အမျိုးသမီးတွေဟာ ကိုယ်ဝန်ဆောင်တဲ့အချိန်ကစပြီ သူ့ဘဝမှာ တစ်ခါမှမကြုံဖူးတဲ့ ပြောင်းလဲမှုတွေကို ခံစားရတာပါ။ မီးဖွားချိန်မှာရော မီးတွင်းမှာရောပဲ။ မီးတွင်းမှာဆိုရင်လည်း သူ့အနေနဲ့ ရုပ်ပိုင်းဆိုင်ရာ၊ စိတ်ပိုင်းဆိုင်ရာပြောင်းလဲမှုတွေကို ကြုံတွေ့နေရပါသေးတယ်။ ဒီထဲမှာ မီးနေသွေး ဆင်းတာလည်းပါပါတယ်။ မွေးပြီးခါစမှာ မိခင်တွေက မိန်းမကိုယ်က သွေးဆင်းရင် တစ်ခုခုဖြစ်တယ်ဆိုပြီး စိုးရိမ်တတ်ကြပါတယ်။ သားဦးအမေတွေဆိုရင်ပိုဆိုးပါတယ်။ ဒါကြောင့် မီးနေသွေးဆိုတာဘာလဲ။ ဘယ်လောက်ကြာအောင်ဆင်းမှာလဲ။ အန္တရာယ်ရှိလားဆိုတာကို လေ့လာကြည့်ရအောင်။
မီးနေသွေး ဆိုတာဘာလဲ။
မီးနေသွေးကို ဆေးပညာအရ Lochiaလို့ခေါ်ပါတယ်။ မွေးပြီးတဲ့နောက်မှာ ရာသီသွေးဆင်းသလိုမျိုး ဆင်းတာပါ။ သွေးတွေရော အချွဲတွေရောဆင်းတာပါ။
ဘာကြောင့် မီးနေသွေး ဆင်းတာလဲ။
ကိုယ်ဝန်ဆောင်ချိန်မှာ ကလေးလေးကို အာဟာရပေးခဲ့ရတဲ့ တစ်ရှူးတွေ၊ ကလေးလေးနေဖို့ သားအိမ်နံရံထူပေးခဲ့ရတာတွေက ခုချိန်မှာ မလိုအပ်တော့တာကြောင့် သွေးတွေ အချွဲတွေအနေနဲ့ ဆင်းတာပါ။ ဒါကြောင့် ရိုးရိုးပဲမွေးမွေး၊ ခွဲပဲမွေးမွေး မီးနေသွေးက ဆင်းမှာပါပဲ။
ဘယ်လောက်ကြာအောင်ဆင်းမှာလဲ။
မွေးပြီးပြီးချင်း ၁၀ရက်လောက်ထိတော့ သွေးဆင်းများနေမှာပါ။ နည်းနည်း နည်းနည်းဆင်းတာကတော့ ၄ပတ်ကနေ ၆ပတ်အထိကြာနိုင်ပါတယ်။ တစ်ယောက်နဲ့ တစ်ယောက်တော့ မတူနိုင်ဘူးပေါ့။
ဘယ်လိုဆင်းမှာလဲ။
မွေးပြီး ၁ရက်ကနေ ၃ရက်အထိ သွေးက ရာသီလာသလိုမျိုး အနီရောင်တွေဆင်းနေမှာပါ။ သွေးခဲလေးတွေလည်းပါတတ်ပါတယ်။ ၄ရက်မြောက်ကနေ ၇ရက်အထိ ပန်းရောင် ဒါမှမဟုတ် အညိုရောင်ဆင်းပါတယ်။ သွေးခဲတွေ ပါချင်မှပါတော့မှာပါ။ တစ်ပတ်ကျော်သွားရင်တော့ အဝါဖျော့ဖျော့ ဒါမှမဟုတ် အဖြူရောင်ဆင်းပါတယ်။ ၃ပတ်ကနေ ၆ပတ်ဆိုရင် ဆင်းတာရပ်သွားပါပြီ။
သွေးဆင်းရင်ဘာလုပ်ကြမလဲ။
စစဆင်းချင်းဆိုရင် များတဲ့အတွက် စုပ်ယူမှုအားကောင်းတဲ့ padကို ခံရမှာပါ။ နောက်ပိုင်းကျရင်တော့ သာမန်padကိုပဲ ခံလို့ရပါပြီ။ ပိုးမဝင်အောင် padကို ခဏ ခဏလဲပေးပါ။ Tamponမသုံးပါနဲ့။
ဘယ်အချိန်မှာ သွေးဆင်းများနိုင်လဲ။
မွေးပြီး ၁ပတ်ကျော်လောက်ဆိုရင် သွေးဆင်းနည်းသွားပါပြီ။ ဒါပေမယ့် ဒီအချိန်မှာတော့ သွေးဆင်းများတတ်ပါတယ်။
- မနက်စောစောအိပ်ရာအထမှာ
- နို့တိုက်တဲ့အချိန်မှာ (နို့တိုက်ရင် ထွက်လာတဲ့ အောက်စီတိုစင်ဟော်မုန်းက သားအိမ်ကျုံ့တာကို အားပေးတဲ့အတွက် သွေးဆင်းများပါတယ်။)
- လေ့ကျင့်ခန်းလုပ်တဲ့အချိန်မှာ
- ဆီးသွား၊ ဝမ်းသွားတဲ့အခါ ညှစ်တာ စတာတွေလုပ်ရင် သွေးဆင်းများတတ်ပါတယ်။
မီးနေသွေး ဆင်းတာသက်သာဖို့ ဘာလုပ်ကြမလဲ။
မီးနေသွေးဆိုတာ မိခင်တိုင်းကြုံရတာမို့လို့ ရှောင်လွှဲလို့ မရပါဘူး။ ဒါပေမယ့် သွေးဆင်းတဲ့အချိန်မှာ သက်တောင့်သက်သာဖြစ်အောင်တော့နေလို့ရပါတယ်။ နည်းလမ်းတွေကတော့
- မီးနေသွေးဆင်းတဲ့အချိန်မှာ padပဲသုံးပါ။ Tamponမသုံးပါနဲ့။ အခန့်မသင့်ရင် ပိုးဝင်တတ်ပါတယ်။
- ပွပွချောင်ချောင် အဝတ်အစားတွေပဲ ဝတ်ပါ။ အထူးသဖြင့် အတွင်းခံတွေပါ။ တတ်နိုင်ရင် မဝတ်ပါနဲ့။ ဝတ်ရင်လည်း သက်တောင့်သက်သာဖြစ်တာပဲ ရွေးတတ်ပါ။
- သက်တောင့်သက်သာ အနားယူပါ။ မီးတွင်းမှာ ပင်ပင်ပန်းပန်းအလုပ်တွေမလုပ်ပါနဲ့။ ဒါက သင့်ခန္ဓာကိုယ်ရဲ့ ပြုပြင်ပြောင်းလဲမှုတွေကို ထိခိုက်စေပါတယ်။
- သွေးဆင်းတာ များလွန်းရင်ပဲဖြစ်ဖြစ်၊ သွေးခဲတွေကြီးလွန်းရင်ပဲဖြစ်ဖြစ်၊ အနံ့ဆိုးတွေထွက်ရင်ပဲဖြစ်ဖြစ် ဆရာဝန်နဲ့ပြသပါ။.
ဘယ်အချိန်မှာ ဆရာဝန်နဲ့ ပြကြမလဲ။
- တစ်နာရီအတွင်းမှာ padတွေ ခဏခဏလဲနေရရင်
- တစ်ပတ်လောက်ကြာတဲ့အထိ သွေးဆင်းများနေတုန်းပဲဆိုရင်
- ပိုးဝင်တယ်လို့ ယူဆရင်
- ချမ်းတုန်ဖျားရင်
- ဗိုက်အောင့်ရင်
- ခေါင်းမူးရင်
- ရင်တုန်ရင် ဆရာဝန်နဲ့ ပြသပါ။
Hello Health Group သည် ဆေးပညာ အကြံပြုချက်များ၊ ရောဂါရှာဖွေအတည်ပြုချက်များနှင့် ကုသမှုများ မပြုလုပ်ပေးပါ။
[embed-health-tool-pregnancy-weight-gain]
