လူကြီးမိဘတွေကို အာဟာရနဲ့ ကန်တော့တော့မယ်ဆိုရင်

မိုးတွေ အကြိုက်ရွာပြီး ပတ်ဝန်းကျင်က စိမ်းလန်းစိုပြေခဲ့တဲ့ ကာလပတ်ကို ကုန်ဆုံးလို့ မိုးလေ ကင်းလွတ်ပြီး သီတင်းကျွတ်ကာလရောက်လာပြီဆိုရင် မြန်မာလူမျိုးတွေရဲ့ ချစ်စရာကောင်းတဲ့ ယဉ်ကျေးမှု ဓလေ့အတိုင်း လူကြီးမိဘတွေကို ကန်တော့ကြတယ်။ အဝေးရောက်နေတဲ့ သားသမီးတွေက မိဘတွေ ရှိရာ ဖိုးဖိုးဖွားဖွားတွေ ရှိရာဆီကို အရောက် ပြန်လာပြီး ကန်တော့ကြတယ်။ ဒါက မြန်မာလူမျိုးတွေရဲ့ ယဉ်ကျေးပြီး ချစ်စရာကောင်းတဲ့ ဓလေ့လေး တစ်ခုပေါ့။

သီတင်းကျွတ်ပြီ၊ မိုးလေ ကင်းလွတ်ပြီဆိုရင် မီးပုံးလွှတ်တယ်။ မီးထွန်းတယ်။ လူကြီးတွေကို ကန်တော့တယ် မုန့်ဖိုး တောင်းကြတယ်ဆိုတာတွေက ကလေးဘဝကတည်းက လုပ်လာခဲ့တဲ့ သီတင်းကျွတ်ရဲ့ အလေ့အထတွေပါ။ ကလေးတွေ စုပြီး အတူတူ ဆော့ရတာလည်း ပျော်စရာ ကောင်းခဲ့တဲ့ ငယ်ဘဝရဲ့ သီတင်းကျွတ် အမှတ်တရတွေ ပေါ့။ သီတင်းကျွတ် လွမ်းချင်းလေး ပြီးတော့ သီတင်းကျွတ် ကန်တော့မယ့် ကိစ္စလေး ပြောကြရအောင်။

မေ့ထားလို့မရတဲ့ အရာတစ်ခု

ကိုယ်တွေ ကိုယ်တိုင်က အလုပ်ခွင်ဝင်နေပြီဆိုရင် ကိုယ့်ကို မွေးဖွားပျိုးထောင်ခဲ့တဲ့ မေမေဖေဖေတို့က အသက်ကြီးနေပြီဆိုတာ ပြောနေစရာတောင် မလိုပါ။ ဒီတော့သီတင်းကျွတ်ကန်တော့တဲ့အခါ ထည့်သွင်းစဉ်းစားရမယ့် အချက်တစ်ခုက အသက်အရွယ်ကြီးရင့်လာတဲ့ဖေဖေမေမေတို့အတွက် ကျန်းမာရေးနဲ့ညီညွတ်အောင်ကန်တော့မယ့်ကိစ္စပါ။

အသက်အရွယ်ကြီးရင့်လာတာနဲ့ အမျှ ခန္ဓာကိုယ်က အင်အားတွေယုတ်လျော့လာမှာ အသေအချာပါ။ ဒီတော့ ဖေဖေမေမေတို့ကို အားအင်ပြည့်နေစေဖို့ အာဟာရပြည့်ဝအောင် ဂရုစိုက်ပေးဖို့လိုမယ်ဆိုတာက မေ့ထားလို့ မရတဲ့အရာတစ်ခုပေါ့။

လူကြီးမိဘတွေကို အာဟာရနဲ့ ကန်တော့တော့မယ်ဆိုရင်

အသက်အရွယ်ကြီးရင့်လာတဲ့ မေမေဖေဖေတို့ရဲ့ အာဟာရလိုအပ်ချက်က ကိုယ်တွေထက် ပိုမြင့်နေမှာ အသေအချာပါ။နောက်တစ်ချက်ရှိတာက အသက်အရွယ်ကြောင့် အရိုးတွေကလည်း အရမ်းမသန်မာတော့ဘူး။ သွားတွေရဲ့ ကြံ့ခိုင်မှုကလည်း နည်းလာပြီ စားလိုက်ရင် သွားနာတာ၊ ဝါးမရတာနဲ့ မစားတဲ့ အရာတွေကလည်း များလာမယ်။ အာဟာရလိုအပ်ချက်ကလည်း များလာမယ်။

ဒီတော့ လူကြီးမိဘတွေကို အာဟာရနဲ့ ကန်တော့တော့မယ်ဆိုရင် ဘာတွေကို သိထားသင့်လဲဆိုတာကို ပြောပြပေးချင်ပါတယ်။

အာဟာရ လိုအပ်ချက်ကို အကောင်းဆုံးဖြည့်စွမ်းဖို့က

အသက်အရွယ်ကြီးရင့်လာတဲ့ မေမေဖေဖေတို့အတွက် အာဟာရလိုအပ်ချက်ပြည့်မီဖို့ဆိုရင် တစ်နေ့တာမှာ မနက်စာ၊ နေ့လယ်စာ၊ အဆာပြေ စားစရာ နဲ့ ညစာတို့ကို ပြင်ဆင်ပေးဖို့လိုမှာပါ။

မနက်စာအနေနဲ့က နွားနို့အပါအဝင် အခြား အာဟာရဖြစ်စေမယ့် သောက်စရာ၊ ပေါင်မုန့်၊ ကြက်ဥ တို့အပြင် မြန်မာလူမျိုးတွေ ခံတွင်းတွေ့ကြတဲ့ မုန့်ဟင်းခါး၊ အသုပ်၊ ထမင်းကြော်စတာတွေပေါ့။

နေ့လယ်စာအနေနဲ့ကတော့ ထမင်းနဲ့ အသားဟင်းတစ်မျိုး၊ အသီးအရွက်ကြော်၊ စွပ်ပြုတ်၊ ငါးတစ်မျိုးမျိုး နဲ့ ပဲတစ်မျိုးမျိုးပါဝင်အောင်ပြင်ဆင်ပေးပါ။ ဒါမှ ပရိုတင်းနဲ့ ဗီတာမင် သတ္တုဓာတ်လုံလောက်ပြည့်ဝအောင်ရရှိမှာပါ။

နေ့ခင်း အဆာပြေအနေနဲ့ကတော့ ပန်းသီး အပါအဝင် သစ်သီးတစ်မျိုးမျိုး၊ အသီးဖျော်ရည်တစ်မျိုးမျိုး၊ ကော်ဖီ၊ လက်ဖက်ရည်နဲ့ပေါင်မုန့်၊ ကွတ်ကီး စသဖြင့်ပြင်ဆင်ပေးလို့ရပါတယ်။ အဆီထုတ်ထားတဲ့ ဒိန်ချဉ်ကိုပြင်ဆင်ပေးလို့လည်းရပါတယ်။

ညစာအနေနဲ့ကတော့ ထမင်း၊ အသီးအရွက်ကြော် တစ်မျိုးမျိုး၊ အသားဟင်း တစ်ခွက်၊ ငါးတစ်မျိုးမျိုးနဲ့ အရည်သောက်ဟင်းတစ်မျိုးမျိုးပြင်ဆင်ပေးပါ။

ဒီလိုလေး ဂရုတစိုက်ပြင်ဆင်ပေးမှ ဖေဖေမေမေတို့ကို လိုအပ်တဲ့ အာဟာရတွေ ပြည့်ဝစေမှာပါ။တကယ်လို့ မေမေဖေဖေတို့က အစားကောင်းကောင်းမစားဘူးဆိုရင် ပေါ့ပေါ့ပါးပါး စားလို့ရမှာမျိုးတွေ ဖြစ်ကြတဲ့ စွပ်ပြုတ်တွေ၊ အရွက်သုပ်လေးတွေကို ပြင်ဆင်ပေးတာကလည်း နည်းလမ်းကောင်းပါ။

ဒီတော့ဖေဖေမေမေတို့ကို လိုအပ်တဲ့ အာဟာရပြည့်ဝပြီး ကျန်းမာပျော်ရွှင်နေစေဖို့ ခု‌ပြောပြ‌ပေးခဲ့တဲ့ အာဟာရတွေနဲ့ ကန်‌တော့လို့ ရပါတယ်။ ဒါ့ပြင် အားဆေးတွေ၊ ဖြည့်စွက်အာဟာရတွေနဲ့ ကန်‌တော့တာကလည်း လူကြီးမိဘတွေရဲ့ အာဟာရအတွက် အထောက်အကူဖြစ်စေမှာ ဖြစ်ပါတယ်။