အချို့ဆို ဟော်မုန်းဆေးတွေ သောက်နေရတာကြောင့် ဝနေတာ ဖြစ်နိုင်သလို အချို့ဆို မျိုးရိုးလိုက်လို့၊ ရောဂါအခံ တစ်ခုခု ရှိလို့ ပိန်နေတာမျိုးလည်း ရှိနိုင်ပါတယ်။ နောက်ထပ် လူ့အခွင့်အရေးဘက်က ကြည့်မယ်ဆိုရင်လည်း ပိန်တာ၊ ဝတာက လူတစ်ယောက်ရဲ့ အခြေခံ ကိုယ်ပိုင် လွတ်လပ်ခွင့် ဖြစ်တာကြောင့် ဒါ့အတွက် ဝေဖန်ခံဖို့ မလိုအပ်ပါဘူး။
လူတစ်ယောက်ကို Body Shaming လုပ်တာက အခုလိုမျိုး စိတ်ကျန်းမာရေးကို ထိခိုက်စေနိုင်ပါတယ်။
ဝနေလို့ ကိုယ်အလေးချိန် ထိန်းဖို့ ကြိုးစားနေတယ်။ ဒါပေမယ့် ရောဂါတစ်ခုခုကြောင့် ဒါမှမဟုတ် ဆေးဝါးတွေရဲ့ နောက်ဆက်တွဲအနေနဲ့ မဝချင်ဘဲ ဝနေတဲ့သူကို ဝလိုက်တာလို့ ပြောတာမျိုး၊ ခန္ဓာကိုယ် ပြည့်ပြည့်လေး ဖြစ်ချင်လို့ အစားအစာတွေလည်း ဂရုစိုက်နေတယ်၊ ကိုယ်လက်လေ့ကျင့်ခန်းတွေလည်း လုပ်နေတဲ့သူကို ပိန်သွားလိုက်တာလို့ ပြောလိုက်ခြင်းက သူတို့ကို Body Shamingလုပ်လိုက်တာပါပဲ။
ဒါက စိတ်ပိုင်းဆိုင်ရာ ထိုးနှက်မှု တစ်ရပ်ပါ။ ဒီလိုမျိုး အကြိမ်ကြိမ် စိတ်ပိုင်းဆိုင်ရာ ထိုးနှက်ခံရတာက စိတ်ဓာတ်ကျတာကို ဖြစ်စေနိုင်ပါတယ်။
မနှစ်သက်တဲ့ အခြေအနေကို ခဏခဏ ကြုံရတာ၊ သဘောမကျတဲ့ ဝေဖန်မှုတွေကို ခဏခဏ ခံစားရတာက စိတ်ဖိစီးစေပါတယ်။ ဒီလိုပါပဲ ကိုယ်တိုင်တောင် အဆင်မပြေလို့ ခန္ဓာကိုယ် အချိုးအစားနဲ့ ပတ်သက်ပြီး အဆင်ပြေတဲ့ အနေအထား ဖြစ်လာအောင် ကြိုးစားနေသူတွေကို ကိုယ်အလေးချိန် ခန္ဓာကိုယ် အချိုးအစားနဲ့ ပတ်သက်ပြီး ခဏခဏ ဝေဖန်တာက စိတ်ဖိစီးစေနိုင်ပါတယ်။
စိတ်ဖိစီးတာက နောက်ဆက်တွဲ ကျန်းမာရေးပြဿနာတွေကို ဖြစ်စေနိုင်ပါတယ်။
ဝတယ်လို့ အပြောခံရတာကြောင့် အစားအသောက်တွေကို ရှောင်တာ ပိန်တယ်လို့ အပြောခံရတာကြောင့် အဆီနဲ့ ကာဗိုဟိုက်ဒရိတ်များတာတွေ ဝစေတယ်ဆိုတဲ့ အစားအစာတွေကို မလိုအပ်ဘဲ စားတာ၊ ရှောင်တာတွေ လုပ်ရင်းက စားသောက်မှု မူမမှန်တဲ့အခြေအနေကို ခံစားလာရနိုင်ပါတယ်။
အချို့ဆို စားချင်တော့ စားလိုက်တယ်။ ပြီးတော့ ဝလာမှာစိုးတယ်ဆိုပြီး စားပြီးပြီးချင်း လက်ထိုးပြီး အန်လိုက်တယ်။ ဒီလို လုပ်တာတွေ ဖြစ်နိုင်သလို ပိန်လွန်းတယ်ဆိုလို့ အဆီတက်စေတာမျိုးတွေကိုပဲ ရွေးစားတယ်။ မစားချင်ဘဲ အတင်းစားတာမျိုးတွေလိုမျိုး စားသောက်မှုဆိုင်ရာ မူမမှန်တဲ့ စိတ်အခြေအနေကို ခံစားလာရနိုင်ပါတယ်။
ကိုယ့်ရဲ့ ခန္ဓာကိုယ် အချိုးအစားနဲ့ ပတ်သက်လို့ ခဏခဏ ဝေဖန်ခံရတဲ့အခါ ကိုယ့်ရဲ့ ခန္ဓာကိုယ် အချိုးအစားအပေါ် ယုံကြည်မှု အားနည်းလာနိုင်ပါတယ်။ ဒီလို အားနည်းလာမှုရဲ့ အကျိုးဆက်အနေနဲ့ လူအများကြား မသွားရဲ မလာရဲတာမျိုးကစလို့ တစ်ခုခု လုပ်ဖို့ဆိုရင်တောင် မဖြစ်နိုင်ပါဘူးလို့ တွေးပြီး ကိုယ့်ကိုယ်ကိုယ် ယုံကြည်မှု ဆုံးရှုံးတာမျိုး ခံစားရနိုင်ပါတယ်။
Body Shamingလုပ်တာက အခုလိုမျိုး စိတ်ကျန်းမာရေးကို ထိခိုက်စေနိုင်တာကြောင့် လူတစ်ယောက်ရဲ့ ခန္ဓာကိုယ် အချိုးအဆစ်နဲ့ ပတ်သက်ပြီး ပိန်လွန်းတယ်။ ဝလွန်းတယ်လို့ ဝေဖန်တာမျိုး မလုပ်မိပါစေနဲ့။
ကိုယ်က ဝေဖန်ခံရတဲ့သူဖြစ်နေမယ်ဆိုရင်လည်း ခန္ဓာကိုယ်အချိုးအစား ပြေပြစ်တယ်။ မပြေပြစ်ဘူး။ ပိန်တယ်၊ ဝတယ်ဆိုတာက ကိုယ့်ရဲ့ မွေးရာပါ ကိုယ်ပိုင်လွတ်လပ်ခွင့်လို့ ယူဆပြီး စိတ်ထဲ တနုံ့နုံ့တွေးနေတာမျိုး မလုပ်ဘဲ ကိုယ့်စိတ်တိုင်းကျ လှုပ်ရှားနေထိုင်ဖို့ အကြံပြုလိုက်ပါရစေ။
Body Shaming လုပ်တာက စိတ်ကျန်းမာရေးကို ထိခိုက်စေပါတယ်
မှတ်ချက်များ
သင့်အတွေးများကို ဝေမျှပါ။
သင့်ကျန်းမာရေးအတွေးများကို Hello Sayarwonနဲ့ ဝေမျှလိုက်ပါ။
ဆက်သွယ်ရန် သို့မဟုတ် ဝင်မည်။ နှင့် ဝင်ရောက်ဆွေးနွေးပါမည်။