backup og meta

သင့်ကလေး နေ့တိုင်းစားသုံးမိနေတဲ့ အချိုကဲအစားအသောက်များ


Yun Sandi Nan Mon မှ ရေးသားသည်။ · 23/08/2022 တွင် အသစ်ဖြည့်စွက်ခဲ့သည်။

    သင့်ကလေး နေ့တိုင်းစားသုံးမိနေတဲ့ အချိုကဲအစားအသောက်များ

    ကလေးကို အချိုသိပ်မကျွေးနဲ့ဆို မကျွေးပါဘူးပဲ မေမေတို့ဖြေမှာပဲ။ ဒါပေမယ့် ကိုယ့်ကလေးနေ့တိုင်းစားနေ၊ သောက်နေတဲ့အရာတွေထဲ သကြားပမာဏလွန်ကဲတာတွေပါနေနိုင်တာ သတိထားမိရဲ့လား။ သကြားလုံးတွေ၊ ရေခဲမုန့်တွေမကျွေးတာနဲ့ပဲ အချိုလျှော့စားတယ်လို့ စိတ်ချထားလို့မရပါဘူး။

    ကလေးက အချိုအများကြီးစားသုံးမိတဲ့အခါ အရင်ဆုံး ချောင်းဆိုး၊ရင်ကျပ်ဖြစ်မယ်။ သွားနဲ့ခံတွင်းကို ပျက်စီးစေတာအပြင် အဝလွန်တာ၊သွေးတွင်းသကြားဓာတ်မြင့်တာ၊သွေးတိုးတာ၊အမျိုးအစား (၂) ဆီးချိုရောဂါနဲ့ နှလုံးရောဂါဖြစ်နိုင်ခြေတွေပိုများစေနိုင်ပါတယ်။ သကြားဓာတ်ဆိုတာ ခန္ဓာကိုယ်ရဲ့လုပ်ဆောင်ချက်တွေနဲ့ ဖွံ့ဖြိုးမှုအတွက်လိုအပ်တဲ့ဓာတ်မို့ လုံးဝဖြတ်တောက်ပစ်ဖို့တော့မလိုပါဘူး။ လွန်ကဲရင်သာ ဆိုးကျိုးတွေရှိနိုင်လို့ ကိုယ့်ကလေးကို ထိုက်သင့်တဲ့ပမာဏစားသုံးမိစေဖို့ ထိန်းသိမ်းစီမံပေးရမှာပါ။ ဒါပေမယ့် မေမေတို့ကိုယ်တိုင်မသိဘဲ ကလေးရဲ့ နေ့စဉ်အာဟာရမှာ အချိုကဲတဲ့အစားအသောက်တွေပါနေရင် ဘယ်လိုလုပ်မလဲနော်။ ဒါ့ကြောင့် နေ့စဉ်စားသုံးနေကျ ကလေးအာဟာရမှာ ပါနေတတ်တဲ့ အချိုကဲအစားအသောက်တွေကိုဖော်ပြပေးလိုက်ပါတယ်။

    (၁) မုယောစပါးအခြေခံတဲ့ အာဟာရပြည့်သောက်စရာ

    ကလေးဖွံ့ဖြိုးကြီးထွားမှုအတွက် လိုအပ်တဲ့အာဟာရဓာတ်တွေဖြည့်စွက်ပေးနိုင်တဲ့ အာဟာရသောက်စရာတွေကို ပိုပြီးအားကိုးတတ်ကြပါတယ်။ အချိုရည်တွေ၊ အားဖြည့်အချိုရည်တွေ၊ ကော်ဖီတွေမတိုက်ဘူးဆိုပြီး မုယောစပါးအာဟာရပြည့်သောက်စရာတွေကို ရွေးချယ်လိုက်ပါလေရော။ အဲဒီအခါကျမှ သူတို့မှာပါတဲ့ အချိုပမာဏကြောင့် ကလေးရဲ့နေ့စဉ်အာဟာရမှာ သကြားဓာတ်လွန်ကဲနိုင်တာ သတိထားသင့်ပါတယ်။

    (၂) အသင့်သောက်နွားနို့ဘူး

    နွားနို့ပုံမှန်သောက်ပေးရင် ကလေးကြီးထွားဖွံ့ဖြိုးမှုအတွက် လိုအပ်တဲ့အာဟာရဓာတ်တွေရနိုင်တာမှန်ပေမယ့် ကယ်လ်စီယမ်တို့ ဘာတို့ထက် အချိုဓာတ်ကပိုများနေနိုင်တာ အသင့်သောက်ဘူးတွေပါ။ လွယ်လည်းလွယ်ကူ၊ သယ်ဆောင်ရလွယ်(ကျောင်းထည့်ပေးလို့လည်းရ)၊ အထားလည်းခံလို့ အသင့်သောက်ဘူးတွေကို မေမေတို့ရွေးချယ်တာများပါတယ်။

    (၃) ဒိန်ချဉ်

    အစာခြေစနစ်ကိုအထောက်အကူပေးပြီး နို့ထွက်ပစ္စည်းအာနိသင်တွေပေးနိုင်တဲ့ ဒိန်ချဉ်ရဲ့အကျိုးကျေးဇူးတွေက ကလေးအတွက်တကယ်ကိုကောင်းပါတယ်။ ဒါပေမယ့် အပေါ်မှာပြောခဲ့သလိုပဲ အသင့်ဖျော်စပ်ပြီးသားဒိန်ချဉ်ဘူးလေးတွေကို အမြဲမပြတ်ဝယ်ကျွေးထားမယ်ဆိုရင် အချိုစားသုံးမှုများနေနိုင်ပါတယ်။

    (၄) အားဖြည့်အချိုရည်

    ကလေးကို လန်းဆန်းအားပြည့်နေစေဖို့ရယ်၊ ကလေးကကြိုက်လွန်းလို့ရယ် အားဖြည့်အချိုရည်တွေတိုက်ခဲ့ဖူးမှာပါ။ ကလေးအတွက် အားဖြည့်အချိုရည်တိုက်တာကပေးလာမယ့် အာဟာရဓာတ်ကမရှိသလောက်ဖြစ်ပြီး ဆိုးကျိုးကပိုများပါတယ်။ အားဖြည့်အချိုရည်အများစုက အချိုနဲ့ ကဖင်းပမာဏတပုံတပင်ပါဝင်တာဖြစ်ပြီး တစ်ဘူးမှာ တစ်ခါတလေကော်ဖီတစ်ခွက်စာကနေ သုံးခွက်စာလောက် ကဖင်းဓာတ်တွေပါနိုင်သေးတယ်။ သူတို့က အချိုများလို့ ကလေးတွေသွားပျက်စီးစေတာနဲ့ အဝလွန်တာတွေဖြစ်စေနိုင်တယ်၊ နောက်ထပ်ပိုဆိုးတာက ကဖင်းဓာတ်များရင် ဦးနှောက်ဖွံ့ဖြိုးကာစ ကလေးတွေမှာအာရုံစူးစိုက်နိုင်စွမ်းနဲ့ လေ့လာမှတ်သားနိုင်စွမ်းကို ထိခိုက်စေနိုင်ပါတယ်။

    (၅) ပဲနို့

    ကလေးရဲ့ ကြီးထွားဖွံ့ဖြိုးမှုအတွက်လိုအပ်တဲ့ ပရိုတင်းကိုအပြည့်အဝရနိုင်တဲ့သောက်စရာတစ်မျိုးဖြစ်ပေမယ့် အချိုပါဝင်မှုများတဲ့အထဲ ပဲနို့လည်းပါဝင်ပါတယ်။ ပဲနို့ကိုဈေးကွက်မှာအသင့်သောက်ဘူးလေးတွေနဲ့တွေ့ရတာများပါတယ်။ အသင့်သောက်ပဲနို့တွေမှာ ပါဝင်တဲ့အချိုဓာတ်က မနည်းတာကြောင့် အာဟာရအတွက်နေ့စဉ်တိုက်မယ်ဆို စဉ်းစားချင့်ချိန်သင့်ပါတယ်။ အကန့်အသတ်နဲ့တိုက်ကျွေးတာဖြစ်ဖြစ်၊ ကိုယ်တိုင်ပဲနို့ပြုလုပ်တာဖြစ်ဖြစ် နည်းလမ်းရှာဖွေသင့်ပါတယ်။

    (၆)ကွေကာအုတ်

    ကလေးကို အားရှိအောင်ကွေကာအုတ်တိုက်တတ်ကြတယ်မလား။ ဘယ်လိုကွေကာကိုရွေးချယ်ကြပါသလဲ။ အသင့်သောက်ကွေကာတွေမှာ ပါဝင်တဲ့အချိုပမာဏက မနည်းပါဘူးနော်။ မနက်အိပ်ရာထ တစ်ခွက်တိုက်တယ်ထား၊ အဆာပြေဆိုပြီးတော့လည်းနေ့လယ်ထပ်တိုက်တတ်တဲ့မိဘတွေရှိပါတယ်။ အာဟာရပြည့်ပါစေတော့ဆိုပြီးကျွေးတာပေမယ့် ပုံမှန်ကြီးဖြစ်လာတဲ့အခါ ကလေးအတွက်ဘေးဖြစ်နိုင်တာသတိထားပါ။ တစ်ခါတလေ ရပေမယ့် အမြဲတော့ စွဲမတိုက်သင့်ပါဘူး။

    မေမေတို့ ဘယ်လိုသတိထားသင့်သလဲ

    ကလေးကို အချိုများများစားမိမှာစိုးလို့ အချိုရည်ဘူးတွေ၊ ချောကလက်တွေ၊သကြားလုံး၊ ဂျယ်လီတွေမကျွေးဘူး၊ ကန့်သတ်ထားမယ်ဆိုလည်း ဒီ(၆) မျိုးကိုပါ သတိထားချင့်ချိန်ကြပါလို့ အကြံပြုချင်တာပါ။ ကလေးအတွက် အဆာပြေသရေစာအဖြစ်နဲ့ တစ်ခါတလေခွင့်ပြုတာမျိုးဆိုရင်တော့ ရနိုင်ပါလိမ့်မယ်။ ကလေးအတွက် အစားအသောက်ကို ရွေးချယ်ဝယ်ယူမယ့်မေမေတို့ အရင်ဆုံးစဉ်းစားသင့်တာက –

    • အစားအသောက်တွေရဲ့ ဘူး သို့မဟုတ် အထုပ်မှာပါတဲ့ label အညွှန်းကိုသေချာဖတ်ပါ။
    • Sugar ၊ sucrose စတာတွေဖော်ပြထားတဲ့ သကြားပါဝင်မှုပမာဏကိုကြည့်ပါ။ အချိုဓာတ်ဆိုတာမှာ သကြား ဂလူးကို့စ် (Glucose) တစ်ခုတည်းရှိတာမဟုတ်ဘဲ ဆူးခရို့စ် (Sucrose) ဖရက်တို့စ် (Fructose) လို မျိုးကွဲနာမည်တွေလည်းရှိသေးလို့ အဲဒါတွေကိုပါသတိထားရပါမယ်။
    • တစ်ခါစားပမာဏ သို့မဟုတ် တစ်ခါသောက်ပမာဏမှာ သကြားဓာတ်ဘယ်လောက်ပါနေနိုင်မလဲ တွက်ချက်ပါ။

    ဒီလိုမှသာ ကလေးအတွက်ဘေးကင်းစိတ်ချရတဲ့ အာဟာရနဲ့အစားအသောက်ကို မှန်မှန်ကန်ကန်ရွေးချယ်နိုင်မှာပါ။ ကလေးရဲ့ ဖွံ့ဖြိုးမှုနဲ့အာဟာရအတွက်ပုံမှန်တိုက်ကျွေးချင်တယ်ဆိုရင် အသက်အရွယ်အလိုက် ကလေးတွေအတွက်ထုတ်လုပ်တဲ့ဖြည့်စွက်အာဟာရတွေကို ဈေးကွက်မှာရှာဖွေရွေးချယ်သင့်ပါတယ်။ ကျန်းမာပျော်ရွှင်တဲ့ ဖွံ့ဖြိုးခြင်းကို ဖန်တီးပေးနိုင်ကြပါစေ။

     

    မသက်ဆိုင်ကြောင်း ရှင်းလင်းချက်

    Hello Health Group သည် ဆေးပညာအကြံဉာဏ်များ၊ ရောဂါရှာဖွေမှုများနှင့် ကုသမှုများ မပြုလုပ်ပေးပါ။


    Yun Sandi Nan Mon မှ ရေးသားသည်။ · 23/08/2022 တွင် အသစ်ဖြည့်စွက်ခဲ့သည်။

    advertisement iconadvertisement

    ဤဆောင်းပါးက အကူအညီဖြစ်ပါသလား။

    advertisement iconadvertisement
    advertisement iconadvertisement