ဘာလို့ ကိုယ်ဝန်မရ သေးတာလဲ

အိမ်ထောင်ရက်သားကျပြီးတဲ့ စုံတွဲတွေတိုင်းရဲ့ အိပ်မက်တွေထဲမှာ ချစ်စဖွယ်ရင်နှစ်သည်းချာ သားသားမီးမီးလေးတွေ မွေးဖွားပြီး ပြုစုပျိုးထောင်ပေးဖို့ဆိုတဲ့ အချက်က အမြဲတမ်းဦးစားပေးလို့ ဆိုလို့ရပါတယ်။ ဒါပေမယ့် ကြိုးပမ်းသမျှ အဖတ်မတင်ဖြစ်ပြီး ကိုယ်ဝန်မရ သေးတာမျိုးလည်း ကြုံရတတ်ပါတယ်။

ကိုယ်က သားသားမီးမီးလေးတွေ လိုချင်ပါတယ်ဆိုမှ မရရင် ပိုပြီးလိုချင်။ လိုချင်လျက်နဲ့ မရဆိုရင် သို့လောသို့သောတွေနဲ့ စိတ်ညစ်ညူးစရာ၊ စိတ်ပျက်စရာအခြေအနေတွေကို ပိုင်ဆိုင်လာရတတ်တဲ့အထိပါပဲ။

ကျန်းမာသန်စွမ်းတဲ့ အမျိုးသား အမျိုးသမီးတိုင်းဟာ ကိုယ်ဝန်ရဖို့ မခက်ခဲနိုင်ဘူးလို့ ယေဘုယျအားဖြင့် သတ်မှတ်ထားကြပေမယ့် တကယ်တမ်းမှာတော့ ခြွင်းချက်အခြေအနေတွေရှိနေပါသေးတယ်။ ကျန်းမာသန်စွမ်းပေမယ့် ကိုယ်ဝန်ရနိုင်ခြေကို နှောင့်ယှက်နေတဲ့ အချက်တွေက အမျိုးသားတွေမှာရော အမျိုးသမီးတွေမှာပါ ရှိတတ်ပါတယ်။

ကိုယ်ဝန်မရ တိုင်း ကိုယ်မစွမ်းလို့ သူမစွမ်းလို့ဆိုတာမျိုး တစ်ထစ်ချတွေးထင်လို့တော့ မရပါဘူး။ တခြားသော ကျန်းမာရေးပြဿနာတွေကြောင့်လည်းဖြစ်နိုင်ပါတယ်။ အရွယ်ကောင်းဖြစ်ပြီး ကိုယ်ဝန်ရဖို့ ကြိုးပမ်းတာလည်း ၆ လ ထက်မနည်းကြာမြင့်လာချိန်မျိုးမှာ ကိုယ်ဝန်မရသေးဘူးဆိုရင် တစ်ချို့များက မြုံနေလို့ တစ်ခုခုချို့ယွင်းနေလို့လို့ ထင်တတ်ကြပါတယ်။

ဒါပေမယ့် မတော်တဆကြုံရတတ်တဲ့ ကျန်းမာရေးပြဿနာတွေကြောင့် ဖြစ်နိုင်ခြေပိုများပါတယ်။ လူတိုင်းက အကြောင်းမဲ့ ကိုယ်ဝန်မရတာမျိုးမဖြစ်တတ်ပါဘူး။ အကြောင်းမတိုက်ဆိုင်သေးလို့ မရတာသာ ပိုများတာကြောင့်ပါ။

လေ့လာချက်တွေအရ စုံတွဲ ၂၀% လောက်ဟာ ကိုယ်ဝန်ရယူရာမှာ ခက်ခဲတဲ့ပြဿနာနဲ့ ရင်ဆိုင်ရတတ်ပါတယ်တဲ့။ ၁၅% လောက်ဟာ သိသာထင်ရှားတဲ့ ချို့ယွင်းချက်ရှာဖွေလို့မရဘဲ ဖြစ်နေတတ်ပါတယ်။ ဒီလိုဖြစ်ရတဲ့အကြောင်းအရင်းကတော့ သဘာဝအတိုင်းဖြစ်တတ်တဲ့ ပြဿနာတစ်ချို့ကြောင့်လို့ဆိုရမှာပါ။

ဒါကြောင့် ကျန်းမာသန်စွမ်းတဲ့ အမျိုးသား အမျိုးသမီးတွေဖြစ်နေပါလျက်နဲ့ ဘာကြောင့် ကိုယ်ဝန်ရဖို့ ခက်ခဲနေတာလဲဆိုတဲ့ အကြောင်းအရင်းလေးတွေကို ပြောပြချင်ပါတယ်။

အမျိုးသားတွေရဲ့ မျိုးပွားနိုင်စွမ်း ပြဿနာများ

ကျန်းမာသန်စွမ်းတဲ့ အမျိုးသားတွေမှာဆိုရင် မျိုးပွားနိုင်စွမ်းကို အဓိက အနှောင်အယှက်ပေးနေတဲ့ ပြဿနာက သုက်ပိုးပါပဲ။ သုက်ပိုးနဲ့ပတ်သက်တဲ့ အခြေအနေတစ်ခုခုကြောင့် မျိုးပွားနိုင်ခြေ၊ ကိုယ်ဝန်ရအောင် စွမ်းဆောင်နိုင်ခြေကျဆင်းရတာများပါတယ်။ ဒီပြဿနာဟာ အခြေခံအကျဆုံး ပြဿနာတစ်ရပ်လို့ဆိုရမှာပါ။

အဖြစ်များတဲ့ သုက်ပိုးဆိုင်ရာ ပြဿနာတွေကတော့

• သုက်ကောင်အရေအတွက်နည်းပါးတာ – သုက်ရည်ထဲမှာ သုက်ကောင်အရေအတွက် နည်းပါးလွန်းတာ ဒါမှမဟုတ် သုက်ကောင်မပါဝင်တာက ကိုယ်ဝန်ရနိုင်ခြေကို ထိခိုက်စေပါတယ်။
• Sperm Motility – သုက်ကောင်တွေ မမျိုးဥနဲ့ ပေါင်းဖို့ ရွှေ့လျားတာကို Sperm Motility လို့ ခေါ်ပါတယ်။ သုက်ပိုးတွေ လုံလောက်တဲ့ အမြန်နှုန်းနဲ့ မရွေ့လျားနိုင်တာကြောင့် မမျိုးဥနဲ့ ထိနိုင်ခြေလျော့ကျပြီး ကိုယ်ဝန်ရနိုင်ခြေနည်းသွားတတ်ပါတယ်။
• ပုံမန်မဟုတ်တဲ့ ပုံစံမျိုးနဲ့ သုက်ကောင်တွေရှိနေတာ – မိမိရဲ့သုက်ရည်ထဲမှာပါဝင်နေတဲ့ သုက်ကောင်တွေဟာ မျိုးအောင်လောက်တဲ့ ပုံစံမျိုးမရှိပဲ ပုံမှန်မဟုတ်တဲ့ ပုံစံမျိုးဖြစ်တည်နေတာမျိုးကြောင့်လည်း ကိုယ်ဝန်ရနိုင်ခြေနည်းသွားစေတတ်ပါတယ်။
• သုက်ရည်ပြွန် ပိတ်ဆို့နေတာ – သုက်ရည်လုံလုံလောက်လောက် မထွက်ရှိနိုင်လောက်အောင်ကို သုက်ရည်ပြွန်ပိတ်ဆို့နေတာမျိုးကြောင့်လည်း ကိုယ်ဝန်ရယူနိုင်လောက်တဲ့ အခြေအနေမျိုးကို မဖန်တီးနိုင်တာမျိုး ဖြစ်တတ်ပါတယ်။
• နောက်ထပ် ပြဿနာတွေကတော့ ယာယီ သုက်ရည်ထွက်နှုန်းနည်းပါးတာ၊ လိင်အင်္ဂါနဲ့ ဝှေးစေ့တို့မှာ ဒဏ်ရာရရှိနေတာ၊ သုက်ရည်အရည်အသွေးကို ထိခိုက်စေနိုင်တဲ့ ဆေးဝါးတွေကို မှီဝဲနေရတာ၊ အရက်နဲ့ ဆေးလိပ် အလွန်အကျွံမှီဝဲသုံးစွဲတာ နဲ့ အသက် ၄၀ ကျော်လာတာတွေပါ။
• သုက်ပိုးတွေရဲ့ အရည်အသွေးက ကလေးရနိုင်ခြေ အပေါ် အများကြီး လွှမ်းမိုးနေပါတယ်။ အရည်အသွေး ညံ့ဖျင်းတဲ့ သုက်ပိုးတွေက မမျိုးဥဆီ ရောက်ရှိဖို့ ခက်ခဲသွားတာကြောင့် မျိုးအောင်နိုင်ခြေသည် လျော့ကျသွားပါတယ်။
•  သုက်ပို့ပြွန် ပုံသဏ္ဍန်မမှန်ခြင်းကလည်း သုက်ရည်စီးဆင်းမှုကို နှောင့်နှေးစေပါတယ်။ ၃၀-၄၀% သော ဇနီးမောင်နှံတွေက ဒီအခြေအနေကြောင့် ကလေးရဖို့ ခက်ခဲတတ်ပါတယ်။

ဒါ့အပြင် အမျိုးသားတွေဟာ အသက် ၃၀ ကျော်လာတာနဲ့ တစ်နှစ်ကို ၁% လောက် သုက်ရည်အရည်အသွေးကျဆင်းလာတတ်တာကလည်း ပြဿနာဖြစ်တယ်လို့ လေ့လာချက်တွေက ဆိုထားပါတယ်။

အမျိုးသမီးတွေ ကိုယ်ဝန်မရ အောင် နှောင့်ယှက်နေတဲ့ ပြဿနာများ

အမျိုးသမီးတွေ ကိုယ်ဝန်ရနိုင်ခြေ နည်းစေတဲ့ အဓိက ပြဿနာကတော့ သားအိမ်ကနေ မမျိုးဥကို အောင်အောင်မြင်မြင်မထုတ်လုပ်နိုင်တာပါပဲ။ ပြောရရင် သုက်ကောင်နဲ့ထိမိကာ ကိုယ်ဝန်ရစေမယ့် မမျိုးဥကို သားအိမ်ကနေ မထုတ်လုပ်ပေးနိုင်တဲ့ အခြေအနေပါ။ အဖြစ်များတဲ့ ရောဂါကတော့ polycystic ovary syndrome သားဥအိမ်အရည်အိတ်တည်ခြင်း ရောဂါစုပဲ ဖြစ်ပါတယ်။

သားအိမ်ကနေထုတ်လုပ်လိုက်တဲ့ သားဥတွေဟာ သားအိမ်ပြွန်ကနေ ကောင်းစွာထွက်မလာနိုင်တာကြောင့်လည်း ကိုယ်ဝန်ရနိုင်ခြေနည်းပါးသွားတတ်ပါတယ်။ သားအိမ်ပြွန်ဟာ တစ်ခါတစ်ရံမှာ ရောဂါပိုးကူးစက်မှုလို အခြေအနေမျိုးတွေ၊ တစ်သျှူးဆဲလ်တွေကြောင့် ယာယီအားဖြင့် ပိတ်ဆို့နေတာမျိုးဖြစ်တတ်ပြီး ဒီအချက်ကလည်း အမျိုးသမီးတွေ ကိုယ်ဝန်ရနိုင်ခြေကို တားဆီးထားတတ်ပါတယ်။

နောက်ထပ် အမျိုးသမီးတွေ ကိုယ်ဝန်ရနိုင်ခြေ နည်းပါးသွားစေတတ်တဲ့ ပြဿနာတစ်ခုကတော့ ဆေးလိပ်နဲ့ အရက်သေစာ မှီဝဲခြင်းကြောင့်ပါ။ ဒါ့အပြင် ကိုယ်အလေးချိန်မြင့်မားခြင်း သို့ အဝလွန်အဆင့်ရောက်နေခြင်းတွေကလည်း ကိုယ်ဝန်ရဖို့ ခက်ခဲအောင် အနှောင့်အယှက်ပေးနိုင်ပါသေးတယ်။

ဒါ့အပြင် cervical mucus လို့ခေါ်တဲ့ မိန်းမကိုယ်အချွဲကလည်း မအင်္ဂါအတွင်း ဝင်ရောက်လာတဲ့ သုက်ပိုးတွေကို ထိခိုက်အောင်လုပ်တာ ဒါမှမဟုတ် သူတို့ရဲ့ လုပ်ငန်းစဉ်တွေကို နှေးကွေးအောင်လုပ်တာမျိုးတွေ ပြုလုပ်တတ်ပါတယ်။ ဒီအချက်ကလည်း ကိုယ်ဝန်ရရှိရေးမှာ အတားအဆီးတစ်ရပ်ပါပဲ။

အရေးအကြီးဆုံးအချက်တစ်ခုကတော့ အမျိုးသမီးတွေဟာ အသက် ၃၅ နှစ်အရွယ်ကျော်လွန်လာရင် မျိုးပွားနိုင်စွမ်းကျဆင်းလာတတ်တာပါ။ အသက် ၄၅ နှစ်အထက်မှာ ကိုယ်ဝန်ရနိုင်ခြေကတော့ အလွန်ကိုနည်းပါးလှပြီး ရှားပါးဖြစ်ရပ်အဖြစ် သတ်မှတ်ထားကြပါတယ်။

သားအိမ် ဒါမှမဟုတ် သားဥပြွန်မှာ သွေးလုံးတည်နေတာကြောင့် သုက်ပိုးနဲ့ မမျိုးဥ ပေါင်းဆုံဖို့အတွက်ရော၊ ပေါင်းဆုံသန္ဓေအောင်ပြီး သားအိမ်မှာ လာတွယ်ဖို့အတွက်ရော အနှောင့်အယှက်ဖြစ်စေပါတယ်။ ဒီရောဂါက ရာသီလာချိန်နဲ့ လိင်ဆက်ဆံချိန်မှာ နာကျင်ခြင်းကို ဖြစ်စေပါတယ်။ ကံကောင်းတာက ကုသပျောက်ကင်းနိုင်ပါတယ်။

ရာသီစက်ဝန်းမှာ ပြဿနာ တစ်ခုခု ရှိတဲ့အခါ ဖြစ်တတ်ပါတယ်။ ရာသီစက်ဝန်းက တိုလာနိုင်တယ်၊ ကြာလာနိုင်တယ်။ တည်တည်ငြိမ်ငြိမ်လည်း မရှိတော့ပါဘူး။ ပိုဆိုးတာကတော့ မျိုးဥကို မကြွေတော့တာပါ။ ၂၀-၄၀%သော အမျိုးသမီးတွေက ဒီပြဿနာနဲ့ ကြုံရတတ်ပါတယ်။

မျိုးဥမကြွေတာက အကြောင်းအရာအမျိုးမျိုးကြောင့် ဖြစ်နိုင်ပါတယ်။ ဥပမာ ဟော်မုန်းများ မူမမှန်ခြင်း၊ လေ့ကျင့်ခန်း အလွန်အကျွံလုပ်ခြင်း၊ ကိုယ်အလေးချိန် ကျဆင်းခြင်း သို့မဟုတ် အဝလွန်ခြင်းနဲ့ စိတ်ဖိစီးမှု အလွန်များခြင်းတို့ကြောင့် ဖြစ်နိုင်ပါတယ်။

မျိုးဥမကြွေတဲ့ ပြဿနာတွေကိုတော့ မျိုးဥကြွေဆေးများနဲ့ ကုသနိုင်ပါတယ်။ IVF (ခန္ဓာကိုယ်ပြင်ပမှာ မျိုးအောင်စေပြီး ကိုယ်အတွင်းသို့ ပြန်လည် ပို့ပေးခြင်းဖြင့် ကိုယ်ဝန်တည်စေခြင်း)ကို အသက်ကြီးတဲ့ လင်မယားများအတွက် အသုံးပြုနိုင်ပါတယ်။

မမျိုးဥ ရောဂါ တစ်မျိုး ဖြစ်ပြီး ဟော်မုန်း မညီမျှခြင်းကို ဖြစ်စေပါတယ်။ ရောဂါလက္ခဏာတွေက ရှုပ်ထွေးပြီး လူတစ်ယောက် နဲ့ တစ်ယောက် မတူပါဘူး။ ရောဂါလက္ခဏာတွေ ကတော့ မျိုးဥမကြွေတော့ခြင်း၊ ရာသီစက်ဝန်း မမှန်ခြင်း၊ ကိုယ်အလေးချိန် အလွန်တက်လာခြင်း၊ ဝက်ခြံ ထွက်ခြင်း၊ မျက်နှာမှာ အမွေးအမျှင်များ ပေါက်လာခြင်းနဲ့ မျိုးမအောင်တော့ခြင်းတို့ပဲ ဖြစ်ပါတယ်။ ဘယ်လိုကုသရမယ်ဆိုတာဟာ ရောဂါလက္ခဏာတွေပေါ်မှာ မူတည်နေပါတယ်။

ကိုယ်အလေးချိန်အရမ်းများတာ၊ အရမ်း နည်းတာက ကလေးရခြင်း၊ မရခြင်း အပေါ်မှာ သက်ရောက်မှု ရှိပါတယ်။ အဆီများတဲ့ အစားအစာတွေ စားတာ၊ အာဟာရချို့တဲ့တာတွေက ဟော်မုန်းတွေရဲ့ လုပ်ငန်းဆောင်တာတွေကို နှောင့်ယှက်နိုင်ပါတယ်။

ဒါ့အပြင် ဆေးလိပ် သောက်ခြင်း နဲ့ အရက်သေစာ သောက်သုံးခြင်းက သုက်ပိုး အရေအတွက်ပေါ်မှာ ဆိုးကျိုးတွေ သက်ရောက်နိုင်တာကြောင့် ရှောင်ရှားဖို့ အကြံပြုထားပါတယ်။

ကိုယ်ဝန်ဆောင်ဖို့ မကြိုးစားခင်မှာ ကျွမ်းကျင်သူ ဆရာဝန်နဲ့ ပြသတာက အကြံကောင်း တစ်ခု ဖြစ်ပါတယ်။ အကြောင်းရင်းကို စောစောတွေ့ရှိမယ် ဆိုရင် သေချာ ကုသပြီး ကလေးရနိုင်ခြေလည်း မြင့်မားသွားပါလိမ့်မယ်။