ခေါင်းတစ်ခြမ်းကိုက်တာကို သက်သာစေမယ့် ယောဂပို့စ်

ခေါင်းတစ်ခြမ်းကိုက်တာက အဖြစ်များတဲ့ ခေါင်းကိုက်ဝေဒနာ တစ်ရပ်ပါ။ ခေါင်းတစ်ခြမ်းကိုက်တာက တစ်ခါတလေမှာ တော်တော်လေး ပြင်းထန်ပြီး နေ့စဉ်လုပ်ငန်းတာဝန်တွေကို ထိခိုက်စေနိုင်ပါတယ်။ ခေါင်းတစ်ခြမ်းကိုက်တဲ့အခါ ခေါင်းကိုက်တာနဲ့အတူ မအီမသာဖြစ်တာ၊ အလင်းရောင်ကို မခံနိုင်တာ၊ ခေါင်းတစ်ခြမ်းပဲ ပြင်ပြင်းထန်ထိုးကိုက်တာမျိုး ခံစားရနိုင်ပါတယ်။ ဒီတစ်ခေါက်တော့ ခေါင်းတစ်ခြမ်းကိုက်တာကို သက်သာစေမယ့် ယောဂပို့စ် တွေ အကြောင်း ပြောပြပေးချင်ပါတယ်။

ယောဂက ခေါင်းတစ်ခြမ်း ကိုက်တာကို သက်သာစေနိုင်လား

သုတေသီတွေရဲ့ လေ့လာမှုတွေအရတော့ ယောဂ လေ့ကျင့်တာက ခေါင်းတစ်ခြမ်းကိုက်တာကို သက်သာစေနိုင်ပါတယ်။ ခေါင်းတစ်ခြမ်းကိုက်တာကိုတင် သက်သာစေတာ မဟုတ်ဘဲ ယောဂလေ့ကျင့်တာ

စိတ်ဖိစီးမှုကို ပြေလျော့စေတယ်
စိုးရိမ်စိတ် လျော့ပါးစေတယ်
အခြား စိတ်ကျန်းမာရေးပြဿနာတွေကို ပြေလျော့စေတယ်
မကြာခဏ ခေါင်းကိုက်တာကို သက်သာစေတယ်
ခေါင်းကိုက်တာကို ကာလတိုစေတယ်
တင်းအားကြောင့်ဖြစ်တဲ့ ခေါင်းကိုက်တာကို သက်သာစေတယ်။

ယောဂက ခေါင်းတစ်ခြမ်းကိုက်တာကို သက်သာစေနိုင်တယ်ဆိုပေမယ့် လူတစ်ယောက်နဲ့ တစ်ယောက်တော့ ကွာခြားနိုင်ပါတယ်။

ဘာတွေကြောင့် ခေါင်းတစ်ခြမ်း ကိုက်ရတာလဲ

ခေါင်းတစ်ခြမ်းကိုက်တာကို ဖြစ်စေတဲ့ အကြောင်းအရင်းက အတိအကျ မရှိပါဘူး။ ဒါပေမဲ့ ပိုဆိုးစေတဲ့ အချက်တွေကတော့

စိတ်ဖိစီးတာ
အိပ်ရေးပျက်တာ
ချောကလက်
အရက်
သောက်သုံးနေရတဲ့ ဆေးဝါးအချို့ကြောင့် ခဏခဏ ပြန်ဖြစ်တတ်ပါတယ်။

ယောဂက ခေါင်းတစ်ခြမ်းကိုက်တာကို သက်သာစေဖို့ ယောဂက ဘယ်လို ကာကွယ်ပေးသလဲ

ယောဂရဲ့ စိတ်ပိုင်းဆိုင်ရာ နဲ့ ရုပ်ပိုင်းဆိုင်ရာ ကျန်းမာရေး အကျိုးကျေးဇူးတွေက ခေါင်းတစ်ခြမ်း မကိုက်အောင် ကာကွယ်ပေးပါတယ်။ ဘယ်လိုကာကွယ်ပေးသလဲဆိုတော့

စိတ်ဖိစီးမှု ပြေလျော့စေတယ်
စိတ်ဖိစီးစေနိုင်တဲ့ အခြေအနေတွေကို ထိန်းညှိပေးနိုင်တယ်
အိပ်ရေးဝစေတယ်
ကိုယ်အလေးချိန် ထိန်းညှိပေးတယ်။

ခေါင်းတစ်ခြမ်းကိုက်တာကို သက်သာစေမယ့် ယောဂပို့စ်

ယောဂ လေ့ကျင့်ပေးတာက အာရုံကြောစနစ်ကို အနားရစေပြီး ခေါင်းတစ်ခြမ်း ကိုက်တာကို သိသိသာသာ သက်သာစေနိုင်ပါတယ်။ ခေါင်းတစ်ခြမ်းကိုက်တာကို သက်သာစေမယ့် ယောဂပို့စ် ဘာတွေများ ဖြစ်မလဲဆိုတာကို အတူတူ ဆက်ကြည့်လိုက်ရအောင်နော်။

Child’s pose

ဒီယောဂပို့စ်အတွက်

ခြေထောက်နှစ်ခုကို ဒူးတုပ်ပြီး ထိုင်ပါ။
ခြေဖနောင်နဲ့ ဒူးပေါ်မှာ တင်ပါးကို ထားပြီး ထိုင်ပါ။
လက်နှစ်ဖက်ကို ရှေ့ဆန့်ထုတ်ပြီး ခန္ဓာကိုယ်ကိုရော လက်နှစ်ဖက်ကိုပါ ကြမ်းပြင်နဲ့ ထိအောင် ဝပ်ချလိုက်ပါ။
ခဏလောက်နေပြီး ခန္ဓာကိုယ်ကို ပြန်မတ်ပါ။

Corpse pose

ဒီယောဂပို့စ်အတွက်

အခင်းပြားပေါ်မှာ ခန္ဓာကိုယ်ကို သက်သောင့်သက်သာ အနေအထားဖြစ်အောင် လှဲပါ။
ခြေထောက်ကို ခွာထားပြီး ဆန့်ထားပါ။
လက်ကိုလည်း ဖြန့်ပြီး ခန္ဓာကိုယ်ရဲ့ ဘေးတစ်ဖက်တစ်ချက်မှာ ဆန့်ထားပါ။
ဒီလို နေနေစဉ်မှာ အသက်ကို မှန်မှန်ရှူပြီး အတွေးတွေကို အနားပေးထားပါ။

Bridge pose variation

ဒီယောဂပို့စ်အတွက်

အခင်းပြားပေါ်မှာ ပက်လက်အနေအထားလှဲလိုက်ပါ။
ပြီးရင် ခြေထောက်ကို အခင်းပြားပေါ်မှာ ခြေပြားချလိုက်ပါ။
နောက်တစ်ဆင့်အနေနဲ့ ခြေထောက်ကို ထောင့်မှန်ပုံရအောင် ဒူးကွေးပါ။
တင်ပဆုံကို အပေါ်ဘက်ကို မတင်ပါ။ နိုင်သလောက်ပဲ မတင်ပေးပါ။ စက္ကန့် ၂၀ ကြာအောင် ထားပေးပါ။

Breathing (အသက်ရှူ လေ့ကျင့်ခန်း)

ဒီယောဂပို့စ်အတွက်

ထိုင်လျက် လုပ်ပေးလို့ရသလို လှဲနေရက်နဲ့လည်း လုပ်ပေးလို့ ရပါတယ်။
အသက်ကို ချက်အထိရောက်အောင် ရှူသွင်း ရှူထုတ် လုပ်ပါ။
ဒီလို ရှူသွင်းရှူထုတ် လုပ်နေချိန်မှာ အသက်ရှူတဲ့အပေါ်မှာပဲ အာရုံစိုက်ထားပါ။
မျက်လုံးမှိတ်ထားပေးဖို့ မမေ့ပါနဲ့။

ဦးနှောက်ဆီကို အောက်ဆီဂျင်ရောက်ရှိတာက ဟော်မုန်းမညီမျှမှုကြောင့် ဖြစ်တဲ့ ခေါင်းကိုက်တာကို သက်သာစေနိုင်ပါတယ်။

Standing forward fold pose

ဒီယောဂပို့စ်အတွက်

တင်ပါးအကျယ်အတိုင်း မတ်မတ်ရပ်ပါ
လက်နှစ်ဖက်ကို ဆန့်တန်းပြီး ခန္ဓာကိုယ်ကို ရှေ့ကို ကိုင်းချပါ။
ကွေးနိုင်သမျှ ကွေးချပါ။ ခန္ဓာကိုယ်ကို သက်တောင့်သက်သာ အနေအထား ဖြစ်တဲ့အထိ ကွေးချလိုက်ပါ။
လက်ဖျားတွေကို ခြေမထိပ်နဲ့ ထိနိုင်မယ်ဆိုရင် ထိပါ။

စာဖတ်ပရိသတ်ကြီးအတွက် အမှာစကား

ခေါင်းတစ်ခြမ်းကိုက်တာကို သက်သာစေဖို့ လေ့ကျင့်ခန်း လုပ်တော့မယ်ဆိုရင် ဘေးကင်းရေးကို အဓိက ထားစေချင်ပါတယ်။

မိမိ တတ်နိုင်သမျှပဲ လုပ်ပါ
စလုပ်စမှာ ပြင်းပြင်းထန်ထန် လုပ်တာမျိုး မလုပ်ပါနဲ့
ယောဂဆရာက ပြောပြသင်ပေးတဲ့အတိုင်း လုပ်ပါ။