အသည်းရောဂါရှိနေရင် ဒီအစားအစာတွေကိုရှောင်ပါ

အသည်းက ခန္ဓာကိုယ်တစ်ခုလုံးကျန်းမာနေစေဖို့ အလုပ်အများဆုံးကို တာဝန်ယူပေးထားတဲ့ ကိုယ်တွင်းအင်္ဂါအစိတ်အပိုင်းတစ်ခုပါ။ ဒီလိုအရေးကြီးတဲ့ အစိတ်အပိုင်းကို ဂရုစိုက်ဖို့လိုမယ်ဆိုတာပြောနေစရာတောင်မလိုပါဘူး။ အသည်းမကောင်းတဲ့အခါ ခန္ဓာကိုယ်မှာ ထိခိုက်လာနိုင်တဲ့အရာတွေအများကြီးပါ။ ဒါကြောင့် အသည်းကျန်းမာရေးကိုသေသေချာချာဂရုစိုက်ဖို့လိုပါမယ်။

အသည်းမကျန်းမာရင် ဘာတွေဖြစ်လာနိုင်လဲ

အသည်းမကျန်းမာတဲ့အခါ –

• သွေးတိတ်အောင် လုပ်ဆောင်နိုင်စွမ်းကျသွားမယ်
• အစာခြေနိုင်စွမ်းနည်းသွားမယ်
• အာဟာရမပြည့်ဝသလိုဖြစ်လာမယ်
• အရေပြားနဲ့ မျက်လုံးအဖြူသားတွေဝါလာမယ်
• ဗိုက်အထက်နားကအောင့်မယ်
• ဝမ်းဗိုက်ရောင်ရမ်းမယ်
• ပင်ပန်းနွမ်းနယ်မယ်
• အော့အန်မယ်
• အိပ်ရေးပျက်မယ်

အသည်းရဲ့ လုပ်ငန်းဆောင်တာတွေက

အသည်းက ဒီတာဝန်တွေကို ယူထားရတာပါ။

• သွေးတွေကို စစ်ထုတ်သန့်စင်ပေးတယ်
• သည်းခြေရည်ထုတ်ပေးတယ်
• အဆီတွေကို ချေဖျက်ပေးတယ်
• လိုအပ်တဲ့ အာဟာရတွေကို စုပ်ယူသိုလှောင်ပေးတယ်
• သွေးတိတ်အောင်လုပ်ဆောင်ပေးတယ်

အသည်းရောဂါခံစားနေရသူတွေက ဘာတွေမစားသင့်ဘူးလဲ

အချိုများတဲ့ အစားအစာတွေ – သကြားလုံးတွေ၊ ကွတ်ကီး နဲ့ အချိုကဲတဲ့အစားအစာတွေ၊ အချိုရည်တွေ။ သစ်သီးဖျော်ရည်ဗူးလိုမျိုး အချိုကဲတဲ့သောက်စရာတွေ ကို အသည်းရောဂါရှိနေရင် မစားသုံးသင့်ပါဘူး။ အသည်းမှာအဆီတွေပိုဖြစ်စေနိုင်တာကြောင့်ရှောင်ပေးပါ။

ဆီကြော်စာတွေ – အဆီနဲ့ ကယ်လိုရီပါဝင်မှုများတာကြောင့် အသည်းအတွက်မကောင်းပါဘူး။ ဒါကြောင့် အဆီပါဝင်မှုများတဲ့ အစားအစာတွေကိုလျှော့စားပါ။ ဆီစားသုံးမှုကိုတတ်နိုင်သမျှလျှော့ပါ။

အငန်ကဲတဲ့ အစားအစာတွေ – အငန်ဓာတ်ကလည်း အသည်းကို ထိခိုက်စေနိုင်တဲ့အရာတစ်ခုဖြစ်တာကြောင့် အလွန်အကျွံမစားသင့်ပါဘူး။ ငန်မှခံတွင်းတွေ့တတ်တဲ့ အကျင့်ကိုပြင်ဆင်ပေးပါ။ အငန်ဓါတ်ပါဝင်မှုများတဲ့ အစားအစာတွေကို တတ်နိုင်သမျှရှောင်ပါ။

အနီရောင် အသားတွေ – အနီရောင်အသားမှာ ပြည့်ဝဆီပါဝင်မှုများတာကြောင့် အသည်းရောဂါရှိနေတယ်ဆိုရင်တော့ အနီရောင်အသားမစားပါနဲ့။

ကဖင်းပါတဲ့ သောက်စရာတွေ – ကဖင်းဓာတ် ပါဝင်မှုများတဲ့ သောက်စရာတွေက အသည်းရောဂါကို ပိုဆိုးစေနိုင်ပါတယ်။

အယ်လ်ကိုဟော – အယ်လ်ကိုဟောပါဝင်နေတဲ့ သောက်စရာတွေက အသည်းကို ထိခိုက်စေနိုင်တဲ့အရာတွေဆိုတာပြောနေစရာတောင်မလိုပါဘူး။ ဒါကြောင့် အသည်းရောဂါခံစားနေရပြီဆိုရင်တော့ အယ်လ်ကိုဟောပါတဲ့သောက်စရာတွေကို မဖြစ်မနေရှောင်ကြဉ်ပေးပါ။

ပေါင်မုန့်၊ ထမင်း –ပေါင်မုန့်ကြမ်းက အဆင်ပြေပေမယ့် ဂျုံအနုနဲ့လုပ်ထားတဲ့ပေါင်မုန့်ကတော့ အသည်းရောဂါခံစားနေရသူတွေနဲ့ မသင့်တော်ပါဘူး။ ထမင်းကလည်း အများကြီးမစားတာကအကောင်းဆုံးပါ။

အသင့်စားအစားအစာတွေ – အသင့်စားအစားအစာတွေက ဖြစ်နိုင်ရင် မစားတာအကောင်းဆုံးပါ။ အသည်းရောဂါရှိသူတွေအနေနဲ့ ဆိုရင်တော့ မဖြစ်မနေကိုရှောင်သင့်တဲ့ စားစရာတွေပေါ့။ အချိုအငန်ကဲတဲ့အပြင် ကယ်လိုရီနဲ့ အဆီပါဝင်မှုလည်းများပါတယ်။

အသည်းရောဂါခံစားနေရပေမယ့် ရောဂါအခြေအနေ ပိုဆိုးမလာစေဖို့နဲ့၊ သက်တမ်းစေ့စေ့နေထိုင်နိုင်စေဖို့အတွက် အခုပြောပြခဲ့တဲ့ အစားအစာတွေကို တတ်နိုင်သမျှရှောင်ပေးပါ။