တခြားသန္ဓေတား နည်းလမ်းတွေထက် ပိုကောင်းမွန်တဲ့ လက်မောင်းတွင်းထည့် သန္ဓေတားပစ္စည်း

အိမ်ထောင်ပြုပြီးခါစ အမျိုးသမီးတိုင်း ခေါင်းစားကြတဲ့ကိစ္စတစ်ခုရှိပါတယ်။ ကိုယ်ဝန်တန်းယူမှာလား၊ ကြားထဲမှာ ကိုယ်ဝန်မရအောင်သားဆက်ခြားရမလား ဆိုတဲ့ ကိစ္စကြီးပါ။ အိမ်ထောင်ကျသွားလို့ ကိုယ်ဝန်ရတာ သဘာဝဖြစ်စဉ်ဖြစ်တဲ့အတွက် ကိုယ်ဝန်တန်းယူတာနဲ့ ပက်သက်လို့ အထွေအထူးပြောစရာတော့ မရှိပါဘူး။ ဒါပေမယ့် သဘာဝဖြစ်စဉ်ကို ဆန့်ကျင်တဲ့ ကိုယ်ဝန်ကိုတားဖို့ အတွက်ကတော့ အနည်းငယ် ခေါင်းစားပါလိမ့်မယ် ။ ကိုယ်နဲ့ ဘယ်သားဆက်ခြားနည်းကသင့်တော်တာလဲ။ ကိုယ်သုံးမယ့်သားဆက်ခြားနည်းတွေမှာ ဘယ်လိုဘေးထွက်ဆိုးကျိုးတွေရှိလဲ။ စတာတွေပေါ့။

သားဆက်ခြားနည်းတွေထဲမှာ အထိရောက်ဆုံးနဲ့ ဘေးထွက်ဆိုးကျိုးလည်း နည်းတဲ့ သားဆက်ခြားနည်းရှိလား။ ။

ရှိပါတယ်။ ကိုယ်ဝန်ကိုလည်း အမှန်တကယ်ထိထိရောက်ရောက်တားပေးပြီး ဘေးထွက်ဆိုးကျိုးလည်း နည်းတဲ့ သန္ဓေတားနည်းရှိပါတယ်။ ခုဆောင်းပါးလေးထဲမှာအကောင်းဆုံး သန္ဓေတားနည်းတွေထဲက တစ်ခုဖြစ်တဲ့ လက်မောင်းတွင်းထည့်သန္ဓေတားပစ္စည်းအကြောင်းကို ပြောပြပေးသွားမှာပါ ။ သူက ကိုယ်ဝန်ကို ဘယ်လိုတားပေးလဲ ။ တစ်ခြား သန္ဓေတားနည်းတွေထက် ဘာကြောင့်ပိုကောင်းရလဲဆိုတာတွေကိုလည်း ပြောပြပေးမယ်နော်။

လက်မောင်းတွင်းထည့် သန္ဓေတားပစ္စည်းဆိုတာ ဘာလဲ။ ။

လက်မောင်းတွင်းထည့်သန္ဓေတား ပစ္စည်းဆိုတာ မီးခြစ်ဆံ အရွယ်လောက်ရှိတဲ့ အချောင်းငယ်လေးနှစ်ခုပါ။ သူက ဟော်မုန်းပါတဲ့ သန္ဓေတားပစ္စည်းတစ်မျိုးဖြစ်ပြီး လက်မောင်းအသားအောက်ထဲမှာ ထည့်ထားရပါတယ်။ ထည့်ပြီးတာနဲ့ ဒီပစ္စည်းလေးက လစဉ် သားဥအိမ်ကသားဥတွေထုတ်လုပ်နေမှုကို ရပ်တန့်သွားအောင်လုပ်ဆောင်ပေးတဲ့ ပရိုဂျက်စတင်ဟော်မုန်းကို နည်းနည်းချင်းထုတ်ပေးပါတယ်။သူက ၃ နှစ်ကနေ ၅ နှစ်အထိကြာအောင် သန္ဓေတားပေးပြီး ကိုယ်ဝန်ရရှိမှုကို ၉၉ ရာခိုင်နှုန်းထက်ပိုမို ကာကွယ်ပေးပါတယ်။

လက်မောင်းတွင်းထည်း သန္ဓေတားပစ္စည်းရဲ့ အားသာချက်တွေက ဘာတွေလဲ။ ။

• တစ်ခါထည့်ထားရင် ၃ နှစ်လောက်အထိကိုယ်ဝန်ကို တားပေးတယ်။ ။

တစ်ခြားသားဆက်ခြားနည်းတွေဖြစ်တဲ့ သောက်ဆေး၊ထိုးဆေးေတွလို သုံးဖို့မေ့သွားမှာစိုးလို့ ရက်တွေကို သေချာ ထိုင်တွက်ချက်နေစရာ မလိုတော့အောင် တစ်ခါထည့်ပြီးတာနဲ့ မေ့ထားလို့ရတဲ့ ပစ္စည်းတစ်ခုပါ။ လက်မောင်းအောက် တစ်ခါလောက်ထည့်ထားရုံနဲ့ ၃ နှစ်ကနေ ၅ နှစ်အထိ ကိုယ်ဝန်မရအောင် တားပေးနိုင်တဲ့ တာရှည်ခံသန္ဓေတား ပစ္စည်းတစ်ခုဖြစ်ပါတယ်။

• သုံးရတာလည်း အဆင်ပြေတယ်။ သိပ်လည်း မသိသာဘူး။

လက်မောင်းထဲတစ်ခါထည့်ထားပြီးပြီးဆိုတာနဲ့ မေ့မေ့ပျောက်ပျောက်ထားလို့ရတဲ့ သန္ဓေတားပစ္စည်းတစ်ခုပါ။ ထည့်ပြီးပြီဆိုတာနဲ့ ပြန်မထုတ်မချင်း၊ သူသက်တမ်းကုန်တဲ့နေ့ မရောက်မချင်း ကိုယ်ဝန်ကို တားပေးနေတာဖြစ်လို့ အလုပ်များတဲ့ လေဒီတို့အတွက် အရမ်းကို အဆင်ပြေတဲ့ သန္ဓေတား ပစ္စည်းလေးတစ်ခုပါ။ လက်မောင်းတွင်းထည့် သန္ဓေတား ပစ္စည်းလေးသာ သုံးလို့ကတော့ နေ့တိုင်းသန္ဓေတားဆေးတွေသောက်ရတဲ့ ဒဏ်၊ ၃ လတစ်ခါ ဆေးခန်းသွားပြီး ဆေးထိုးဖို့ မေ့မှာစိုးတဲ့သောကတွေကနေ ကင်းဝေးတော့မှာပါ။ ဒါ့အပြင် လက်မောင်းအောက် မှာထည့်ထားတာဆိုတော့ ကိုယ်က ထုတ်မပြောရင် ဘယ်သူမှ မသိနိုင်လောက်အောင် သိုသိပ်ပါတယ်။ ။

• အီစတိုဂျင်နဲ့ မတည့်တဲ့အမျိုးသမီးတွေအတွက် ပိုသင့်တော်တယ်။ ။

သန္ဓေတားနည်း အများစုဟာ အီစတိုဂျင်၊ ပရိုဂျက်စတုန်း စတဲ့ ဟော်မုန်းနှစ်မျိုးလုံးပါအောင် အသားပေးထုတ်ထားတာပါ။ ဒီလို ဟော်မုန်းနှစ်မျိုးပါတဲ့ သန္ဓေတားဆေးတွေကြောင့် ဘေးထွက်ဆိုးကျိုးတွေဖြစ်တဲ့ ခေါင်းမူးတာ၊ ပျို့အန်တာ၊ စိတ်အပြောင်းအလဲတွေဖြစ်တာနဲ့ သွေးပေါင်ချိန်တက်တာလိုမျိုး ပြဿနာလေးတွေဖြစ်တတ်ပါတယ်။ လက်မောင်းတွင်းထည့် သန္ဓေတားပစ္စည်းမှာတော့ အီစတိုဂျင်မပါဘဲ ပရိုဂျက်စတုန်း တစ်မျိုးတည်းပါတာကြောင့် ဒီလိုပြဿနာလေးတွေ နည်းပါတယ်။

• ပစ္စည်းလေးကို ထုတ်ပြီးတာနဲ့ချက်ချင်းကိုယ်ဝန်ပြန်ရနိုင်တယ်။ ။

ကိုယ်ဝန်ယူဖို့ အဆင်သင့်ဖြစ်လို့ ကိုယ်ဝန်ပြန်ရချင်ပြီဆိုတာနဲ့ ပစ္စည်းလေးကို လက်မောင်းအောက်ကပြန်ထုတ်လိုက်ရုံပါပဲ။ တစ်ချို့သန္ဓေတားနည်းတွေလို ဖြတ်လိုက်ပြီဆိုတာနဲ့ ကိုယ်ဝန်ပြန်ရဖို့ ခက်ခဲတာမျိုး မဖြစ်နိုင်တဲ့အတွက် သုံးရ အရမ်းအဆင်ပြေတဲ့ သန္ဓေတား ပစ္စည်းလေးပါ။

Hello Health Groupသည် ဆေးပညာဆိုင်ရာ အကြံပေးချက်များ၊ ရောဂါရှာဖွေခြင်းနှင့် ကုသခြင်းများ မပြုလုပ်ပါ။

[embed-health-tool-ovulation]