ဗီတာမင် B က ကျန်းမာဖို့အတွက် မရှိမဖြစ် လိုအပ်တဲ့ ဗီတာမင် တစ်မျိုးဖြစ်သလို ရေမှာ ပျော်ဝင်နိုင်တဲ့ ဗီတာမင်လည်း ဖြစ်ပါတယ်။ ဗီတာမင် B ကို ခန္ဓာကိုယ်က မထုတ်လုပ်နိုင်ပါဘူး။ ဒါကြောင့် အစားအစာတွေ အပေါ်မှာ မှီခိုရပါတယ်။ ဗီတာမင် B က ခန္ဓာကိုယ်ရဲ့ လုပ်ဆောင်မှုတွေကို ဘယ်လိုများ ထောက်ပံ့ပေးလဲဆိုတာ အတူတူကြည့်လိုက်ရအောင်လား။

ဗီတာမင် B အုပ်စုတွေက ဘာတွေဖြစ်မလဲ။

ဗီတာမင် B က ခန္ဓာကိုယ်ရဲ့ ဆဲလ်တွေ ကောင်းမွန်စွာ လုပ်ဆောင်နိုင်စေဖို့ အရေးပါတဲ့ အခန်းကဏ္ဍကနေ လုပ်ဆောင်ပေးပါတယ်။ ဗီတာမင် B အုပ်စုက စားလိုက်တဲ့ အစားအစာတွေကို အင်အားအဖြစ် ပြောင်းလဲပေးပါတယ်။ ဒါ့အပြင် ကိုယ်တွင်း ဇီဝကမ္မဖြစ်စဉ်ကို တိုးတက်ကောင်းမွန်စေတယ်။ သွေးဆဲလ် အသစ်တွေ ဖြစ်ပေါ်စေတယ်။ အရေပြားဆဲလ် နဲ့ ဦးနှောက်ဆဲလ်တွေကို ကျန်းမာစေတယ်။ ခန္ဓာကိုယ်က တစ်ရှူးတွေကို ကျန်းမာစေတယ်။ ဗီတာမင် B အမျိုးအစားက ၈ ခု ရှိပါတယ်။

• ဗီတာမင် B-1 (thiamin)
• ဗီတာမင် B-2 (riboflavin)
• ဗီတာမင် B-3 (niacin)
• ဗီတာမင် B-5 (pantothenic acid)
• ဗီတာမင် B-6 (pyridoxine)
• ဗီတာမင် B-7 (biotin)
• ဗီတာမင် B-9 (folate)
• ဗီတာမင် B-12

ဒီ ဗီတာမင် အားလုံးကို စုပြီး ဗီတာမင် B complex လို့ ခေါ်ပါတယ်။ ဒီ ဗီတာမင် B အုပ်စုတွေကို အစားအစာ​ တော်တော်များများမှာ အမျိုးအစား စုံစုံလင်လင်တွေ့ရတတ်ပါတယ်။

ဗီတာမင် B တစ်မျိုးချင်းစီရဲ့ လုပ်ငန်းတာဝန်

ဗီတာမင် B အုပ်စုက ဗီတာမင် အမျိုးအစား တစ်မျိုးချင်းစီရဲ့ လုပ်ငန်းတာဝန်တွေက မတူကြပါဘူး။

ဗီတာမင် B-1 (thiamin)

နှလုံး၊ အသည်း နဲ့ ဦးနှောက်တို့မှာ thiamin ပမာဏ တော်တော်လေး ပါဝင်နေရတာပါ။ ဒါမှလည်း ကျန်းမာမှာကိုး။ thiamin က ခန္ဓာကိုယ် အတွက်

• အစားအစာတွေထဲက သကြားဓာတ်ကို ဖြိုခွဲပေးတယ်
• ဦးနှောက်ရဲ့ လုပ်ဆောင်မှုတွေ ကောင်းမွန်စေတယ်
• fatty acids ဖြစ်ပေါ်စေတယ်
• ဟော်မုန်းတွေကို ထုတ်လွှတ်ပေးတယ်။

ဗီတာမင် B-2 (riboflavin)

Riboflavin က

• စွမ်းအင်တွေ ဖြစ်ပေါ်စေတယ်
• ခန္ဓာကိုယ်က အဆီတွေ၊ ဆေးဝါးတွေ နဲ့ စတီးရွိုက် ဟော်မုန်းတွေကို ဖြိုခွဲရာမှာ ကူညီပေးတယ်။

ဗီတာမင် B-3 (niacin)

ဗီတာမင် B3 က ခန္ဓာကိုယ်မှာ

• စားသုံးလိုက်တဲ့ ကာဗိုဟိုက်ဒရိတ်၊ အဆီ နဲ့ ပရိုတင်းတွေကို ခန္ဓာကိုယ်အတွက် လိုအပ်တဲ့ စွမ်းအင်တွေအဖြစ် ပြောင်းလဲပေးတယ်
• ဆဲလ်တွေရဲ့ လုပ်ဆောင်မှုတွေကို အကောင်းဆုံး လုပ်ဆောင်နိုင်စေတယ်
• ဆဲလ်တွေကို တစ်ခုနဲ့တစ်ခု ဆက်သွယ်ဆောင်ရွက်နိုင်စေတယ်
• ဆဲလ်တွေထဲ DNA မျိုးဗီဇဆဲလ်တွေကို သိရှိနိုင်အောင် လုပ်ဆောင်ပေးတယ်။

ဗီတာမင် B-5 (pantothenic acid)

Pantothenic acid က

ခန္ဓာကိုယ်အတွက် coenzymes၊ ပရိုတင်း နဲ့ အဆီတွေကို ဖြစ်ပေးစေတယ်။ သွေးဆဲလ်တွေကနေတဆင့် pantothenic acid ကို သယ်ဆောင် သွားစေပြီး စွမ်းအင် ဖြစ်ပေါ်စေဖို့နဲ့ ဇီဝကမ္မဖြစ်စဉ်တွေ ဖြစ်ပေါ်စေဖို့ လိုအပ်တဲ့ အာဟာရအဖြစ် ဆောင်ရွက်ပေးပါတယ်။

ဗီတာမင် B-6 (pyridoxine)

Vitamin B-6 ( pyridoxine) က

• အမိုင်နိုအက်ဆစ် ပြောင်းလဲဖြစ်ပေါ်မှုကို လုပ်ဆောင်ပေးတယ်
• ကာဗိုဟိုက်ဒရိတ်ကို အဆီအဖြစ် ဖြိုခွဲပေးတယ်
• ဦးနှောက် ဖွံ့ဖြိုးစေတယ်
• ကိုယ်ခံအား ကောင်းစေတယ်။

ဗီတာမင် B-7 (biotin)

ဗီတာမင် B-7 (biotin) က

• အဆီ၊ ကာဗိုဟိုက်ဒရိတ် နဲ့ ပရိုတင်း တို့ကို ဖြိုခွဲပေးတယ်
• ခန္ဓာကိုယ်က ဆဲလ်တွေကို ချိတ်ဆက် ဆောင်ရွက်နိုင်စေတယ်
• DNA ကို ထိန်းညှိပေးတယ်။

ဗီတာမင် B-9 (folate)

ဗီတာမင် B-9 (folate) က

• DNA ကွဲပွားမှုကို လုပ်ဆောင်ပေးတယ်
• ဗီတာမင်တွေကို ဖြိုခွဲပေးတယ်
• အမိုင်နိုအက်ဆစ်ကို ဖြိုခွဲပေးတယ်
• ဆဲလ်ကွဲပွားမှုတွေကို ဖြစ်ပေါ်စေတယ်။

ဗီတာမင် B-12

vitamin B-12 က

• သွေးဆဲလ် အသစ်တွေကို ဖြစ်ပေါ်စေတယ်
• DNA ပေါင်းစပ်မှုကို ဖြစ်ပေါ်စေတယ်
• ဦးနှောက် နဲ့ အာရုံကြော လုပ်ဆောင်မှု ကောင်းစေတယ်
• အဆီ နဲ့ ပရိုတင်းတွေကို ဖြိုခွဲပေးတယ်။