ရေများများသောက်နော်။ ခန္ဓာကိုယ်မှာ ရေဓာတ် နည်းရင် ကျန်းမာရေးကို ထိခိုက်စေနိုင်တယ်ဆိုပြီး စကားတွေကို ခဏခဏ ကြားဖူးကြမှာပါ။ ဒါဆို ရေဓာတ်ဆုံးရှုံးမှု နဲ့ပတ်သက်ပြီး သိထားတာတွေ မှန်ရဲ့လားဆိုတာကို ဆောင်းပါးလေးထဲမှာ ဖတ်ကြည့်လိုက်နော်။
ရေဓာတ် ခန္ဓာကိုယ်အတွက် လိုအပ်သလား ….
ရေဓာတ်က ခန္ဓာကိုယ် ကျန်းမာစေဖို့ အရေးအကြီးဆုံး အရာ တစ်ခုပါ။ ရေဓာတ် ပြည့်ဝမှ ခန္ဓာကိုယ်ရဲ့ လုပ်ငန်းဆောင်တာတွေက ကောင်းကောင်း လုပ်ဆောင်နိုင်မှာပါ။
ခန္ဓာကိုယ်ရဲ့ အစိတ်အပိုင်းတွေ ဖြစ်တဲ့ ကြွက်သားတွေ၊ နှလုံးနဲ့ ကျောက်ကပ် အားလုံးက ရေဓာတ်ကို လိုအပ်ပါတယ်။ ရေဓာတ် ပြည့်ဝမှု ရှိမှလည်း ခန္ဓာကိုယ်ရဲ့ ကိုယ်ခံအားက ရောဂါတွေကို ကောင်းကောင်း ကာကွယ်နိုင်တော့မှာပေါ့။
ရေဓာတ် ခမ်းခြောက်ရင် ဘာတွေ ဖြစ်မလဲ …….
ရေဓာတ် ခမ်းခြောက်တာက ကျန်းမာရေးကို ထိခိုက်စေနိုင်တဲ့ အရာပါ။ ကိုယ်ထဲမှာ ရေဓာတ် လုံလောက်မှု မရှိတာက ခေါင်းမူးတာ၊ ခြေကုန်လက်ပမ်းကျတာ၊ အရေပြားတွေ ခြောက်သွေ့ ကွဲအက်တာ၊ ခေါင်းကိုက်တာ၊ ခြေလက်တွေ မလှုပ်ရှားနိုင်တာ၊ စိတ်ရှုပ်ထွေးတာမျိုးတွေ ခံစားရနိုင်ပါတယ်။
ရေဓာတ် ဆုံးရှုံးမှုက ပြင်းထန်လွန်းမယ်ဆိုရင် ခန္ဓာကိုယ် အပူချိန် မြင့်တက်တာ၊ အသက်ရှုရခက်တာ၊ သွေးလည်ပတ်မှု မကောင်းတာ၊ တက်တာမျိုးတွေ ခံစားရနိုင်ပါတယ်။ နောက်ထပ် နောက်ဆက်တွဲ ကျန်းမာရေး ပြဿနာတွေအနေနဲ့ ဆီးလမ်းကြောင်း ပိုးဝင်တာ၊ ဆီးကျောက်တည်တာတွေ ခံစားရနိုင်ပါတယ်။
ရေဓာတ်ဆုံးရှုံးမှု နဲ့ပတ်သက်ပြီး သိထားတာတွေ မှန်ရဲ့လား ………
ရေဓာတ်ဆုံးရှုံးမှု နဲ့ပတ်သက်ပြီး သိထားတာတွေ မှန်ရဲ့လား ……… ဆိုတာကို အတူတူ ကြည့်လိုက်ရအောင်နော်။
Myth – 1 ရေဆာနေတာ ရေဓာတ်ဆုံးရှုံး လို့ပါ။
ရေဆာတယ်ဆိုတာက ခန္ဓာကိုယ်အတွက် ရေသောက်ဖို့ လိုနေတဲ့ လက္ခဏာ တစ်ရပ် ဆိုပေမယ့် ရေဓာတ်ဆုံးရှုံးမှုကြောင့်လို့ တထစ်ချ ဆိုလို့ မရပါဘူး။ ရေဆာတယ် ဆိုတာ ရေဓာတ်ဆုံးရှုံး တာကြောင့် ဖြစ်နိုင်သလို အခြား အကြောင်းအရင်းတွေကြောင့်လည်း ဖြစ်နိုင်ပါတယ်။ ဥပမာ အစပ်တွေ အရမ်းစားပြီးချိန်မှာ ရေငတ်နိုင်သလို MSG တွေ အများကြီး စားမိပြီးချိန်မှာလည်း ရေငတ်နိုင်ပါတယ်။
နောက်ထပ် ဖြစ်နိုင်ခြေ တစ်ရပ်က ကိုယ့်မှာ ဆီးချိုရောဂါ ရှိနေရင်လည်း ရေငတ်နိုင်ပါတယ်။ အချို့သော ဆေးဝါးတွေကြောင့်လည်း ရေငတ်တာ၊ ခံတွင်းခြောက်တာတွေကို ခံစားရနိုင်ပါတယ်။
Myth – 2 ရေဓာတ်ဆုံးရှုံးမှု မဖြစ်စေဖို့ ရေကို သောက်နိုင်သမျှ များများ သောက်ပါ။
ရေဓာတ် ပြည့်ဝနေအောင်ဆိုပြီး ရေများများ သောက်တာကလည်း နည်းလမ်းကောင်း တစ်ရပ် မဟုတ်ပါဘူး။ ရေတွေ အများကြီး သောက်တာက ရေဆိပ်သင့်စေနိုင်ပါတယ်။ ရေကို လိုအပ်တဲ့ ပမာဏအတိုင်း သောက်သုံးတာက ရေဓာတ်ဆုံးရှုံးမှု မဖြစ်အောင် ကာကွယ်ပေးနိုင်တယ်ဆိုပေမယ့် အလွန်အကျွံ သောက်တာက ကျန်းမာရေးကို ထိခိုက်စေနိုင်ပါတယ်။
Myth – 3 ရေဓာတ် ပြည့်ဝစေဖို့ဆိုရင် အရည်သောက်ပေးမှ ရမယ်။
ရေဓာတ် ပြည့်ဝစေဖို့ ရေက အကောင်းဆုံးပါ။ ဒါပေမယ့် ရေဓာတ် ပြည့်ဝအောင် အရည်တွေပဲ သောက်ရမယ်လို့တော့ မဆိုလိုပါဘူး။ အချိုရည်တွေ၊ ကော်ဖီတွေကို ရေဓာတ် ပြည့်အောင်ဆိုပြီး သောက်တာက ထိရောက်တဲ့ နည်းလမ်းတော့ မဟုတ်ပါဘူး။ ရေဓာတ် ပြည့်အောင် ဖရဲသီး စားပေးလို့ ရသလို မုန်လာဥဖြူ၊ စပျစ်သီး၊ သခွှားသီး၊ သခွားမွှေး၊ စတော်ဘယ်ရီ စတာတွေကိုလည်း စားပေးလို့ ရပါတယ်။
Myth – 4 ရေဓာတ်ပြည့်ဝစေဖို့အတွက် လူတိုင်း တစ်နေ့ကို ရေ ၈ ခွက် သောက်ဖို့ လိုမယ်။
ကျန်းမာကြံ့ခိုင်စေဖို့အတွက် ရေဓာတ် ပြည့်ဝဖို့ လိုတယ်ဆိုပေမယ့် လူတစ်ယောက်နဲ့ တစ်ယောက် ရေဓာတ် လိုအပ်ချက် မတူနိုင်ပါဘူး။ ခန္ဓာကိုယ် ဖွဲ့စည်းပုံ၊ ကိုယ်လက်လှုပ်ရှားမှု ပမာဏ၊ ကျန်းမာရေး အခြေအနေ၊ ကျား/မ ကွာခြားချက်၊ အသက်အရွယ်၊ ကိုယ်ဝန်ဆောင်ထားရတာ၊ နို့တိုက်မိခင် ဆိုတဲ့ အချက်တွေအပေါ်မှာ မူတည်ပြီး ရေဓာတ် လိုအပ်ချက်က ကွာခြားနိုင်ပါတယ်။
ကျန်းမာရေး အခြေအနေပေါ် လိုက်ပြီးတော့လည်း တစ်နေ့တာအတွက် ရေလိုအပ်ချက် ကွာခြားနိုင်ပါတယ်။ လူတစ်ယောက်က သူ့အခြေအနေပေါ်လိုက်ပြီး ရေ၈ခွက်ထက် သောက်ဖို့ လိုနိုင်သလို၊ ရေ ၈ခွက်မပြည့်ပေမယ့် ရေဓာတ်ပြည့်ဝနေတာမျိုး ရှိနိုင်ပါတယ်။
Myth – 5 ရေဓာတ်ဆုံးရှုံးမှု ဖြစ်ရင် ရေများများ သောက်ရမယ်။
ရေဓာတ်ဆုံးရှုံးမှု ဖြစ်တိုင်း ရေပဲ သောက်နေရမယ်လို့ မဆိုလိုပါဘူး။ အခြေအနေကို လိုက်ပြီး ကွာခြားနိုင်ပါတယ်။ ရေဓာတ်ဆုံးရှုံးတာက ဝမ်းလျှောတာကြောင့် ဖြစ်မယ် ဖြစ်နေတာကလည်း ၂၄ နာရီ ကျော်ပြီဆိုရင် ခန္ဓာကိုယ်မှာ ဆုံးရှုံးသွားတဲ့ ရေဓာတ် အပါအဝင် အခြားဓာတ်တွေပါ ပြည့်စေဖို့အတွက် ဆိုဒီယမ်၊ ပိုတက်ဆီယမ် နဲ့ မဂ္ဂနီဆီယမ်ပါတဲ့ အရည်တွေကို သောက်သုံးပေးဖို့ လိုပါတယ်။ ဓာတ်ဆားရည်လိုမျိုးပေါ့။
[embed-health-tool-bmi]
