home

What are your concerns?

close
Inaccurate
Hard to understand
Other

သို့မဟုတ် လင့်ခ်ကူးယူမည်

မွေးရာပါ နှလုံးရောဂါ ရှိတဲ့ ကလေးကို အာဟာရပြည့်ဝစေဖို့

မွေးရာပါ နှလုံးရောဂါ ရှိတဲ့ ကလေးကို အာဟာရပြည့်ဝစေဖို့

မွေးကတည်းက ကျန်းမာရေး ပြဿနာ တစ်ခုခု ပါလာတဲ့ ကလေးငယ်လေးတွေဟာ အခြား ကလးငယ်လေးတွေနဲ့ မတူပါဘူး။ အစားအစာကစလို့ နေထိုင်မှု အထိ အသေးစိတ် ဂရုစိုက်ပေးနိုင်မှ ကျန်းမာစွာနဲ့ အရွယ်ရောက် ကြီးပြင်းလာမှာပါ။ ဒီ တစ်ခေါက်တော့ မွေးရာပါ နှလုံးရောဂါ ပါလာတဲ့ ကလေးလေးတွေကို ကျန်းမာနေစေဖို့အတွက် အာဟာရ ပြည့်အောင် ဘယ်လို ကျွေးရမလဲဆိုတာကို ပြောပြပေးသွားပါမယ်။

မွေးရာပါ နှလုံးရောဂါရှိတဲ့ ကလေးလေးရဲ့ ကြီးထွားဖွံ့ဖြိုးမှု

မွေးရာပါ နှလုံးရောဂါ ရှိတဲ့ ကလေးလေးတွေက အခြား ကျန်းမာတဲ့ ကလေးတွေထက် ကြီးထွားမှု နှေးပါတယ်။ ဥပမာ ပြောပြရရင်

  • မွေးရာပါ နှလုံးရောဂါ ရှိတဲ့ ကလေးလေးတွေက အခြားကလေးတွေထက် ပိုပိန်တာ၊ ပိုညှက်တာမျိုး ရှိနိုင်သလို အခြား ကလေးတွေထက်လည်း ထိခိုက်လွယ်ပါတယ်။
  • ကလေးရဲ့ ကိုယ်အလေးချိန် နဲ့ အရပ်ဟာ အသက်အရွယ်ထက် နည်းနေနိုင်တယ်။
  • ကလေးရဲ့ ထိုင်တာ၊ လမ်းလျှောက်တာ၊ စကားပြောတာတွေ နဲ့ ရေအိမ်သုံးတတ်တာတွေလိုမျိုး ဖွံ့ဖြိုးမှုတွေက အခြားကလေးတွေထက် နောက်ကျနိုင်ပါတယ်။

မွေးရာပါ နှလုံးရောဂါ ရှိတဲ့ ကလေးကို အာဟာရပြည့်ဝစေဖို့

ကလေးမှာ မွေးရာပါရောဂါပါလာတဲ့အခါ မိဘတွေအနေနဲ့ ကလေးကို ကျန်းမာအောင် ဘာကျွေးရပါ့မလဲဆိုတာကို အမြဲလို စိတ်ပူနေကြပါတယ်။ မွေးရာပါ နှလုံးရောဂါ ရှိတဲ့ ဘေဘီလေးကို အာဟာရပြည့်ဝအောင် အခုလိုလေး ကျွေးပေးဖို့ လိုပါမယ်။

ဘေဘီလေးအရွယ်ဆိုရင်

ဘေဘီလေးက အသက် ၆ လ အရွယ်ဆိုရင် အာဟာရ ပြည့်ဝစေဖို့ဆိုရင်

  • မွေးရာပါ နှလုံးရောဂါရှိတဲ့ ဘေဘီလေးက မိခင်နို့ကို ကောင်းကောင်း မစို့နိုင်ဘူးဆိုရင် မေမေ့နို့ကို ညှစ်ထုတ်ပြီး ရေနွေးနဲ့ သန့်စင်ထားတဲ့ ပန်းကန်လုံးနဲ့ ဇွန်းကို သုံးပြီး နည်းနည်းချင်း ခွံ့တိုက်ပါ။
  • ဆရာဝန်က ညွှန်းတဲ့ ဗီတာမင် နဲ့ သတ္တုဓာတ်တွေကို တိုက်ပေးပါ။
  • ကလေးက မွေးရာပါ နှလုံးရောဂါပါမယ်ဆိုရင် ပုံမှန်ထက် ကယ်လ်လိုရီ လိုအပ်နိုင်တာကြောင့် မကြာမကြာ နို့ချို တိုက်ပေးဖို့ လိုပါမယ်။
  • ကလေးက ကူးစက်ရောဂါ တစ်ခုခု ဝင်မယ်ဆိုရင် ကလေးကို ပုံမှန်အတိုင်း ပြန်လည် ကောင်းမွန်လာစေဖို့အတွက် ပုံမှန်ထက် ပိုကျွေးဖို့ လိုပါမယ်။
  • ဘေဘီလေးကို အသက် တစ်နှစ် ပြည့်တဲ့အထိ မိခင်နို့ တစ်မျိုးတည်း တိုက်ပါ။ ၆လကျော်ပြီဆိုရင်တော့ ဖြည့်စွက်စာ တွဲကျွေးလို့ရပါပြီ။ အာဟာရဓာတ်ပိုပြည့်ဝအောင် ၆လအထက် ဘေဘီလေးတွေအတွက် သီးသန့်ထုတ်ထားတဲ့ နို့မှုန့်ကို ဖျော်တိုက်လို့ရပါတယ်။ တစ်နှစ်ပြည့်မှသာ နွားနို့ကို နည်းနည်းချင်း စတိုက်ပေးပါ။

မတ်တတ်ပြေးအရွယ်ဆိုရင်

ကလေးက အစာမာ စစားတတ်ပြီဆိုရင် ကလေးကို ကျန်းမာနေစေဖို့အတွက် အစားအစာကို အာဟာရပြည့်စေဖို့အတွက် အမြဲမပြတ် ဂရုစိုက်ဖို့ လိုပါမယ်။

ကလေးက မွေးရာပါ နှလုံးရောဂါကို ခံစားနေရတဲ့အတွက် ဇီဝကမ္မဖြစ်စဉ်က ပုံမှန်ထက် မြန်နေနိုင်ပါတယ်။ ကယ်လ်လိုရီ လောင်ကျွမ်းမှုကလည်း ပိုမြန်နေနိုင်ပါတယ်။ ဒါကြောင့် ကယ်လ်လိုရီ လိုအပ်ချက် ပြည့်မီစေဖို့အတွက် ကယ်လ်လိုရီ ပါဝင်မှု များတဲ့ အစားအစာတွေကို ပြင်ဆင်ပေးပါ။

  • ကလေးက အစာစားဖို့ မောနေနိုင်ပါတယ်။ ဒါကြောင့် နည်းနည်းနဲ့ ခဏခဏ ကျွေးပေးပါ။ ခပ်ပျော့ပျော့ အစားအစာလေးတွေ များများ ကျွေးပေးပါ။
  • ကယ်လ်လိုရီ နဲ့ အာဟာရပါဝင်မှု များတဲ့ အစားအစာတွေကို နည်းနည်းချင်းစီနဲ့ မကြာမကြာ ကျွေးပေးပါ။
  • ပရိုတင်း ပါဝင်မှု များတဲ့ ဥအမျိုးမျိုး၊ အသား၊ ကြက်သား၊ ငါး စတာတွေ ပြင်ဆင်ပေးပါ။ ပဲပင်ပေါက်၊ ပဲပိစပ် စတာတွေ ကျွေးပေးပါ။
  • ထောပတ်၊ နို့၊ ဒိန်ခဲ စတာတွေကို မကြာခဏ ကျွေးပေးပါ။
  • အသင့်စား အစားအစာတွေ၊ ပြုပြင်ထားတဲ့ အစားအစာတွေကို မကျွေးပါနဲ့။
  • ဆားလျှော့ကျွေးပါ။ ကိုလက်စထရော နဲ့ ပြည့်ဝဆီ ပါဝင်မှု များတဲ့ အစားအစာတွေကို နည်းနည်းပဲ ကျွေးပေးပါ။
  • omega-3 fatty acids ကြွယ်ဝတဲ့ အစားအစာတွေကို ကျွေးပေးပါ။

ဒီအစားအစာတွေကို ပုံမှန် ပြင်ဆင်ပေးတာက ကလေးက မွေးရာပါ နှလုံးရောဂါကို ခံစားနေရပေမယ့်လည်း ကျန်းမာနေစေမှာပါ။

Hello Health Group သည် ဆေးပညာအကြံဉာဏ်များ၊ ရောဂါရှာဖွေမှုများနှင့် ကုသမှုများ မပြုလုပ်ပေးပါ။

ရင်းမြစ်များ

Diet for Child with Congenital Heart Disease https://littlemoppetheartfoundation.org/diet-for-child-with-congenital-heart-disease/ Accessed Date 23 August 2021

Nutrition and feeding consultants for patients with congenital heart disease https://www.aboutkidshealth.ca/article?contentid=1598&language=english Accessed Date 23 August 2021

Growth and Development in Children with Congenital Heart Disease

https://www.stanfordchildrens.org/en/topic/default?id=growth-and-development-in-children-with-congenital-heart-disease-90-P01792 Accessed Date 23 August 2021

စာရေးသူ ဓာတ်ပုံbadge
Aye Thi Mon မှ ရေးသားသည်။ 4 ပတ် အကြာက တွင် ပြန်လည်ပြင်ဆင်ခဲ့သည်။
Hello Sayarwon Panel မှ အချက်အလက် စစ်ဆေးထားပါသည်။