ကိုယ်ဝန်ဆောင်ချိန် နဲ့ ကလေးမွေးဖွားပြီးနောက်ပိုင်း ကိုယ်အလေးချိန်ဘယ်လိုထိန်းသိမ်းမလဲ

ကိုယ်ဝန်ဆောင်ချိန် နဲ့ ကလေးမွေးဖွားပြီးနောက်ပိုင်း ကိုယ်အလေးချိန်ဘယ်လိုပြောင်းလဲနိုင်သလဲ ဘယ်လိုထိန်းသိမ်းမလဲ

ကလေးမွေးဖွားပြီး မိခင်အတော်များများဟာ ကိုယ်ဝန်မဆောင်ခင်က ကိုယ်အလေးချိန်ကို ပြန်ရနိုင်ဖို့ ခဏတော့ အချိန်ယူရပါတယ်။ တချို့အမျိုးသမီးတွေမှာတော့ ကလေးကို ကျွေးမွေးရတာ၊ ဂရုစိုက်နေရတာနဲ့ပဲ ကိုယ်ဝန်ဆောင်ချိန်မှာ မြင့်တက်လာခဲ့တဲ့ ကိုယ်အလေးချိန်ကို ပြန်ကျစေပြီး ကိုယ်ရေစစ်သွားကြပါတယ်။

ဒါပေမယ့် အများစုကတော့ ကလေးမွေးဖွားပြီး ခြောက်လလောက်အထိ ကိုယ်အလေးချိန် ပြန်မကျနိုင်ကြပါဘူး။ ကိုယ်အလေးချိန်မကျသွားတဲ့ အမျိုးသမီးတွေ ဒါမှမဟုတ် မကျဘဲ ကိုယ်အလေးချိန် ထပ်တိုးလာတဲ့ အမျိုးသမီးတွေမှာ ကျန်းမာရေးပြဿနာတွေ ဖြစ်လာနိုင်ခြေများပါတယ်။ ဒီပြဿနာတွေက ကိုယ်ဝန်ဆောင်ပြီးနောက်ပိုင်းမှာ ပိုဆိုးရွားလာနိုင်ပါတယ်။

ကိုယ်ဝန်ဆောင်ချိန် နဲ့ ကလေးမွေးဖွားပြီးနောက်ပိုင်း ကိုယ်အလေးချိန် ကျစေနိုင်မယ့် အကောင်းဆုံးနည်းလမ်းကတော့ ကိုယ်လက်လှုပ်ရှားမှု ပိုလုပ်ပြီး ညီညွတ်မျှတတဲ့ အာဟာရပုံစံနဲ့ ထိန်းသိမ်းတာပဲဖြစ်ပါတယ်။ ကိုယ်အလေးချိန် ကျဆင်းမှုမှာ သိပ်များတာ၊ သိပ်မြန်တာတွေကလည်း ဆိုးကျိုးရှိနိုင်ပါတယ်။

ကိုယ်အလေးချိန် ပုံမှန်အနေအထား

ကိုယ်ဝန်ဆောင်ကာလအတွင်းမှာ ကိုယ်စားသောက်တဲ့ အာဟာရတွေနဲ့ လှုပ်ရှားမှုတွေ အပါအဝင် ကိုယ့်ရဲ့ နေ့စဉ်လုပ်ဆောင်နေကျအလုပ်တွေ၊ အမူအကျင့်တွေ အတော်များများ ပြောင်းလဲလာပါတယ်။ ဒါပေမယ့် အများစုမှာတော့ အမျိုးသမီးတွေဟာ ကိုယ်ဝန်ဆောင်ချိန်မှာ ခန္ဓာကိုယ်ပြောင်းလဲလာမှ သန္ဓေသားမှာ လိုအပ်တဲ့ အာဟာရဓာတ်တွေ အလုံအလောက်ရရှိမှာ ဖြစ်ပါတယ်။

ကိုယ်ဝန်လနုစဉ်မှာကတည်းက ဒီလိုအပြောင်းအလဲတွေ စတင်လာပြီး မွေးဖွားကာနီးအချိန်မှာတော့ ကိုယ်အလေးချိန် ပိုများနေတတ်ပါတယ်။ ဒါဟာ ကြီးထွားလာတဲ့ ဗိုက်ထဲကကလေးရဲ့ အလေးချိန်ကြောင့်ချည်းပဲ မဟုတ်ပါဘူး။ ခန္ဓာကိုယ်ထဲက အရည်ပိုတွေကြောင့်လည်း ပါပါတယ်။ ဒီအရည်တွေက ကလေးလှည့်ပတ်လှုပ်ရှားနိုင်ဖို့၊ အချင်းနဲ့ ရေမြွာတို့အတွက် လိုအပ်ပါတယ်။

ကိုယ်ဝန်ဆောင်ချိန် ကိုယ်အလေးချိန်မြင့်တက်မှုနဲ့ BMI (ခန္ဓာကိုယ်ထုထည်ညွှန်းကိန်း)အတွက် U.S. Institute of Medicine (IOM) က ထုတ်ပြန်တဲ့လမ်းညွှန်ချက်တွေအရ အောက်ပါမြင့်တက်မှုနှုန်းဆိုရင် ပုံမှန်အနေအထားရှိပါ တယ် –

• ကိုယ်ဝန်မဆောင်မီက ကိုယ်အလေးချိန်နည်းခဲ့တဲ့အမျိုးသမီးတွေ (BMI 18.5 အောက်) ဟာ ကိုယ်ဝန်ဆောင်စဉ်အတွင်း ၁၂.၅ နဲ့ ၁၈ ကီလိုဂရမ်လောက် ကိုယ်အလေးချိန်မြင့်တက်နိုင်
• ကိုယ်ဝန်မဆောင်မီက ပုံမှန်ကိုယ်အလေးချိန်ရှိတဲ့အမျိုးသမီးတွေ( BMI 18.5 နဲ့ 24.9 ကြား)ဟာ ကိုယ်ဝန်ဆောင်စဉ်အတွင်း ၁၁.၅ နဲ့ ၁၆ ကီလိုဂရမ်ကြား ကိုယ်အလေးချိန်မြင့်တက်နိုင်
• ကိုယ်ဝန်မဆောင်မီက ကိုယ်အလေးချိန်များနေတဲ့အမျိုးသမီးတွေ( BMI 25 နဲ့ 29.9 ကြား)ဟာ ကိုယ်ဝန်ဆောင်စဉ်အတွင်း ၇ နဲ့ ၁၁.၅ ကီလိုဂရမ်ကြား ကိုယ်အလေးချိန်မြင့်တက်နိုင်
• ကိုယ်ဝန်မဆောင်မီက အဝလွန်နေတဲ့အမျိုးသမီးတွေ( BMI 30 ကျော်) ဟာ ကိုယ်ဝန်ဆောင်စဉ်အတွင်း ၅ နဲ့ ၉ ကီလိုဂရမ်ကြား ကိုယ်အလေးချိန်မြင့်တက်နိုင်ပါတယ်။

ဘေးအန္တရာယ်ကင်းကင်းနဲ့ ကိုယ်အလေးချိန်ဘယ်လို ပြန်လျှော့ချနိုင်မလဲ

ကိုယ်ဝန်ဆောင်ချိန် နဲ့ ကလေးမွေးဖွားပြီးနောက်ပိုင်း  ဘေးကင်းကင်းနဲ့ ကိုယ်အလေးချိန် ပြန်ချဖို့ဆိုရင် သစ်သီးနဲ့ ဟင်းသီးဟင်းရွက်တွေ များများစားတာ အပါအဝင် ကျန်းမာရေးနဲ့ညီအောင် စားသုံးပါ။ ကျန်းမာလှပစွာ ကိုယ်အလေးချိန်ထိန်းသိမ်းနိုင်ဖို့ အောက်ပါအချက်တွေက အထောက်အကူပေးပါလိမ့်မယ်။

• မနက်စာကို အချိန်မှန်စားပါ
• တစ်နေ့ကို အသီးနဲ့ ဟင်းသီးဟင်းရွက် ငါးကြိမ်ခန့်စားပါ
• အုတ်ဂျုံ၊ ပဲအမျိုးမျိုး၊ ပဲနီလေး၊ အစေ့အဆန်တွေလိုမျိုး အမျှင်ဓာတ်ကြွယ်ဝတဲ့ အစားအစာတွေကို နေ့စဉ်အာဟာရမှာ ထည့်သွင်းစားသုံးပါ
• ပေါင်မုန့်၊ ထမင်းနဲ့ ပါစတာတို့လို ကစီဓာတ်များတဲ့အစားအစာတွေကို နေ့စဉ်အာဟာရမှာ သင့်တင့်ရုံ ထည့်သွင်းစားသုံးပါ
• အချိုများ၊ အဆီများတဲ့ အစားအစာတွေ၊ အသင့်အမြန်စား အစားအစာတွေ၊ သကြားလုံး၊ ဘီစကစ်၊ ဂျုံနဲ့လုပ်တဲ့ မုန့်တွေနဲ့ ဂက်စ်ပါတဲ့ အချိုရည်တွေကို စားသုံး၊ သောက်သုံးမှု လျှော့ပါ
• ထမင်းစားတဲ့အခါ ပါဝင်တဲ့ အစာအာဟာရတွေရဲ့ အချိုးအဆနဲ့ ကြားချိန်မှာ စားခဲ့တဲ့ သရေစာအမျိုးအစားနဲ့ အကြိမ်ရေကို ချိန်ညှိပါ

အဆီချချင်တဲ့အခါ ကျန်းမာရေးနဲ့ ညီညွတ်အောင်စားသုံးခြင်းနဲ့ ကိုယ်လက်လေ့ကျင့်ခန်းကို တွဲဖက်တဲ့နည်းက အထိရောက်ဆုံးပါပဲ။

ကလေးမွေးဖွားပြီး နေပြန်ကောင်းပြီလို့ ခံစားရချိန်မှာ လမ်းလျှောက်ခြင်း၊ တင်ပါးဆုံကြွက်သား လေ့ကျင့်ခန်းတွေနဲ့ ခါးဆန့်လေ့ကျင့်ခန်းတွေလိုမျိုး အားမစိုက်ရတဲ့ လေ့ကျင့်ခန်းတွေ စလုပ်နိုင်ပါတယ်။ ဒါပေမယ့် အားစိုက်ရတဲ့ လေ့ကျင့်ခန်းတွေကို လုပ်ဖို့ကတော့ ကလေးမွေးဖွားပြီး ခြောက်ပတ်လောက်တော့ စောင့်သင့်ပါတယ်။

[embed-health-tool-ovulation]