ငှက်ပျောသီးက နေ့စဉ်အစာအာဟာရကို ဘယ်လိုအကျိုးပြုလဲ

ကျွန်တော်တို့နိုင်ငံမှာတော့ ငှက်ပျောသီးကို နေရာအနှံ့၊ ရာသီမရွေး တွေ့နေကြတာပါပဲ။ အရသာလည်း ရှိတယ်၊ အမျှင်ဓါတ်လည်း များတော့ တစ်လုံးလောက်စားပြီးတာနဲ့ ဗိုက်ဝသွားရော။ သဘာဝအချို အရသာဆိုတော့ ကလေးတွေပါ ကြိုက်ကြတာပေါ့။ ဒီနေ့ဆောင်းပါးလေးမှာ အသက်အရွယ်မရွေး ကြိုက်နှစ်သက်ကြတဲ့ ငှက်ပျောသီးရဲ့ ကျန်းမာရေးဆိုင်ရာ အကျိုးကျေးဇူးတွေကို ပြောပြပေးချင်ပါတယ်။

၁။ အာဟာရဓါတ် အများအပြား ပါဝင်ပါတယ်။

အရောင်၊ အရွယ်အစား၊ ပုံစံချင်း မတူရင်တောင် ငှက်ပျောသီးမှာ ပါတဲ့ အာဟာရဓါတ်ေတွကတော့ လူတွေအတွက် အကျိုးများစွာ ဖြစ်စေနိုင်ပါတယ်။ အမျှင်ဓါတ် ပါဝင်မှု များလို့ အစာကြေလွယ်စေတယ်။ ဓါတ်တိုးဆန့်ကျင်ပစ္စည်းတွေ ပါဝင်လို့ ကိုယ်ခံအားစနစ်ကို ကောင်းစေပြီး ရောဂါတွေကို တိုက်ဖျက်ပေးနိုင်တယ်။ အိုမင်းရင့်ရော်မှုကို နှေးကွေးစေတယ်။ ပိုတက်စီယမ်ဓါတ်၊ ဗီတာမင် ဘီ-စစ်၊ ဗီတာမင် စီ၊ မဂ္ဂနီဆီယမ်ဓါတ်၊ ကစီဓါတ်၊ ပရိုတင်းဓါတ်နဲ့ အဆီဓါတ်အနည်းငယ် ပါဝင်လို့ ကျန်းမာကြံ့ခိုင်စေပြီး တစ်နေ့တာအတွက် လိုအပ်တဲ့ ခွန်အားတွေကို ပြန်လည်ဖြည့်တင်းပေးနိုင်ပါတယ်။

၂။ သွေးတွင်း သကြားဓါတ်ကို ထိန်းညှိပေးနိုင်တယ်။

ငှက်ပျောသီးမှာပါဝင်တဲ့ ပက်တင် (Pectin) လို့ ခေါ်တဲ့ အမျှင်ဓါတ်ေတွဟာ အစာကို လျင်မြန်စွာ ချေဖျက်နိုင်စေဖို့ ကူညီပေးတဲ့အပြင် သွေးတွင်း သကြားဓါတ်ကိုပါ ထိန်းညှိပေးနိုင်ပါတယ်။ အမျိုးအစား (၂) ဆီးချိုရောဂါရှင်ေတွအနေနဲ့ ငှက်ပျောသီးကို သင့်တင့်ရုံ ပမာဏလောက်သာ စားပေးနိုင်ရင် ပိုကောင်းပါတယ်။ ဒါ့အပြင် စားပြီးတာနဲ့ ဗိုက်ပြည့်သွားစေလို့ အစာမကြာခဏ စားချင်စိတ်ကို မဖြစ်စေတော့ အဝမလွန်စေဖို့ ကာကွယ်ပြီးသား ဖြစ်တာပေါ့။

၃။ အစာခြေစနစ်ကို မြှင့်တင်ပေးနိုင်တယ်။

ငှက်ပျောသီးမှာ ပါဝင်တဲ့ အမျှင်ဓါတ်နဲ့ ကစီဓါတ်ဟာ အူမကြီးထဲရောက်သွားတဲ့အခါမှာ ကိုယ်ခန္ဓါ အကျိုးပြုဘက်တီးရီးယားတွေအတွက် အစာဖြစ်သွားပါတယ်။ ဒီဘက်တီးရီးယားလေးတွေ များလာတာနဲ့ ကိုယ်ခံအားစနစ်ကိုသာမက အစာကောင်းကောင်း ချေဖျက်နိုင်ဖို့ကိုလည်း ကူညီပေးတယ်။ အူမကြီးကင်ဆာကိုလည်း ကာကွယ်ပေးနိုင်ပါတယ်။

၄။ ကိုယ်အလေးချိန် ကျစေပါတယ်။

ကိုယ်အလေးချိန် ချဖို့ ရည်မှန်းထားတဲ့ မိန်းကလေးတွေအတွက် စားပေးသင့်တဲ့ အသီးတွေထဲမှာ ပါပါတယ်။ ငှက်ပျောသီးမှာ ကယ်လိုရီပမာဏ နည်းပြီး ပရိုတင်းဓါတ်နဲ့ တခြားအကျိုးပြု အာဟာရဓါတ်တွေ အများအပြား ပါဝင်ပါတယ်။ အမျှင်ဓါတ်ပါဝင်မှု များလို့ ကိုယ်အလေးချိန်ကို ကျစေပြီး အစာမကြာခဏ စားချင်စိတ်ကို ထိန်းချုပ်ပေးလို့ အဝမလွန်စေဖို့ ကူညီပေးနိုင်တာပေါ့။

၅။ နှလုံးနဲ့ ကျောက်ကပ်ကို ကျန်းမာစေတယ်။

ငှက်ပျောသီးမှာ နှလုံးနဲ့ ကျောက်ကပ်အတွက် မရှိမဖြစ်အာဟာရ ပိုတက်စီယမ်ဓါတ်တွေ အများအပြား ပါဝင်ပါတယ်။ ဒါ့အပြင် ပိုတက်စီယမ်ဓါတ်ဟာ သွေးတိုးကျစေလို့ နှလုံးနဲ့ ဆက်စပ်ရောဂါတွေ ဖြစ်မလာစေဖို့ ကာကွယ်ပေးနိုင်တယ်။ နှလုံးအားကောင်းစေတဲ့ သက်လုံကောင်းပြီး အမောခံနိုင်ရည်ရှိစေတာပေါ့။

၆။ ငှက်ပျောသီးမှာ ဓါတ်တိုးဆန့်ကျင်ပစ္စည်းတွေ အများအပြား ပါဝင်ပါတယ်။

ဟင်းသီးဟင်းရွက်နဲ့ သစ်သီးဝလံတွေမှာ ကိုယ်ခန္ဓါအကျိုးပြု ဓါတ်တိုးဆန့်ကျင်ပစ္စည်းတွေ အများအပြား ပါဝင်တာကို သိပြီးသားဖြစ်မှာပါ။ ဒီဓါတ်တိုးဆန့်ကျင်ပစ္စည်းတွေဟာ ကိုယ်ခံအားစနစ်ကို မြှင့်တင်ပေးပြီး ရောဂါတွေကို တိုက်ထုတ်ပေးနိုင်တယ်။ အရွယ်မတိုင်ခင် အိုမင်းရင့်ရော်ခြင်းကို နှေးကွေးစေပြီး ဇီဝကမ္မဖြစ်စဉ်ကို မြှင့်တင်ပေးနိုင်တယ်။ နှလုံးရောဂါ၊ သွေးတိုးရောဂါ ဖြစ်နိုင်ခြေကို လျော့နည်းစေပါတယ်။

၇။ အားကစားသမားတွေအတွက် အကျိုးပြုပေးတယ်။

ငှက်ပျောသီးက တစ်နေ့တာအတွင်း ကုန်ဆုံးသွားတဲ့ အားအင်တွေကို ပြန်လည်ဖြည့်တင်းပေးနိုင်လို့ အားကစားသမားတွေအတွက်သာမက လေ့ကျင့်ခန်းလိုက်စားသူတွေအတွက်ပါ ကောင်းကျိုးများစွာ ဖြစ်စေပါတယ်။ ပိုပြီး အမောခံနိုင်တဲ့အတွက် အလေးအပင်တွေ မတဲ့အခါမှာလည်း အားစိုက်လို့ ရတာပေါ့။ အချိန်တိုအတွင်း ကြွက်သားတည်ဆောက်ဖို့ ရည်မှန်းထားတဲ့ ကိုကိုတွေအနေနဲ့ ငှက်ပျောသီးကို Gym မကစားခင် တစ်လုံးလောက်ဖြစ်ဖြစ် စားပေးတာ ပိုကောင်းတယ်နော်။

Hello Health Groupသည် ဆေးပညာဆိုင်ရာ အကြံပေးချက်များ၊ ရောဂါရှာဖွေခြင်းနှင့် ကုသခြင်းများ မပြုလုပ်ပါ။