ပြည့်ပြည့်ဝဝရရှိစေမှာဖြစ်ပါတယ်။

ငရုတ်ပွ

အရေပြားက ကော်လာဂျင်ထွက်ရှိအောင် လှုံ့ဆော်ပေးတဲ့ ဇာတ်လိုက်တစ်ဦးဖြစ်တဲ့ ဗီတာမင် C ကြွယ်ဝစွာပါဝင်နေပါတယ်။ ဒါကြောင့် အရေပြားကို ကော်လာဂျင်ထွက်ရှိပြီး ဖြူစင်လှပေနေအောင် အကောင်းဆုံးထောက်ပံ့ပေးနိုင်ပါတယ်။ ငရုတ်ပွတွေထဲမှာ အနီရောင် ငရုတ်ပွက အသားအရေကို အကောင်းဆုံးအားဖြည့်ပေးနိုင်မှာပါ။ ဒါကြောင့် ခပ်ရင့်ရင့် အရွယ်တော် ငရုတ်ပွတစ်လုံးလောက်ကို တစ်ပတ် နှစ်ကြိမ်လောက် စားပေးသင့်ပါတယ်။

ခရမ်းချဉ်သီး

နေရောင်အောက်မှာ အခြောက်ခံထားတဲ့ ခရမ်းချဉ်သီးက ကော်လာဂျင်ထွက်ရှိအောင် လှုံ့ဆော်ပေးတဲ့ ဗီတာမင် C ကြွယ်ဝစွာပါဝင်နေသလို အရေပြားပျက်စီးမှုတွေကို အကောင်းဆုံးပြုပြင်ပေးနိုင်တဲ့ lycopene လို့ခေါ်တဲ့ ဓာတ်တိုးဆန့်ကျင်အာနိသင်တွေလည်းကြွယ်ဝစွာပါဝင်နေပါတယ်။ အဆာပြေအနေနဲ့ သုပ်စားလို့ရသလို ယိုထိုးစားတာ၊ ဟင်းချက်စားတာတွေလည်းလုပ်စားလို့ရပါတယ်။ တစ်ပတ်ကို အရွယ်တော် ခရမ်းချဉ်သီး ၃ လုံးလောက်စားပေးရင်ကို လိုအပ်တဲ့ ကော်လာဂျင်ပြည့်ဝနေစေမှာပါ။

အရိုးစွပ်ပြုတ်

အရိုးစွပ်ပြုတ်က ကော်လာဂျင်ကြွယ်ဝတယ်လို့ နာမည်ကြီးတဲ့ အစားအစာတစ်ခုပေါ့။ အချိန်ကြာကြာလေး ပြုတ်ထားတဲ့ အမဲရိုး၊ ကြက်ရိုး၊ ဆိတ်ရိုး၊ ဝက်ရိုးစွပ်ပြုတ်တွေက ကော်လာဂျင်ကြွယ်ဝစွာပါဝင်နေပါတယ်။ ဒါကြောင့် အချိန်ကြာကြာပြုတ်ထားတဲ့ အရိုးစွပ်ပြုတ်ကို တစ်ပတ်နှစ်ကြိမ်လောက်သောက်ပေးပါ။ ခန္ဓာကိုယ်အတွက်လိုအပ်တဲ့ ကော်လာဂျင်ကို ပြည့်ဝစွာရရှိစေမှာဖြစ်ပါတယ်။

ဘယ်ရီသီးတွေ

စတော်ဘယ်ရီ၊ ဘလက်ခ်ဘယ်ရီ၊ ရက်စ်ဘယ်ရီ၊ ဘလူးဘယ်ရီသီးတို့မှာ အရေပြားကျန်းမာရေးကို အကောင်းဆုံးစောင့်ရှောက်ပေးနိုင်တဲ့ ဗီတာမင် C ကြွယ်ဝစွာပါဝင်နေသလို အသားအရေကို နေလောင်ဒဏ်ကနေ အထိရောက်ဆုံး ကာကွယ်ပေးနိုင်တဲ့ ellagic acid ပါဝင်နေပါတယ်။ တစ်ပတ်ကို ၃ ကြိမ်လောက် ဘယ်ရီသီး တစ်ခွက်စာ စားပေးပါ။

အမဲသား

ဇင့်ဓာတ်ကြွယ်ဝစွာပါဝင်နေပါတယ်။ ဒါတွေတင်မကသေးပါဘူး။ အမဲသားမှာ ကော်လာဂျင်ထွက်ရှိမှုကို တိုးမြှင့်ပေးတဲ့ ဇင့်အပြင် ကော်လာဂျင်ထွက်ရှိမှုအတွက် အရေးပါတဲ့ အမိုင်နိုအက်ဆစ် ၃ မျိုးဖြစ်တဲ့ glycine၊ proline နဲ့ hydroxyproline တို့ပါဝင်နေပါတယ်။ တစ်ပတ်ကို အမဲသား ၂၅ သား ကနေ ၃၀ သားလောက်စားပေးလို့ရပါတယ်။

အချဉ်သီးတွေ

ဗီတာမင် C ကြွယ်ဝမှုက အသားအရေကို ကျန်းမာလှပစေနိုင်ပါတယ်။ ဗီတာမင် C ကြွယ်ဝတဲ့ အသီးတွေဖြစ်ကြတဲ့ လိမ္မော်သီး၊ သံပရာသီး၊ ကီဝီသီး၊ ကမ္ဗလာသီး အပါအဝင်အခြားအချဉ်ဓာတ်ပါတဲ့ အသီးတွေကို တစ်ပတ်ကို ၃ ကြိမ် ကနေ ၅ ကြိမ်အထိစားပေးပါ။ အရွယ်တော် လိမ္မော်သီး တစ်လုံးမှာ ဗီတာမင် C ၇၀ မီလီဂရမ်အထိပါဝင်နေပါတယ်။

ဥအမျိုးမျိုး

ကြက်ဥအကာမှာ ကော်လာဂျင်ထွက်ရှိလာစေဖို့ လှုံ့ဆော်ပေးတဲ့ အမိုင်နိုအက်ဆစ်ကြွယ်ဝစွာပါဝင်နေပါတယ်။ ဥအမျိုးမျိုးကို စားသုံးပေးတာက အရေပြားတင်မဟုတ်ပါဘူး။ ဆံသားကိုပါကျန်းမာစေနိုင်ပါတယ်။ ဒါကြောင့် တစ်ပတ်ကို ဥအမျိုးမျိုးကို ၃ ကြိမ် ကနေ ၅ ကြိမ်အထိစားပေးလို့ အသားအရေနဲ့ ဆံသားရဲ့ ကောင်းခြင်းတို့နဲ့ ပြည့်စုံလိုက်ပါ။

အစ်မ်းရင့်ရောင် ဟင်းရွက်တွေ

ကိုက်လန်၊ ဟင်းနုနွယ်၊ ဆလတ်ရွက်တို့လိုမျိုး အစိမ်းရင့်ရောင် ဟင်းသီးဟင်းရွက်တွေမှာ ဗီတာမင် C ကြွယ်ဝစွာပါဝင်နေပါတယ်။ ဒါ့အပြင် အစိမ်းရောင် ဟင်းသီးဟင်းရွက်တွေမှာပါတဲ့ အာဟာရဓာတ်တွေက အရေပြားကိုကျန်းမာစေသလို ကြည်လင်လှပေစေဖို့ အကောင်းဆုံးထောက်ပံ့ပေးနိုင်မှာပါ။

ကြက်သား

အမဲသားတွေ၊ ငါးတွေလိုပဲ ကြက်သားမှာ ကော်လာဂျင်ထုတ်လုပ်ဖို့ အကောင်းဆုံးထောက်ပံ့ပေးနိုင်တဲ့ အမိုင်နိုအက်ဆစ်ပါဝင်နေပါတယ်။ ဒါကြောင့် အဆီမပါတဲ့ ကြက်သားကို တစ်ပတ်ကို ၃ ကြိမ် ကနေ ၅ကြိမ်လောက်အထိစားပေးတာက ကော်လာဂျင်ထွက်ရှိမှုကောင်းစေပြီး အသားအရေကိုချောမွေ့စိုပြည်စေမှာပါ။

ဒါတွေအပြင် အယ်လ်မွန်စေ့၊ ပဲနီလေး၊ ကီဝီသီး၊ မုန်လာဥနီ၊ ကမာတို့ကိုစားပေးလို့ရပါတယ်။ ကော်လာဂျင်ကို ဆေးသောက်မှရတယ်ရယ်မဟုတ်ပါဘူး။ အခုလို အစားအစာတွေစားပေးရင်လည်းရနိုင်ပါတယ်။

ဒီတော့ ကော်လာဂျင်ပြည့်ဝအောင် အခုပြောပြတဲ့ အစားအစာတွေထဲက အနည်းဆုံး ၃ မျိုးလောက်တော့ ပုံမှန်စားပေးနော်။ စိုပြည်ကျန်းမာလှပတဲ့ အသားအရေကို ပိုင်ဆိုင်နိုင်ကြပါစေကြောင်း………………

[embed-health-tool-bmr]

မသက်ဆိုင်ကြောင်း ရှင်းလင်းချက်

Hello Health Group သည် ဆေးပညာအကြံဉာဏ်များ၊ ရောဂါရှာဖွေမှုများနှင့် ကုသမှုများ မပြုလုပ်ပေးပါ။

13 Foods That Help Your Body Produce Collagen https://www.healthline.com/health/beauty-skin-care/collagen-food-boost Accessed Date 13 November 2019

12 Collagen-Rich Foods to Eat for Healthy, Radiant Skin https://www.goodhousekeeping.com/health/diet-nutrition/g29486608/collagen-rich-foods/ Accessed Date 13 November 2019

10 Foods That Increase Collagen Production https://medium.com/mauer-sports-nutrition/10-foods-that-increase-collagen-production-532255796ff4 Accessed Date 13 November 2019

ယခုပုံစံ

01/06/2022

Aye Thi Mon မှ ရေးသားသည်။

Dr. Htet Htet Zaw Win မှ ပြင်ဆင်ခဲ့ပါသည်။

ဆက်စပ် အကြောင်းအရာများ

Aye Thi Mon မှ ရေးသားသည်။ · 01/06/2022 တွင် အသစ်ဖြည့်စွက်ခဲ့သည်။

အသားအရေအတွက်ကော်လာဂျင်ကြွယ်ဝတဲ့ အစားအစာ (၁၀) မျိုး

အသားအရေလှပအောင် ကော်လာဂျင်ကြွယ်ဝစေဖို့ ဘာတွေစားမလဲ………

ကော်လာဂျင်မြင့်တက်စေဖို့ စားပေးသင့်တဲ့ အစားအစာတွေ

ကော်လာဂျင်သောက်ပေးသင့်တဲ့ အကြောင်းအရင်း ၅ ချက်