4 ပတ်

4 ပတ် မှာကလေးလေး ဘယ်လိုဖွံ့ဖြိုးလာမှာလဲ

အခုဆို စတုတ္ထပတ်တောင် ရောက်လာပြီနော်။ ဒီအချိန်ဆို သားသားမီးမီးလေးက ဘိန်းစေ့အရွယ်ပဲ ရှိပါသေးတယ်။ အခုချိန်မှာတော့ ဆေးဘက်ဆိုင်ရာအသုံးအနှုန်းနဲ့ဆို အမ်ဘရီယို embryoလို့ ခေါ်ပါတယ်။ ဒီအဆင့်မှာ သားသားမီးမီးလေးရဲ့အရေးကြီးတဲ့အင်္ဂါအစိတ်အပိုင်းတွေဖြစ်တဲ့ ဦးနှောက်၊ နှလုံး၊ အဆုတ် စတဲ့ ကိုယ်တွင်းအင်္ဂါဖြစ်မယ့် ဆဲလ်တွေ ဖွံ့ဖြိုးပါပြီနော်။

သန္ဓေသားလေးရဲ့ပတ်ပတ်လည်မှာ အကာအကွယ်ပေးဖို့ ရေမြွာအိတ်လည်း စပေါ်လာပါပြီ။ သန္ဓေသားမှာပါတဲ့ ကြက်ဥအနှစ်လိုမျိုး အင်္ဂါက အချင်းအာဟာရမပေးခင်အချိန်ထိ သွေးတွေထုတ်ပေးပြီးတော့ သန္ဓေသားလေးကို အာဟာရပြုပေးပါတယ်။

အခုဆိုရင် မေမေတို့ရဲ့သားသားမီးမီးလေးက အတွင်းလွှာ၊ အလယ်လွှာ၊ အပြင်လွှာဆိုပြီးတော့ ထင်ရှားတဲ့ အလွှာ ၃ လွှာအနေနဲ့ ရှိနေပါပြီ။ အတွင်းလွှာကနေဆို အစာခြေအဖွဲ့အစည်း၊ အသည်း၊ အဆုတ်တွေဖြစ်လာမယ်။ အလယ်လွှာကဆို နှလုံး၊ လိင်အင်္ဂါ၊ အရိုး၊ ကျောက်ကပ်နဲ့ ကြွက်သားတွေဖြစ်လာမှာပါ။ အောက်ဆုံးလွှာကတော့ အာရုံကြောအဖွဲ့အစည်း၊ ဆံပင်၊ အရေပြားနဲ့လက်သည်းလေးတွေဖြစ်လာမှာပါနော်။

ခန္ဓာကိုယ်နဲ့ အနေအထိုင်အပြောင်းအလဲလေးများ

ခန္ဓာကိုယ်မှာရော ဘာတွေဆက်ပြောင်းလဲဦးမှာပါလိမ့်

ဒီအပတ်မှာ သန္ဓေသားလေးက သားအိမ်အတွင်းသားမှာစပြီး တွယ်ကပ်ပါပြီ။ ဒါကို တွယ်ကပ်ခြင်း implantationလို့ ခေါ်ပါတယ်။ မျိုးဥတွယ်ကပ်ချိန်မှာ ထွက်တဲ့ ဟော်မုန်း (hCG ဟော်မုန်း) ကို ထပ်ထုတ်ပါတယ်။ ဒီဟော်မုန်းတွေက သားအိမ်နံရံက အချွဲတွေကို ထိန်းသိမ်းပေးပါတယ်။ ပြီးတော့ သားဥအိမ်ကနေ တစ်လတစ်ခါ သားဥ ဆက်မထုတ်တော့အောင်လည်း တားပေးပါတယ်။ အဲဒါကြောင့် ကိုယ်ဝန်ဆောင်ချိန်မှာ ရာသီမလာတော့တာပါ။

တချို့ကိုယ်ဝန်ဆောင်မိခင်တွေဆို ဒီရက်ပိုင်းမှာ သွေးစက်နည်းနည်းကျတတ်ပါတယ်။ အဲ့တာ သန္ဓေသားလေးက သားအိမ်နံရံကို တိုးဝင်လို့ပါ၊၊ ပုံမှန်ရာသီလာတဲ့ရက်လောက်မှာဖြစ်တော့ ရာသီလာတာနဲ့ မှားနိုင်ပါတယ်နော်။

ကိုယ်ဝန်ရှိမရှိတိုင်းတဲ့ဟော်မုန်းက အပေါ်ပြောခဲ့တဲ့ hCG ဟော်မုန်းပါပဲ။ ဒီအပတ်မှာဆိုရင်တော့ ကိုယ်ဝန်ရှိမရှိ စမ်းတာက ပိုပြီးသေချာမှာပါ။ ဒီဟော်မုန်းက ကိုယ်ဝန်ရှိတဲ့ လက္ခဏာတွေဖြစ်တဲ့ ပင်ပန်းနွမ်းနယ်တာ၊ ရင်သားတင်းတာ၊ နာတာ၊ မူးဝေတာတွေကိုလည်း ဖြစ်စေတတ်ပါတယ်။ ဒီလက္ခဏာတွေကတော့ ရာသီလာခါနီးဖြစ်တာတွေနဲ့ မှားတတ်တယ်ဟုတ်။ ဒါပေမယ့် ရက်သတ္တပတ်ကုန်ခါနီးကျတော့ ရာသီမလာတော့ဘူးဆို ကိုယ်ဝန်ရှိဖို့ များပါတယ်၊၊

သိသင့်သိထိုက်တာလေးတွေ

ကိုယ်ဝန်ရှိတဲ့လက္ခဏာတွေကို ခံစားနေရတယ်လို့ထင်နေပြီလား

မေမေတို့ရေ။ ကိုယ်ဝန်တကယ်ရှိတဲ့လက္ခဏာတွေကို အောက်မှာဆက်ပြောပေးမယ်နော်။

• နာကျင်ရောင်ရမ်းနေတဲ့ ရင်သားတွေ- အမျိုးသမီးတော်တော်များများက ရာသီလာချိန်ခံစားရတဲ့ လက္ခဏာတွေကို ခံစားရပါတယ်တဲ့။ ဟုတ်ပါတယ်။ အဲဒီထက်တောင် ဆိုးနိုင်ပါတယ်။
• ပင်ပန်းနွမ်းနယ်တာ- ဘာမှမလုပ်ရဘဲ ပင်ပန်းတာမျိုးပါ။ ပရိုဂျက်စတုန်းဟော်မုန်းတိုးလာတာ၊ ကလေးရအောင် ပြင်ဆင်တာတွေက ပင်ပင်ပန်းပန်းအလုပ်လုပ်ထားတဲ့နေ့မှာ တာဝေးထပ်ပြေးရသလောက်ကို ပင်ပန်းစေပါတယ်။
• ခဏခဏဆီးသွားတာ- ကိုယ်ဝန်စရှိနေပြီဆို ကိုယ့်ကိုယ်ကို အပေါ့ခဏခဏသွားမိနေတာကို သတိထားမိကြမှာပါနော်။
• အနံ့တွေကို မခံနိုင်တာ- ကိုယ်ဝန်ဆောင်အမျိုးသမီးတော်တော်များများဟာ အနံ့တွေကို မခံနိုင်ဖြစ်လာပါတယ်။ မဟော်မုန်း ရုတ်တရက်တက်လာတာရဲ့ ဘေးထွက်ဆိုးကျိုးတွေ ဖြစ်ပါတယ်။
• အစာစားချင်စိတ်မရှိတာ- အစားဝင်တဲ့အချိန်ထက် အစားတွေ အန်ထုတ်မိတဲ့ အကြိမ်ရေ ပိုများနေသလောက်ကို ဖြစ်တတ်ပါတယ်။ တစ်ချိန်ကကြိုက်ခဲ့တဲ့ အစားတွေတောင် စားရမှာကြောက်နေနိုင်ပါတယ်။
•  မူးမော်အော့အန်တာ- ဒါကတော့ ကိုယ်ဝန်စ ဆောင်ဆောင်ခြင်းမှာ မဖြစ်သေးပါဘူး။ တချို့တချို့တွေမှာတော့ ဖြစ်တတ်ပါတယ်။
• ကိုယ်အပူချိန်မြင့်တာ- ကိုယ်အပူချိန်ကို နေ့တိုင်းတိုင်းပြီး မှတ်ကြည့်ရင်တော့ ပထမ ၁၈ရက် ဆက်တိုက်ကို တက်နေတာကို တွေ့ရမှာပါ။ ဒါဆိုရင်တော့ ကိုယ်ဝန်ရှိနေပါပြီနော်။
• သွေးနည်းနည်းဆင်းတာ- တချို့တွေဆို အနီရောင်၊ နီညို ရောင်သွေးစက်လေးတွေ ဆင်းတတ်ပါတယ်။ သွေးဆင်းတာအပြင် ဆီးစပ်ကိုက်မယ်ဆိုရင်တော့ ဆရာဝန်ဆီ ချက်ချင်းသွားပြကြပါနော်။ သားအိမ်ပြင်ပမှာ သန္ဓေတည်နေတာမျိုးဖြစ်နိုင်လို့ပါ။

လက္ခဏာတွေထဲက တစ်ခုခုကို ခံစားနေရတယ်ထင်ရင် ကိုယ်ဝန်စစ်တဲ့ ဆီးစစ်တံနဲ့ စစ်ကြည့်လို့ရပါတယ်။ ရာသီသွေးစမလာတဲ့ ပထမရက် မနက်အိပ်ရာထထချင်းမှာ စမ်းပေးလို့ရပါတယ်နော်။

ဆရာဝန်ဆီသွားပြရအောင်

ဆရာဝန်နဲ့ ဘာတွေတိုင်ပင်ကြမလဲ

ကိုယ်ဝန်ရှိပြီလို့ သတိထားမိတာနဲ့ ဆရာဝန်ကို ပြောပြရအောင်နော်။ ကိုယ့်ကိုယ်ကို တစ်ခုခုပြောင်းလဲနေပြီလို့ထင်ရင် ဆရာဝန်က အကောင်းဆုံးညွှန်ကြားပေးနိုင်သူပါ။ အခုချိန်က သားဖွားမီးယပ်ဆရာဝန်နဲ့ ပြဖို့အသင့်တော်ဆုံးအချိန်ပါပဲ။ သားဖွားမီးယပ်ဆရာဝန်က မီးဖွားဖို့ကို တာဝန်ယူပေးမှာပါ။

ဘယ်လိုစစ်ဆေးမှုတွေ ထပ်လိုဦးမလဲ ဆက်လေ့လာရအောင်

ဒီအချိန်မှာ လိုတာက ကိုယ်ဝန်ရှိမရှိစစ်ဖို့တစ်ခုပါပဲ။ ဒီစစ်ဆေးမှုက မှန်းဆဖို့ခက်ပါတယ်။ လူတိုင်းအတွက် အမြဲသေချာတာမျိုးမဟုတ်လို့ အကြိမ်အရေအတွက်များများ ပိုစမ်းပေးစေချင်ပါတယ်။

ကျန်းမာဘေးကင်းအောင်နေကြမယ်

ကိုယ်ဝန်ရှိချိန်မှာ ကျန်းမာဘေးကင်းအောင် ဘာတွေသိထားရမလဲ

ကိုယ်ဝန်ရှိနေရင် သွေးမလှူရပါဘူး။ ကိုယ်ဝန်ရှိတုန်း သွေးလှူရင် သွေးအားနည်းရောဂါ ခံစားရနိုင်ပါတယ်။ သွေးလှူတဲ့ဌာနတွေကလည်း ကိုယ်ဝန်ရှိတဲ့သူဆီက သွေးကို လက်မခံပါဘူး။ မီးဖွားပြီးခါစဆိုလည်း မလှူရပါဘူး။ လှူချင်ရင် မွေးပြီး ၆ပတ် အကြာ ဘာကျန်းမာရေး ပြဿနာမှ မရှိရင် လှူလို့ရပါတယ်၊၊ ၆ပတ်ကျော်ရင်တော့ နို့တိုက်မိခင်ဆိုလည်း ပုံမှန်လှူလို့ရပါပြီတဲ့။

အမျိုးသမီးတော်တော်များများက ကလေးမွေးထားရင်လည်း သွေးနီဥတွေ လှူနိုင်ပါတယ်။ တချို့ကတော့ သွေးဥမွှားတွေကို လှူလို့မရပါဘူး။ တချို့တွေက ကိုယ်ဝန်ဆောင်ပြီးရင် သွေးထဲမှာ ရောဂါပိုးတိုက်ထုတ်တဲ့ ဆဲလ်အသစ်ပေါ်လာတတ်ပါတယ်။ အဲဒီဆဲလ်က သွေးလက်ခံသူမှာ မတည့်တာမျိုးတွေဖြစ်တတ်ပါတယ်။ အသေးစိတ်ကို သွေးလှူဘဏ်က ဆရာဝန်နဲ့ တိုင်ပင်ပါ၊၊

၅ပတ်မြောက်မှာ ကလေးလေးဘာတွေဆက်ဖြစ်မလဲ၊၊

ရေးသားသူ- Hmwe San Eain