ကိုယ်ဝန်ဆောင်ချိန်မှာ ဗိုက်အောင့်ဗိုက်နာ ဖြစ်တာစိုးရိမ်ရလား

ကိုယ်ဝန်ဆောင်တဲ့အချိန်မှာ သွေးဆင်းတာ၊ ဗိုက်အောင့်ဗိုက်နာတာတွေဖြစ်ရင် ကိုယ်ဝန်ပျက်ချင်တာမသိဘူးဆိုပြီး စိုးရိမ်တတ်ကြသူချည်းပါပဲ။ ကိုယ်ဝန်ဆောင်ချိန်မှာ ဗိုက်အောင့်ဗိုက်နာ ဖြစ်တယ်ဆိုတာနဲ့ ကိုယ်ဝန်ပျက်ကျတော့မှာလား။ ဒါမှမဟုတ် ဖြစ်နေကျပဲလားဆိုတဲ့ အကြောင်းလေးကို ဒီဆောင်ပါးလေးထဲမှာ ပြောပြပေးမှာပါ။ ဘယ်လို နာတာမျိုးက ပုံမှန်ဖြစ်နေကျဆိုတာရယ်၊ ဘယ်လို အချိန်ဆို စိုးရိမ်ရလဲဆိုတာတွေကို ပြောပြပေးမှာပါ။

ကိုယ်ဝန်ဆောင်ချိန်မှာ ဗိုက်အောင့်ဗိုက်နာ ဖြစ်တာစိုးရိမ်ရလား

ကိုယ်ဝန်ဆောင်ချိန်မှာ ဗိုက်အောင့်ဗိုက်နာ ဖြစ်ရင် စိုးရိမ်စရာမရှိတဲ့ ဗိုက်အောင့်တာမျိုးနဲ့ စိုးရိမ်ရတဲ့ ဗိုက်နာတာမျိုးဆိုပြီး ၂ မျိုးရှိပါတယ်။

စိုးရိမ်စရာ မရှိတဲ့ ဗိုက်အောင့်တာဆိုတာ ကိုယ်ဝန်ဆောင်ချိန်မှာ ပြောင်းလဲလာတဲ့ ကိုယ်ခန္ဓာဖွံဖြိုးပြောင်းလဲမှုတွေကြောင့် ဖြစ်ရတာပါ။ ဘာတွေလဲဆိုတာ ကြည့်ရအောင်။ ။

ကိုယ်ဝန်ဆောင်ချိန်ဆို ဖြစ်နေကျ စိုးရိမ်စရာမရှိသည့် ဗိုက်အောင့်ဗိုက်နာ ဖြစ်စေတတ်သော အကြောင်းအရင်းများ ကတော့

၁ – သားအိမ် ကြီးထွားလာခြင်း။

ကိုယ်ဝန်ဆောင်ပြီဆိုတာနဲ့ ကြီးထွားလာတဲ့ သားအိမ်ကြောင့် ဗိုက်ကြီးတင်းပြည့်နေသလို ခံစားရပြီး အခန့်မသင့်ရင် ဗိုက်အောင့်တာမျိုးတွေဖြစ်တတ်ပါတယ်။

၂ – Round ligament pain ( သားအိမ်အရွတ်နာခြင်း)

သားအိမ်ကြီးလာတဲ့အခါ သားအိမ်ကနေပြီး ပေါင်ရင်းထိဆင်းသွားတဲ့ Round ligament လို့ခေါ်တဲ့ အရွတ်ကို ဆွဲတင်းလိုက်သလိုဖြစ်တာကြောင့် ဗိုက်အောက်ပိုင်းအောင့်တာမျိုးတွေဖြစ်တတ်ပါတယ်။ အရွတ်က ပေါင်ရင်းထိရှိနေတာကြောင့် နာနေတဲ့အနာက ပေါင်ရင်းထိပါ ပြန့်သွားတတ်ပါတယ်။ ဒီလိုဗိုက်အောင့်တာမျိုးက ကိုယ်ဝန် ဒုတိယ ၃ လမှာစဖြစ်တတ်ပြီး သူ့ဘာသာ ပြန်ပျောက်သွားတတ်ပါတယ်။

၃ – ဝမ်းချုပ်ခြင်း။

ကိုယ်ဝန်ဆောင်ချိန် ဝမ်းချုပ်တယ်ဆိုတာ ပုံမှန် အဖြစ်များတဲ့ ပြဿနာတစ်ခုပါ။ ဒါတွေအတွက် ကိုယ်ဝန်ဆောင်ချိန်မှာ ထွက်နေတဲ့ progesterone ဟော်မုန်းကို အပြစ်တင်ရမှာပါ။ သူက အစာအိမ်နဲ့ အူလမ်းကြောင်း လှုပ်ရှားမှုကို နှေးသွားအောင် လုပ်လိုက်တာကြောင့် ဝမ်းပုံမှန်သွားဖို့ ခက်ခဲသွားတာဖြစ်ပါတယ်။ ဒါကြောင့် ကိုယ်ဝန်သည်တွေ ရေများများသောက်ဖို့၊ အမျှင်ဓာတ်များတဲ့ အစားအသောက်တွေ စားဖို့ အရေးကြီးတာပါ။

၄ – လေအောင့်ခြင်း။ 

ကိုယ်ဝန်သည်တွေမှာ လေထစေတဲ့ တရားခံကို စဉ်းစားလိုက်ရင် progesterone ဟော်မုန်းကိုသာ အပြစ်တင်ရပါလိမ့်မယ်။ Progesterone ဟော်မုန်းရဲ့ ကြွက်သားတွေကို ပြေလျော့စေတဲ့ အာနိသင်ကြောင့် အူလမ်းကြောင်းက ကြွက်သားတွေ ပြေလျော့သွားပြီး အစာခြေအားနည်းသွားပါတယ်။ ဒီလိုနဲ့ အစာမကြေလေထိုးလေအောင့်တွေ ဖြစ်လာတော့တာပါပဲ။ ။

၅ – Braxton Hicks contractions (အမွေးသင်ခြင်း)

Braxton Hicks ဆိုတာ သားအိမ်ခေါင်းကျယ်လာလို့၊ ကလေးမွေးချင်လို့ ဗိုက်နာပြီးညှစ်တဲ့ ပုံစံမျိုးနဲ့ မတူပါဘူး။ သူက ကိုယ်ဝန်ဆောင်တွေ ဗိုက်နာခြင်းကို ဖြစ်စေတဲ့ ညှစ်အားတစ်မျိုး ဖြစ်ပေမယ့် မွေးခါနီး ညှစ်ချင်တဲ့ ဗိုက်နာမှုမျိုးနဲ့တော့ မတူပါဘူး။

ဗိုက်က ညှစ်နာနေတယ်ဆိုပေမယ့် ရုပ်ရှင်ကြည့်နေနိုင်တယ်၊ ထမင်းစားနိုင်တယ် ၊ စာအေးဆေးဖတ်နေနိုင်သေးတယ်ဆိုရင် မွေးချင်လို့နာတာမျိုး မဟုတ်ဘဲ Braxton Hicks contractions ကြောင့် နာတာပိုဖြစ်နိုင်ပါတယ်။

ကိုယ်ဝန်ဆောင်ချိန်မှာ ဘယ်လို ဗိုက်အောင့်ဗိုက်နာတာတွေဖြစ်ရင် စိုးရိမ်ရလဲ။

ကိုယ်ဝန်ဆောင်ချိန်မှာ တချို့သော ဗိုက်အောင့်ဗိုက်နာတာတွေက အရေးကြီးပါတယ်။ ချက်ချင်းဆေးကုသမှု ခံယူဖို့ လိုပါတယ်။ ဒါတွေကတော့

၁ – နေရာမှား သန္ဓေတည်ခြင်း ( ectopic pregnancy)

သန္ဓေအောင်လာတဲ့ မျိုးဥလေးဟာ သားအိမ်မှာမတည်ဘဲ သားဥပြွန်မှာ သွားပြီး သန္ဓေမှားတည်တတ်ပါတယ်။ ဒီလိုနဲ့ ကိုယ်ဝန်သက် ၆ပတ်ကနေ ၁၀ ပတ်လောက်မှာ ဗိုက်ပြင်းထန်စွာနာပြီး သွေးဆင်းတာတွေ စဖြစ်လာပါတယ်။ ဒီလို နေရာမှား သန္ဓေတည်ရင်ကိုယ်ဝန်သက်ရလာတာနဲ့အမျှ အချိန်မရွေး ပြွန်ကွဲသွားနိုင်ပြီး သွေးဆင်းလွန်တတ်တာကြောင့် သတိထားရမယ့် စိုးရိမ်စရာပြဿနာ တစ်ခုပါ။

၂ – ကိုယ်ဝန်ပျက်ကျခြင်း

ကိုယ်ဝန်အစောပိုင်းကာလမှာဖြစ်တဲ့ ဗိုက်အောင့်ဗိုက်နာခြင်းတွေထဲမှာ ကိုယ်ဝန်ပျက်ကျတာကို လုံးဝ ချန်ထားခဲ့လို့မရပါဘူး။ ဗိုက်အောင့်တာကလည်း ပြင်းထန်မယ်၊ သွေးဆင်းလည်းများမယ်ဆိုရင် ဒါ ကိုယ်ဝန်ပျက်ကျတာ ဖြစ်နိုင်ပါတယ်။

၃ – လမစေ့ဘဲ မွေးခြင်း

ကိုယ်ဝန် ၃၇ ပတ်မတိုင်မီမှာ သားအိမ်ညှစ်မှုနဲ့ ခါးနာမှုတွေ ဆက်တိုက်ဖြစ်ပြီး အချိန်မတိုင်မီ ကလေးမွေးနိုင်ပါတယ်။ အခြားလက္ခဏာတွေကတော့ မိန်းမကိုယ်မှ အရည်များ ဆင်းခြင်း (သို့) ပိုများခြင်း၊ မိန်းမကိုယ်မှ သွေးထွက်ခြင်း၊ ရာသီလာစဉ် ဗိုက်နာခြင်းကဲ့သို့ ဗိုက်နာခြင်းတွေပဲ ဖြစ်ပါတယ်။

၄ – ကိုယ်ဝန်ဆိပ်တက်ခြင်း

အရင်က သွေးတိုးမရှိဘဲ ကိုယ်ဝန်ဆောင်တော့မှ သွေးပေါင်တွေတက်လာပြီဆိုရင် ဒါ ကိုယ်ဝန်ဆိပ်တက်တာဖြစ်နိုင်ပါတယ်။ ကိုယ်ဝန်သက် အပတ် ၂၀ နောက်ပိုင်းဆို စဖြစ်တတ်ပါတယ်။

ကိုယ်ဝန်ဆိပ်တက်တဲ့ လက္ခဏာတွေကတော့ ဗိုက်အပေါ်ပိုင်း (အသည်းနေရာ) ပြင်းထန်စွာ အောင့်တာ အပြင် ပျို့အန်တာ၊ ခေါင်းကိုက်တာနဲ့ အမြင်အာရုံ ဝေဝါးတာတွေ ဖြစ်နိုင်ပါတယ်။ ကိုယ်ဝန်ဆိပ်တက်တာကို ပေါ့ပေါ့ဆဆနေလိုက်ရင် မိခင်ရော ကလေးပါ အသက်ဆုံးရှုံးနိုင်ပါတယ်။

၅ – အချင်းကွာကျခြင်း 

ဒါဟာ အသက်အန္တရာယ် ရှိတဲ့ အခြေအနေတစ်ခုဖြစ်ပါတယ်။ အချင်းကွာကျတယ်ဆိုတာ သားအိမ်နံရံကနေ အချင်းစောကွာကျတာကို ဆိုလိုပါတယ်။ တတိယ သုံးလပတ်မှာ အဖြစ်များပါတယ်။ လက္ခဏာအနေနဲ့ ဗိုက်အောင့်တာ၊ ခါးကိုက်တာ၊ သားအိမ်ညှစ်တာတွေ ခံစားရတတ်ပါတယ်။ သွေးဆင်းတာမျိုး ဖြစ်တတ်ပေမယ့် အမြဲတမ်းဖြစ်မှာတော့ မဟုတ်ပါဘူး။ ဒါကြောင့် သွေးမဆင်းပေမယ့် ဗိုက်အောင့်နေတယ်ဆိုရင် ဒါကို သတိထားသင့်ပါတယ်။

ဒါတွေအပြင် ကိုယ်ဝန်ဆောင်ပြဿနာတွေ မဟုတ်တဲ့ အစာအိမ်အောင့်ခြင်း၊ ဆီးလမ်းကြောင်းကျောက်တည်ခြင်း၊ သားအိမ်အလုံးတည်ခြင်း စတာတွေကြောင့်လည်း ဗိုက်အောင့်ဗိုက်နာဖြစ်တတ်ပါသေးတယ်။

ဘယ်အချိန်မှာ ကုသမှု ယူသင့်သလဲ။

အောက်ပါ လက္ခဏာတွေ ရှိလာခဲ့ရင် ဆရာဝန်ကို ချက်ခြင်း အကြောင်းကြားသင့်ပါတယ်။

• မိန်းမကိုယ်မှ ရေဆင်းခြင်း၊ သွေးဆင်းခြင်း၊ အကျိအချွဲဆင်းခြင်း
• တင်ပါးဆုံပိုင်းမှာ ဖိအားများခြင်း
• ဗိုက်အလွန်နာခြင်း
• တစ်နာရီအတွင်း ၆ ကြိမ်ထက်ပိုပြီး သားအိမ်ညှစ်ခြင်း
• ဆီးသွားရ ခက်ခဲခြင်း
• ပျို့အန်ခြင်း
• မူးဝေခြင်း၊ ဖျားခြင်း
• လက်၊ ခြေထောက်၊ မျက်နှာ ရောင်ခြင်း

ဒါတွေကတော့ ကိုယ်ဝန်ဆောင်ချိန်မှာ ဗိုက်အောင့်ဗိုက်နာ စေတတ်တဲ့ အကြောင်းတွေဖြစ်ပါတယ်။ ဖြစ်တတ်တဲ့အကြောင်းတွေကိုသိထားတော့ ဘယ်ဟာဆို စိုးရိမ်ရလဲ ခွဲခြားလို့ရသွားပြီး ဆေးကုသမှု စောစောခံယူလို့ရတာပေါ့။ ။