ဆေးလိပ်ငွေ့ နဲ့ ဘေဘီလေးကျန်းမာရေး

ဘေဘီလေးတွေက နုနယ်လွန်းတဲ့အရွယ်ဆိုတာကို ပြောပြနေစရာမလိုအောင် လူတိုင်း သိထားပြီးဖြစ်မှာပါ။ နုနယ်တဲ့ဘေဘီလေးတွေက အထိအခိုက်ခံနိုင်စွမ်းကလည်း တော်တော်လေးနည်းကြပါတယ်။ ဒါကြောင့် ဘေဘီလေးကို ကျန်းမာပျော်ရွှင်စွာကြီးပြင်းစေချင်တယ်ဆိုရင် ကိုယ်ဝန်ဆောင်ထားချိန်မှာကတည်းက သတိထားရမယ့် အချက်လေးရှိပါတယ်။ ဒါကတော့ တဆင့်ခံဆေးလိပ်ငွေ့နဲ့ ထိတွေ့မှုမရှိအောင်နေတာပါပဲ။

တစ်ဆင့်ခံဆေးလိပ်ငွေ့ ဆိုတာဘာလဲ…..

စီးကရက်ကို မီးညှိထားတာကြောင့်ထွက်လာတဲ့ အငွေ့နဲ့ ဆေးလိပ်သောက်သူက ရှုထုတ်လိုက်တဲ့ အငွေ့တွေပေါင်းစပ်ပြီး တဆင့်ခံဆေးလိပ်ငွေ့ဖြစ်လာရပါတယ်။ တဆင့်ခံဆေးလိပ်ငွေ့မှာ ဓါတုပစ္စည်းအမျိုးပေါင်း ၇၀၀၀ ကျော်ပါဝင်နေပြီး ဒီဓါတုပစ္စည်းတွေထဲက ရာပေါင်းများစွာက အဆိပ်အတောက်ဖြစ်စေနိုင်ပြီး အမျိုးပေါင်း ၇၀ လောက်က ကင်ဆာ ဖြစ်စေနိုင်ပါတယ်။ ဒီအငွေ့တွေဟာ လေထုထဲမှာ ၄ နာရီလောက်ထိရှိနေနိုင်ပြီး စက္ကန့်တိုင်း မိနစ်တိုင်းမှာ ကျန်းမာရေးကို ဒုက္ခပေးနေပါတယ်။

ကလေးတွေက အရွယ်ရောက်ပြီးသူတွေထက် တဆင့်ခံဆေးလိပ်ငွေ့ဒဏ်ကို ပိုခံစားရတယ်ဆိုတာ သိရဲ့လား………

ဖွံ့ဖြိုးဆဲ ဘေဘီလေး နဲ့ တဆင့်ခံဆေးလိပ်ငွေ့

• ကိုယ်ဝန်ပျက်ကျတာ
• လမစေ့ဘဲ ကလေးမွေးဖွားတာ
• ပေါင်မပြည့်တာ
• မွေးကင်းစကလေး ရုတ်တရက်သေဆုံးတာ
• သင်ယူမှုပိုင်းမှာ အားနည်းတာ
• အာရုံစူးစိုက်နိုင်စွမ်းနည်းတာ
• တက်ကြွလွန်ရောဂါ (ADHD) ကိုခံစားရတာမျိုးတွေဖြစ်နိုင်ပါတယ်။ ဒါကြောင့် ကိုယ်ဝန်ဆောင်ချိန်မှာ မေမေ့က ကိုယ်တိုင်ဆေးလိပ်သောက်တတ်ရင် ဆေးလိပ်ဖြတ်ဖို့လိုသလို တဆင့်ခံဆေးလိပ်ငွေ့ကို တတ်နိုင်သမျှရှောင်ဖို့လိုပါမယ်။

ဘေဘီလေးအနေနဲ့ တဆင့်ခံဆေးလိပ်ငွေ့ကို ထိတွေ့မိတဲ့အခါ ဆိုးရွားတဲ့ ကျန်းမာရေး ပြဿနာတွေကို ခံစားရနိုင်ပါတယ်။ တဆင့်ခံဆေးလိပ်ငွေ့ကို ရှုရှိုက်မိတာကြောင့်

• မွေးကင်းစကလေးငယ်ရုတ်တရက်သေဆုံးတာ (SIDS)
• နားပိုးဝင်ကူးစက်တာ
• ချောင်းဆိုးတာ
• လေနာရောဂါ
• အသက်ရှုလမ်းကြောင်းဆိုင်ရာရောဂါတွေခံစားရတာ
• ကိုယ်ခံအားနည်းတာ
• သွားတွေထိခိုက်ပျက်စီးတာ
• အမြင်အာရုံထိခိုက်တာ
• ဦးနှောက်ဖွံ့ဖြိုးမှုထိခိုက်တာတွေကို ခံစားရနိုင်ပါတယ်။ ဒါတွေအပြင် တဆင့်ခံဆေးလိပ်ငွေ့ကို ကာလရှည်ကြာထိတွေ့မိမယ်ဆိုရင် ဘေဘီလေးမှာ နှလုံးရောဂါနဲ့ အဆုတ်ကင်ဆာတွေခံစားလာရနိုင်ပါတယ်။

တဆင့်ခံဆေးလိပ်ငွေ့ထိတွေ့မိနိုင်တဲ့နေရာတွေက ဘယ်နေရာတွေလဲ………..

နေရာတိုင်းမှာ တဆင့်ခံဆေးလိပ်ငွေ့ထိတွေ့မိနိုင်တယ်ဆိုပေမယ့် ဘေဘီလေးကို တဆင့်ခံဆေးလိပ်ငွေ့အများဆုံး ထိတွေ့မိနိုင်ခြေအများဆုံးရှိတဲ့ နေရာတွေကတော့

• အငှားကား
• ဘတ်စ်ကား
• မူကြိုကျောင်း
• ဆွေမျိုးတွေရဲ့ အိမ်
• စားသောက်ဆိုင်
• ပန်းခြံ
• ဈေးဝယ်စင်တာနဲ့
• ကစားကွင်းလိုနေရာတွေပါ။

တဆင့်ခံဆေးလိပ်ငွေ့ထိတွေ့မိနိုင်ခြေကို ဘယ်လိုလျှော့ချမလဲ……..

ဘေဘီလေးကို တဆင့်ခံဆေးလိပ်ငွေ့ထိတွေ့မိနိုင်ခြေ လျှော့ချနိုင်စေဖို့ဆိုရင် ဒီအချက်လေးတွေက အသုံးတည့်မှာပါ။

• အိမ်ထဲမှာ ဆေးလိပ်မသောက်ပါနဲ့
• ပြတင်းတံခါးတွေဖွင့်ထားပါ
• လေသန့်စက်အသုံးပြုပါ
• ကားထဲမှာ ဆေးလိပ်မသောက်ပါနဲ့
• ဆေးလိပ်သောက်နေသူတွေနဲ့ ဝေးဝေးနေပါ
• ဈေးဝယ်စင်တာတွေကို ခေါ်မသွားပါနဲ့။

ကဲ…ဘေဘီလေးကျန်းမာပျော်ရွှင်ဖို့ တဆင့်ခံဆေးလိပ်ငွေ့ အန္တရာယ်ကနေ ကာကွယ်လိုက်ကြစို့လား……………..

Hello Health Group သည်ဆေးပညာအကြံပြုချက်များ၊ရောဂါရှာဖွေအတည်ပြုချက်များနှင့် ကုသမှုများမပြုလုပ်ပေးပါ။