အမျိုးသားများ ဆီးကျိတ် ကျန်းမာရေး ကောင်းစေဖို့

အမျိုးသားတွေဟာ အသက်ကြီးလာတာနဲ့အမျှ ဆီးကျိတ် နဲ့ ပတ်သက်တဲ့ ပြဿနာတွေ ဖြစ်နိုင်ခြေများလာလေ့ရှိပါတယ်။ ဆီးကျိတ်ရောင်တာက စလို့ ဆီးကျိတ်ကင်ဆာအထိ အမျိုးမျိုးဖြစ်နိုင်ပါတယ်။ ဆီးကျိတ်ရောဂါလက္ခဏာတွေကို သိရှိဖို့နဲ့ ဆီးကျိတ် ကျန်းမာရေး ကောင်းစေဖို့ နေထိုင်စားသောက်နည်းတွေကို သိထားသင့်ပါတယ်။

အဖြစ်များတဲ့ ဆီးကျိတ်ရောဂါများ

• ဆီးကျိတ်ရောင်ရမ်းခြင်း

ဆီးကျိတ်ရောင်ရမ်းတာက ဘယ်အရွယ်မှာမဆို ဖြစ်နိုင်ပေမယ့် ငယ်ရွယ်တဲ့အမျိုးသားတွေ (၃၀-၅၀ကြား)တွေမှာ ပိုဖြစ်တတ်ပါတယ်။ ဆီးကျိတ်ရောင်ခြင်းမှာ

-ဘက်တီးရီးယားကြောင့် ရောင်ရမ်းခြင်းနဲ့

-ဘက်တီးရီးယားကြောင့် မဟုတ်ဘဲ တခြားအကြောင်းအရင်းကြောင့် ရောင်ရမ်းခြင်း ဆိုပြီး ၂မျိုးရှိပါတယ်။

လက္ခဏာအနေနဲ့

-ခဏခဏ ဆီးသွားချင်တာ

-ဆီးကျန်တာ

-ချမ်းတုန်ဖျားတာ

–ဆီးပူဆီးကျဉ်တာတွေ ဖြစ်တတ်ပါတယ်။

• ဆီးကျိတ်ကြီးခြင်း

ကင်ဆာမဟုတ်တဲ့ ရိုးရိုးဆီးကျိတ်ကြီးခြင်းက အသက်ကြီးလေ ဖြစ်နိုင်ခြေ များလေလေပါ။ အသက် ၅၀ဝန်းကျင်ဆို အမျိုးသား၂ယောက်မှာ ၁ယောက် ဖြစ်နိုင်ခြေရှိပါတယ်။ အသက် ၆၀ကျော်လာရင်တော့ ဖြစ်နိုင်ခြေက ၇၅% ထိတက်လာပါတယ်။

လက္ခဏာအနေနဲ့

-ဆီးသွားရခက်တာ

-ဆီးညှစ်ပေါက်ရတာ

-ဆီးလုံးသေးတာ

–ဆီးမထိန်းနိုင်တာ

-ခဏခဏ ဆီးသွားချင်တာ

-ဆီးကျန်ပြီး တစ်စက်စက်နဲ့ ကျနေတာတွေ ဖြစ်နိုင်ပါတယ်။

• ဆီးကျိတ်ကင်ဆာ

အမျိုးသားတွေ အဖြစ်အများဆုံးကင်ဆာတွေထဲမှာ ဒုတိယနေရာမှာ ရှိနေပါတယ်။ ဆီးကျိတ် ကင်ဆာက အပြန့်နှေးတဲ့အတွက် စောစောသာသိမယ်ဆိုရင် ထိထိရောက်ရောက် ကုသနိုင်မှာပါ။ ဒါပေမယ့် အများစုက လက္ခဏာမပြတာကြောင့် အစောပိုင်း အဆင့်ကို လွတ်သွားတတ်ပါတယ်။ ဒါကြောင့် ပုံမှန်ဆေးစစ်ဖို့ လိုပါတယ်။

ဆီးကျိတ်ကင်ဆာရဲ့ လက္ခဏာတွေကတော့

-ဆီးစသွားဖို့ ခက်တာ

-ခဏခဏ ဆီးသွားချင်တာ (အထူးသဖြင့် ညဘက်တွေမှာ)

-ဆီးမသွားနိုင်တာ

-ဆီးလုံးသေးပြီး ဆီးအားပျော့တာ

–သုက်လွှတ်ရင် နာတာ

-ဆီး ဒါမှမဟုတ် သုက်ရည်မှာ သွေးပါလာတာ

-ခါးနဲ့ ပေါင်တွေ ကိုက်ခဲတာတွေ ဖြစ်တတ်ပါတယ်။

ဆီးကျိတ် ကျန်းမာရေး ကောင်းနေစေဖို့

• ကိုယ်အလေးချိန်ထိန်းပါ။

အဝလွန်တာက ဆီးကျိတ်ကင်ဆာအပါအဝင် တခြားဆီးကျိတ်ရောဂါတွေကိုပါ ဖြစ်စေနိုင်ပါတယ်။ အစားအသောက်ထိန်းစားတာ၊ လေ့ကျင့်ခန်း လုပ်တာတွေနဲ့ ကိုယ်အလေးချိန် ထိန်းထားနိုင်ပါတယ်။

• အသီးအရွက်များများစားပါ။

အထူးသဖြင့် အစိမ်းရောင် အရွက်ဖားဖားတွေက ဆီးကျိတ် ကျန်းမာရေး အတွက် သင့်တော်ပါတယ်။ အသီးအရွက်တွေမှာပါတဲ့ ဗီတာမင်နဲ့ ဓာတ်တိုးဆန့်ကျင်သတ္တိတွေက ဆီးကျိတ်ကို ကျန်းမာစေပါတယ်။

• အနီရောင်အသား လျှော့စားပါ။

အနီရောင် အသား (အထူးသဖြင့် ကင်စားတာ) အစားများတဲ့အခါ PhIP ဆိုတဲ့ ဓာတ်ပစ္စည်း ထွက်လာပါတယ်။ ဒါက ဆီးကျိတ်ကင်ဆာဖြစ်နိုင်ခြေကို များစေပါတယ်။

• ပုံမှန်ဆေးစစ်ပါ။

အထူးသဖြင့် ဆီးကျိတ်ကင်ဆာကို ပုံမှန်စစ်ဆေးသင့်ပါတယ်။ သာမန် အမျိုးသားတွေဆိုရင်တော့ အသက် ၄၀ကျော်တာနဲ့ တစ်နှစ်တစ်ခါလောက် ဆီးကျိတ်ကင်ဆာ ရှိမရှိကို စစ်ဆေးသင့်ပါတယ်။ မိသားစုထဲမှာ ဆီးကျိတ်ကင်ဆာမျိုးရိုးရှိရင်တော့ အသက် ၃၅နှစ်လောက်တည်းက စပြီး စစ်ဆေးသင့်ပါတယ်။

• လေ့ကျင့်ခန်း လုပ်ပါ။

ကိုယ်လက်လှုပ်ရှားမှုတွေက ဆီးကျိတ်အပါအဝင် ခန္ဓာကိုယ်တစ်ခုလုံးကို ကျန်းမာစေပါတယ်။ တစ်နေ့ကို မိနစ်၃၀လောက် ခပ်မြန်မြန်လမ်းလျှောက်ပေးတာကတောင် အကျိုးရှိစေပါတယ်။

• ရေဓာတ်ပြည့်ဝပါစေ။

ရေများများသောက် ရှူးများများပေါက်တာကလည်း ဆီးကျိတ် ကို ကျန်းမာစေပါတယ်။ တစ်နေ့ကို အနည်းဆုံး ၈ဖန်ခွက် ဝင်အောင်သောက်ပါ။

• စိတ်ဖိစီးမှု လျှော့ချပါ။

စိတ်ဖိစီးမှုက ဆိးကျိတ်ကို တိုက်ရိုက်ထိခိုက်စေတာတော့ မဟုတ်ပေမယ့် ရေရှည်မှာ ကိုယ်ခံအားကျတာ၊ ဟော်မုန်းအပြောင်းအလဲဖြစ်တာ၊ ရောဂါပိုးတွေ ဝင်လွယ်တာကို ဖြစ်စေပါတယ်။ အသက်ရှူလေ့ကျင့်ခန်းတွေ၊ တရားထိုင်တာတွေက စိတ်ဖိစီးမှုကို လျှော့ချဖို့ အကောင်းဆုံး နည်းလမ်းတွေပဲ ဖြစ်ပါတယ်။

•  ဆေးလိပ်ဖြတ်ပါ။

ဆေးလိပ်က အမျိုးသားတွေကို သေစေနိုင်လောက်တဲ့ ရောဂါတွေကို ဖြစ်စေပါတယ်။ ဆေးလိပ်ကထွက်တဲ့ ကာဗွန်မိုနောက်ဆိုဒ်က သွေးနီဥကို တွယ်ကပ်ပြီး ခန္ဓာကိုယ်တစ်ခုလုံးကို ရောက်သွားပါတယ်။ ရောက်တဲ့နေရာက ဆဲလ်တွေကို သေစေပါတယ်။ ဒီလိုနဲ့ ဆီးကျိတ်ကင်ဆာဖြစ်နိုင်ခြေကို မြင့်စေပါတယ်။