ဆီးချိုသွေးချိုရှိသူအတွက် ဆောင်ရန် ရှောင်ရန်များ

(၁) သွေးတွင်းသကြားဓါတ်ကို ပုံမှန်စစ်ဆေးပါ

သွေးတွင်းသကြားဓါတ်ကို မကြာမကြာ စစ်ကြည့်တော့မှ အစားအသောက်၊ စိတ်ဖိစီးမှု၊ လှုပ်ရှားမှု စတာတွေအပေါ် ကိုယ့်ခန္ဓါကိုယ်က ဘယ်လိုတုံ့ပြန်မှုရှိလဲဆိုတာ အမြဲမပြတ်သိနိုင်မှာပါ။ မနက်အစာမစားမီနဲ့ ထမင်းစားပြီးနှစ်နာရီမှာသွေးချိုတိုင်းကြည့်သင့်ပါတယ်။ ကိုယ်လက်လေ့ကျင့်ခန်းလုပ်ပြီးတဲ့အခါ စစ်ကြည့်ပါ၊ စိတ်ဖိစီးနေတဲ့အခါ စစ်ကြည့်ပါ။ အခြေအနေအမျိုးမျိုးမှာ ကိုယ့်ခန္ဓါကိုယ်က ဘယ်လိုတုံ့ပြန်နေသလဲ သိလာပါလိမ့်မယ်။

(၂ ) သွေးတွင်းသကြားဓါတ်အတက်အကျကို သက်ရောက်မှုရှိနိုင်တဲ့အရာတွေ လေ့လာပါ

ရုတ်တရက်ဆိုရင်တော့ သကြားပါတဲ့၊ အချိုများတဲ့အစားအသောက်တွေကိုပြေးမြင်မှာပဲပေါ့။ ဒါပေမယ့်သွေးတွင်းသကြားဓါတ်ကိုသက်ရောက်မှုရှိနိုင်တဲ့အရာတွေက ဒီတစ်ခုတည်းမကပါဘူး။ ကိုယ်လက်လှုပ်ရှားမှုရယ်၊ စိတ်ဖိစီးမှုတွေရယ်၊ဆေးဝါးတွေရဲ့ဘေးထွက်ဆိုးကျိုး၊ နာကျင်ကိုက်ခဲမှုဝေဒနာ၊ စတာတွေကြောင့်လည်း ဆီးချိုသွေးချို အတက်အကျရှိစေနိုင်ပါတယ်။

အစားအသောက်မှာဆိုလည်း အချိုမပါရင် အကုန်တည့်တယ်ဆိုပြီး အချိုမပါတာတွေကို အကြိုက်စားတာမျိုးက မသင့်တော်ပါဘူး။ တကယ်က အဆီများတာ၊ ဆီကြော်စာတွေမစားသင့်ပါ။ အငန်လျှော့စားပါ။

(၃) ပရိုတင်းကို မမေ့ပါနဲ့

ကာဗိုဟိုက်ဒရိတ်ပါဝင်မှုကို သတိထားကြည့်နေသင့်တယ်ဆိုပေမယ့် ပရိုတင်းရဲ့အရေးပါမှုကိုလည်းလျှော့တွက်လို့မရပါဘူး။ ပရိုတင်းမပါဘဲ ကာဗိုဟိုက်ဒရိတ်ကိုပုံမှန်စားသုံးနေလည်းသွေးတွင်းသကြားဓါတ်ကိုတက်စေနိုင်ပါတယ်။ ပဲ၊ အသား၊ဥ တို့ကရတဲ့ ပရိုတင်းတွေကို လုံလောက်အောင်စားပေးမှ ဆီးချိုရှိသူတွေမှာဖြစ်တတ်တဲ့ ကြွက်သားဆုံးရှုံးမှုကို ကာကွယ်ပေးနိုင်မှာပါ။ အဲဒီထဲကမှ whey protein လို့ခေါ်တဲ့ နို့ထွက်ပစ္စည်းကရတဲ့ပရိုတင်းတစ်မျိုးက ဆီးချိုထိန်းညှိပေးနိုင်တဲ့အစွမ်းထက်အာနိသင်ရှိတယ်လို့ သုတေသနတွေကတွေ့ရှိထားပါတယ်။

(၄) ကာဗိုဟိုက်ဒရိတ်တွေကို ယတိပြတ် မရှောင်ပါနဲ့

ကာဗိုဟိုက်ဒရိတ်တွေက မကောင်းတဲ့အရာတွေမဟုတ်ပါဘူး။ ဆီးချိုတက်လိမ့်မယ်ဆိုတာနဲ့ပဲ အပြီးရှောင်လိုက်စရာမလိုပါဘူးနော်။ သူတို့ကို ထိုက်သင့်တဲ့ပမာဏအထိ အမြဲပုံမှန်စားပေးဖို့အရေးကြီးပါတယ်။ပေါင်မုန့်၊ပါစတာ၊ထမင်းတို့မှာပဲ ကာဗိုဟိုက်ဒရိတ်ပါတာမဟုတ်ပါဘူး။ နို့ထွက်ပစ္စည်းတွေ၊အသီး၊ ဟင်းသီးဟင်းရွက်တွေ၊ ဥပမာ အာလူး၊ ပဲစိမ်းနဲ့ပြောင်းဖူးတွေမှာ ကာဗိုဟိုက်ဒရိတ်ပါဝင်တဲ့အတွက် စားတဲ့အခါ ပမာဏကို ချင့်တွက်ပါ။

(၅) ရေသောက်မနည်းပါနဲ့

ဆီးချိုရှိသူတွေမှာ အရေးကြီးတဲ့တစ်ချက်ကရေသောက်ဖို့ပါ။ရေဓါတ်ပြည့်ဝနေဖို့ကလည်းသွေးတွင်းသကြားဓါတ်ထိန်းတဲ့နေရာမှာ အရေးပါနေပါတယ်။သွေးတွင်းသကြားဓါတ်မြင့်လာတဲ့အခါ ခန္ဓါကိုယ်က ပိုလျှံနေတဲ့သကြားဓါတ်ကိုဖယ်ထုတ်ဖို့ ဆီးကတဆင့် စွန့်ထုတ်ပါလိမ့်မယ်။ ဒီလိုနဲ့ ဆီးသွားတာများတဲ့အခါ ခန္ဓါကိုယ်မှာရေဓါတ်ပြန်ဖြည့်ဖို့လိုအပ်လာပါတယ်။ ဒါ့ကြောင့်ရေသောက်ခြင်းကသွေးတွင်းကသကြားဓါတ်ကို တချို့တဝက်စွန့်ထုတ်နိုင်ဖို့ အထောက်အကူပေးပါတယ်။

(၆) စိတ်ဖိစီးမှုကို ဖြေရှင်းပါ

စိတ်ဖိစီးမှုကြောင့် ခန္ဓါကိုယ်မှာ သကြားဓါတ်ပိုထွက်စေနိုင်ပြီး ဆဲလ်တွေထဲမှာ စုပုံများပြားလာစေနိုင်ပါတယ်။ ဒါ့ကြောင့်ပဲ အချိန်ကာလကြာရှည် စိတ်ဖိစီးမှုခံစားနေရတဲ့အခါသွေးချိုထိန်းတဲ့နေရာမှာ အနှောင့်အယှက်ဖြစ်စေနိုင်ပါတယ်။ စိတ်ဖိစီးမှုကိုပြေလျော့စေဖို့အတွက်က ကိုယ်လက်လှုပ်ရှားမှုပုံမှန်လုပ်ဖို့၊ စိတ်ပြေလျော့စေတဲ့နည်းလမ်းတွေကို ကြိုးစားကြည့်ဖို့( အသက်ရှူလေ့ကျင့်ခန်း၊ တရားထိုင်တာ) လိုပါတယ်။

(၇) လှုပ်ရှားပေးဖို့ မမေ့ပါနဲ့

ကိုယ်လက်လှုပ်ရှားမှုပုံမှန်လုပ်ပေးတဲ့အခါ ကိုယ်အလေးချိန်ကိုထိန်းနိုင်တဲ့အပြင်သွေးတွင်းသကြားဓါတ်ကိုလည်း ထိန်းညှိပေးနိုင်ပါတယ်။ တစ်နေ့ကို မိနစ် ၃၀လောက်အနည်းဆုံး လမ်းလျှောက်ပေးတာ၊ ကိုယ်လက်လှုပ်ရှားမှုလုပ်ပေးတာဆိုသွေးတွင်းသကြားဓါတ်ကို သိသိသာသာလျော့ကျစေပါတယ်။

Hello Health Group သည်ဆေးပညာအကြံပြုချက်များ၊ရောဂါရှာဖွေအတည်ပြုချက်များနှင့် ကုသမှုများမပြုလုပ်ပေးပါ။

Hello Health Group သည် ဆေးပညာအကြံဉာဏ်များ၊ ရောဂါရှာဖွေမှုများနှင့် ကုသမှုများ မပြုလုပ်ပေးပါ။