အုန်းနို့က ကျန်းမာရေးအတွက် ဆိုးကျိုးပေးတယ်ဆိုတာ ဟုတ်ရဲ့လား

အုန်းနို့

အုန်းနို့က အုန်းသီးအရင့်ကို ကြိတ်ပြီး အရည်ညှစ်ထားတာပါ။ သဘာဝကရတဲ့ အာဟာရတစ်မျိုးပေါ့။မြန်မာနိုင်ငံ အပါအဝင် ထိုင်း နဲ့ အရှေ့တောင်အာရှနိုင်ငံတော်တော်များများမှာ ဟင်းပွဲတွေ။ အချိုပွဲတွေပြင်ဆင်တဲ့အခါ အုန်းနို့ကို အသုံးပြုကြပါတယ်။

ဟာဝိုင်အီ၊ အိန္ဒိယနဲ့ ကာရေဗီယန်နိုင်ငံတွေမှာလည်း အုန်းနို့ကို ကြိုက်နှစ်သက်စွာ စားသုံးနေကြပါတယ်။ အုန်းနို့က အဆီဓါတ်ပါဝင်နေပြီး ရင့်နေတဲ့ အုန်းသီးကနေထုတ်ယူထားတဲ့အဆီအနှစ်ပါ။

အုန်းခွံက အညိုရောင်သန်းသန်းလေလေ အုန်းသီးရင့်လေလေပါ။ ရင့်မှည့်နေတဲ့ အုန်းသီးကို ကြိတ်ထားတဲ့ အုန်းနို့က အဆီပါဝင်မှုများသလို အရသာလည်းရှိပါတယ်။ ဟင်းပွဲတွေရဲ့ အရသာကိုတိုးစေနိုင်တဲ့ အရာတစ်မျိုးပါ။

ဘယ်လိုအာဟာရဓါတ်တွေပါဝင်နေလဲ

အုန်းနို့က ကယ်လ်လိုရီ များတဲ့ အစားအစာ တစ်ခုပါ။ အုန်းနို့မှာပါတဲ့ အာဟာရဓါတ်တွေကို အတိအကျ တွက်ပြရမယ်ဆိုရင်တော့ အုန်းနို့ တစ်ခွက်စာ (၂၄၀ ဂရမ်) မှာဆိုရင် –

• ကယ်လ်လိုရီက ၅၅၂ ဂရမ်
• အဆီဓါတ်က ၅၇ ဂရမ်
• ပရိုတင်း ၅ ဂရမ်
• ကာဗိုဟိုက်ဒရိတ် ၁၃ ဂရမ်
• အမျှင်ဓါတ် ၅ ဂရမ်
• ဗီတာမင် C ၁၁ ရာခိုင်နှုန်း
• ဖောလိတ် ၁၀ ရာခိုင်နှုန်း
• သံဓါတ် ၂၂ ရာခိုင်နှုန်း
• မဂ္ဂနီဆီယမ် ၂၂ ရာခိုင်နှုန်း
• ပိုတက်ဆီယမ် ၁၈ ရာခိုင်နှုန်း
• ကော့ပါး ၃၂ ရာခိုင်နှုန်း
• မဂ္ဂနိ ၁၁၀ ရာခိုင်နှုန်း
• ဆီလီနီယမ် ၂၁ ရာခိုင်နှုန်း တို့ပါဝင်နေပါတယ်။

အုန်းနို့ စားရင် ဘယ်လိုအကျိုးကျေးဇူးတွေရရှိစေနိုင်သလဲ

အုန်းနို့က အစားအစာတွေကို သူရဲ့ ဆိမ့်သက်တဲ့အရသာလေးနဲ့ အရသာတိုးစေသလို ဒီလိုလည်း ကျန်းမာရေး အကျိုးကျေးဇူးတွေပေးပါသေးတယ်။

နှလုံးကျန်းမာစေပါတယ် – အုန်းနို့မှာပါတဲ့lauric acid ကသွေးတွင်းကိုလက်စထရောကိုကျဆင်းစေပြီး နှလုံးကို ကျန်းမာစေနိုင်ပါတယ်။ ဒါကြောင့် နှလုံးကျန်းမာချင်တယ်ဆိုရင် အုန်းနို့ က သင့်တော်ပါတယ်။

ကိုယ်အလေးချိန်ကျစေနိုင်ပါတယ်– အုန်းနို့မှာပါတဲ့medium-chain triglycerides (MCTs) က အဆီတွေကိုလောင်ကျွမ်းစေနိုင်သလို အစားစားချင်စိတ်ကိုလျှော့နည်းစေနိုင်ပါတယ်။ အုန်းနို့ က ကိုယ်အလေးချိန်ချနေသူတွေ စားသုံးပေးလို့ရပါတယ်နော်။

ကိုယ်ခံအားကောင်းစေနိုင်ပါတယ် – အုန်းနို့မှာ ဗီတာမင် C ပါဝင်တာကြောင့် ကိုယ်ခံအားကောင်းစေဖို့ အထောက်အပံ့ပေးနိုင်ပါတယ်။ အုန်းနို့ ပုံမှန်စားသုံးပေးတာက အအေးမိဖျားနာနဲ့ ကူးစက်ရောဂါတွေကနေ ကာကွယ်ဖို့ အထောက်အပံ့ဖြစ်စေမှာ အသေအချာပါ။

အစာကြေစေနိုင်တယ် – ရာသီဥတုကအေးနေတာကို အုန်းနို့ပါတဲ့အစားအစာတွေစားနေတာလား၊ အစာမကြေဖြစ်မယ်နော်ဆိုတဲ့စကားက အပြည့်အဝကြီးမမှန်ပါဘူး။ အုန်းနို့မှာပါတဲ့ ဗီတာမင်တွေနဲ့ သတ္တုဓါတ်တွေက အစာခြေလမ်းကြောင်းကိုကောင်းမွန်စွာလှုပ်ရှားနိုင်အောင် အထောက်အကူပြုပေးပြီး အစာကြေစေနိုင်သလို ဝမ်းမချုပ်အောင်လည်း ကာကွယ်ပေးနိုင်ပါသေးတယ်။

အရိုးတွေသန်မာစေနိုင်ပါတယ် – အုန်းနို့မှာ ကယ်လ်ဆီယမ်နဲ့ အရိုးတွေကို သန်မာစေတဲ့ အခြားဓါတ်တွေ ပါဝင်နေတာကြောင့် အရိုးတွေကို ကြံ့ခိုင်သန်စွမ်းစေနိုင်ပါတယ်။ အုန်းနို့စားသုံးပေးတာက အရိုးပွတာ၊ အရိုးပါးတာ၊ အဆစ်တွေ ရောင်တာနဲ့ အရိုး ထိခိုက်တာတွေ ဖြစ်နိုင်ခြေ နည်းသွားစေမှာပါ။

ဆီးချိုအတွက် သင့်တော်ပါတယ် – အုန်းနို့မှာ ဓါတ်တိုးဆန့်ကျင်ပစ္စည်းတွေကြွယ်ဝစွာပါဝင်နေတာကြောင့် ခန္ဓါကိုယ်က အင်ဆူလင်တွေထွက်ရှိအောင်လငံ့ဆော်ပေးနိုင်ပါတယ်။ ဇီဝတွင်းဖြစ်စဉ်တွေကိုတိုးတက်ကောင်းမွန်စေပြီး ဆဲလ်တွေကို အင်ဆူလင်တုံ့ပြန်မှုကောင်းအောင်လုပ်ဆောင်ပေးတဲ့အပြင်သွေးတွင်းသကြားဓါတ်ကို ထိန်းညှိပေးနိုင်ပါတယ်။

သွေးအားနည်းရောဂါကို ကာကွယ်ပေးတယ် – အာဟာရမပြည့်ဝတဲ့အခါ၊ ခန္ဓါကိုယ်ထဲမှာ သံဓါတ်နည်းလာတဲ့အခါသွေးအားနည်းရောဂါခံစားရနိုင်ပါတယ်။ ဒီပြဿနာကိုရှောင်ရှားဖို့ဆိုရင်တော့နေ့တိုင်း အုန်းနို့ နည်းနည်းစီ စားသုံးပေးလိုက်ပါ။ သွေးအားနည်းတာကြောင့်ဖြစ်တဲ့ ခြေကုန်လက်ပမ်း ကျတာကို သက်သာစေမှာပါ။

ဒါတွေအပြင် အုန်းနို့က ဆံသားနဲ့ အသားအရေအတွက်လည်း အထောက်အပံ့ပေးပါသေးတယ်။ သွေးလည်ပတ်မှုကိုကောင်းမွန်စေသလို အာရုံကြောဆဲလ်တွေကိုလည်း ကျန်းမာစေနိုင်ပါတယ်။ ဘက်တီးရီးယားတွေကိုသေစေနိုင်သလို မှိုပိုးတွေကိုလည်း ဖယ်ရှားပေးနိုင်ပါတယ်။